27
Jul-2017

دليلك السريع لساعات الترانزيت في اثينا

اليونان   /   Tags: ,

شركة طيران اليونانية تعتبر من اكتر شركات الطيران المنافسة في اوروبا. اي حد مسافر اوروبا من القاهرة او اسكندرية، دائما هيلاقي طيران اليونانية بيقدم اسعار منافسة جدا. المقالة دي هقولكم ازاي تستفيدوا من ساعات الترانزيت بتاعتكم في اثينا احسن واسرع استفادة.

طيران الترانزيت

يعني ايه طيران اليونانية؟ يعني بكل تأكيد هتركب طيارتك الاولى وتتجه الى اليونان تعمل ترانزيت في عاصمتها اثينا قبل ما تركب طيارتك التانية الى وجهتك النهائية. اقرا المقالة المهمة دي عن طيران الترانزيت علشان مش تعمل اي خطأ وانت بتركب ترانزيت.

ساعات انتظار طويلة، نعمة احيانا

للاسف طيران الترانزيت الارخص دائما بيكون ليه تكلفة اخرى، الا وهي ساعات انتظار طويلة في مطار الترانزيت. لو كانت ساعات الانتظار طويلة اوي، ممكن ساعتها تكون محظوظ وتزور مدينة الترانزيت، اثينا مثلا، بدون مصاريف طيران اضافية.

محتاج تاشيرة ترانزيت؟

– اذا كنت مسافر اي بلد غير شنجن، الترانزيت في مطار اثينا لا يحتاج الي تاشيرة شنجن. بامكانك الإنتظار في المطار براحتك حتى ميعاد طيارتك القادمة، ولكن لا يمكنك مغادرة صالة المطار.

– اذا كنت مسافر اي بلد شنجن، بتعدي اولا على الجوازت للحصول على ختم دخول اليونان. بعدها تتوجه الي صالة المغادرة لركوب طيارتك الثانية او الخروج من المطار لقضاء ساعات الترانزيت في المدينة.

مترو من المطار الى وسط البلد

ساعات الترانزيت المناسبة

لو الترانزيت بتاعك اقل من ٦ ساعات، يبقى خليك في المطار احسن علشان لا تاخذ اي مخاطرة. لانك هتحتاج اكتر من ٨ ساعات علشان تخرج وتعمل اي حاجة مفيدة في اثينا. اشمعنى ٦ ساعات يعني؟

– الخروج من الطيارة والجوازات – ٦٠ دقيقة

– ايجاد مكان لحفظ شنطة الهاند باج Lockers وايجاد محطة المترو M3  – ٣٠ دقيقة

– الطريق من المطار الى وسط البلد يحتاج الى ٤٥ دقيقة (محطة Monastiraki)

– العودة من وسط البلد الى المطار يحتاج الى ٤٥ دقيقة اخرى

– التواجد في المطار قبل ميعاد الطيارة الثانية على الاقل ب٩٠ دقيقة

– وقت احتياطي للطوارئ – ٩٠ دقيقة اخرى – بلاش مخاطرة!

يعني المجموع حوالي ٦ ساعات. يعني لو الترانزيت بتاعك ٩ ساعات، هيكون معاك ٣ ساعات تزور وسط بلد اثينا سريعا. تتغدى اكلة يونانية حلوة وترجع تاني.

اهم حاجة تشوفها في اثينا

طبعا اهم حاجة تشوفها في اثينا هي قلعة الاكروبوليس، والي فوقها معبد “بارثينون” الشهير. القلعة مبنية على هضبة عالية جدا وممكن رؤيتها من جميع انحاء اثينا زي ما ممكن روئية اهرامات الجيزة من بعيد كدة.

اقرب محطة مترو الى الاكروبوليس على خط مترو M3  هيMonastiraki. اتمشى في الميدان وخد صور حلوة (٣٠ دقيقة) وبعدين اطلع سلالم الاكروبوليس في ٢٠ دقيقة علشان توصل للمدخل. التذكرة ٢٠ يورو وممكن تزور بيها حاجات تانية في اثينا. ممكن تحتاج ساعة فوق علشان تشوف المكان سريعا وبعدين تنزل في ٢٠ دقيقة تانيين. اتمشى في الشوارع الي حول محطة المترو. هتلاقيها مليانة مطاعم حلوة. اتغدى واشتري سوفونير وارجع المحطة تاني واطلع على المطار.

محطة المترو “مونستراكي” قادما من المطار

اقعد كام يوم في اثينا؟

لو حبيت تعمل ترانزيت طويل في اثينا (ممكن طلبه من شركة الطيران مباشرة) – او لو حبيت تزور اليونان وتقعد في اثينا شوية، يبقى اخرك فيها يومين بالكتير:

– انصحك تشتري تذكرة اتوبيس Hop On Hop Off لانه ب١٣ يورو فقط لمدة يومين. من ارخص الاسعار الي شوفتها في حياتي لخدمة الاتوبيس السياحي ده. هتشوف بيه كل حاجات اثينا وقرر ساعاها تدفع تذكرة دخول ولا لأ.

– آثينا مليانة اثار يونانية كتيرة ومتاحف اكتر. لو انت من عشاق التاريخ هتتبسط فيها. شوف اللينك ده فيه نصائح حلوة لجميع زيارات أثينا.

– مش عايزك تتخض من شوارع وسط البلد علشان هتلاقيها قبيحة بصراحة. تحس انك ماشي في بورسعيد او اسكندرية في التسعينات مثلا.

– ينتشر في شوارع اثينا مهاجرين من كل انحاء الارض، اوروبا اسيا افريقيا والوطن العربي.

– ميناء بيريوس جميل للزيارة، وفيها محلات مأكولات بحرية باسعار معقولة. اخر محطة على مترو M1

– عدي على البرلمان اليوناني وشوف الحرس بتاعه وهم بيغيروا الوردية بتاعتهم ولابسين اللبس اليوناني الوطني بتاع الجيش. شوف الفيديو ده.

رحلة ترانزيت سعيدة

5

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec