13
Sep-2017

كل حاجة عن اسطنبول في ١٢ صورة

١- التاشيرة

تاشيرة تركيا للاسف اصبحت رخمة بسبب مواعيد سفارتها بقت متأخرة في مواسم السفر العالية. هيكون مطلوب منك تدخل على موقع السفارة وتسجل بياناتك في السفارة في القاهرة او القنصلية في الاسكندرية وتكلفتها ٦٠ دولار. تكون مجهز حجوزاتك المبدئية للطيران والفندق وكشف الحساب (١٠ الاف جنية) وجواب العمل علشان هترفعهم upload علي الموقع وانت بتقدم. لو انت طالب او مش مكتوب مهنة في الباسبور، يبقى لازم تجيب دعوة زيارة علشان تعمل تاشيرة زيارة (شركة “عالم انجاز” بتساعد في الاجرائات). لو طلعت التاشيرة، بتروح المجمع علشان تعمل التصريح الامني المطلوب من جميع المصريين المسافرين من جمهورية مصر العربية.

لو سنك تحت ال٢٠ او فوق ال٤٥، او معاك تاشيرة امريكا او اوروربا، ممكن تستخرج تاشيرة تركيا اونلاين ب٢٠ دولار بدون اي اوراق او اثباتات من اي نوع.

لمزيد من التفاصيل واللينكات لكل المواقع دي، ادخل على اللينك ده

٢- تذكرة الطيران

لحسن حظنا ان شركة الطيران الاقتصادي التركية “بيجاسوس” بتطير من مطارات شرم الشيخ والغردقة الى مطار صبيحة – اسطنبول مباشرة. بكل سهولة ممكن تلاقي تذاكر طيران رايح جاي من اول ٢٣٠٠ جنية. لطيران النيل كمان بيطير من القاهرة الى مطار صبيحة في اسطنبول بسعر منافس جدا(٢٥٠٠ جنية) عن مصر للطيران والخطوط التركية الي بتطير الى مطار اتاتورك. معلومات اكتر عن ازاي تلاقي تذكرة رخيصة الى تركيا، المقالة دي فيها كل التفاصيل واحدة واحدة. 

٣- ميعاد السفر

اسطنبول طقسها يجمع بين اوروبا والبحر المتوسط. حار جاف صيفا – بارد ممطر شتاء – ولكن درجات الحرارة بتنزل لتحت الصفر احيانا ويحدث تساقط ثلوج في الشتاء. افضل اوقات الزيارة الربيع ثم الخريف، درجات الحرارة بتكون معقولة وبتكون المدينة والمزارات اقل ازدحاما. الصيف بيكون حلو للزيارة طقسا، ولكن الزحام بيكون شديد والاسعار مرتفعة بسبب توافد السائحين من كل مكان (خاصة دول الخليج). لو عايز تنزل بحر وتصيف، يبقى تروح في الصيف تزور اسطنبول وبعض المدن الساحلية الي فيها شواطئ. لو عايز جو شتوي مختلف، زورها في الشتاء والخريف، لان الجبال حولها (بورصة مثلا) بتكون مميزة جدا للزيارة.

٤- اماكن الاقامة

اسطنبول فيها  جميع مستويات الاقامة، هتلاقي هوستلز من اول ٧ دولار لحد ١٥ دولار السرير في الليلة. الهوستلز الي حبتها هناك كان Cheers downtown & Bahaus Guesthouse Hostel. هتلاقي كمان فنادق ٣ نجوم كويسة جدا من اول ٣٠ دولار في الليلة. ترشيحي للعائلات بديل للفنادق ممكن يكون شقة كبيرة من خلال موقع airbnb، علشان هتكون موفرة. ممكن تلاقوا عليه اوضة حلوة ومريحة ونضيفة ب٢٠ دولار الليلة. اشهر مكانين للاقامة السياحية في اسطنبول هم ميدان تقسيم (شارع الاستقلال) وميدان السلطان احمد. وانت بدور على مواقع الحجز المختلفة، خليك في المكانين الي ظاهرين على الخريطة دول. المنطقتين كبار جدا، ممكن تلاقي حد بيقول انه في ميدان تقسيم، ويكون بعيد ربع ساعة من الميدان. عادي جدا. لا تتوقع حاجة بتطل على الميدان. ادخل على اللينك ده علشان تعرف كل حاجة عن طرق ايجاد ارخص هوستل، فندق، او شقة. 

٥- العملة واللغة

لحسن حظنا (كمصريين بعد تعويم الجنية) ان الليرة التركية بتضعف بقالها كام سنة. حاليا الدولار بحوالي ٣.٤ ليرة تركي. ممكن تغير في احدى مطارات اسطنبول لما توصل مباشرة. السعر مش فارق كتير عن محلات الصرافة في وسط البلد. غير ١٠٠ دولار اول ما توصل وابقى غير بعدين من وسط البلد. ممكن طبعا تسحب من كارت atm الخاص بالبنك بتاعك.

استخدام الكريدت كارد متوفر في محلات ومطاعم كتير (خاصة البراندات والاماكن الكبيرة)، لكن المحلات الصغيرة احيانا كتير لا تقبل البطاقات البنكية الدولية. اغلب الظن ان اصحاب المحلات الصغيرة بيتحججوا ان المكنة الي عندهم بتقبل كروت الدفع من البنوك التركية فقط علشان تدفع ليهم كاش فقط. ادخل على اللينك ده لمعرفة معلومات اكتر عن البطاقات البنكية في السفر ونصائح اخرى كتير عن الفلوس وانت مسافر. https://goo.gl/avmkf4

معظم الاتراك للأسف لم يدرسوا الانجليزية على الاطلاق غالبا. بالعافية ممكن تلاقي حد بيتكلم انجليزي في المناطق السياحية. احسن واحد هيكون موظفي الاستقبال في محل اقامتك، غير كدة بيكون صعب اوي. كلمات عربية قليلة نتشاركها مع اللغة التركية. اشهرهم “شاي اكرام” – يعني عايز شاي من ابو بلاش وانت في المطعام. “الحساب” – الي هو الحساب برضو.

علشان كدة عليك وعلى تطبيقات اللغة التركية والعربية او الانجليزية، لازم تنزل برامج لترجمة الكلمات والصور. المقالة دي فيها تطبيقات اللغة الي تسهلك صعوبات اللغة في اي بلد انت مسافرها. 

٦- الاتصالات والانترنت

بالرغم من ان تركيا من ارخص البلاد الاوروبية الي سافرتها، لكن الانترنت كان غالي بشكل عجيب هناك. متوسط سعر ال٥ جيجا مثلا ب٥٠٠ جنية. شركات الاتصلات هناك ٣، vodafone، turk telecom, turlcell. ارخص واحدة فيهم كانت turk telecom، ولكن ايجاد سعر رخيص ليها بيكون صعب كمان. انا اشتريت خط ٥ جيجا وانا في مدينة طرابزون ب٢٠٠ جنية. لكن السعر ده عمري ما شوفته في اسطنبول.

نصيحتي ليك انك لا تشتري خطوط موبايل من المطار، لانها هتكون اغلى من وسط البلد. خزن مكان الفندق بتاعك على الخريطة offline واتحرك بالGPS لحد ما توصل الفندق. هتنزل تلف لفة علي محلات التليفونات وتسأل على الاسعار. اول ما بيعرفوا انك سايح، بيقولك سعر عالي. ما تحاولش تفاصل كتير علشان كتير منهم سخفاء جدا وبيتنحوا.

الواي فاي متوفر في اماكن الاقامة اكيد وشغال كويس معظم الوقت. المطاعم والكافيهات فيها واي فاي برضو، لكن المشكلة انه احيانا كتير بيكون راوتر واي فاي بس، مافيهوش انترنت شغال. لو عايز انترنت في اي مطعم او كافيه، ما تطلبش اي طلبات قبل ما تتوصل بالواي فاي وتتأكد انه شغال. لاني لبست كتير في الموضوع ده وانا هناك.

٧- المواصلات الداخلية

– من المطارات: اسطنبول مدينة كبيرة جدا وفيها شبكاااات مواصلات داخلية ضخمة جدا لخدمة ٢٠ مليون مواطن ومقيم وزائر. لما بتوصل على اي مطار في اسطنبول، سواء اتاتورك او صبيحة، هتلاقي اتوبيسات havas خارج مبنى الوصول بتاخد الركاب الى ميدان تقسيم مباشرة. التذكرة بحوالي ٤ دولار (١٥ ليرة ).

– داخل البلد: مترو الانفاق والترام والاتوبيسات والمراكب كمان ليهم كارت موحد Istanbul Kart بتشتريه بدولار ونص مثلا (٥ ليرة) من اي كشك قريب من محطة اتوبيس او مترو او اتوبيس وتشحنه زي ما انت عايز من الكشك او من مكنات صفراء عند مدخل كل نوع مواصلات. الشحن سهل جدا. تنح قدام المكنة وشوف الناس بتعمل ايه واعمل زيهم. بسيطة جدا 🙂 . التذكرة بتتراوح من ٢ ل ٥ ليرة. المواصلات نسبيا ارخص من بعض المدن في اوروبا. للاسف لا يوجد تذكرة يومية او اسبوعية موفرة. لازم يتخصم من الرصيد عند استخدام كل مواصلة.

– تطبيقات مهمة: انا كنت بستخدم جوجل Maps وكان شغال ٩٠٪ من الوقت، لكن احيانا كان بيبقى غبي شوية. في تطبيقات للمواصلات الداخلية في اسطنبول زي  Trafi مثلا. التطبيقات هتقولك تركب انهي خطوط مترو، او ترام، او اتوبيس. لو بتحتاس في استخدامها او مش معاك انترنت، اعرف انت عايز تروح فين واسال الناس الي عندك في الفندق او الهوستل وهم هيقولولك هتركب ايه. اوبر كمان موجود وتطبيقات تانية ارخص منه زي Bitaksi، ممكن تستخدمهم وقت الطوارئ بالليل لو المواصلات العامة مش متوفرة.

محتاجها فعلا؟  استخدامك للمواصلات الداخلية هيعتمد على برنامج رحلاتك في المدينة وايام زيارتك وعايز تزور ايه وتعمل ايه. لو قاعد يومين فقط، ممكن تتمشى في كل الاماكن السياحية في وسط البلد. التمشية حلوة جدا في اسطنبول. لو عايز تروح مولات بعيدة للشوبينج او تعدي للجانب الاسيوي تزور حاجات، يبقى لازم هتشتري كرات المواصلات وتعتمد عليها.

٨- الاكل والشرب

حلال الله اكبر!!! كل الاكل في تركيا حلالل. علشان كدة وجهة مفضلة لاهل المملكة العربية السعودية. الاكل التركي فيه حاجات كتيرة مشتركة مع مطابخنا المصرية العربية، خاصة الشاورما. عند كل ناصية بياعين شاورما لا ينتهوا. في اختيارات لوجبات كتيرة ورخيصة. ممكن ب١٠ دولار تاكل مرتين في اليوم اكل حلو جدا. انا كنت عامل قبل كدة مقالة كاملة عن احلى ١٠ حاجات ممكن تاكلها باقل من ٥ دولار، هتلاقوها في اللينك دي.

البقالة: حيث اني بحب اوفر واشتري اكل من البقالة علشان الفطار او السناكس، كنت دائما بشتري حاجات من البقالة او الفكهاني. اغلب محلات الافراد في منطقتي تقسيم والسلطان احمد … اسف، مش اغلبهم، بصراحة كلهم، نصابين. اول ما يعرف انك سايح، بيقول السعر الي على مزاجه. ممكن يوم ادخل اشتري حاجة ب٢ ليرة وتاني يوم اشتريها من نفس البياع ب٣ ليرة. محلات السوبر ماركت الكبيرة Chains، زي مثلا حاجة اسمها BIM، بيكون عندهم جهاز سكانر بيقرا البضاعة ويقول الاسعار …. اختراع عجيب لا يعرفه اصحاب البقالات …. هتلاقي الاسعار في المحلات دي محددة ورخيصة.

٩- الزيارات السياحية

اسطنبول طبعا مليانة اماكن سياحية كتيرة ومتنوعة جدا. ممكن في يومك الاول تزور منطقة ميدان تقسيم وشارع استقلال وبرج جلاتة Galata Tower. تذكرة زيارته ب٧ دولار (٢٥ ليرة). المنظر من فوق يستحق. كمل تمشية بعده لحد ما تطلع على البحر وتوصل كوبري جلاتة. هتشوف اسطنبول كلها يمينك وشمالك من هناك. عدي الكوبري مشي وخد مركب من محطة ايمنونوEminönü (كل سندوتش سمك هناك) علشان تعمل رحلة في خليج البوسفور لمدة ساعتين. التذكرة بحوالي ٤ دولار (١٥ ليرة). ممكن بعدها تزور “البازار المصري” الي جنب محطة امنونو تشوف البازارات التركية. ممكن تختم يومك بحمام تركي في احد الحمامات المنتشرة في اسطنبول، ولكن احذر سيئي السمعة.

يومك التاني تبدأه من ميدان السلطان احمد وتزور مسجده الازرق المهيب. دخوله مجانا. يقابله الناحية التانية متحف ايا صوفيا، الي كان كنيسة وتحول الى مسجد وبعدين تحول الى متحف. تذكرة دخوله ١٢ دولار (٤٠ ليرة). المكان متحف لان يجمع بين اركانه كنيسة ومسجد. لازم زيارته وقراءة تاريخ فتح القسطنطينة قبلها. لو انت من هواة مسلسل “حريم السلطان” يقى لازم تزور الباب العالي، مقر حكم السلاطين العثمانيين، “توب كابي”. ممكن يحتاج منك ساعتين او اكتر. تذكرته بحوالي ١٢ دولار (٤٠ ليرة). يوجد كارت لزيارة زيارات اسطنبول المهمة ب٨٥ ليرة، بيه ممكن تزور حاجات كتيرة اوي والمزارين دول منهم. لو ليك في المتاحف والزيارات التاريخية الكتيرة، اشتري الكارت ده من اي مكان من الاتنين دول. بعد كدة ممكن تزور الجراند بازار (قبل ٧ بالليل) وتتفرج على التحف والهدايا والبهارات التي لا تنهي تحت سقف البازار.

لو معاك يوم تالت في اسطنبول، بالامكان زيارة مسجد السلطان سليمان القانوني وكذلك مسجد السلطان ايوب، تحف معمارية للمعمار سنان. التمشية في شوارع اسطنبول ممتعة لوحدها، شوارع اوروبية بنكهة اسلامية. قال عنها نابليون لو كان العالم كله دولة واحدة لكانت اسطنبول عاصمته. ممكن كمان تزور قصر دولمة بهشت كمان من القصور الاوروبية الطراز الي حكم منها تركيا آواخر السلاطين العثمانيين المتأثرين بالاوروبيين ومن بعدهم مصطفى كمال اتاتورك . قصر مهيب وفخم جدا، يذكرني بقصور شاهات ايران في طهران. ومن بعده كمان تزور منطقة ارتاكوي وقت الغروب، تتعشى وتتمشى هناك.

لو معاك يوم رابع كمان، ممكن تعمل زيارة الى جزر الاميرات Adalar بالتركية. هتروح محطة كراكوي Karaköy او كاباطاشKabataş في اسطنبول وهتلاقي مراكب كتير بتروح جزر الاميرات. ارخبيل من ٩ جزر متفاوتة الاحجام، ٣ منهم مأهولين بالسكان. التذكرة لا تتعدى ١٠ دولار رايح جاي. خد صورة من جدول المواعيد بتاعك علشان تعرف اخر ميعاد هترجع فيه ايه. الجزر فيها شواطئ للسباحة لو انت رايح في الصيف. المركب بتقف في اكتر من جريزة في الطريق، انزل في اكبر جزيرة فيهم لانها احلاهم واشهرهم، اسمها Büyükada. تعتبر رحلة معروفة لسكان اسطنبول ليبعدوا عن ضوضاء المدينة وتلوثها. غير مسموح بالسيارات هناك. ممكن تركب حنطور اللفة ساعة ب١٠ او ٢٠ دولار او تأجر عجلة وتنطلق في الجزيرة والساعة ب٤ دولار. البيوت والشوارع والحناطير عاملين جو جميل للجزيرة فعلا.

١٠- النايت لايف

اسطنبول فيها مناطق لا تنام بسبب النايت لايف، خصوصا الي فيها سياح كتير في الصيف. ابدأ من شارع الاستقلال بالليل علشان بيكون حاجة تانية خالص. شوية اماكن سهر وبارات وكلبز clubs، بس احترس من النصابين الي هياخدوك كلبز سيئة السمعة. كل المنطقة بتاعت Beyoğlu الي فيها ميدان تقسيم واستقلال مليانة حاجات متنوعة ومتفاوتة الاسعار كمان. البارات الرخيصة بتكون من غير تذاكر اكيد وبيكون فيها مزيكا لايف احيانا. الديسكوهات بتكون بتذاكر، خصوصا في الويك اند. بعض الاماكن الغير سياحية بتشترط الدخول يكون couples، لكن الاماكن المستهدفة السياح بترحب بالسناجل الجناتل.

– انصحم تشترك في موقع couchsurfing او موقع meetup علشان تشوف لو في حفلات او تجمعات لمسافرين تقدر تشترك معاهم فيها.

– خدمة لطيفة جدا بتقدمها الهوستلز، خصوصا للشباب او المسافرين لوحدهم، اسمها pub crawl بيجمعوا الناس يتعرفوا على بعض ويلفوا على بارات كتير متنوعة يشربوا عصير برتقال او جوافة. ممكن تجربوه في اسطنبول، علشان هيعرفوكم على احسن اماكن سهر حلوة.

– في كمان سهرات زي شارع الهرم عندنا، عشاء ورقاصة وشيشة، ودول ليهم رحلات في البوسفور وممكن تناسب العائلات.

– سهرات مزيكا ورقص صوفي ممكن تكون اختيار حلو جدا لناس الي بتحب المزيكا والرقص الصوفي. حفلاتهم بتكون حول منطقة السلطان احمد.

١١- الشوبينج

لو انت من هواة الشوبينج، يبقى محتاج يومين تلاتة كمان في اسطنبول. شارع استقلال كله محلات لجميع الماركات العالمية والتركية. يوجد الكثير من المولات داخل المدينة ولكن اسعارها مثل محلات الشوبينج في شارع استقلال، مفيهاش تخفيضات كبيرة. لازم تروح مولات بعيدة وخارج اسطنبول علشان تلاقي تخفيضات كويسة. احسن مولات عرفتهم من هواة الشوبينج: هستوريا مول في الفاتح، جلاتا مول، اكسراي مول في عثمان بيه، الجوهرة مول، فيستا مول، سوق باكيركوي الاسبوعي.

لو عايز تعمل شوبينج لهدايا، انصحك تشتري ملبن تركي، اقيم واحلى هدية، وخصوصا الي بالفستق. نصيحتي لا تشتري الملبن المعلب الجاهز، اشتري الملبن الطازة الي تقدر تدوقه قبل ما تشتريه. اغلى شوية ولكن ثمنه فيه.

١٢ – زيارات حولها و بعدها

حول اسطنبول: شركات سياحة كتير بتنظم رحلات يوم واحد خارج اسطنبول لزيارة مدينة بورصة او قرية سابنجا. مشهورين جدا وبيحتاجوا يوم كامل للزيارة. تكلفة الرحلة عادة بتكون ٥٠ دولار للفرد شاملة الغذاء. لو انت قاعد اسبوع في اسطنبول، يبقى تعمل كل واحدة منهم في يوم منفصل.

مدن بعد اسطنبول: لو رحلتك في تركيا طويلة او مش عايز تقعد في اسطنبول اكتر من يومين، الاختيارات عندك غير محدودة. لو انت في الصيف، توجه للساحل التركوازي التركي في الجنوب. انصحك بمدينة “فتحية” Fethiya وشاطئ اولودنيز Oludniz الشهير. احلى من انطاليا في وجهة نظري واجدد. ممكن كمان تروح كبادوكيا او باموكالي في وقت من اوقات السنة. اماكن خيالية مفيش زيها في العالم. المقالتين دول فيهم كل حاجة عنهم بالتحديد. ممكن تطير طيران داخلي ب٥٠ دولار رايح جاي للاماكن دي. لا تتردد في الخروج من اسطنبول.

1

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec