22
Oct-2016

٣ اسباب ليه البيتزا الطلياني وحشة في ايطاليا؟

photostudio_1477161364778

طبعا الكلام ده هيكون صادم لكل عشاق الاكل الايطالي، الي أول ما بيسمعوا سيرة إيطاليا بييجي في دماغهم صورة البيتزا الغرقانه جبنه موتزاريلا بتمط زي اللبانه و عليها مكونات كتير من فوق زي اللي بتيجي في إعلانات بيتزا هت كده. لكن يؤسفني أقولكم إن البيتزا في إيطاليا هي أكتر أكله محبطة للمصريين على الإطلاق! هي مش وحشة طبعا، لكن مش هتعجب اغلب الناس.  إيه يا عم اللي إنت بتقوله ده؟؟؟ لا طبعاً مستحيل!

اثناء رحلتي في ايطاليا، كنا مجموعة اصدقاء مصريين، جربنا مطاعم بيتزا في اكتر من مدينة ايطالية، إكتشفت إن فيه شبه إجماع ما بينا على إن البيتزا في إيطاليا مش حلوة، في نظرنا طبعا، رغم إننا جربناها في كذا مطعم و بكذا طريقة مختلفة! طب ليه؟!

 ١- فقيرة المكونات

البيتزا “الاصلية” في ايطاليا مش عليها غير صلصة طماطم وجبنة واضافة واحدة فقط. شغل بقى الفطير الاسكندراني الي بيحط اضافات كتيييييرة بتاعنا ده مش موجود.

٢- أغلبها بلحم الخنزير

جميع انواع اللحوم المستخدمة في البيتزا الايطالية “الاصلية” من لحم الخنزير. ببروني، سلامي، سجق أو بسطرمة إيطالي إسمها بروشتو، كل ده من الخنزير. لا يوجد في قاموس البيتزا الايطالية اي ذكر لانواع البيتزا الي باللحم البقري او الفراخ … دي كدة بالزبط اكن واحد طلب منك ساندوتش ملوخية مثلا؟ تنفع؟ …. كذلك الطلبان، عمرهم ما سمعواعن بيتزا بالفراخ او اللحمة قبل كدة. عليك ان تكون “نباتي” في رحلتك في ايطاليا وتقضيها بيتزا بالجبنة والطماطم او الخضروات.

٣-عجينة عيش

العجينة بتاعت البيزا في المطاعم الايطالية “ الاصلية” رفيعة جدا وبتشد كدة، حتى مش زي pan الي نعرفها في مصر، وكمان لازم تكون محروقة من الاطراف.

ليه كدة طيب؟؟ 

الطليان لما هاجروا لأمريكا (حوالي 4 مليون إيطالي هاجروا لأمريكا) نقلوا معاهم جزء من ثقافتهم و منها مطبخهم و أكلاتهم. المجتمع الأمريكي بدأ يحط التاتش بتاعه على المطبخ ده. و بما إن الأمريكان بيحبوا الأكل الدسم الحرش كده زي حالاتنا فكانت البيتزا الطلياني على قد ما فكرتها مغرية بالنسبالهم (مين ما يحبش عيش عليه جبنه سايحة يعني مش فاهم؟!) إلا إن البيتزا الرفيعة الخفيفة البسيطة اللي بيعملها الطليان السمباتيك دول ماينفعش تسد معاهم. فتخنوا العجينة و زودوا الجبنة و حطوا فوقيها لحمة طبعاً لإنهم شعب بيحب الهوبر زي حالاتنا و طلعوا في الاخر بالشكل الأمريكاني للبيتزا و المنتشر حالياً حول العالم و اللي بدأ ينتشر بصورة كبيرة في الوطن العربي بدخول مطاعم بيتزا عالمية كتير كل حتة.

الخلاصة، احنا الذوق بتاعنا في الاكل “جنح” عن الطعم الايطالي الاصلي ومش هتعجبنا البيتزا الايطالي الاصلية، علشان اتعودنا على البيتزا الامريكاني.

   طيب ايه الحل؟

  • طبعا المحلات السياحية في إيطاليا عملت حسابها على أذواق السياح المختلفة، فعملوا البيتزا بتتباع بالقطعة …. commerical pizza – take away style …  ودي موجودة في كل حتة في الشارع، ودائما أرخص. العجينة تخينة ومربربة، وعليها حشو كتير، لكن ماقدروش يعملوها باللحمة او الفراخ … قلبهم مش مطاوعهم لسه… تتراوح أسعار القطعة من ٢ الى ٤ يورو . قبل ما تاكل بيتزا في اي مطعم، ادخل المحل واتفرج على شكل البيزا الي بتتقدم هناك. عموماً، إبعد عن الميادين السياحية علشان تلاقي أكل رخيص. قرب من محطة القطر مثلا في روما علشان تلاقي أكل رخيص.

  • المكرونات والريزوتو في رأيي هم أحلى الحاجات الي ممكن تاكلها في إيطاليا، وهتلاقي فيها حاجات أكلها حلال كتير، بولونيز مثلا باللحم البقري أو باستا بالسلامون … حوالي ٧-٩ يورو الطبق.

  • لو هنتكلم عن أكل مش طلياني، ومشبع، ورخيص، وحلال … يبقي عليك وعلى Donor Kebab، ده أنسب أوبشن للأكل الرخيص و الحلو في نفس الوقت في أوروبا كلها أصلاً من وجهة نظري.

علشان تعرفوا كل حاجة عن رحلتي في ايطاليا، شوفوا مقالاتي في روما ، فلورانس، شنكو تيري، فينيسيا.

ملحوظة – i am not foodie

انا مش بكتب عن الاكل كتير في السفر، لكن هحاول اكتب عن الحاجات المهمة الي ناخد بالنا منها واحنا مسافرين في بعض البلاد. علشان كدة هعمل مقالة بخصوص الاكل في البلاد الي شايف انها تستحق.

2

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec