16
Jul-2017

ازاي تحجز تذاكر المراكب بين الجزر اليونانية

اليونان   /  

رحلة الى اليونان لا تكتمل بكل تأكيد الا بزيارة الجزر اليونانية المنتشرة في بحر ايجة، وخصوصا ان اثينا لا تتحمل الزيارة اكتر من يومين اتنين. خلال رحلتي القصيرة في اليونان، استخدمت مواقع كتير جدا علشان الاقي واحجز تذاكر الباخرات والمراكب الي بتربط بين الجزر اليونانية المختلفة.

محركات البحث  Ferries

الموضوع في البحث عن Ferries مختلف شوية لان اغلب المواقع بتطلب البحث باسم الميناء وليس باسم المدينة او الجزيرة، والي ممكن تحتوي على ٣ موانئ مثل اثينا. علشان كدة لقيت موقع ممكن البحث عليه باسم المدينة ونتائج البحث بتاعته بتكون لكل شركات المراكب والبواخر المتتوفرة >>>>  Fantastic Greece  او موقع تاني اسمه Greeka

اسعار التذاكر

تختلف تذاكر المراكب عن تذاكر الطيران في اكتر من حاجة:

١- بعكس تذاكر الطيران، اسعار التذاكر لا تختلف لو اشتريتها اتجاه واحد one way او رايح جاي round ticket. اشتري تذكرة راي-راجع لما تكون متأكد من برنامج رحلتك. او اشتريها اتجاه واحد يمكن تغير رأيك لما توصل الجزيرة وتقرر تمد يومين تلاتة او تقرر تسيبها بدري وتروح جزيرة تانية.

٢- هتلاقي فروقات الاسعار كبيرة احيانا بين شركات المراكب المختلفة، لانه بيعتمد على كبر حجم المركب وسرعتها ووسائل الراحة فيها و درجة التذكرة. ولكن الاكيد ان سعر تذكرة المركب من الموقعين دول او من مكتب التذاكر في الميناء كلها واحدة.

٣- الاسعار لا تتغير بتوقيت شرائها. لو اشتريت التذكرة قبلها بشهرين، سعرها هيكون نفس السعر لو اشتريتها يوم الركوب الصبح. قد تختلف الاسعار بين يوم والاخر اختلافات بسيطة، لكن في الاغلب الاسعار ثابتة طوال ايام الاسبوع.

٤- لازم التذكرة تكون مصدرة ورقية – يعني ما ينفعش تكون تذكرة رقمية على الايميل زي تذاكر الطيران. علشان كدة مواقع الحجز بتديك الاختيار انك تستلمها من “كشك” الشركة في الميناء او ارسالها بالبريد.

٥- لو معاك عربية او موتوسيكل، ممكن تحجز ليها تذكرة معاك على المركب. تذكرة العربية في حدود ال٦٠ يورو مثلا. المركب اصلا ضخمة جدا وتستوعب عربيات نقل واتوبيسات كمان 🙂

مصاريف التذاكر

زي ما قولت قبل كدة، اسعار التذاكر واحدة على الموقعين دول او من شباك التذاكر مباشرة في الميناء، ولكن المواقع الالكترونية دي بتاخد مصاريف اصدار تذكرة service fees حوالي ٧ او ٨ يورو – ولازم تاخد التذكرة من شباك التذاكر في الميناء او يشحنوها ليك بالبريد بفلوس كتير. علشان كدة نصيحتي ليك، لا تشتري من هذه المواقع واشتري مباشرة شباك التذاكر من الميناء قبل السفر بساعة على اقصى حد.

توفر التذاكر

تذاكر المراكب داااااائما متوفرة في اي وقت. ممكن شرائها اونلاين قبل السفر بشهر او مباشرة من الميناء يوم السفر صباحا. انا ركبت مراكب كتير بين اكتر من جزيرة يونانية. احجامها ضخمة جدا وقدرتها الاستيعابية كبيرة ودائما فيها مكان. اثناء رحلتي في شهر مايو، قررت امشي من جزيرة ميكونوس يوم بدري. توجهت على الميناء قبل ميعاد المغادرة بنص ساعة واشتريت تذكرة وركبت. كنت عارف مواعيد الرحلات من الموقع طبعا.

جرب دلوقتي وانت بتقرأ المقالة، ادخل على الموقع وشوف تذاكر لمراكب بكرة بين اي مكانين، اكيد هتلاقي تذاكر متوفرة.

المراكب ضخمة جدا ودااااائما فيها اماكن

وقت الرحلة والترانزيت

شركات المراكب كتيرة وانواعها اكتر. في منها مراكب سريعة واخرى بطيئة. مراكب مباشرة بدون توقف واخرى بتعمل توقفات في جزر اخرى. لما دورت على رحلة مركب للذهاب الى اثينا من ميكونوس، وجدت مركب بتاخد المسافة في ساعتين مثلا، ومراكب تانية بتاخدها في ٥ ساعات (ارخص عادة). المركب البطيئة بتاخد وقت اطول لانها بتتوقف في الطريق في بعض الجزر الاخرى، تنزل ناس وتركب ناس تانية. لازم تكون مركز علشان بعد ما توصل الجزيرة بتاعتك، المركب هتقف ٥ دقايق تنزل وتركب وتكمل على الجزيرة الي بعدها. خد بالك علشان مش تكمل رحلتك على جزيرة غلط.

لحظة انتظار الركاب لفتح باب السفينة للنزول

اختيار ميناء اثينا

العاصمة اثينا فيها ٣ موانئ:

١) اكبر ميناء في اثينا هو “بيريوس Piraeus” ويبعد عن وسط المدينة حوالي ١٠ كم. الوصول اليه ممكن بالمترو الاخضر في اقل من نصف ساعة من محطة Monastiraki، اشهر محطات وسط المدينة.

٢) ثاني اكبر ميناء في اثينا هو “رافينا Rafina” يبعد حوالي ٣٠ كم. الوصول اليه ممكن باتوبيس (٢.٥ يورو) بيتحرك كل ساعة من محطة اسمها Pedion Areos في قلب العاصمة اثينا، ولكن بياخد حولي ٧٠ دقيقة او اكتر، على حسب الزحام.

٣) ابعد ميناء عن العاصمة اثينا هو ميناء “لافريو Lavrio”، والي يبعد حوالي ٦٠ كم ويحتاج حوالي ساعتين للوصول اليه. مش هتلاقي فيه مراكب الا للجزر القريبة اوي من اثيناء.

هتلاقي اغلب الاختيارات بين اول مينائين. لو فرق السعر بين ميناء بيريوس وميناء رافينا مش كبير، يبقى خليك في الميناء الاقرب والسهل الوصول ليه بالمترو، بيريوس.

مراكب ولا طيران ؟

يبقى السؤال الاخير هنا، هل في طيران الى الجزر اليونانية؟ …. نعم! اغلب الجزر اليونانية المشهورة والكبيرة فيها مطارات. شركات طيران اقتصادي كثيرة عندها رحلات من اثينا الى جزر يونانية كثيرة والمشوار اقل من ٦٠ دقيقة من اثينا الى اي جزيرة. لكن ٥ اسباب هيخلوك تفضل المراكب عن الطيران:

١- المراكب ارخص من الطيران. فرق السعر ممكن يكون من ٢٠ يورو الى ٥٠ يورو. لو وقتك ضيق جدا جدا، خد طيران وهتوصل اسرع. قارن بين الاسعار وخد قرارك.

٢- الشنط المسموحة على المركب بدون وزن او عدد، غير الطيارة طبعا محكوم بعدد محدد من الشنط ووزن محدد. لو مسافر خفيف خفيف، مستعجل، معاك فلوس اكتر، سافر طيران. معاك شنط ووزن كتير، سافر مركب.

٣- الجزر اليونانية — الجزررررر — يعني بحر وشواطئ ومراكب وسفن وعبارات وطبيعة مش هتشوف زيها. تجربة الرحلة البحرية تجربة تستحق التجربة بصراحة.

٤- المراكب كبيرة و مريحة جدا . تحس انك خارج في مول فيها محلات ومطاعم وكافيهات. هتكون جزء مسلي وممتع جدا في رحلتك وعمرك ما هتنساه.

٥- لو هتنتقل من جزيرة الى اخرى، مفيش طيران مباشر. المراكب هى افضل وسيلة. الطيران الموجود ساعتها هيكون طيران ترانزيت في اثينا وكده الرحلة هتكون اغلى واطول واتعب.

انتظروا مقالات عن بعض النصائح لليونان وعاصمتها اثينا والجزيرة الوحيدة الي زورتها فيها، ميكونوس.

5

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec