21
Jun-2016

أحسن خطة سفر لأمريكا – أجازة اسبوعين

Best USA Trips

بعد ما لفيت امريكا لمدة حوالي ٦٠ يوم بالعربية من شرقها لغربها، و سجلت معظمها فيديوهات، هبتدي أعمل شوية مقالات فيها نصائح مختلفة علشان زيارة أمريكا. هبتدي النهاردة باقتراحاتي لخطة السفر لامريكاItinerary، لاكتر حاجات قد تكون سياحية بالنسبة لينا. في اعتقادي ان أحلى منطقتين في امريكا ممكن تزورهم في اجازة مدتها حوالي اسبوعين:

– الشاطئ الشرقي: نيويورك، ميامي، اورلاندو (ممكن كمان نيواورليانز)

– الشاطئ الغربي: لاس فيجاس، سان فرانسيسكو، لوس انجلوس (ممكن كمان جراند كانيون)

اولا تذكرة الطيران:

مفيش اي طيران مباشر بين مصر وامريكا الا على مصرللطيران: القاهرة-نيويورك فقط. في حدود ال٧٠٠ – ٧٥٠ دولار في شهر نوفمبر مثلا. لو انت عايز تزور اكتر من مكان في أمريكا، يبقى لازم تستعد لرحلة ترانزيت طويلة شوية.

اقترح عليك انك تشتري تذكرة multi-destination . لانها هتكون موفرة في الوقت والمجهود والفلوس. يعني تسافر القاهرة-نيويورك وترجع ميامي-القاهرة مثلا. او تسافر القاهرة-سان فرانسيسكو – وترجع لاس فيجاس- القاهرة. يبقى علشان تشتري تذكرتك، لازم تقرر هتبتدي رحلتك فين وتنهيها فين. 

(استخدم خاصية multi-city على أكثر من موقع بحث (Skyscanner و Kayak و Expedia) علشان تلاقي تذاكر طيران كتيرة – وتصفح المدونة بتاعتي الي فيها نصايح كتير اوي بخصوص تذاكر الطيران)

١) الجانب الغربي:

هتلاقي ارخص شركة طيران بتغطي الشاطئ الغربي لامريكا من القاهرة هي British Airways، وبعمل ترانزيت مرة واحدة في مطار هيثرو – لندن. كل رحلة بتكون في حدود ال١٨ ساعة بالترانزيت.

لو جربت تدور في شهر ١١ مثلا، تذكرة ذهاب: القاهرة – لاس فيجاس، وتذكرة عودة: سان فرانسيسكو – القاهرة (او العكس) هتلاقي التذكرة في حدود ٧٥٠ دولار 

لازم تكون عارف انت مسافر بكام شنطة سفر، لان سياسة الشنط بتختلف من شركة طيران للأخرى. البريطانية مثلا بتسمح بشنطة سفر واحدة.

٢) الجانب الشرقي:

هتلاقي طيران الايطالية والقطرية ارخص شوية من طيران British Airlines على الجانب الشرقي، بس ساعات طيران اول. لو جربت تدور في شهر ١١ مثلا، تذكرة ذهاب: القاهرة – نيويورك، وتذكرة عودة ميامي – القاهرة، هتكون التذكرة   في حدود ٦٤٠ – ٦٨٠ دولار، ولكن البريطانية هتكون في حدود ٧٠٠ دولار.

افكركوا تاني، المقارنة مش بتكون على اساس السعر فقط. في حاجات مهمة زي مواعيد الاقلاع الوصول، مدة الرحلة، عدد الشنط المسموحة واوزانها. قارن بين كل الكلام ده. ممكن تلاقي تذكرة اغلى ٢٠ دولار، و٦ ساعات اقصر. ممكن تلاقي رحلة بتسمح بشنطتين سفر بس اطول ٥ ساعات في المدة. اعمل تباديل وتوافيق لحد ما تلاقي التذكرة المناسبة لاحتياجاتك من جميع الزوايا المختلفة.

نصيحة انك تسافر خفيف علشان الطيران بالشنط الكتيرة في امريكا مكلف.

ثانيا خط سير الرحلة:

   ١) الشاطئ الغربي:

– ابدأ من مدينة سان فرانسيسكو، هتحتاج منك ٣-٤ أيام بالكتير

– بعد كدة توجه جنوبا الى لوس انجلوس ٤ أيام – اتوبيس ٧ ساعات – تذكرة ١٠-٢٠ دولار

– بعد كدة لاس فيجاس ٤ أيام بالكتير (لازم تكون هناك خلال الويك اند) – اتوبيس  ٥ساعات – تذكرة ٢٠-٣٠ دولار

– اقترح عليك تأجر عربية لمدة اسبوع بحوالي ٢٠٠ دولار. بعد ما تنتهي من زيارة سان فرانسيسكو، أجر العربية واعمل بيها  Road Trip على الشاطئ الغربي. هتكون حلوة جدا. طريق كاليفورنيا ١ احلى طريق شوفته في امريكا. ممكن تبات ليلة في النص كمان في Big Sur – فنادق كتير موجودة …. بين الغابات والجبال. 

لما توصل لوس انجلوس هتكتشف انها كبيرة والعربية فيها هتكون افضل الحلول. للتنقل بين شواطئها واحيائها البعيدة عن بعضها. خلص لوس انجلوس وكل الحاجات الي حواليها في اربع ايام (سانتا بربرا ، سانتا مونيكا، فينيس، هوليوود، وفيها ديزني لاند كمان). اطلع على لاس فيجاس بعد كدة ولما توصل رجع العربية لانك مش هتكون محتاجها اوي داخل المدينة.

ـ الجراند كانيون

علشان تكون زيارتك لامريكا مختلفة ومتنوعة، لو معرفتش تطول رحلتك يومين كمان، حاول تقصر ايام اقامتك في كل مدينة وتحاول تزور الجراند كانيون يومين وليلة فقط. يعني سان فرانسيسكو ٣ ايام، يوم على طريق كاليفورنيا ١، وبعد كدة ٣ ايام لوس انجلوس، ٣ ايام لاس فيجاس، وبعد كدة يومين الجراند كانيون. (ساعتها اشتري تذكرة الرجوع فينيكس- القاهرة و ترجع العربية هناك في مدينة فينيكس)

٢) الشاطئ الشرقي:

– هتبدأ من مدينة نيويورك طبعا. هتحتاج فيها على الاقل ٥ ايام

– طيران الي مدينة ميامي، فلوريدا في حدود ١٠٠ – ١٢٠ دولار (handbag) + ٣٥ دولار للشنطة- 

– اقترح عليك تأجر عربية لمدة اسبوع مثلا بحوالي ١٥٠-٢٠٠ دولار في الاسبوع وتعمل Road Trip  حول فلوريدا. في مدن كتيرة حلوة ممكن تشوفها. Key West, Tampa, Orlando, Hollywood

– لو مش عايز الاقتراح ده، يبقى ممكن تقضي الاسبوع كله في ميامي. فيها حاجات كتيرة تتعمل. 

– اورلاندو لا انصح بزيارتها الا للعائلات، علشان ما فيهاش حاجة غير مدن ملاهي. غالية طبعا، مش اقل من ٩٠-١٠٠ دولار في اليوم للفرد. الشباب الي عايز ملاهي يبقى يروحها في اي حتة تانية.

– نيواورليانز

لو معاك شوية وقت و فلوس كمان، ممكن تزور نيواورليانز ٣ ايام قبل فلوريدا، لانها مدينة حلوة جدا وتستحق الزيارة. علشان المسافات بعيدة شوية في الجانب الشرقي، هتكون مضطر تسافر طيران ومن غير شنط كتير.

اشتري تذكرة طيران multi-destination من احد المواقع و تكون كالآتي:

New York – New Orleans     +     New Orleans – Miami

التذكرة هتكون في حدود ٢٢٠ دولار (+ حوالي ٣٥ للشنطة في كل رحلة). التذكرة هتكون ارخص لو اشتريت التذكرتين مع بعض من شركة واحدة في طلعة واحدة. بدل ما تشتري كل تذكرة لوحدها.

(يبقى نيويورك ٥ ايام، نيواورليانز ٣ ايام، ميامي ٥ ايام)

ثالثا، ايجار العربية والبنزين:

لما تكون مع واحد او اتنين من صحابك، تأجير العربية هيكون اختيار موفق جدا، علشان هتتشاركوا في المصاريف. الالف كيلو سواقة كان بيكلف حوالي ٣٥-٤٠ دولار بنزين. هتديكوا حرية اكبر في الحركة والفسحة.  استخدم موقع rome2rio علشان تعرف المسافات كام كيلو بين كل مدينة والتانية وكمان هيقولك هتاخد وقت قد ايه. الموقع بيحسب تكلفة البنزين، بس من الواقع، هو اسعاره مبالغ فيها. 

المواصلات العامة الداخلية في المدن الكبرى زي نيويورك، ميامي، لاس فيجاس، سان فرانسيسكو حلوة جدا ومغطية كل حتة، والتكلفة هتكون ٣٠-٥٠ دولار في الاسبوع مثلا. (تذكرة اسبوعية او يومية). Uber طبعا موجود في كل مكان، وساعات بيكون اسهل، خصوصا لو هتتشاركوا فيه كمجموعة.

تأجير العربية يكون خارج المدن الكبيرة علشان مشاكل المواصلات والركنة. موضوع مزعج ومكلف. استخدام Google Maps (او تطبيقات تانية كتير) بيخلي السواقة سهلة جدا في امريكا. محطات البنزين في كل مكان وممكن تشوفها على الخريطة طبعا. لو اتفرجت على فيديوهات رحلتي هتعرف تفاصل دقيقة كتير جدا.

رابعا التسوق:

لو عايز تعمل شوبينج وانت في امريكا، اعمله في اخر مدينة انت هترجع منها على بلدك. اشتري شنطة سفر في الشوبينج بتاعك واملاها مشتريات وارجع بيها من هناك. ليه؟ اولا علشان لما تكون مسافر بالطيارة داخل امريكا، ما تدفعش فلوس على شنطة سفر زيادة. ثانيا علشان لو مأجر عربية ومعاك واحد صاحبك او اكتر، يكون معاكوا مكان للشنط في العربية. ثالثا، اسهل في الحركة طبعا واسرع.

انتظروا المقالات القادمة هتكون بخصوص مصاريف المعيشة اليومية والتليفون والاقامة بشكل عام في امريكا، وهعمل كمان مقالات بخصوص كل مدينة مهمة.

6

 likes / 2 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec