08
Oct-2016
Oct-2016
فلورانس في ٢٤ ساعة
بعد ما خلصت زيارة روما في يومين، في حاجات كتيرة اوي ممكن تتعمل وتتشاف في ايطاليا. دلوقتي الدور على احب المدن الايطالية الى قلبي … فلورانس .. مدينة مايكل انجلو ومئات الفنانيين. فلورانس متحف مفتوح في الشوارع … ماتعرفش انت في سنة كام وانت بتتفرج على شوارعها ومبانيها.
بعد ما تخلص المقالة، اتفرج على الفيديو بتاعي في فلورانس
الموصلات
اتوبيسات وقطارات كتيرة جدا من روما الى فلورانس. كل ساعة يمكن. زي القاهرة واسكندرية. ممكن تحجز قبل ما تسافر online من موقع goeuro.com …انا لقيت تذكرة ب٥ يورو فقط من على الموقع ده. جربوه علشان سهل جدا.
لما توصل فلورانس، مش محتاج تركب اي مواصلات، لانها صغيرة وكل حاجة قريبة من بعضها. محطة الاتوبيس او القطر لما بتوصل، ممكن تكون ٥-١٠ دقايق مشي من مكان اقامتك. المنطقة السياحية كلها تتمشي في يوم واحد او يومين، انت ونشاطك. هتحتاج مواصلات علشان تخرج برة فلورانس تعمل رحلة الي بيزا او تشنكو تيري. هقولكم على تفاصيلهم في المقالة الجاية.
الاقامة
المنطقة السياحية في فلورانس صغيرة واغلب اماكن الاقامة موجودة في المنطقة السياحية دي. الهوستلز الرخيصة هتلاقيها جنب محطة القطر. اقل من ٢٠ دولار السرير. لما تفتح خريطة الفنادق في فلورانس، قارنها دائما بالخريطة السياحية علشان تعرف انت بعيد ولا قريب. اختار دائما في المنطقة على يمين النهر.
خريطة المناطق السياحية في فلورانس – هتلاقيها في الهوستل او الفندق بتاعك
هوستلز في حدود ال٢٠ دولار في الليلة او اقل، في وسط المدينة – تقييم متوسط
احجز ليلتين في فلورانس، علشان يوم تقضيه في فلورانس واليوم التاني تطلع برة تكتشف حاجات تانية جنبها حلوة جدا. لو انت من عشاق الفن التشكيلي والمتاحف، يبقى لازم تزود ليلة كمان تالتة. البرنامج السياحي بتاعك في اول ٢٤ساعة دول ممكن يكون كالاتي:
٢٤ ساعة في فلورانس
في الفندق او الهوستل، هتلاقي الخريطة الي فوق دي كبيرة جدا وعليها كل الحاجات الي تقدر تشوفها في المدينة. انا هقولك هنا على اهم الحاجات الي لازم تشوفها واسعارها. المدينة مليانة كنائس وميادين ومتاحف لا تحصى.
اول حاجة هتشوفها اول ما تبدأ جولتك Basilica di San Lorenzo، كنيسة كبيرة جدا وليها ميدان كبير. مش تطول هنا علشان الجاي احلى من كدة.
اول حاجة تتوجه عليها هي Piazza Duomo و تزور الكنيسة والبرج بتاعهم Cathedral of Santa Maria del Fiore، لانك من فوق تقدر تشوف فلورانس كلها. ممكن تطلع الكنيسة او البرج او الاتنين (ارتفاعهم واحد تقريبا)، لو فيك صحة يعني. بس انصحك اطلع البرج فقط علشان تشوف الكنيسة من فوق وتشوف معاها فلورانس كلها. لانك لو طلعت الكنيسة كمان من فوق بعد ما تكون طلعت البرج، مش هتشوف اي حاجة مختلفة غير فلورانس مع البرج، بدلا من فلورانس مع الكنيسة.
مش هتكون عارف انت في سنة كام من المنظر. مفيش اي حاجة تقولك ان احنا في ٢٠١٦ ومفيش حاجة تقولك ان احنا مش في القرن ال١٥ مثلا. تحفة معمارية حضارية. التذكرة ب١٥ يورو، ممكن تدخل بيها ٥ حاجات: البرج، الكنيسة، المعمدية San Giovanni baptistery, و كمان متحف نحت وفيه تحفة فنية من مايكل انجلو.
تمثال مايكل انجلو في المتحف
المزيد من التماثيل في المتحف
فلورانس والكنيسة من اعلى البرج Cathedral of Santa Maria del Fiore
اعلى برج في فلورانس القديمة Cathedral of Santa Maria del Fiore
تاني اهم الحاجات هو قصر اسمه Palazzo Vecchio، من التحف المعمارية المشهورة في فلورانس. تذاكر الدخول للبرج بتاع القصر ٦.٥ يورو، ولو المتحف والبرج ١٠ يورو. بعد الضهر احيانا بيكون الدخول مجاني، شوفوا الجدول ده. الميدان الي فيه القصر اسمه Piazza della Signoria
القصر والبرج Palazzo Vecchio
بعد الميدان ده، هتكمل تمشية لحد ما توصل لنهر “آرنو” الي بيعدي وسط مدينة فلورنس. نهر صغير ومش عريض اوي، لكن مبني عليه شوية كباري تحفة. احلى واحد تشوفه من بعيد هو Ponte Vecchio او الجسر القديم بالايطالي. احلى حاجة عليه المحلات والشبابيك. انا شوفت هناك غروب شمس حلو جدا.
الكوبري الاشهر في فلورانس وايطاليا