14
May-2017

دليلك السريع للتنقل بالاتوبيس داخل تركيا

تركيا   /  

من واقع رحلتي المستمرة بقالها اسابيع في تركيا، اقدر اقوكم ان شبكة الاتوبيسات في تركيا قوية جدا وبتغطي تقريبا كل حتة بشكل مباشر او غير مباشر.

مواقع بحث اونلاين

بعد الكثير من البحث والتدوير، وجدت موقع يجمع اونلاين معظم شركات الاتوبيس التركية اسمه Nereden Nereye والي معناها بالتركية “من اين الى اين”. التعامل مع الموقع سهل جدا زي اي موقع بحث عن المواصلات، ونتائج البحث بتاعته بتوريك اسم شركة الاتوبيس، ميعاد التحرك، عدد ساعات الرحلة، مواعيد الوصول، عدد التذاكر المتاحة، الامكانيات في الاتوبيس، عدد الكراسي في الصف الواحد، واخيرا سعر التذكرة. هتلاقي تذاكر كتير من شركة اسمها Metro لان دي واحدة من اكبر الشركات في تركيا. ليها موقع منفصل برضو تقدر تشوف عليه التذاكر.

مواقع اخرى

يوجد مواقع اخرى للبحث والشراء اونلاين، قد يكونوا اقوى من ده كمان، بس المشكلة انهم بالتركي. يعني لازم متصفح الانترنت بتاعك يكون بيترجم صفحات الى اللغة الانجليزية. موقع اسمه www.obilet.com والتاني اسمه www.govego.com  … القي نظرة تاكيد واطمئنان عليهم برضو، قد يكونوا افضل في اسعار التذاكر.

اتوبيسات مريحة جدا

اغلب الاتوبيسات الي ركبتها في التحرك بين المدن الكبيرة كانت VIP جدا – الصف فيه ٣ كراسي مش ٤. كرسي كبير ومريح للمسافات الطويلة. فيه خدمات زي شاى وقهوة ومشروبات وسناكس. محطات توقف كل ساعتين تلاتة للراحة والحمام والاكل. عاملين زي كراسي البيزنس كلاس. كل كرسي قدامه شاشة فيها افلام واغاني. جنبك فيشة كهرباء احيانا للشحن.

الشراء اونلاين

انا حاولت اشتري مرتين اونلاين من الموقع ولكن للاسف حصل مشكل تقنية منعتني من الشراء. هل لازم اشتري اونلاين وانا بخطط رحلتي قبل وصولي الاراضي التركية؟

الشراء من المحطة

دائما كنت بشتري تذكرة الاوتوبيس بتاعي من المحطة مباشرة. اول ما اوصل البلد واعرف مواعيد تحركي امتى، اشتري تذكرة الاتوبيس لرحلتي القادمة. داااااائما هتلاقي تذكرة. لا داعي للهلع dont panic.  انا كنت بستخدم الموقع Nereden Nereye علشان اعرف المواعيد والمدة والاسعار واهم حاجة “عدد الكراسي المتاحة”  … لا تقلق. لا داعي للشراء مبكرا اونلاين. هتلاقي دائما تذاكر اتوبيس في المحطة.

مثلا اخدت اتوبيس من اسطنبول الى جورومية في كابادوكيا، هتقعد يومين فيها مثلا، يبقى وانت في المحطة تشتري تذكرة رحلتك القادمة بعدها بيومين. استخدم الموقع لعمل جدول رحلتك وميزانية التذاكر بتاعتها.

محطة الاتوبيس Otogar

اعرف اسمها التركي علشان لم تسأل عليها اي حد يقدر يساعدك. الاتراك بعافية شوية في الانجليزي. اول ما توصل save وقع محطة الاتوبيس على الخريطة علشان توصلها بسهولة وانت ماشي من المدينة.

مواصلات من والى المحطة

الغالب في محطات الاتوبيس هي التواجد في وسط المدينة. لكن احيانا المحطة بتكون كبيرة جدا ولا يتحمل وجودها وسط البلد. هتلاقيها مطرفة برة شوية. في الغالب هتلاقي مترو او ترام يصل بك من وسط البلد الى محطة الاوتوبيس (مثلا اسطنبول، قونية، انطاليا) او هلاقي ميكروباصات كتير تاخدك وسط البلد. لو وصلت في في وقت متأخر ومفيش مواصلات عامة شغالة، الشركات بتوفر خدمة ميكروباصات مجانية من المحطة الى وسط المدينة. حصلت معايا في انطاليا. وصلت ٦ الصبح وسألت لحد ما لقيت ميكروباص تابع لشركة الاتوبيس وصلني وسط البلد ببلاش.

مندوبين الشركات

اول ما تقرب من اي محطة اتوبيس او تدخلها، هتلاقي مناديب كتير من شركات الاتوبيسات تسألك انت رايح فين وحاي منين. كل واحد هيكون عايز ياخدك للشركة بتاعته. غالبا هتلاقي اسعار التذاكر متقاربة جدا بين جميع الشركات. اعرف السعر من على الموقع قبل الذهاب وحاول تلاقي الشركة الي سعرها مناسب. خد لفة على المكاتب واسأل برضو. هيساعدوك.

شركات الاتوبيسات كتير اوي

هل كل الوجهات متوفرة؟

احيانا لا يوجد مواصلات مباشرة الى كل الوجهات السياحية في تركيا. عندك مثلا باموكالي، مش هتلاقي اتوبيس مباشر اليها من اسطنبول، لانها قرية صغيرة. لازم تاخد اتوبيس الى مدينة “دينيزلي”، ولما توصل محطة الاتوبيس تدور على ميكروباص رايح باموكالي. طيب وانا هعرف الكلام ده ازاي قبل ما اروح اركب الى مكان؟

يا اما تكون عارفه من موقع Rome2Rio الي اتكلمت عليها في فيديو دي قبل كدة، او تتابع مقالاتي عن الاماكن اللي زورتها قبل كدة، او لما تسأل في محطة الاتوبيس هيقولوا ليك مفيش مباشر الى باموكالي، وهيركبوك الاتوبيس الي يوديك دينيزلي. لا تقلق.

قطارات تركيا

للاسف لم تتاح لي فرصة ركوب قطارات داخل تركيا، ولكن هكتب عنها مقالة اول ما اجربها ان شاء الله. ده الموقع الرسمي للقطارات لو حد مهتم يشوف تذاكر القطر.  اغلب المدن السياحية ممكن الوصول ليها بالاتوبيسات وهى دائما ارخص.

8

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec