26
May-2017

كل ما تريد معرفته عن كابادوكيا ـ جزء ٢

تركيا   /  

استكمالا للمقالة السابقة عن كبادوكيا في اللينك ده، هنكمل في المقالة دي باقي الحاجات الي تتشاف وتتعمل في كبادوكيا. (اقرا  المقالة السابقة الاول وبعدين كمل المقالة دي).

الجولة الخضراء Green Tour

مدن تحت الارض

كابادوكيا مبهرة تحت الارض زي ما هي مبهرة فوق الارض برضو. اهم زيارة بتتعمل في الجولة الخضراء هي المدن الي تحت الارض Underground City – والمشهورين جدا في منطقة كابادوكيا وتم اكتشاف منهم حوالي ٢٠٠ مدينة فقط.  يعني ايه مدينة تحت الارض؟ التكوينات الصخرية العجيبة الي تشكلت منها كابادوكيا، موجود منها تحت الارض كمان. قام اهل المنطقة قديما بحفر مدن كاملة تحت الارض لتكون مخابئ من غارات الاعداء على مدينتهم. يعني عملوا ملاجئ تحت الارض تكفي لمعيشة الآلاف لعدة شهور. يصل عمق بعض المدن الى اكثر من ١١ دور تحت الارض. غرف نوم وغرف معيشة وكنائس وحمامات ومطابخ وسلالم وقنوات تربط بينهم جميعا، بالاضافة الى آبار مياة وغرف تخزين الطعام وغرف تصنيع النبيذ كمان. بالاضافة الى نظام تهوية يسمح بتغلغل الهواء الى جميع ارجاء المدينة … تحت الارض.

انا عارف اني بوصف في شئ خيالي للبعض منكم، ولكنه حقيقي فعلا. لما كان يحصل غزو للمدينة، كان اهلها بيستخبوا تحت الارض بالشهور لحين انتصار جيوشهم وطرد الغزاة. اتفرجوا على الخريطة التصورية دي لاحد المدن الي تحت الارض.

مدينة Derinkuyu

دي واحدة من اشهر واكبر المدن تحت الارض المكتشفة في كابادوكيا. تتسع ل٢٠ الف شخص ومساحتها حوالي ١٠ كيلومتر مربع. دي مقالة علمية كاملة عنها لقراءة المزيد.  تقع على بعد ساعة من جورميه. تعتبر من اهم الزيارات الي بتتعمل في الجولة الخضراء. تذكرة دخولها ٢٥ ليرة (٧ دولار). تحتاج ساعة او ساعتين على حسب زحمتها.

(تاني اشهر مدينة تحت الارض اصغر اسمها Kaymakli ولكن غير موجودة في الجولة الخضراء.)

بعض القنوات والممرات الضيقة في المدينة الي “تحت الارض”

حجرات المدينة تحت الارض شرحة وبرحة والله

وادي اهلارا Ihlara

الزيارة الثانية دعد كدة هتكون رحلة Hike في وادي اهلارا – على بعد اكتر من ٨٠ كم من جورميه. تذكرة الدخول ٢٠ ليرة (٥.٥ دولار). المكان عبارة عن وادي كبير داخل اخدود صخري، يمر من خلاله نهر صغير. الاتوبيس بينزل المجموعة عند المدخل ويتمشوا داخل الوادي لمسافة حوالي ٤ كم وبعدين يقابلهم عن نقطة الخروج بعدها بساعتين تلاتة. من احلى الHikes الي تتعمل في كابادوكيا. جوانب الوادي هي كمان كانت محفورة في صخور الاخدود ومسكونة من اهل كبادوكيا. في الطريق وعند باب الخروج الكثير من الكافيهات والمطاعم على مياة النهر مباشرة. بعد كدة بيتم زيارة دير Selime Monastery ويعتبر من اكبر واقدم الاديرة في كابادوكيا.

احد طاولات الطعام في كافيهات اهلارا

اصدقاء الهوستل الي اجرنا العربية سوا وروحنا زيارات الجولة الخضراء

التمشية في وادي اهلارا في يوم مشمس

 جوانب اخدود اهلارا كان محفور بالغرف والبيوت – انا الي واقف في الدائرة الحمراء دي 🙂

المجوهرات العجيبة

بعض الجولات بيكون فيها زيارة لمصنع مجوهرات واحجار كريمة عجيبة جدا اسمها Zultanite – والي بيتغير لونها على حسب الاضائة من الاخضر الى الاصفر الى الوردي. اتفرجوا على الفيديو ال٣٠ ثانية ده علشان تشوفوا ازاي. اسعاره ايه؟ مش عارف بصراحة؟ جهز الكريدت كارد بتاعك لو عايز تشتري 🙂

سعر الرحلات

سعر كل جولة حوالي ٨٥ ليرة الى ١٠٠ ليرة (٢٤ دولار الى ٢٨ دولار) – وممكن تكون ارخص لو اخدت الاتنين مع بعض. السعر ده يشمل الآتي:

– المواصلات من الفندق وبين المزارات والى الفندق مرة اخرى

– تذاكر زيارات المتاحف والمزارات.

– وجبة غذاء في بوفيه مفتوح ( بيكون حلو جدا ويستاهل لوحده ١٠ دولار اصلا)

طيب ليه شركات سياحة؟

للاسف المسافات بين معظم المزارات بعيدة ومحتاجة مواصلات بينها، ومش متوفر وسائل عامة كتير. انا شخصيا عملت الجولة الحمراء مع شركة، وبعض الرحلات لوحدي واستخدمت اوتوستوب hitch hiking. يوم تاني اجرت عربية علشان اعمل الجولة الخضراء مع ٣ اصدقاء قابلتهم في الهوستل. للاسف تكلفة الايجار والبنزين وتذاكر الدخول والغذاء كانت تقريبا نفس تكلفة الجولة مع شركة سياحة. الجولة الحمراء ممكن تكون ارخص شوية لان المسافات فيها اقرب من الجولة الخضراء. ممكن تعمل منها حاجات تمشية وتاخد اتوبيسات وميكروباصات او موتوسيكلات للتنقل (تفاصيل اكتر تحت).

انشطة اخرى في كبادوكيا

منطاد الهواء الساخن Hot air baloon

طبعا من اشهر الانشطة في كبادوكيا هي ركوب المناطيد في الصباح الباكر وعمل رحلة جوية للاستمتاع بلحظات شروق الشمس على اودية كبادوكيا الكثيرة. للاسف تكلفة الرحلة ممكن تكون من ٨٠ الى ١٢٠ يورو – على حسب الشركة وتوقيت الزيارة. يفضل حجزها اونلاين قبل السفر لان احيانا بيكون في عروض ارخص اونلاين. جولة قصيرة كفاية Standard Tour، لان بعد اول ربع ساعة المنظر هيكون مسطح تماما وهيفقد متعته. لا تشتري الجولة الطويلة.

للاسف الشديد قد يمنع سوء الاحوال الجوية (رياح شديدة او امطار) من القيام برحلات منطاد. اعمل حسابك تكون هناك ٣ ايام فجرا علشان تكون احتمالية صلاحية الجو للاقلاع تكون عالية.

استمتع بالمناطيد ببلاش

انا شخصيا لم اجرب اي شركة مناطيد ولكني استيقظت في الساعة الخامسة صباحا لمشاهدة لحظات اقلاعها. ودي لوحدها حاجة ممتعة جدا جدا لانك بتشوف شروق الشمس كمان. وثانيا لان معي طيارة بكاميرا Drone ومش محتاج اطلع فوق بنفسي 🙂

لازم تسأل الفندق او الهوستل عن جدول رحلات المنطاد في الصباح الباكر، وتصحى بدري من ٥ الفجر وتطلع فوق اعلى قمة علشان تشوف اقلاع المناطيد من الاودية المنتشرة حول جورميه. يوجد في وسط مدينة جورميه تلة عالية يرفرف عليها العلم التركي ودائما عليها ناس وقت الشروق والغروب – تتبع الناس واسأل على كيفية الوصول لهذه النقطة العالية. انا شخصيا روحت للمكان ده علشان كان اقل زحمة.

DCIM100MEDIADJI_0041.JPG

DCIM100MEDIADJI_0031.JPG

رحلة الموتوسيكلات الرباعية  ATV او Quad او البيت باجي

شركات سياحة كتير بتعمل رحلات بالبيتش باجي لمشاهدة غروب الشمس. بتبدأ ساعتين او ثلاثة قبل الغروب. تكلفتها ممكن من ٥٠ الى ٨٠ ليرة (١٤-٢٢ دولار) للموتوسيكل الواحد (يعني ممكن اتنين ينصصوه مع بعض). انصحك تعملها لانها حلوة جدا والمناظر الطبيعية والوديان حلوة اوي.

ممكن تعمل الرحلة دي بعد ما ترجع من الجولة الحمراء مثلا. علشان تكون شوفت كل حاجة. لكن لو مش معاك ميزانية كتير، ممك ممكن تزور Open Air Musuem الي في الجولة الحمراء لوحدك، لانه يبعد كيلومتر واحد من جورميه واعمل معاه رحلة الموتوسيكلات دي لانك بتمر فيها ببعض المناطق الي في الجولة الحمراء.

ركوب الخيل

حيث ان كبادوكيا اصلا تعني بلد الخيول الجميلة، اكيد هتلاقي فيها خيول كتير. لو انت ليك في ركوب الخيل، هتلاقي اسطبلات بتعمل رحلات خيل لمدة ساعة او ساعتين في الوديان المحيطة. اسعارها في حدود ال١٠ ل٢٠ دولار في الجولة.

 المطاعم الحلوة

جورميه فيها مستويات كتيرة من المطاعم. كل ما كان الفيو حلو كل ما كان المطعم اغلى. مش محتاجة فكاكة يعني 🙂 … انا جربت مطعم حلو هناك اسمه View Point Resturnat من احلى المطاعم العالية الي ليها فيو حلو. الوجبة ممكن تتكلف من٢٠ ل٣٥ ليرة – ( ٧ الى ١٠ دولار). اشهر الاكلات في كبادوكيا Pottery Kebab. بيطبخوا اللحمة و الفراخ مع خضروات وصلصة في فخارة مقفولة وتكسرها بنفسك بالشاكوش. موجودة في مطاعم كتير في تركيا، بس اصلها من كبادوكيا. يوجد مطاعم ارخص وممكن تتعشى شاورما ورز وسلطة وبطاطس ب١٥ ليرة ( حوالي ٤ دولار).

انشطة ليلية

مفيش حاجات كتير ممكن تتعمل بالليل غير انك تتعشى في مكان لطيف وتشرب شاي وتشيش. المدينة صغيرة مافيهاش نايت لايف. لكن في بعض الرحلات الليلة لحضور حفلات راقصة. حفلة رقص دراويش صوفيين وتكلفتها ممكن ٢٠ دولار مثلا وحفلة تانية رقص شرقي مع عشاء وتكلفتها ٣٠ دولار (راجعالاسعار مع الفندق او الهوستل بتاعك علشان انا معملتش اي منهما). نصيحتي احضر الحاجات دي في اسطنبول هتكون احسن.

الخلاصة

رحلتك الى تركيا لازم تتضمن زيارة كبادوكيا، لانها مكان غير موجود مثله في العالم كله. تحتاج منك يومين كاملين. على حسب ميعاد وصولك الى جورميه.

اليوم الاول:  لو وصلت الصبح بدري، ممكن تلحق تعمل الجولة الحمراء من اول اليوم وبعد الضهر تعمل جولة الموتوسيكلات وقت غروب الشمس. بالليل ممكن تتعشى في مطعم او تحضر حفلة ليلية.

او لو وصلت متأخر شوية تزور Open Air Museum وتتمشى في الوادي الي حوله شوية، وبعدين تعمل رحلة الموتوسيكلات لمشاهدة غروب الشمس.

اليوم التاني: الاستيقاظ مبكرا لعمل رحلة المناطيد (لو معاك فلوس) او لمشاهدة شروق الشمس واقلاع المناطيد ببلاش. بعدها افطر واعمل الجولة الخضراء، والي هتاخد طول اليوم تقريبا.

بعد كبادوكيا ممكن تروح بلاد كتيرة بالاتوبيس – ولكن اغلبهم هيكونوا مسافرات طويلة ووقت كتير. انطاليا ٨ ساعات – باموكالي ١٠ ساعات – فتحية ١٢ ساعة. ارجع للمقالة دي علشان تعرف اكتر عن الاتوبيسات وتذاكرها، وانتظر باقي المقالات عن المدن التركية علشان تعرف تقرر هتروح فين.

1

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec