19
Jul-2017

ازاي تروح “بحرا” من تركيا لليونان ب٢٠ يورو

اليونان   /  

تعرف ان اليونان تبعد عن تركيا اقل من ١٥ كم بحرا ؟؟

لو فكرت تعمل رحلة حلوة ومختلفة في البحر المتوسط، ارشح ليك تعمل تركيا واليونان مع بعض في رحلة واحدة. المقالة دي هتقولك ازاي تروح فين ومنين وازاي.

ملحوظة قبل ما نكمل بس: تأشيرة اليونان هي تأشيرة الشنجن الاوروبية. يعني لو معاك شنجن من اليونان اواي دولة اوروبية تقدر تدخل بيها الجزر اليونانية. المقالة دي هتعلمك الطريقة الصحيحة علشان تاخد تاشيرة الشنجن.

تاريخ جزر اليونان

ايام مجد الدولة العثمانية، كانت اليونان وبحر ايجه جزئاً منها حتى اوائل القرن التاسع عشر عندما استقلت سنة ١٨٣٢. بعد عقود وعقود من الصراحات والحروب بين البلدين، والي انتهت ١٩٢٣، اتفقوا على ان جميع جزر بحر ايجه اراضي يونانية. هتلاقي جزيرة مثلا تبعد عن السواحل التركية ١٥ كم مثلا،ولكنها يونانية بالرغم من بعدها عن الاراضي اليونانية باكتر من ٢٠٠ كم.

السبب الرئيسي ان اغلب سكان هذه الجزر كانوا اليونانيين، وفضل الاتراك طول عمرهم الاقامة في اراضي الاناضول. كان هناك ملايين من اليونانيين يعيشون في تركيا وملايين اقل من الاتراك يعيشون في اليونان. بعد انتهاء الحرب بين البلدين، تم توقيع اتفاقية تبادل سكانية للحد من العنف الطائفي والعرقي ضد الاقليات في البلدين.

شوفوا الخريطة دي وهتلاقوا كل الجزر غرب السواحل التركية تابعة لليونان:

اشهر الجزر اليونانية

طبعا اشهر الجزر اليونانية للزيارة، من وجهة نظرنا كمصريين، هم ميكونوس وسانتوريني ورودس وكريت. لما قررت اروح اليونان بحرا من تركيا، دورت على مراكب توديني الى ميكونوس تحديدا، حيث انها اشهر جزيرة بالحفلات والنايت لايف والشواطئ المجنونة. لم افكر في جزيرة سانتوريني المشهورة ايضا، لانها وجهة مشهورة لشهر العسل اكتر. حيث الاجواء رومانسية زيادة عن اللزوم.

ملحوظة: جزيرة كريت بعيدة بالمركب وقد يكون الذهاب اليها طيران اسهل وارخص!

وقبرص طيب؟

هيطلع حد يسألني عن جزيرة قبرص؟؟ احب اوضح ان جزيرة قبرص لا تتبع اليونان وليها تاشيرة منفصلة ومقسومة دولتين اصلا في نفس الجزيرة. هتكلم عليها في مقالة منفصلة لما ازورها قريبا.

مراكب مباشرة ولا ترانزيت؟

طيب هل في مراكب من تركيا مباشرة الى جزيرة ميكونوس مثلا؟ للأسف لا يوجد مراكب مباشرة، لازم تروح ترانزيت!

الذهاب برا وبعدين بحرا

تنتشر على سواحل تركيا الجنوبية والغربية الكثير من الموانئ الكبيرة والصغيرة الي بتعمل رحلات بحرية الى الجزر اليونانية القريبة منها. بعضهم كمان بيعملوا رحلة يوم واحد لزيارة الجزيرة صباحاً والعودة مساءً. بعد التفحيص والتمحيص في الكثير من الخرائط ومواقع المراكب، وجدت ان افضل وارخص طريقة للذهاب  من تركيا الى الجزر اليونانية المشهورة هتنقسم الى شقين …. واحد بري والتاني بحري …. ازاي يعني؟

١- الجزء البري

اول حاجة لازم تعملها بعد ما تحدد انت عايز تروح انهي جزيرة في اليونان، هي انك تروح علشان تركب من اقرب ميناء لهذه الجزيرة. يعني مش تكون في اسطنبول ولا ازمير وتقولي انا عايز اروح جزيرة رودس بالمركب، او تكون في انطاليا ولا طرابزون وتقولي عايز اروح جزيرة ميكونوس بالمركب. لازم تعرف ما هو اقرب ميناء وتروح ليه بالاتوبيس او الطيارة لو بعيد جدا.

٢- الجزء البحري

بعد ما توصل الى اقرب ميناء تركي علشان تركب المركب وتروح اليونان، للاسف احيانا مش هتلاقي مركب توديك مباشرة الى جزيرتك المنشودة … حلوة “المنشودة” دي ولا اغيرها 🙂 …. غالبا هتكون مضطر تركب مرتين على الاقل.

خريطة لاقرب واشهر الجزر اليونانية واهم الموانئ التركية

الجزر اليونانية والموانئ القريبة

١- جزيرة رودس

اذا اردت الذهاب الى جزيرة رودس بحرا، عليك التوجه برا الي السواحل الجنوبية الغربية من تركيا. عندك مينائين تركيين عندهم مراكب مباشرة الي رودس:

الاول: ميناء مارماريس >٥٢ كم، ٦٠ دقيقة، ٤٠ يورو Marmaris Ferry

الثاني: ميناء فتحية > ٨٥ كم، ٩٠ دقيقة، ٥٠ يورو Fethiye Ferry

٢- جزيرة ميكونوس (تفاصيل اكثر)

حيث ان جزيرة ميكونوس تتوسط بحر ايجة، لن تجد لها مراكب مباشرة من السواحل التركية. لذلك عليك التوجه الى السواحل التركية الغربية، تحديدا مدينة ازمير. بالرغم من انهاء اكبر موانئ تركيا، الا ان الذهاب الى جزر اليونان يتطلب الذهاب الى ميناء اخر بجوارها: ميناء كوشادسي Kuşadası. وصول ميكونوس هيتم على خطوتين هقولكم عليهم بالتفصيل لاني عملت الرحلة بنفسي.

    ٢.١ > وصول ميناء كوشاداسي

علشان توصل مدينة كوشاداسي، هتلاقي اتوبيس من اسطنبول مباشر اليها في ١١ ساعة وسعره في حدود ال١٧ دولار. الحل التاني هو انك تروح ازمير طيران بحوالي ٢٥ دولار، ومنها تروح مدينة كوشاداسي. المقالة دي هتلاقي فبها كل حاجة عن الطيران الداخلي في تركيا والمقالة دي هتلاقي غيها كل حاجة عن الاتوبيسات في تركيا.

    ٢.٢ > من ميناء كوشاداسيKuşadası الى جزيرة ساموس Samos

اذا لم تحجز تذكرتك اونلاين من الموقع ده Barel Travel هتتوجه الى ميناء كوشاداسي وتشتريها مباشرة من الميناء قبلها بساعة (انا عملت كدة). تذكرة الى جزيرة ساموس اليونانية كانت ب٤٠ يورو. كانت مركب صغيرة وسريعة، خدت المشوار في اقل من ساعة ونص. مكاتب تذاكر العبارات موجودة في كل ميناء.

“المعدية” التركية الصغيرة الي ركبتها من كوشاداسي الى ساموس

سطح المركب هو مكان وضع الشنط – بس بيغطوها بمشمع طوال الرحلة

سيلفي مع جزيرة ساموس

٢.٣> من جزيرة ساموس Samos الي جزيرة ميكونوس Mykonos

جزيرة ساموس كبيرة وحلوة واليونانيين بيقولوا عليها من احلى الجزر. منها تقدر تلاقي مراكب اخرى توديك الى ميكونوس وجزر تانية كتير في بحر اليونان (مرورا بميكونوس). نزلت الجزيرة غيرت فلوس في البنك، اتغديت ، واشتريت خط انترنت (٩ جيجا ب١٥ يورو) – وبعدين روحت مكتب شركة مراكب وحجزت تذكرتي الى ميكونوس. بدون حجز مسبق. اعرفوا كل حاجة عن حجز المراكب بين الجزر اليونانية في المقالة المفصلة دي.

مكاتب شركات المراكب موجودة امام الميناء مباشرة

 العبارة الي ركبتها من جزيرة ساموس كانت ضخمة جدا. عربيات واتوبيسات وعربيات نقل واقفة في الميناء ومنتظرة علشان تركبها. اخدنا المشوار الى ميكونوس في حوالي ٥ ساعات وسعر التذكرة كان حوالي ٥٠ يورو. يعني مشوار ساعة ونص ب ٤٠ يورو ومشوار ٥ ساعات ب٥٠ يورو. مفيش اي منطق في الاسعار. بس دي الاسعار للاسف.

العبارة من جزيرة ساموس الى ميكونوس كانت “مول” متحرك

٣- سانتوريني

ليس بالامكان الوصول الى جزيرة سانتوريني ومينائها Thira مباشرة من تركيا. لا بد من العبور بجزيرة “ميكونوس”. يعني لو انت مُصر توصل لحد سانتوريني بالمراكب، رحلتك هتكون طويلة جدا. لانك لازم تتوقف في ميكونوس. ممكن شراء تذكرة من ساموس الى سانتوريني، ولكن في جميع الحالات المركب هتعمل عدة توقفات في الطريق، واهمهم ميكونوس.

٤- جزر يونانية اخرى ممكنة بالمراكب

بالاضافة الى جزيرة رودس كما شرحنا سابقا، بالامكان زيارة جزر يونانية قريبة من السواحل التركية لمدة قصيرة والعودة مرة ثانية الى تركيا:

  •  جزيرة “كوس Kos” ، بالامكان زيارتها من مدينة ” بودروم Bodrum” التركية ب٢٥ يورو.
  • جزيرة “خيوس Chios”، بالامكان زيارتها من مدينة “تشيشمي Çeşme” التركية ب٢٠ يورو.

(جزيرة خيوس من اشهر المقاصد للهجرة الغير شرعية بسبب قربها الشديد للسواحل التركية وعليها مخيمات استقبال وفرز لاجئين، يرسلون المتعلمين منهم الى اوروبا، بينما الاقل تعلما يرسلونهم مرة اخرى الي تركيا او بلادهم. ربنا معاهم)

اجرائات الجوازات

انا كنت سعيد بالرحلة البحرية دي علشان دي كانت اول مرة اعبر فيها حدود بحرية بين دولتين. اجرائات ركوب المركب تشبه اجرائات ركوب الطيارة. تفتيش امني وبعده نقطة الجوازات لختم الجوازات بختم الخروج من تركيا. (قبل شرائك اي تذكرة الى الجزر اليونانية، يقوم موظف شركة المراكب بالتأكد من وجود تاشيرة سفر على باسبورك.)

عند وصول اول جزيرة يونانية، مخرج السفينة بيكون في مكان مقفول في الميناء للتوجه مباشرة الى شباك الجوازات اليونانية لختم دخول اليونان. محدش سألني اي اسئلة (تذكرة عودة، اقامة، فلوس). الاجرائات كانت بسيطة جدا.

لما رجعت اركب من نفس الميناء المركب التانية المتوجهة الى ميكونوس، كان الميناء مفتوح عادي بدون اي اسوار داخله. لانهم كانوا انتهوا من اجرائات دخول الركاب الدوليين. عند ركوب المركب المتجه الى ميكونوس، تم التأكد من تذكرة السفر دون الاطلاع على جواز السفر، لان احنا اصبحنا داخل الاراضي اليونانية. ولكن من حق موظفين المركب طلب الباسبور للاطلاع على تحقيق الشخصية.

جزيرة ميكونوس

الخلاصة

لو عايز تعمل رحلة في تركيا واليونان مع بعض، عندك اكتر من طريقة. طريقة سريعة عن طريق زيارة جزر يونانية قريبة من الساحل التركي لمدة يومين تلاتة مثلا، حلوة ورخيصة في نفس الوقت (رودس، كوس، خيوس، ساموس) . او انك تروح اسبوع مثلا الجزر اليونانية الابعد في اعماق بحر ايجة، والي بعيدة بحرا ٥ ساعات على الاقل. لو عايز الحاجات المشهورة، يبقى جزيرتي ميكونوس وسانتوريني مفيش اختلاف على حلاوتهم،  ولكن غالين جدا جدا. (هعمل مقالة قريب عن تجربتي في ميكونوس). لو عايز الحاجات الاقل شهرة، ولسه حلوين جدا وارخص بكتير، ممكن تروح جزر زي Tinos, Ios, Naxos, Paros. هتلاقي في مقالتي دي دليلك الكامل للوصول الى اي جزيرة يونانية. 

3

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec