26
Jul-2017

احلى ١٠ اكلات في تركيا وارخص من ٥دولار

تركيا   /  

السفر لاي بلد جديدة يعني اكل جديد ….. ده شعار ناس كتير وهي مسافرة، وانا واحد منهم بصراحة

الاكل جزء مهم من ثقافة الشعوب العالم. انا شخصيا بحب اجرب الاكل بتاع اي بلد بزورها. المطبخ التركي متشابه مع المصري والشامي في شوية حاجات. هتلاقوا فرق الاسعار بين اللحمة والفراخ كبير جدا. يعني اي حاجة هتطلبها فلحمة، تاكد ان سعرها اكتر من الفراخ من ٣٠٪ الى ٥٠٪ في السعر. لو عايز تكون اقتصادي، خليك في الفراخ.

هقولكم على ١٠ اكلات رخيصة لازم هتجربوها لما تيجوا تركيا:

١) الشاورما التركي

انا هبدأ بالشاورما التركي – Donor – والمنتشرة في كل شوارع اسطنبول وتركيا انتشار النار في الهشيم. مفيش ركن مش هتلاقي فيه محل شاورما. تختلف عن الشاورما السوري او المصري. تعتبر احسن اختيار للغذاء في مكان. سعر شاورما الفراخ في المناطق السياحية ٢$ والمناطق الغير سياحية ممكن يكون دولار واحد. الساندوتش الملفوف اسمه Durum.

رأي شخصي: بس بعد ما تجرب الشاورما التركي، هتروح تبوس شاورما سمسمة وحيدر وابومازن في بوقهم …. الشاورما المصري والسوري احلى بكتير من التركي 🙂

٢) البوريك

احد انواع المخبوزات التركية. ليه مخابز مخصوصة في حتت كتير. يعتبر فطار تقليدي في تركيا. متوفر باللحمة والجبنة والبطاطس. بيتباع بالكيلو – طبق صغير للفطار بحوالي ٥ ليرة (دولار ونص).

٣) الكفتة النية cig kofta

من الوجبات الي حبيتها جدا في تركيا، لانها رخيصة وحلوة وصحية ومفيدة ( vegeterian) . كفتة برغل مفروم مع الخصروات ودبس الرمان. ساندوتش ملفوف بتاعها durum باقل من دولار (٢.٥ ليرة) واتنين منه مشبعين جدا. تقدم احيانا في هيئة “صوابع كفتة” في طبق مع السلاطة.

٤) بيدا Pide – البيتزا التركية

عجيبة رفيعة تشبة عجيبة البيتزا والمناقيش اللبنانية – وعليها اضافات topping  تشبه زي جبنة وسجق وخضار. ليست دائرية مثلهم، ولكن مسحوبة مشدودة من الطرفين. سعرها باقل من ٥$.

٥) الاسكندر – الفتة التركية

هو طبقات من العيش المحمر وعليه شرائح لحمة او فراخ (شاورما) – وعليهم صلصة طماطم حمراء وبجوارهم زبادي. تشبه الفتة يعني من حيث المبدأ ولكن تختلف من حيث المكونات. الفراخ منها ب٤-٥ دولار واللحمة ٧-٨ دولار.

٦) كومبير Kumpir

من الاكلات المفرحة في تركيا، لان طريقة عملها شهية. هي عبارة عن حبة بطاطس كبيرة، مشوية في فرن مخصوص. قشرتها صلبة ولكن قلبها مستوي. تشق نصفين ويتم هرس البطاطس داخل بالزبدة والجبنة الموتزاريلا، ثم يتم اضافة مكونات فوقها  topping من بوفية مفتوح. خضروات وسلطات وهوت دوج ومخللات. سعرها حوالي ٥$. اشهر مكان ليها في اسطنبول في منطقة اسمها اورتاكوي على خليج البسفور.

٧) كباب الجرة – pottery kebab

من اشهر الاطباق التركي والي منشأة وسط هضبة الاناضول. مطاعم كبادوكيا كلها بتعمل الطبق ده لانهم مشهورين بالفخار. عبارة عن فراخ ا ولحمة مطبوخين مع خضار وصلصلة في فخارة. يتم احضارها وكسرها امامك في الطبق بتاعك. طبق الفراخ بتاعها بحوالي ٥$ لكن اللحمة اغلى شوية.

٨) المانتي – الرافيولي التركية

المانتي ده نوع من المكرونة التركي المحشية لحمة مفرومة. بيقولوا عليها الرافيولي (مكرونة محشية بالايطالي). تقدم مع صلصة طماطم حمراء واحيانا معلقة زيادي كمان. سعر طبقها اقل من ٥$.

٩) ساندوتشات السمك Balik

يوجد في اسطنبول ميناء خاص بسندوتشات السمك الطازجة – الباليك – ميناء آمنونو – بجوار محطة ترام واتوبيس تحمل نفس الاسم. تنتشر حوله محلات تبيع ساندوتشات سمك ب٣$. يوجد طبعا محلات سي فوود كتير في المدن الساحلية التركية، ولكن اسعارها متفاوتة.

١٠) الكوكورتش Kokoreç

من الاكلات الشعبية في تركيا – تشبه الشاورما في طريقة تسويتها على اسياخ، ولكن بالعرض مش بالطول. وتشترك مع الممبار في كونها تتكون من امعاء الماشية، ولكن غير محشية رز مثل الممبار. بتتعمل في سندوتشات بالتوابل. تستحق التجربة جدا وسعر الساندوتش ٢$ او ٣ $

 الحلويات

طبعا الحلويات التركية حاجة اساسية في الرحلة بتاعتك. الكنافة بالجبنة ($٣) – طبق البقلاوة المحشية الكثير من الفستق ($٤) – رز بلبن في الفرن (زوتلاش) – (٢$) – الايس كريم التركي (داندورما) – من اول ١$ الى ٣$.

محلات الحلويات المشهورة في تركيا مثل Mado – Mustafa Haviz – وآخرين – لازم تجرب الحلويات بتاعتهم – لا استثني حاجة منهم، لازم تجربهم. اسعارهم اغلى من العادي لانهم سياحين. بس محلات الحلويات الشعبية الاخرى جودتها عالية برضو وارخص.

المشاريب

طبعا الشاي هو اكتر مشروب بيتشرب في تركيا. اغلب المطاعم تقدم الشاي مجانا بعد تناول وجبة طعام. اطلب دائما “شاي اكرام” – يعني شاي مجاني بالتركية.

عيران – هو مشروب من الزبادي – يشبه اللبن الرايب ولكن اخف بكتير. مشهور جدا في المطاعم التركية. لازم تجربة.

 المسليات

تنتشر عربيات المسليات في شوارع اسطنبول، ودي قائمة بالحاجات الي لازم تجربها منهم:

– اشهرهم على الاطلاق الذرة المشوية او المسلوقة – “مِصر” – معناها بالتركي”ذرة”، لانها اول ما وصلت الى تركيا كانت عن طريق التجار المصريين. الذرة سعرها من ٣ الى ٣ ليرة (اقل من دولار بالتأكيد).

– ابو فروة – محمصات ابو فروة بالتركي “كاستانة” – وتباع بالجرام لانها غالية جدا. ال١٠٠ جرام ب٢ دولار.

– SIMIT – بالعربي يعني سميط برضو – اقراص عجينة مغطاة بالسمسم من كل اتجاه – سادة او بالجبنة – من ارخص الحاجات الي تاكلها في الشارع – الواحدة بليرة واحدة (٣٠ سنت).

– محشي القواقع – midye dolma – محار اسود كبير محشي رز مستوي – سعره على حسب الحجم. الواحدة بحوالي بنص ليرة – يعني السبعة بدولار. اعصر ليمون واضرب منها كتير. هتعجبك.

اكلات اغلى من ٥ دولار وتستحق جدا

– المشويات >> ادانا كباب – اسياخ كفتة عادية

>> اورفا كباب – اسياخ كفتة حارة.

>> شيش طاووق – Tavuk بالتركي اصلا يعني فراخ – سهلة كدة ليكو طبعا

 >> الكفتة – بتكون كفتة مدورة مبططة – تقدم مع رز وسلطة

>> الفطار التركي التقليدي في المطاعم الفخمة، شوية جبنة وعسل وبيضة – طريقة تقديمه حلوة

احلى اكلة تركية اكلتها – Eli Nazik

اكلة تركي متداخلة المطابخ. لان اصلها من الجنوب الشرقي لتركيا، ومتأثرة بالمطبخ السوري والارماني. عبارة عن باذنجان وحمص مخلوطين على بعض كدة وفوقيهم لحمة مفرومة او لحمة مكعبات ومطبوخة مع صلصة. وصف الاكلة صعب بصراحة. انصحك تاكلها في المطاعم الشيك لانها تحفة. بس سعرها حوالي ٩$.

2

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec