29
Dec-2016

أهم ١٠ رحلات تعملهم في جورجيا

جورجيا   /  

photostudio_1482978780045

بعد ما خلصت زيارتك الى العاصمة الجورجية تبليسي في ٤٨ ساعة ومشيت على البرنامج بتاعها في المقالة الي فاتت، تبدأ بقى تعمل رحلات تزور الامكان الرائعة الي في جورجيا. لو هنفترض ان رحلتك في جورجيا اسبوع واحد – هتوصل يوم في الطيارة الشهيرة بتاعت يوم السبت وتقضي السبت والاحد في تبليسي. فاضلك ٥ ايام في رحلتك، تعمل فيهم ايه بقى؟ القرار طبعا هيعتمد على ايه الحاجات الي تحب تعملها وتشوفها وفي اي اوقات السنة انت رايح. في اماكن حلوة في الصيف بس واماكن حلوة في الشتاء بس واماكن حلوة في جميع الاوقات. خليني اخدكم في جولة سريعة كدة على اهم الاماكن والحاجات الي تتعمل فيها واقولكم ازاي ممكن تعملوها باكتر من وسيلة مواصلات. 

شمال جورجيا

المدن الي داخل الصندوق الاحمر هى اهم المزارات في شمال جورجيا. كمل قراءة المقالة وارجع القى نظرة على الخريطة كل شوية.

north-georgia-visits

١- انانوري

هي قلعة وكنيسة في قرية صغيرة تبعد اقل من ساعة شمالا من تبليسي. تطل على بحيرة جميلة وتحيطها الجبال طبعا من كل مكان. زيارتها لا تستغرق اكتر من ساعة.

photostudio_1480943824955

كنيسة وقلعة انانوري

٢- جوداوري

دي من اشهر مناطق التزحلق على الجليد في جورجيا، علشان المنحدرات بتاعتها وممرات التزحلق حلوة جدا، ولكن لمحترفين التزحلق. تقع قرية جوادوري على بعد اقل من ساعتين شمالا من تبليسي (بعد انانوري بساعة تقريبا). مليانة فنادق ومنتجعات للتزحلق. زيارتها في الشتاء هتكون لتجربة التزحلق على الجليد. لما زورتها في ديسمبر كانت قافلة لسه علشان الموسم يبدأ يوم ١٠ ديسمبر (قد يتغير كل عام) واتزحلقنا على كارتونة يوميها 🙂  … اتفرج على فيديو زيارتنا للتزحلق بالكرتونة. ممكن تروح تركب التلفريك وتأجر عدة تزحلق وتجربه بنفسك. ممتع جدا.

20161206_153152

احد فنادق جوداوري يستعد لاستقبال المشتيين (زي المصيفين كدة عندنا)

٣- كازبيجي

هي منطقة اقصى شمال جورجيا، على الحدود مع روسيا، وفيها اعلى قمة في سلسلة جبال القوقاز الي بتحد جورجيا من الشمال. تبعد حوالي ساعتين-تلاتة شمالا من تبليسي. زيارتها ليها طعم مختلف في كل اوقات السنة. في الشتاء طبعا بتكون مكسوة بالتلج من كل اتجاه لكن للاسف ممكن يعوقك ده عن الوصول للقمة وزيارة الدير الاعلى في جورجيا كلها. في باقى فصول السنة، الجبال بتكون الوانها متدرجة من الاخضر الي الوان الخريف الاصفر والابني. اقرب قرية للزيارة والمبيت هى قرية Stepantsminda.

20161206_090602

قهوة الصباح مع اطلالة على قرية ستيبانتسميندا – اظن اسمها سهل اوي

نعمل الرحلة دي ازاي طيب؟

١- شركات سياحة كتيرة اوي بتنظم رحلات يوم واحد لزيارة الثلاثة اماكن في رحلة واحدة. تكلفة الفرد حوالي ٦٠-٦٥ لاري (حاليا الدولار ب٢.٧ لاري) يعني حوالي ٢٢-٢٤ دولار.

٢- تأجير عربية كانت الطريقة الي جربتها مع اصدقائي. ايجار اليوم الواحد من اول ٢٠ دولار العربية العادية الى ٤٠ و٥٠ دولار في اليوم للعربية الدفع الرباعي 4×4 (يعتمد على حجم وموديل العربية). اما تكلفة البنزين فهي تتراوح بين٣٠-٤٠ دولار رايح راجع. لتر البنزين العادي بحوالي 0.6 دولار.

الاوبشن ده هيكون اقتصادي وموفر لو انتوا مجموعة اصدقاء من ٥ افراد مثلا. لان تكلفة الرحلة لو تتراوح من٥٠ الى ٩٠ دولار، يعني تكلفة الفرد هتتراوح من ١٠ الى ١٨ دولار. اوبشن السواقة طبعا ليه متعة تانية خالص. بتقف في اي مكان انت عايزه او تبات في المدينة الي انت رايح تزورها. المشكلة بس ان السواقة هناك محتاجة حرص كبير، خصوصا في اجواء التلج الي بتحتاج عربية 4×4. اتفرجوا على مغامرتنا الكاملة في اليومين الي زورنا فيهم المنطقة دي.

٣- المواصلات العامة متوفرة من الموقف الرئيسي في تبليسي – “محطة ديادوبا Didube” – موقف عبود التبليسي بالزبط. هتلاقي فيه مكروباصات بالجورجي اسمها “مارشروتكا marshrutka” بتروح اماكن كتير اوي. الاجرة لكازبيجي او جوداوري ب١٠ لاري – حوالي ٣.٧ دولار للاتجاه الواحد. يعني رايح/راجع بحوالي ٧.٥ دولار. المشكلة انك مش هتقدر تنزل براحتك في الطريق تشوف المزارات الي على الطريق. ممكن تتوقف في جوداوري الاول تزورها وبعدين تنتظر تركب ميكروباص رايح كازبيجي تزوره وبعدين تاخد ميكروباص راجع من كازبيجي الى تبليسي. لازم تكون اتحركت في اتجاه الرجوع الى تبليسي قبل غروب الشمس بساعة، لان المواصلات مش شغالة ٢٤ ساعة. الاوبشن ده الارخص طبعا ولكن يحتاج بعض الشجاعة. قابلت ناس اكتفت بالذهاب الى كازبيجي فقط والعودة في نفس اليوم. محطة وصول المرشروتكا هي نفس محطة الركوب للعودة الي تبليسي. المناظر على الطريق طبعا حلوة جدا. هتستمتع بالفرجة عليها جدا.

  • نصيحتي تعمل الزيارة بالطريقة الي تناسبك من الطرق التلاتة وترجع تبات في تبليسي.

الفيدوهات دي لرحلتنا في المناطق التلاتة – كازبيجي – جوداوري – انانوري

وسط جورجيا

المدن الي داخل الصندوق الاحمر هى اهم المزارات في وسط جورجيا (مع نقطة صغيرة في جنوبها). كمل قراءة المقالة وارجع القى نظرة على الخريطة كل شوية.

center-georgia-visits

١- متسخيتا

متسخيتا هي عاصمة جورجيا القديمة وتعتبر مهد المسيحية فيها، لاحتوائها على الكاتدرائية الاورثوزوكسية الجورجية Svetitskhoveli Cathedral المبنية من القرن السادس الميلادي. هي من اجمل المدن القديمة الي زورتها في جورجيا لانها تقع على ملتقى نهرين Mtkvari & Argvi. تقع على بعد نصف ساعة فقط من تبليسي. منازلها واسواقها القديمة تستحق الزيارة. تذكرة المرشروتكا ٦ لاري (٢ دولار). زيارة المدينة والكاتدرائية ساعة  او ساعتين. بعد ما تخلص زيارتها، ممكن تزور دير اسمه “جفاري Jvari“، المبني من القرن السابع الميلادي، موجود اعلى التلال المطلة على متسخيتا. يكمن الذهاب اليه بتاكسي تكلفته حوالي ١٢-١٥ لاري  (٤-٦ دولار) رايح/راجع.

شركات السياحة بتعمل الرحلة دي الفرد ب٢٥ لاري (٩ دولار). يعني لو انتوا مجموعة من ٤ افراد مثلا، الرحلة بالمواصلات العامة والتاكسي هتكلفكم ١٢ لاري مكروباص رايح/راجع وتاكسي ٣-٤ لاري نصيب الفرد (١٢-١٥ لاري على ٤ افراد)، يبقى تكلفة الواحد ممكن تكون ١٥ لاري (٥.٥ دولار). لو انت لوحدك، اعملها مع شركة سياحة ارخص.

mtskheta-by-drone-pic

صورة لمدينة متسخيتا والكاتدرائية Svetitskhoveli من الدورن

20161209_133012

بائعة السنيكرز الجورجية – churchkhela – اشهر حلويات جورجيا

فيديو كامل عن المدينة:

٢- جوري

مدينة جوري في وسط جورجيا مسقط رأس جوزيف ستالين، اشهر زعماء الاتحاد السوفيتي. مدينة صغيرة قديمة من القرن الثامن الميلادي، كانت تقع على طرق الحرير قدميا. يتوسطها قلعة كبيرة عالية، والتي تعتبر من اهم مزارتها بعد متحف الزعيم السوفيتي جوزيف ستالين. تتناثر فيها الكثير من الكنائس ذات المعمار الجورجي المتميز. تكسوا منازلها القصيرة الثلوج البيضاء في الشتاء. الذهاب اليها من تبليسي يحتاج حوالي ساعة. تكلفة المارشروتكا من الموقف حوالي ٢ دولار. تحتاج في المدينة لزيارة المتحف والقلعة ثلاثة ساعات مثلا.

20161208_143451

قلعة جوري المطلة على المدينة

20161208_134921

تمثال من السبعة تماثيل للابطال الجورجيين  بجوار القلعة

20161208_155539

سيلفي مع جوزيف ستالين

ابليستسيخ – Uplistsikhe

اهم الزيارات خارج مدينة جوري هي المدينة الاثرية “ابليستسيخ” (انت في الاخر خالص اكتب الاسامي في ورقة علشان مش هتحفظ منهم ولا واحدة لحد ما تزورهم). مدينة محفورة في صخور الجبال وتعتبر من اقدم المدن في جبال القوقاز – يرجع تاريخ انشائها الى قرنين قبل الميلاد. جبل صخري صغير محفور فيه غرف وطرقات ومخازن. زيارتها كانت حلوة جدا. تبعد عن جوري حوالي ١٥ كم. تاكسي من المدينة لزيارتها ١٢-١٥ لاري  (٤-٦ دولار) رايح/راجع. تحتاج ساعة لزيارتها مثلا.

photostudio_1482919041362الغرف المنحوتة في الجبال وتعلوها احد الاديرة

img_20161212_175659

المنظر من فوق المدينة كان اكتر من رائع – الرياح قوية حبتين

  • شركات السياحة بتعمل الاربع الاماكن (متسخيتا، جيفاري، جوري، ابليستيخ) في رحلة يوم واحد من تبليسي بحوالي ٢٠ دولار الفرد.

٣- بورجومي

بورجومي من احلى المدن في وسط/جنوب جورجيا. تقع على حافة سلسلة القوقاز السفلى. تشتهر بنبوع المياة المعدنية Water Springs التي اكتشفها الجيش الروسي سنة ١٨٢٠. المدينة قائمة على صناعة المياة المعدنية ذات الماركة الشهيرة Borjomi والي تعتبر اكتر حاجة بتصدرها جورجيا كلها لاكتر من ٤٠ دولة حول العالم. المدينة تقع في وادي برجومي بين جبلين ويقطعها نهر. ممكن زيارتها في كل فصول السنة، لان المناظر الطبيعية فيها بتختلف اختلاف جذري في كل فصل.

20161226_125559

اعلان very creative في برجومي يوضح الوانها في فصول السنة الاربعة

زيارتي ليها كانت في فصب الشتاء (ديسمبر ٢٠١٦). اجواء مختلفة عن اي حاجة احنا متعودين عليها. الشوارع البيوت الشجر العربيات كلها بيضاء من الثلج. التمشية في شوارعها ممتعة لاقصى درجة. وصلتها بالمارشروتكا من تبليسي في حوالي ساعتين – (دولارين) . انا مش هقدر اوصفها بالكلمات، لكن هخلي الصور دي هي الي تتكلم:

img_20161228_150228_277

تبعد برجومي ساعتين عن تبليسي

20161226_104531_001

الشجر الابيض في كل مكان

screen_677adbb73663fc92_1482740244000

وادي برجومي من الدورن

photostudio_1482923602964

عندما يختلط تراب الارض بالثلج – يكون هذا الطين الثلجي 🙂

  • برجومي بارك من اهم الزيارات الي تتعمل في برجومي، لكن لضيق الوقت لم استطع زيارتها. المرة القادمة اكيد.

٤- باكورياني

باكورياني هي من اشهر منتجعات التزحلق على الجليد في جورجيا، والتي تقع على ارتفاع ١٧٠٠ متر من سطح الارض.. تبعد عن بورجومي جوالي ساعة بالمارشروتكا (٢ دولار) وطريقها اكثر من رائع، لانه افعواني داخل الجبال. الشجر والقرى على الطريق تاخد العقل.

  • الكاكوشكا – هو قطار بخاري قديم عمره اكثر من ١٠٠ عام، يصل بين بورجومي وباكورياني. يقطع المسافة بينهم في ٢-٣ ساعات لانه يسير ببطئ شديد على المنحدرات وسط الاشجار (التذكر اقل من دولار). له ميعادين اتنين في اليوم، واحد الساعة ٧ الصبح والتاني ١١ الصبح. للأسف ملحقتوش علشان توهت وانا رايح. لان فيه محطتين للقطر في بورجومي. المحطة الغلط الي انا روحتها اسمها Borjomi PARKI Railway Station  ولكن المحطة الي بيطلع منها “الكاكوشكا” اسمها Borjomi Railway Station . اتفرجوا على الفيديو ده على اليوتيوب علشان تعرفوا شكله ايه، لحد ما ازورها تاني واصوره بنفسي.

(تذكير: اي مكان مكتوبة باللون ازرق في المقالة بيكون فيه لينك GPS لتطبيق خرائط جوجل – افتح كل حاجة عايز تعملها او تروحها، واعملها SAVE على تليفونك)

20161226_130056

لقد مرت الكاكوشكا من هنا منذ ١٠ دقائق

باكورياني الجميلة

اول ما توصل باكورياني هتلاقي مدينة جميلة اوي مليان محلات ومطاعم وفنادق وخدمات ترفيهية كتير. اهم حاجة في المدينة هي منحدرات التزحلق على الجليد. هتلاقي الي فاتح فرن عيش بيأجر ادوات تزحلق، الي فاتح محل شاورما بيأجر ادوات تزحلق. كل حاجة هنا تدور في فلك التزحلق على الجليد. فضلت اتمشى في المدينة واستمتع بكل المناظر الحلوة الي فيها. الصور ابلغ بكتير من الكلمات:

20161226_161201الكارتة الثلجية دي خارجة من فيلم والت ديزني

20161226_150317_006الحلويات الجورجية والفاكهة المحفوظة

20161226_141127معدات التأجير في كل مكان تقريبا

img_20161228_000457_126

ممكن تأجر حصان ب٤ دولار اللفة الطويلة

20161226_162839الجميع منتظر دوره لصعود التلة للتزحلق

20161226_180310_001نعم فعلتها وتزحلقت 🙂

التزحلق على الجليد

وصلت احدى التلال الي فيها Tracks للتزحلق على الجليد وسيور للرفع اعلى التلال. يعني ايه؟ بتاعه كدة بتمسك فيها بايدك علشان بعد ما تنزل متزحلقا من اعلى التلة، ترفعك تاني وتطلعك بسهولة علشان تتزحلق مرة اخرى. الخمس طلعات بدولار. تاجير المعدات رخيص اوي، ٢ دولار الساعة. لكن للأسف لو معندكش خبرة زي حالاتي هتكون محتاج مدرب بياخد ٦ دولار في النص ساعة. حاولت لوحدي ووقعت بصراحة، لكن مع المدرب كانت ممتعة والله. تجربة كانت اكتر من رائعة بصراحة ودفعت فيها حوالي ٨ دولار. اعتقد ممكن تعرف تتزحلق وتلعب لوحدك بعدها. اتفرجوا على الفيديو اللايف ده عملته من هناك:

درجات الحرارة – طبعا حاسس انك سقعت بعد ما شوفت كمية التلج الي في صور دي. احب اقولك ان درجة الحرارة كانت تحت الصفر بدرجتين تلاتة، مش مميت اوي. شوية تجهيزات بسيط وهتكون في التمام اوي والله. شوفوا المقالة دي عن تجهيزات اللبس لزيارة اوروبا في الشتاء. 

  • انصحك بالبيات في باكورياني ليلة، لان اجوائها مختلفة. لو هتبات في برجومي لازم تمشي عقبل المغرب علشان المواصلات هناك بتقفل بدري.

٥- فاردزيا – Vardzia

اثناء زيارتك بورجومي، ممكن كمان تزور مدينة حجرية قديمةاسمها Vardzia من القرن السابع وترتبط بالملكة الجورجية الشهيرة تامارا. تقع مدينة فاردزيا في جنوب جورجيا، على بعد ساعتين بورجومي. تشبه المدينة المحفورة في الجبال الي زورتها في جوري، ولكن دي كبر واشهر واحلى. لو قدامك تختار بين واحدة من المدينتين، اختار فاردزيا.

  • شركات السياحة بتعمل بورجومي وفاردزيا في رحلة يوم واحد من تبليسي بحوالي ٣٠ دولار الفرد.

غرب جورجيا

منطقة غرب جورجيا فيها اكبر مدينتين بعد تبليسي، كوتايسي وباتومي.

west-georgia-visits

١- كوتايسي

كوتايسي هى العاصمة القديمة لجورجيا وتاني اكبر مدنها. انصحك تقضي فيها يومين لانها مليانة حاجات كتير حلوة تتعمل.

  • كهف بروميتيوس – Prometheus Caves:هو عبارة عن كهف مليان تجاويف وطرقات تحت الارض تمتد ٢ كيلومتر تحت الارض، وتصل اعمق نقطة فيها ٨٠ متر. الكهوف وممراتها مليانة هياكل ذات اشكال مدببة، نازلة من السقف او طالعة من الارض. تكونت الاشكال دي من ترسيبات المية المعدنية فقط. عبر آلاف السنين, تسربت المياة من اسقف الكهف او من الانهار الجوفية تحت الارض, وفضلت ترسب جميع انواع المعادن الي فيها على الاسقف والارضيات. كل سنتيميتر من الاشكال دي بيحتاج حوالي 1000 سنة علشان يتعمل. اقصى عمق للكهف حوالي 800 متر تحت الارض ومشينا حوالي كيلومتر في المتاهات بتاعته.

    شركات الرحلات في جورجيا بتعمل الرحلة من تبليسي بحوالي 36 دولار رايح راجع. لكن انا انصح الي رايح جورجيا, يزور مدينة كوتايسي يوم وليلة, لانها فعلا تستاهل. المدينة تبعد حوالي 3 او 4 ساعات من تبليسي, وبحوالي 4 دولار تذكرة الذهاب بالمواصلات وزيارة الكهف منها ممكن تكلف 10 دولار مثلا, لانها تبعد 20 كيلو فقط منها.

    prometheus-caves-4 prometheus-caves-3 prometheus-caves-2 prometheus-caves-1

    الكهوف والاشكال والاضائات – رائعة

  • اوكاتسي كانيون Okatse Canyon: للأسف حاولنا نزوره في رحلتي في ديسمبر، لكن بسبب الظروف الجوية كان مقفول. الثلج كان مغطي سلالم كتير فيه وكان مغلق لمدة كام يوم. لو روحت في اي فصل من فصول السنة لازم تزوره وتعمل hike داخل الاخدود الرائع ده. اتفرج على الصور بتاعته في اللينك ده. لو رايح في فصل الشتاء، يستحسن تتواصل معاهم للتأكد اذا كان فاتح ولا لأ. لينك الموقع الرسمي.

 الفيديو ده فيه رحلتنا للكهف

  • وسط مدينة كوتايسي يستحق الزيارة جدا، وصولا الى اكبر كنائسها – كاتدرائية باجاراتي، ذات القبب الزرقاء المشهورة.

20161207_173830 photostudio_1482972184222

  • شركات السياحة بتعمل مزارات كوتايسي السياحية + كهف البروميتيوس في رحلة يوم واحد من تبليسي بحوالي ٣٣ دولار الفرد.

٢- باتومي

مدينة ساحلية على البحر الاسود. لا انصحك بزيارتها الا صيفا، حيث البحر والشواطئ الكثيرة.

شرق جورجيا: يشتهر بمزارع العنب ومصانع النبيذ والمزيد من الاديرة والقلاع. لم ازر هذا الجزء بعد من جورجيا. قريبا ان شاء الله.

شير المقالة مع الي رايح جورجيا

الخلاصة

قدامك اماكن كتير تزورها وتروحا خارج تبليسي. حاولت من خلال المقالات والصور والفيديوهات انقلكم الرحلة واجوائها ورحلات كتيرة عملتها (اكتر من ١٠ كمان)، وانتوا عليكم تختاروا البرنامج المناسب ليكم. تاجير عربية تجربة لطيفة جدا وممتعة ومريحة، ولكن تحتاج على الاقل ٤ او ٥ افراد علشان التكلفة. لو مسافر لوحدك او مع واحد صاحبك ومستعدين للمرمطة شوية، ممكن تعملوا كل الرحلات بالمواصلات العامة زي ما شرحت وهتوفروا. لو مسافر لوحدك ومكسل تركب المواصلات، ممكن تعمل رحلات يوم واحد من تبليسي وتزور الامكان الي عجبتك، ولكن التكلفة هتكون اعلى شوية.

تنبيه: بعض الفيديوهات من الرحلة قيد المونتاج. تابعوا الصفحة علشان تشوفوا الفيديوهات الكتير الي جاية في الطريق. 

3

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec