09
Oct-2016
Oct-2016
تشنكو تيري ب٣٠ يورو – بالفيديو
رحلات خارج فلورانس
اليوم ده هيكون طويل ومرهق حبتين، بس اوعدك هيكون احلى ايام الرحلة. مكانيين خارج فلورانس وممكن زيارتهم في يوم واحد علشان توفر فلوس كتير. انصحك بعد ما تقرأ المقالة، تتفرج على فيديو الرحلة الي عملت فيه نفس الرحلة دي بالزبط.
١- برج بيزا
محدش ينفع يروح القاهرة من غير ما يتصور مع اهرامات الجيزة، او يروح باريس من غير ما يتصور مع برج ايفيل. ايطاليا كمان كدة، ما ينفعش تروح ايطاليا من غير ما تتصور مع برج بيزا المائل، الاشهر في اوروبا بعد برج ايفيل في باريس.
٢- الخمسة قرى – Cinque Terre
من احلى الاماكن الي مش هتشوفها في حتة تانية زي ايطاليا. خمس قرى جنب بعض على ساحل البحر، بيوت ملونة جميلة مبنية فوق صخور عالية على البحر مباشرة. في شركات سياحة في فلورانس بتعمل رحلات ب٩٠ دولار في اليوم لزيارتهم. لكن انا هقولك ازاي تعملها ارخص من كدة بكتير.
خريطة باسماء الخمس قرى
احلى قرية انا شوفتها منهم كانت Manarola
تأجير عربية
العائق الاكبر في زيارتهم هي المواصلات، لان برج بيزا يقع في مدينة Pisa على بعد حوالي ساعة من فلورانس، والخمس قرى يبعدوا حوالي ساعة ونص من مدينة Pisa.
انا شخصيا لما زورتهم، كنت مأجر عربية انا واصدقائي وقضينا اليوم من اوله لآخره في زيارة المكانين. تأجير عربية ٥-افراد اونلاين ممكن يكون ٣٠-٤٠ يورو في اليوم، والتأمين ممكن يكون ٢٠ يورو كمان، والبنزين كان حوالي ٤٠ يورو، لان المشوار رايح جاي كان حوالي ٤٠٠ كيلومتر. والبنزين في اوروبا حراق شوية – لتر البنزين كان بحوالي ١.٤ يورو.
احنا لما نكون ٥ افراد، ندفع ١٠٠ يورو ونقسمهم على ٥، تبقى ٢٠ يورو كل واحد. ده ارخص طريقة ممكن تعملها.
اصدقاء الرحلة الخمسة
بس المشكلة في تأجير العربية معانا كانت ان شركة التأجير لازم تحجز مبلغ تحت الحساب من credit card بتاعنا علشان لو حصل حادثة او مخالفات. جربوا ١٠ كروت معانا علشان يحجزوا ٣٠٠ يورو، طبعا مفيش ولا كارت اشتغل. المهم، اخدوا ٣٠٠ يورو كاش وحجزوا مبلغ ٥٠ يورو تحت الحساب، بيرجع تاني بعد حوالي اسبوعين. حاول تفاصل في المبلغ الي ياخدوه من الكارت بتاعك. علشان طبعا كلنا معانا كروت مصرية ليها حدود شهرية. اعمل حسابك على الموضوع ده علشان مش تتفاجئ بيه. اتفرج على الفيديو بتاعي بخصوص نصائح تأجير العربيات علشان تعرف كل النصائح اللازمة.
القطار هو الحل
طيب لو انا مسافر لوحدي، او مع واحد صاحبي، او مش بنعرف نسوق، او مش معانا كروت ندفع بيها، او اي حاجة تانية، ممكن نعمل نفس الرحلة ازاي بارخص طريقة؟
انا لقيت ان ارخص طريقة هتكون بالقطارات.انا لقيت الموقع ده حلو جدا لشراء تذاكر القطارات اونلاين مباشرة اسمه Wanderio. وعليه جداول القطارات كلها بين كل المدن الي هقولك عليها دي. ركز كدة في الخطة. هتركب ٥ قطارات من الصبح بدري جدا، علشان تلحق تعمل المكانين في يوم واحد. والله لو بعمل البرنامج ده لبنتي، مش هعمله احسن من كدة 🙂 ….. اقرأ البرنامج كويس، بعدين اتفرج على الفيديو الي عامله في الاخر علشان تعرف ازاي تشتري التذاكر كلها.
خريطة للرحلة وتكلفة تقديرية ليها من موقع Rome2Rio