الدور دلوقتي بقى على البندقية، فينيسيا …. جميلة الجميلات … احلى واعجب مدن ايطاليا والعالم كله. بعد ما تكون اكتشفت روما وفلورانس، دلوقتي الدور على تالت احلى مكان تزوره في ايطاليا.

المواصلات الى فينيسيا

وسائل المواصلات الى فينيسيا كتيرة جدا. من فلورانس مثلا هتلاقي قطارات بتاخدها في ساعتين او خمس ساعات، على حسب نوع القطر وثمنه. التذاكر من ٢٠ الى ٤٠ دولار.  في اتوبيسات كتيرة كمان بتروح في حوالي ٥ ساعات، والتذكرة ارخص كمان، من ١٣- ١٥ دولار.  ادخلوا على موقع goeuro او wanderio علشان تعرفوا تشتروا التذاكر اونلاين.

اتفرجوا على اول يوم ليا في فينيسيا علشان تشوفوا كل حاجة عن ركوب القطارت الايطالية 

الاقامة في فينيسيا

طبعا علشان مدينة بيزورها ملايين السياح سنويا، وهي جزيرة اصلا في المية، اماكن الاقامة داخل جزيرة فينيسيا نفسها غالية جدا جدا. يعني لو بتحلم بقى انك تصحى من النوم تبص من الشباك تلاقي مراكب معدية في قنوات المية وعليها واحد بيغني وكدة، احب اقولك فوق من الحلم الجميل ده علشان عايز ١٠٠ او ٢٠٠ يورو في الليلة.

مدينة فينيسا تنقسم الى قسمين ….  فينيسيا البلد وفينيسيا المحطة 🙂 …. فينيسيا جزء منها في المية، مجموعة الجزر والقنوات الي مبني عليها المدينة، والجزء التاني من المدينة هو Mestre ، الجزء الواقع في البر. الاقامة في Mestre ارخص بكتيييير طبعا من فينيسيا.

انا كنت قاعد في هوستل اسمه PLUS Camping Jolly، يبعد ١٠ كيلو عن وسط جزيرة فينيسيا، علشان كدة سعر الليلة ٩ يورو. مكان اكتر من رائع، نضيف ورخيص، وفيه كل الخدمات الي تحتاجها، ما عدا المطبخ. ده كان عيبه الوحيد.

المواصلات داخل فينيسيا

مشكلة الاقامة في منطقة Mestre هي بعدها عن مدينة فينيسيا الي انا جاي ازورها. القطر من محطة  Mestre الى محطة فينيسيا ١٠ دقائق بالزبط، وسعر التذكرة 1.25 يورو. موقع Wanderio عليه كل المواعيد. احجز التذكرة وانت في المحطة، علشان في قطر كل ١٠ دقايق.

الحل التاني هو Shuttle Bus بتاع الهوستل او الفندق بتاعك. اغلب اماكن الاقامة عندها الخدمة دي. قبل ما تحجز في اي هوستل او فندق، اتأكد ان عندهم الخدمة دي، علشان هتوفر عليك مشاوير من والى محطة القطر. الهوستل الي كنت فيه كان عنده اتوبيس ب٤ يورو رايح جاي، بيتحرك كل ساعم من الصبح بدري، واخر واحد في الرجوع ١٠.٣٠ مساء.

الاتوبيس الخاص بالهوستل

لما توصل جزيرة فينيسيا وتبدأ تشوف القنوات المائية الساحرة بتاعتها، هتلاقي محطة “الاتوبيس النهري” بتاعهم، Ferry service. عبارة عن شبكة مراكب مكونة من ٢٢ خط، مغطي كل شبر من الجزيرة، لما تبص على الخريطة بتاعتها، هتلاقيها عاملة زي شبكة المترو بتاع باريس مثلا … هتلاقي محطات ممكن تنزل فيها تغير وتركب خط تاني، وتحس انها مولد كبير. تذكرة اليوم الواحد ب٢٠ يورو، اليومين ب٣٠ يورو، الثلاثة ايام ب ٤٠ يورو. كل خرايط المراكب موجودة على تطبيق خرايط جوجل.

المراكب المنتشرة في قنوات فينيسيا

وانا بحاول اركب المراكب، مسترشدا بجوجل

خريطة خطوط المراكب الي مغطية جزيرة فينيسيا

المفاجأة بقى، انك مش محتاج تركب المراكب دي كلها خالص

انا شخصيا اتمشيت من اول الجزيرة لآخرها في حوالي ساعة. اصلا الفسحة في فينيسيا هي انك تتوه في الشوارع بتاعتها الضيقة دي. مش انك تركب مركب تتنقل بيها من مكان لمكان. لو عايز تركب مركب اوي يعني، اتفرج انا عملت ايه في تاني يوم في فينيسيا، بس على مسؤليتك الخاصة. 

مفيش احلى من التمشية في شوارع وقنوات فينيسيا

ممكن تاخد تذكرة المركب لو الفندق بتاعك في قلب جزيرة فينيسيا، ومش هتقدر تمشي ومعاك شنط كتير، لان المركب التاكسي الواحد هياخد منك ٦٠ يورو مثلا في المشوار. الموقف ده حصل مع احد الاصدقاء وهي رايحة الفندق بتاعها، وبالعافية لقت واحد ياخد ٢٠ يورو علشان يشيل ليها الشنط بتاعتها لحد الفندق بتاعها.

البرنامج السياحي

التمشية في مدينة فينيسيا تعتبر احلى فسحة بصراحة تعملها. القنوات والكباري والبيوت والمراكب، بصراحة مفيش احلى من كدة فسحة تعملها ببلاش في فينيسيا. طبعا في كنايس ومتاحف كتيرة ممكن تزورها في المدينة، لكن انا شخصيا لم ازر غير اشهر واكبر ميدان في فينيسيا “سان ماركو”. فيه كنيسة تحمل نفس الاسم، ضخمة وحلوة جدا جدا، مختلفة من الخارج عن اي كنيسة شوفتها في ايطاليا. البرج بتاعها هو اطول برج في الجزيرة، ومن فوق ممكن تشوف احلى غروب شمس في حياتك، معاه اكيد فينيسيا كلها من الأعلى.  بتاعها وممكن تطلعه بالاسانسير ب٨ يورو. . . اتفرجوا على الفيديو وانتوا هتعرفوا ان دي فعلا احلى حاجة تتعمل في فينيسيا.

ميدان سان ماركو والكنيسة الخاصة به

برج سان ماركو – الاعلى في فينيسيا

قبب كنيسة سان ماركو من اعلى

احلى غروب تشوفه في فينيسيا من اعلى برج سان  ماركو

اشهر فسحة تتعمل في فينيسيا طبعا هي ركوب المركب الشهير “الجوندول”. بس المشكلة ان النص ساعة بتكلف حوالي ٨٠ يورو، واقصى عدد بتاخده ٦ افراد. يعني لو عايز تاخد المدام في ركوبه رومانسية، اعمل حسابك على ٨٠ يورو. لو انتوا جروب، ممكن تاخدوها وتقسموها عليكم، طبعا هتكون ارخص. لو انت لوحدك او معك واحد صاحبك، ممكن تحجزوا اونلاين في شركات بتبيع بالكرسي، حوالي ٢٨ يورو في اللينك ده. 

مراكب الجندول الشهيرة – اسعارها اغلى ليلا

بالليل بقى عندك اماكن كتير بتعمل حفلات موسيقية ومسرحيات. اشهر تذكارات فينيسيا هي اقنعة المسرحيات، لا توجد الا في فينيسيا. ملونة ومبهجة حقا. الانشطة الغنائية المسرحية طبعا تحتاج بعض المصاريف، لانها بتكون غالية حبتين، ممكن من ٤٠ يورو مثلا وطالع. انا لم ادخل اي منها، لو عجبتك، احكي لي عن تجربتك.

باقي المدينة بالليل تقتصر على المطاعم وبعض البارات الصغيرة – لا مكان للسهرات الصاخبة او النايت لايف. المدينة بالليل شوارعها هادية، تقتصر على الحبيبة الهائمين في غرام بعضهم 🙂

اليوم التاني

انت ممكن تتكتفي بال٢٤ سااعة الي فاتوا دول في فينيسيا وخلاص على فكرة، لانها انبهارك بها بيخفت بعد اول يوم انبهار، او هكذا شعرت انا. تاني يوم ممكن تعمل رحلات خارج جزيرة فينيسيا. اشهر الرحلات هى رحلات لزيارة الجزر المحيطة بيهم، اشهرهم جزيرتي مورانو وبورانو … حيث اخترعوا الزجاج “المورانو” الشهير. جزر صغيرة، بيوتها ملونة وحلوة اوي. بامكانك زيارة مصانع الزجاج ومشاهدة طريقة عمله. ممكن تشتري تذاكارت مورانو وانت راجع لحماتك، وهتبقى مبسوطة منك اوي.

جزيرة مورانو تشبه فينيسيا الى حد كبير، ولكن المنازل ملونة اكتر

ابسط حماتك بالزهرية الجميلة دي

ما تنساش تتفرج على الفيديوهات بتاعتي في فينيسيا