30
May-2017

زيارة باموكالي في اقل من ٢٤ ساعة

تركيا   /  

باموكالي هي ثاني اعجب الحاجات الي لازم تشوفها في تركيا بعد كبادوكيا.

لانك مش هتشوف معجزة بالحجم ده ولا الجمال ده غير في تركيا

ما هي باموكالي

من كبر حجمها ولونها الابيض، اول ما توصل باموكالي هتفتكر نفسك تسلقت سلسلة جبال شاهقة ودي قمتها المغطاة بالثلوج. هي عبارة عن هضبة كبيرة لونها ابيض علشان مكونة من ترسيبات الكالسيوم. المنطقة فيها ١٧ عين طبيعية سخنة جدا (درجة حرارة ٣٥ الى ١٠٠) – فضلت ترسب كالسيوم على مدى عشرات الآلاف من السنين لحد ما عملت الشكل ده كله. كونت فوقيها كمان حمامات سباحة طبيعية من الماء الساخن. تعجز الكلمات عن وصفها بصراحة – انا هخلي الصور والفيديوهات دي تتكلم عنها احسن.

حمامات سباحة طبيعية على تلال من الكالسيوم المرسب

ارتفاع باموكالي كبير جدا وتحتاج منك حوالي كيلومتر من Hiking

فيديو ٩٩ ثانية عن باموكالي

الوصول الى باموكالي

باموكالي هي قرية صغيرة تقع بجوار مدينة دينيزلي، في الجنوب الغربي من تركيا. ممكن الوصول اليها من اسطنبول عن طريق الطيران او الاتوبيس الى مدينة دينزلي، ومنها بامكانك ان تصل الى باموكالي بكل سهولة.

الطيران الى دينزلي

بامكانك ان تذهب من اسطنبول الى دينزلي بالطيران في ساعة وربع الى مطار دينزلي. طيران بيجاسوس يطير من مطار صبيحة باقل من ٣٠ دولار للاتجاه الواحد، بينما يطير طيران التركية من مطار اتاتورك بضعف الثمن. الرجاء الاطلاع على هذه المقالة للمزيد عن تذاكر الطيران والمطارات في تركيا. انصحك برحلة طيران بيجاسوس، لانها ٩.٢٠ صباحا، لانك لا تحتاج في باموكالي الا يوما واحدا، فابدأه باكرا. هتلاقي اتوبيس في المطار يوديك الى محطة الاتوبيس في دينزلي ومنها تاخد ميكروباص الى باموكالي.

الاتوبيس الى دينزلي

لو كنت رايح باموكالي من اسطنبول، الافضل انك تروح بالطيران ب٢٧ دولار مثلا (لو حجزت بدري) لان ارخص تذكرة اتوبيس ٢٢ دولار وبتاخد حوالي ١٠ ساعات ونص. لو اتأخرت ومالقتش طيران رخيص ومش قدامك غير الاتوبيس، يبقى اتوبيس شركة Metro الي بيطلع بالليل (١٠ مساء) من اسطنبول علشان توفر ثمن ليلة بيات في فندق وتوصل الصبح تبدأ يومك من بدري. لو ما نمتش كويس في الاتوبيس، ريح ساعتين في فندقك الجديد وابدأ اكتشاف المدينة على طول. اقرا المقالة دي علشان تعرف كل حاجة عن تذاكر الاتوبيسات داخل تركيا. يوجد الكثر من الميكروباصات الي تاخذك الى باموكالي من محطة الاتوبيس العامة في دينيزلي.

الاقامة في باموكالي

لو قررت المبيت ليلتك في باموكالي، هتلاقي الكثير من الفنادق والهوستلز. اختر ما يبعد عن مزار باموكالي ٥ او ١٠ دقائق سيرا على الاقدام. القرية صغيرة واختيارات الاقامة مش كتير. انا نزلت في فندق وهوستل متواضع اسمه Kale Hotel – السرير في غرفة ١٠ سراير كان ب٧ دولار في الليلة.

زيارة باموكالي

وانت رايح زيارة باموكالي لازم تكون مستعد ولابس المايوة بتاعك، ومعاك شنطة فيها فوطة ولبسك لما بعد الاستحمام. هتلاقي الهضبة البيضاء المهيبة اول ما توصل المدينة. امامها بحيرة كبيرة وحولها مطعم وكافيتريا للفيو على الباموكالي. هتروح المدخل وتشتري تذكرة ٣٥ ليرة (١٠ دولار). هتقلع الجزمة وانت طالع علشان الارض مبلولة مية و للمحافظة عليها ممنوع تدوسها بالجزمة.

هتلاقي المية متدفقة على بعض اجزاء الطريق، ولكن هتلاقيها بادرة مش سخنة. ليه بقى؟ لان المية السخنة بتطلع من العيون الي فوق، بتفقد حرارتها في الطريق وهي نازلة. هتلاقي درجة حرارة المية بترتفع بالتدريج وانت طالع للقمة.

رغم مظهرها الابيض الاملس ورغم جريان المياة فوقها، الا ان الارض خشنة معظم الوقت. خد بالك لان احيانا ممكن تكون مزحلقة في بعض الاحواض. “احواض ايه؟” وانت في الطريق للقمة هتلاقي يمكن ١٠ حمامات سباحة طبيعية تشبه البانيوهات الكبيرة. بامكانك السباحة فيها طبعا. الاحواض السفلى ابرد من الاحواض العليا. انتظر الوصول فوق علشان المية تكون سخنة وممتعة. الاسم النجليزي ليها “white travertine pools”.

هتفضل مكمل طلوعك للقمة وهتفضل منبهر بالحجم الكبير لقلعة القطن – وده ما تعنيه كلمة “باموكالي”.

زيارات ما وراء باموكالي

بعد ما توصل قمة باموكالي وتكون قضيت وقتك في الاتستمتاع بجمالها وبالسباحة في احواضها السخنة، هتلبس جزمتك تاني وتكمل زيارة بقايا مدينة “هيروبوليس” الاغريقية/الرومانية القديمة، والي كانت مدينة SPA زمان علشان عيون المية  الي في المكان. هتلاقي الاماكن التالية بالترتيب:

١) متحف اثار مدينة هيروبوليس

تذكرة دخول منفصلة ب٥ ليرة (اقل من دولارين) لزيارة ثلاثة متاحف، والتي تحتوي على اثار مكتشفة من مدينة هيروبوليس. القليل من التماثيل السليمة والكثير من التماثيل المتكسرة، وخصوصا الفاقدة للرأس. متحف اخر للمقتنيات الصغيرة من ادوات مطبخ وحلى ذهبية وعملات معدنية.

٢) حمامات كيلوباترا

من الواضح ان حمامات كيلوباترا ده كان البراند الي بيطلق على اي مكان فيه مكان استحمام بمية سخنة … لانه موجود في واحة سيوة مثلا مكان اسمه حمامات كيلوباترا ايضا. تقول الاسطورة ان مارك انطوني بنى حمامات سباحة اسطورية مخصوص للملكة كيلوباترا في هذا المكان، ولكن للاسف تهدمت بفعل الزلازل وانهارت الاعمدة الخاصة بيها في قاع الحمام. لحسن الحظ ان الحمامات لسه موجودة ومليانة مية ساخنة مباشرة من العيون الطبيعية حولها. يطلق عليها حاليا  Pamukkale Antique Pools. الدخول لزيارتها مجاني، ولكن الاستحمام فيها له تذكرة منفصلة ب ٣٠ ليرة (٩ دولار). يوجد مكان خاص لتغيير الملابس و Lockers لتخزين الشنط. ممكن تدخل تتفرج عليها ببلاش وتمشي، او تكمل سباحة في بقايا حمام الملكة كيلوباترا. بصراحة هي حمامات اسطورية جدا بسبب العواميد المتكسرة والمتناثرة في قاع الحمام وتستحق الاستحمام فيها.

٣)  آثار مدينة هيروبوليس

بعد زيارة حمامات كيلوباترا، يتبقى لك زيارة بقايا اثار مدينة هيروبوليس. الكثير من بقايا المباني والمعابد، بالاضافة الى بقايا الكثير من الاعمدة. المبنى الوحيد الشبه مكتمل هو مسرح كبير على الطراز الروماني القديم. مسرح نصف دائري يتسع لآلاف الحاضرين، استخدم في الماضى لمشاهدة عروض ترفيهية وقتالية، او حتى اعدامات للمجرمين. ثقافة المسارح الاغريقية/الرومانية انتشرت في جميع المدن والمستعمرات التابعة لها. يوجد مثيلاتها في مصر، ليبيا، الاردن، تونس.

زيارات وانشطة اخرى

١) Pamukkale Paragliding

من اشهر الانشطة في باموكالي هي Paragliding  “القفز بالباراشوت من فوق الجبل”. بالامكان القيام بها مع طيار محترف وتكلفتها ١٥٠ ليرة ($40~). غير مشهورة مثل الباراجليدينج في شاطئ اولودونيز، ولكن لمحبي الانشطة الهوائية، يوجد في باموكالي  امكانية القيام بهذه القفزة، السهلة والممتعة. اذا كنت تنوي الذهاب الى اولودونيز، انصحك بالانتظار والقيام بها هنا. قد تكون اغلى ٥٠ ليرة اضافية (15$) ولكن هتكون اعلى واحلى.

هو ده الباراجليدنج في باموكالي – بس ده مش انا 🙂

٢) باموكالي الحمراء

كما رأيت الباموكالي البيضاء الكبيرة، يوجد في ضواحي قرية باموكالي مكان مشابه لها تماما ولكن حجمه اصغر بكثير ولونه “احمر” لاختلاط الكالسيوم بمعادن اخرى.  بامكانك زيارته باتوبيس نقل عام (اسأل موظف الفندق عن المحطة). للاسف الشديد لم يتسع وقتي لزيارته في زيارتي السابقة.

الشقيقة الحمراء الصغرى لباموكالي

الخلاصة

باموكالي من عجائب تركيا والي مش موجودة في اي مكان في العالم بالحجم ده ولا البياض ده. لا تحتاج منك اكثر من نصف يوم للزيارة او يوم بليلة لو مشوار الاتوبيس هيكون متعب عليك. فنادقها عادة خاوية لان معظم زوارالمدينة يأتون لزيارتها من مدن اخرى مجاورة ويعودون في نفس اليوم.

لو ناوي تروحها من اسطنبول، يبقى اكيد تروح بالطيارة في الصباح الباكر وتقضي فيها اليوم. لو انت فيك صحة لسه، حط شنطك في محطة الاتوبيس وخلص زيارتها في يوم من بدري، وبعد كدة كمل رحلتك الى مدينة اخرى (فتحية ممكن لانها ٤ ساعات بالاتوبيس). لو ناوي تبات فيها، اوصل فندقك، اعمل check in وابدا بزيارة باموكالي ومزاراتها المتعددة بعد ما توصل على طول وبات ليلتك واطلع الصبح بدري على وجهتك التالية. لو عايز تعمل paragliding، يبقى اعمله الصبح بدري قبل ما تبدأ زيارتك.

لو انت في زيارة الى انطاليا او فتحية او ازمير، بامكانك زيارة باموكالي لمدة يوم واحد من الصبح بدري والعودة في نفس اليوم او بيات ليلة واحدة في باموكالي والعودة تاني يوم.

لو انت زيارة الى كبادوكيا، بامكانك وصول باموكالي في اتوبيس ليلي يقطع المسافة في حوالي ٩ او ١٠ ساعات، يعتمد على عدد التوقفات في الطريق. وبعدها يمكنك البيات واكمال رحلتك الى مدينة اخرى.

 الخريطة دي بتوضح المسافات التقريبية من المدن السياحية البعيدة والقريبة من باموكالي

انتظروا باقي المقالات عن باقى المدن التركية

2

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec