17
May-2017

دليلك الشامل لشراء تذاكر طيران رخيصة الى تركيا وداخلها

تركيا   /  

تذاكر الطيران طبعا اكبر جزء من تكلفة اي رحلة دلوقتي. انا طبعا كتبت مقالات كتير بخصوص افضل طريقة لايجاد ارخص تذاكر طيران، تطبيقات، مواقع، استراتيجيات، اخطاء شائعة.لايجاد اي تذاكر طيران من اي بلد الى تركيا او اي حتة في العالم اقرا المقالات كلها الي في اللينك ده.

المقالة دي هتكون مكونة من جزئين الطيران الدولي الى تركيا والطيران الداخلي داخل تركيا.

١) تذاكر الطيران الدولية الى تركيا

الموقع المفضل بالنسبة لي في ايجاد تذاكر الطيران هو موقع Skyscanner – هو ليس الموقع المثالي لحجز ارخص تذاكر طيران، ولكن محرك البحث الخاص به بيعطي نتائج مختلفة عن باقي المواقع.

كيف تجد تذاكر طيران على سكاي سكانر؟

استخدام خاصية البحث بالدولة بدلا من المطار وخاصية البحث بالشهور بدلا من الايام.

مثال: لو بحثت عن تذاكر طيران من مصر الى تركيا في شهر سبتمبر، ستجد ان هناك تذاكر مباشرة من مطارات الغردقة وشرم الشيخ بداية من ١٥٠ دولار بدلا من القاهرة تذاكر ترانزيت ب١٧٠ دولار (فرق بسيط).

طيران Pegasus

استخدام موقع سكاي سكانر خلانا نعرف ان في طيارات بتروح اسطنبول من الغردقة وشرك الشيخ. ادخل على موقع طيران بيجاسوس علشان تعرف اسعار التذاكر والخدمات المتاحة مع التذكرة في مواعيد سفرك وقارنها باسعار السفر من القاهرة. وطبعاالمقارنة هتشمل تذكرة اتوبيس لحد شرم او الغردقة ووقت في الطريق وكدة. لو الفرق اكتر من ٥٠ دولار، توكل على الله وروح سافر من هناك.

ارخص سعر على طيران بيجاسوس الاقتصادي Basic ومسموح تسافربشنطة صغيرة (hand bag) وزنها ٨ كيلو فقط. ولكن ممكن تزود شنطة وزتها ٢٠ كيلو ب٦ دولارات فقط.

الطيران المباشر من القاهرة

الطيران المباشر من القاهرة متاح يوميا عبر خطوط طيران مصر للطيران والخطوط التركية. لكن في شركة ثالثة اسمها “طيران النيل”، والتي تعتبر ارخص طيران مباشر حاليا الى اسطنبول من القاهرة – ولكن متوفر ٤ ايام في الاسبوع فقط. الرجاء مراجعة موقع الشركة لمعرفة جدول الرحلات من هذا اللينك. قارن بين اسعار الثلاثة شركات على موقع سكاي سكانر قبل الشراء.

الطيران الغير مباشر من القاهرة

هتلاقي احيانا شركة الطيران اليونانية بتقدم تذاكر ترانزيت عن طريق عاصمتها اثينا وباسعار ٣٠٪-٤٠٪ اقل من الطيران المباشر. المشكلة ممكن تكون في حاجتين: ساعات الترانزيت في مطار اثينا قد تكون طويلة جدا، ثاني حاجة (فرصها ضعيفة جدا دلوقتي) ان ممكن تتمنع من ركوب الطيارة لو جواز السفر ابيض وشاكين في نواياك في اللجوء اثناء الترانزيت في اثينا. لمعلومات اكتر، اقرا المقالة دي كويس “ممنوع من الترانزيت في اوروبا”.

مطارات اسطنبول

المطار الدولي الرئيسي في اسطنبول هو مطار اتاتورك، والذي يقع في الجزء الاوروبي من اسطانبول. تصل اليه شركات الطيران الدولية من القاهرة والاسكندرية واغلب عواصم العالم. يبعد حوالي ٢٢ كم من وسط العاصمة ويحتاج حوالي ٤٠ دقيقة للوصول اليه بالاتوبيس او المترو.

المطار الدولي الاصغر هو مطار صبيحة – ويقع في الجزء الاسيوي من اسطنبول. يقع على بعد ٤٤ كم ويحتاج حوالي ساعة ونصف للوصول اليه – على حسب الزحمة. لازم تتحرك اليه قبل الرحلة ب٣ او ٤ ساعات.

اتوبيسات Havas

دي شركة اتوبيسات في تركيا وعندها اسطول اتوبيسات في مطارات كتير في تركيا، مش اسطنبول فقط، والي بتاخدك من المطار الى وسط المدينة او اقرب محطة اتوبيس تركب منها مواصلات الى وجهتك القادمة. هتلاقيها موجودة في المطارين وبتودي وسط مدينة اسطنبول – ميدان تقسيم الشهير. في اتوبيس بيتحرك بين المطار والميدان تقسيم كل ساعة او نصف ساعة. تأكد من جدول الاتوبيس من السائق او محطة وصولك في تقسيم.

2) تذاكر الطيران داخل تركيا

نظرا لان مساحة تركيا كبيرة جدا، فيها شبكة مطارات مغطية تقريبا كل المحافظات والمدن السياحية. يوجد اكتر من ٤ شركات طيران تغطي تركيا: Pegasus, Turkish Airline, Onur Air, Atlas Global. استخدم موقع Skyscanner علشان تعرف المواعيد والاسعار الموجودة. الارخص عاااااادة هتكون طيران بيجاسوس Pegasus من مطار صبيحة في اسطنبول الي اشهر الوجهات السياحية حول تركيا. معاك كمان شنطة وزنها ١٥ كيلو غير هاند باج ٨ كيلو.

هتلاقي تذاكر رخيصة جدا مثلا الى كابادوكيا من اول ١١ دولار. المشكلة في ايه بقى، ان التذاكر الرخيصة جدا دي بتكون في مواعيد صعبة جدا. يعني تذكرة ب١١ دولار دي ميعادها ١٢.١٠ صباحا من مطار صبيحة وهتوصل مطار قيصرية (كبادوكيا) الساعة ١.٤٠ صباحا. في هذا التوقيت ممكن الاتوبيسات من المطار الى وسط المدينة او محطة الاتوبيس مش شغالة غير بداية من ٦ الصبح. يبقى الافضل انك تاخد التذكرة الي ب١٣ دولار (الاغلى ب٢ دولار) علشان توصل في ميعاد مناسب 🙂

تأكد من وجود مواصلات من والى المطار

زي ما اتكلمنا عن شركة Havas قبل كدة، هتدخل على موقع الشركة وتشوف جدول مواعيد الاتوبيس من ميدان تقسيم الى مطار صبيحة وبعدين تشوف جدول الاتوبيس في مطار وصولك في قيصري او غيره. ده الموقع الرسمي للشركة وهتلاقي عليه جميع الخدمات في جميع المطارات ومواعيدها وتذاكرها.

اعمل Self Check in

مطار صبيحة الي بيطير منه اغلب الطيران الداخلي الرخيص مطار زحمة جدا. علشان كدة وفروا خدمة self chekc in في المطار للركاب الي مش معاهم شنط ومعاهم هاند باج فقط. مكنة بشاشة بسيطة جدا. بتدخل اسمك ورقم رحلتك وهتلاقي تذكرتك، تدخل بيانات باسبورك وتطبع الboarding pass بتاعك بنفسك وتتوجه على بوابات المغادرة مباشرة. ممكن تكون قبل الرحلة بتاعتك بساعة وهتلحق تركب عادي. لو معاك شنطة وهتعمل ليها check in في الطيارة وهتاخد boarding pass من مكتب شركة الطيران counter، يبقى لازم تكون قبل الرحلة بساعتين على الاقل في المطار.

اعرف ازاي مطار الوصول المناسب

وجهات سياحية كتيرة مشهورة في تركيا ولكن مطارتها مش بنفس الاسم خالص. يعني علشان تروح كابادوكيا تاخد طيارة الى قيصرية – علشان تروح باموكالي تاخد طيارة الى دينيزلي، مارماريس و فتحية هتاخد طيارة لمطار دالامان. استخدم موقع Rome2rio علشان تعرف مطارات الوصول الاقرب لاي وجهة سياحية انت بدور عليها في تركيا. واقرا مقالاتي المفصلة عن كل مكان علشان تعرف معلومات اكتر.

من اسطنبول الى اي مكان، الطيران ارخص من الاتوبيس

لما تكون مسافر من اسطنبول او الى اسطنبول من اي مدينة تركية، الطيران الداخلي لما تحجزه بدري هيكون ارخص من الاتوبيس واسرع طبعا، لان المسافات في تركيا شاسعة. لازم تعمل برنامج رحلتك الى تركيا بتذاكر الطيران الداخلية، ولكن اعرف تفاصيل مواعيد الاتوبيس من المطارات الى وسط البلد او محطة الاوتوبيس الرئيسية.

طيران بين مدن تركية غير اسطنبول

لو هتسافر بين مُدن سياحية غير اسطنبول، استخدم الاتوبيس، لانك اغلب الظن هتحتاج تعمل ترانزيت في اسطنبول علشان تروح طيران من مدينة لآخرى. لان مفيش طيران مباشر من مدن تركية الى مدن اخرى تركية الا من بلاد قليلة زي انقرة وازمير وانطاليا مثلا. استخدم skyscanner لمعرفة مواعيد الرحلات واسعارها وقارنها بالاتوبيس وقتا ومالا.

في رحلتنا القادمة مثلا، هنروح من كابادوكيا الى باموكالي بالاتوبيس، لان الطيران هيكون غالي ومحتاج ساعات ترانزيت طويلة ومواعيده غير مناسبة على الاطلاق. وممكن كمان توصل على مطار اتاتورك في اسطنبول وتروح تركب من مطار صبيحة. احسبها كويس قبل ما تاخد قرار زي ده. لمعرفة كل حاجة عن اتوبيسات داخل تركيا، اقرا المقالة المهمة دي.

الخلاصة

اعمل خطة رحلتك لتركيا واحجز تذاكر الطيران بتاعتك بدري علشان تلاقي تلاقي اسعار كويسة. خطط تحركاتك بشكل كويس علشان تقدر تشوف حاجات متنوعة في تركيا.

0

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec