26
May-2017

كل ما تريد معرفته عن كابادوكيا ـ جزء ١

كبادوكيا واحدة من معجزات الطبيعة الي ربنا خلقها في تركيا

حاجة لن ترى مثلها في العالم كله الا في تركيا

هي عبارة تكوينات صخرية عجيبة تكونت على مدى ملايين السنين بفعل البراكين والزلازل والمياة والرياح. تقع في وسط هضبة الاناضول. مش هقدر اوصفها بالكلمات ولكن الصور والفيديوهات في المقالة دي ممكن تقرب لك الصورة شوية.

(اي مكان مذكور في المقالة ومعاه لينك، هيكون الموقع بتاعه على Google Maps علشان تحفظه في تليفونك مباشرة)

منطقة كبادوكيا

تعني في اللغة القديمة “الخيول الجميلة” لانتشار الخيول الجميلة فيها. يطلق هذا الاسم على منطقة واقعة في وسط تركيا. تتبع لمحافظة “قيصرية”.

نزورها امتى؟

افضل وقت لزيارتها من الربيع الى الخريف، لان شتاءها ثلج. ولكن من وجه نظري، الثلج له سحر خاص في مكان ساحر مثل كبادوكيا. انا شخصيا زورتها في الربيع والصيف فقط، ولكن مرة اخرى سازورها في الشتاء. في اللينك ده هتلاقي ملخص لدرجات الحرارة والامطار عن مدينة جورميه. فصل الصيف هيكون الافضل لانه جاف ولا يوجد امطار، ولكن هيكون حر حبتين.

مركز منطقة كابادوكيا: جوريمية Göreme

اسم كابادوكيا يطلق على المنطقة كلها دي من وسط تركيا. زي مصر كده لما تقول عايز اروح “سيناء” – فين في سيناء يعني؟ شرم، ولا دهب، ولا نويبع؟ …. لو عايز تروح تزور كابادوكيا، يبقى وجهتك هي مدينة جورمية، والتي تعتبر المركز السياحي لمنطقة كابادوكيا.

المواصلات الى جورمية

لو انت في اسطنبول وعايز تروح تزور كابادوكيا، يبقى قدامك حل من اتنين، الاتوبيس او الطيارة

١- الاتوبيس: في اتوبيسات كل يوم من اسطنبول الى مدينة جوريمية مباشرة في حوالي ١١-١٢ ساعة، على حسب التوقفات في كل محطة وسعرها حوالي ٨٠ ليرة (٢٢ دولار) . لمعرفة كل حاجة عن اتوبيسات تركيا، ارجع للمقالة دي.  محطة اوتوبيس جوروميه في وسط المدينة مباشرة. هتنزل من الاتوبيس هتلاقي المدينة في وشك على طول.

٢- الطيران: اقرب وارخص مطار الى مدينة جوريمية يوجد في مدينة “قيصرية” (Kayseri (ASR – يوجد في المواسم السياحية اكثر من ٢٣ طيارة يوميا من خلال ٤ شركات طيران – من مطاري اتاتورك وصبيحة في اسطنبول، واسعار التذاكر تبدأ من ٢٠-٣٠ دولار الى ٥٠-٨٠ دولار. يعتمد السعر على شركة الطيران ومطار المغادرة، الحقائب، توقيت الرحلة، ووقت حجزها. اكثر وارخص الشركات هي Pegasus. مدة الرحلة حوالي ساعة ونص فقط.

لمعرفة معلومات اكتر عن الطيران الداخلي، ارجع للمقالة الكاملة دي عن الموضوع.

قيصرية الى جورميه

مطار مدينة قيصرية يقع على بعد حوالي ساعة من جوريميه. هتلاقي سواقين تاكسي ممكن يوصلوك بحوالي ٥٠ دولار – يعني تبقى جاي ب٢٥ دولار وتركب تاكسي ب٥٠ دولار. علشان كده خلي مواعيد الوصول في الصبح او النهار علشان تلاقي اتوبيسات مواصلات الى جوروميه. لازم تاخد بالك من مواعيد الوصول، لانك ممكن توصل في ميعاد مفيش فيه مواصلات من المطار.

للاسف مفيش مواصلات مباشرة من المطار الى جوريميه. انا لما روحت فضلت اسأل لحد ما لقيت الآتي:

– بتاخد اتوبيس Havas من المطار الى محطة اتوبيس قيصرية Otogar – ٣ دولار مثلا

– من محطة الاتوبيس بتاخد اتوبيس مباشرة الى جوروميه

– او بتاخد اتوبيس الى مدنية افنانوس Avanos – والي تبعد ١٠ دقائق فقط من جوروميه. ٦-٧ دولار مثلا.

– ممكن تنسق مع الفندق بتاعك يبعتلك عربية تاخدك من المطار. قد يكون سعرها اقل من التاكسي العادي لو هيكون باعت عربية كبيرة تاخد اكتر من واحد من نفس الرحلة.

– وانت بتغادر (من الفندق للمطار) ممكن تطلب من الفندق او الهوستل بتاعك عربية توديك المطار، ودي بتكون متوفرة اكتر لانها بتكون عربية Van بتاخد كذا واحد مع بعض من كذا فندق وسعرها حوالي ٦-٧ دولار.

الموضوع سهل وبسيط ومفيش فيه مشاكل. لا تقلق. لن تضيع في سهول كبادوكيا 🙂

الاقامة في كبادوكيا

اختار مكان اقامة في جوريميه اكيد علشان هي السنتر والي فيها جميع الخدمات والرحلات وتتوسط المزارات كلها. عندك اختيارات متعددة لو انت مسافر برنس او لو انت مسافر اقتصادي

١- كهوف الفنادق Cave Hotels

الاقامة فيها ليها طعم تاني خالص، لان الناس قديما في كابادوكيا كانت تسكن الكهوف المحفورة داخل الصخور دي – Cave Hotels. الاقامة لوحدها في احد الفنادق المحفورة دي لوحدها متعة لا توصف. طبعا هتكون اقامة غالية، ممكن تبدأ من ٥٠ دولار ل١٠٠ دولار واكتر. اتفرج على صور كل فندق كويس واقرا الريفيوهات كمان.

صورة من على النت طبعا – انا سكنت في واحد منهم مرة من ٥ سنين 🙂

ان شاء الله اطفحه لو كنت كلته الفطار ده بالفيو ده هاهاها – ولكن ده الفيو بتاع الفنادق الغالية في جورميه 🙂

٢- الهوستلز حلوة

لكن الحمدلله في هوستلز حلوة وشيك جدا وبعض منها محفور برضو في الصخور. جميع اماكن الاقامة متوزعة على تلال جورومية. الهوستل الي انا نزلت فيه (The Dorm Cave)  حلو جدا وسعره حوالي ٧ دولار بالفطار. الدورم Dorm بتاعه كان عامل زي زنزانة انور وجدي في فيلم “امير الانتقام” وكنت منتظر اسمعه بحفر في الحيطة بالليل وانا نايم.

 برنامج زيارة كابادوكيا

منطقة كابادوكيا فيها حاجات كتيييييرة جدا تتعمل، وشركات السياحة هناك سهلت الموضوع اوي واتفقت سويا انها تعمل برامج ثابتة Tours علشان تخليك تشوف احلى الحاجات في كابادوكيا في اقصر وقت ممكن. هتلاقي كل الشركات السياحية بتبيع حاجة اسمها Red Tour وGreen Tour …. ودول اشهر اتنين واهمهم على الاطلاق، وبعد كدة هتلاقي Blue *& Yellow Tours, ودول مش مهمين اوي بصراحة.

الخريطة دي هتلاقيها موجودة عند جميع الفنادق والهوستلز وشركات السياحة. نصيحتي ما تحجزش من الفندق او الهوستل علشان تتفادى العمولة بتاعتهم، انزل شوف شركات السياحة الي في وسط المدينة اول ما توصل علشان تلاقي سعر احسن وتعرف تقارن.

خريطة الجولات السياحية في كابادوكيا

الجولة الحمراء Red Tour

بتبدأ من الساعة ٩ او ١٠ الصبح لحد ٤ او ٥ بعد الضهر. دي تشمل جميع الزيارات القريبة وحول جورميه. تبدا من قلعة “اوتشاير” Uchisar castle والي تعتبر اعلى نقطة في كابادوكيا كلها. وبعد كله بتروحوا المتحف المفتوح لمدينة جورميه Open Air Museum وده تذكرة دخوله لوحدها 25 ليرة (٧ دولار). مليان كنائس محفورة في الصخور من القرون الرابع والخامس. كابادوكيا كان ليها دور كبير في الديانة المسيحية زمان لانها احتضنت كتير من الرهبان والقساوسة الفارين من الامبراطورية الرومانية الوثنية قبل اعتناقها رسميا الديانة المسيحية.

بعد كدة بتزوروا كذا وادي ومزار حول كابادوكيا – Rose Valley – Love Valley – Imagination Valley. كلهم مليانين عجائب صخرية جيولوجية. اتفرجوا على الفيديو ده علشان تعرفوا هتشوفوا ايه هناك علشان فعلا الكلمات لا تستطيع وصف المكان.

جولات تجارية

طبعا الجولات السياحية دي لا تخلوا من بعض البيزنس. تشتهر كابادوكيا بصناعة الفخار والخزف الراقي جدا، علشان كده هتروحوا جولة في احد المصانع اليدوية المشهورة وتتفرجوا على طريقة صنعها وبعدين هتزوروا معرض البيع بتاعهم علشان تشتروا. حاجات حلوة بس غالية جدا جدا. فعلا هتفهم ليه سعرها بيكون غالي بالشكل ده.  هتلاقوا حاجات حلوة زيها وارخص بكتييييير في البازارات العادية (تقليد حلو).

صناعة السجاد اليدوي كمان مشهورة اوي في كابادوكيا منذ قرون بعدية. هتروحوا تتفرجوا على طريقة صنع السجاد والفرق بينه وبين السجاد الايراني في انواع العقد بتاعته. انا كنت منبهر بطريقةعملها بصراحة. فعلا لما تعرف ان السجادة ممكن تتعمل في ٣ او ٤ شهور بالطريقة اليدوية دي، يبقى تستاهل الاف الجنيهات فعلا علشان تشتريها. هتتفرج في معرضهم كمان على انواع واشكال من القطن والكتان والحرير – حاجات بالالاف الدولارات.

بالرغم من الطابع السياحي للجولتين، الا انهم حلوين الصراحة ويعتبروا جزء من التعرف على ثقافة وتاريخ المكان.

1

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec