16
Jan-2017

٦حاجات كمان محتاج تعرفهم عن جورجيا

جورجيا   /  

photostudio_1484537988655

في ست حاجات مهمين محتاجين تعرفوهم عن جورجيا وانتوا مسافرين

١- نسافر جورجيا امتى؟

جورجيا ممكن زيارتها كل ايام السنة، لان كل موسم وليه وقته وحلاوته. جورجيا اصلا محاطة بجبال القوقاز السفلى والعليا من الشمال والجنوب، يتخللها بعض السهول لحد الغرب بتاعها المطل على ساحل البحر الاسود.

georgia-map

خلال فصلي الربيع والخريف درجات الحرارة هتكون معقولة للزيارة، لا حر اوي ولا برد اوي، لكن ده لا يمنع وجود امطار في اواخر فصل الربيع مثلا وفي الخريف كمان. اعمل حسابك على جاكيت خفيف للمطر وشمسية احتياطي. شوف  weather forecast للفترة الي عايز تسافرها علشان تعرف احتمالات المطر كل يوم.

انا شخصيا حبيت فصل الخريف في اوروبا، لان الوان الشجر بتكون درجاته متدرجة بين الاخضر والاصفر والذهبي والاحمر والبرتقالي والبني …. الشجر والغابات بتكون الوانها خيالية.

فصل الصيف بقى درجات الحرارة بتكون ٣٠-٤٠، والمناطق الساحلية بتكون رطوبتها عالية جدا، وفي احتمالات سقوط امطار في الساحل (مدينة باتومي).

تجربتي الشخصية في جورجيا بصراحة كانت في فصل الشتاء، في شهر ديسمبر حيث الجبال مغطاة من اعلاها لاسفلها بالثلوج. بصراحة كانت تجربة متميزة جدا، لان الجوء مختلف تماما عن الاجواء الي متعودين عليها في مصر. اتفرجوا على فيديوهات رحلتي في جورجيا، علشان تعيشوا اجواء الشتاء هناك عاملة ازاي.

اكتر حاجة بتخوفنا من السفر في الاجواء الثلجية دي هي ان مش عندنا لبس مناسب للموضوع ده. المقالة دي انا كاتب في ١٠ حاجات لازم يكونوا معاك لو ناوي تروح اوروبا في الشتاء. 

٢- الاتصالات والانترنت 

جورجيا من ارخص دول اوروبا في الاتصالات . اول ما توصل مطار تبليسي او وسط البلد، اشتري خط محلي بحوالي ٤ دولار وفيه ٤ جيجا – شركة Geocell على سبيل المثال. شبكة سريعة ومتوفرة في جميع المدن والجبال الي زورتها في جورجيا. wifi كمان متوفر في كافيهات ومطاعم كتير. ارجع لمقالاتي الكتيرة بخصوص الانترنت والتجوال في السفر واهم التطبيقات الي تستخدمها offline.

٣- العملة الجورجية

عملة جورجيا هي ال “لاري” ويرمز لها Gel – واللاري فيه ١٠٠ تتري. سعر العملة بيتحرك قدام سعر الدولار والاسعار الاخرى. اول ما وصلت جورجيا اول ديسمبر كان الدولار بحوالي ٢.٥ لاري واخر ديسمبر ضعفت وبقت ب٢.٨ لاري. كل ما العملة المحلية تضعف امام الدولار، كل ما يكون افضل بالنسبة لينا. علشان احنا بنسافر بدولارات. اخيرا ممكن نستفيد من ضعف عملة بلد. لكن المشكلة ان في الموسم العالي في فصل الصيف، العملة المحلية بتقوى والدولار ممكن يوصل ٢.٣ لاري. علشان كدة تفادي المواسم الزحمة ممكن يوفر فلوس.

usd-gel-chart

رسم بياني يوصح سعر اللاري مقابل الدولار خلال الخمس سنوات السابقة

 lariالفئات الورقية والمعدنية للعملة الجورجية

تغيير العملة ومحلات الصرافة

  • الجورجيين بيعتزوا بعملتهم ولا يقبلوا التعامل بالدولار او اليورو في المحلات والاسواق. يبقى لازم تمشي بالعملة المحلية.
  • اول ما توصل اسحب بكروت البنك بتاعتك من  ATM او غير دولار/يورو من محلات الصرافة.  هتلاقيها متوفرة في كل حتة في الشوارع الرئيسية في العاصمة تبليسي او المدن الكبيرة.
  • هتلاقي يفط حمراء في الشارع مكتوب عليها ارقام وعملات. ما تغيرش من اول واحد يقابلك في طريقك علشان الاسعار بتختلف من محل للتاني. هتلاقيهم ممكن يختلفوا في فروق بسيطة. تأكد قبل ما تغير اي عملة معاك ان مفيش مصاريف تغيير عملة No Commission .
  • لما تيجي تغير من دولار الى لاري، اختار الصرافة الي سعرها اعلى. يعني لو محل ب٢.٧٥ ومحل تاني ٢.٨٠، اختار الاعلى. علشان انت بتبيع دولار. بيع بالاعلى.
  • المدن والقرى الصغيرة هتلاقي فيها محلات صرافة برضو، لكن اسعارهم اقل للأسف. اعمل حسابك وانت مسافر اي مدينة خارج العاصمة يكون معاك عملة كفاية. لو مزنوق في مكان وبياخد عمولة او سعره وحش، غير مبلغ صغير ومشي بيه نفسك.
  • لو سحبت/غيرت فلوس كتير وانت هناك ورحلتك خلصت ومعاك لسه “لاري” كتير، ممكن ترجعهم دولار مرة اخرى من محلات الصرافة. ما ترجعش بلدك معاك “لاري” علشان مفيش بنك هياخده منك.
  • لما تيجي تغير من لاري الى دولار، بتعمل عكس الي عملته قبل كده. اختار الصرافة الي سعرها اقل. يعني لو قدامك صرافة فيها دولار ب٢.٦٠ وواحد تاني ب٢.٦٥، يبقى تختار الاقل، علشان انت بتشتري دولار. اشتري الارخص.
  • اسعار الصرافة: بتكون مكتوبة رقمين جنب بعض. الاعلى بيكون لسعر بيع الدولار والاقل لسعر شراء الدولار

٤- اللغة الجورجية

للأسف حروف اللغة الجورجية غير الحروف اللاتينية الي احنا عارفينها، علشان كدة استحالة تقدر تقرا منها حرف. الجورجيين الي بيتكلموا انجليزي اكترهم من الشباب، كبار السن اغلبهم بيتكلموا روسي. جورجيا كانت احدى دول الاتحاد السوفيتي السابقة، علشان كدة هتلاقي اللغة الروسية الاكثر شيوعا بين كبار السن والعاملين في السياحة (السياحة الروسية كتيرة هنا). لو محتاس في اي محادثة، استخدم Typing في برامج الترجمة زي Google Translate، لان للاسف ما فيهوش ترجمة صوتية او للصور. ارجع لمقالتي الكاملة عن اهم تطبيقات اللغات على التليفون.  الناس طيبين ومتعاونيين وهيحاولوا يساعدوك ويتواصلوا معاك لو عندك سؤال.

georgian_road_signs

حروف اللغة الجورجية لا تمت للحروف اللاتينية بصلة

٥- الاكل الجورجي

تمثل العجائن جزء مهم من المطبخ الجورجي. احلى فطار هنا هو “الخاتشبوري” الي بالجبنة او باللحمة والبيض كمان. الجبنة القريش مشهورة جدا في العجائن مثلما رأيت في كرواتيا سابقا. من اي فرن في الشارع هتلاقيه اشكال مختلفة للخاتشبوري. اقل من دولار ممكن تفطر فطار يقفل معاك لحد اخر اليوم. في المطاعم هتلاقيه من ٢-٣ دولار. عندهم كمان “خنكالي”، عجينة لونها ابيض وملفوفة ومحشية جبنة، لحمة، مشروم، خضار، بطاطس. الخمسة منها بحوالي دولار. وممكن يكونوا وجبة لوحدهم او مقبلات قبل الاكل. عندهم كمان مشويات كويسة وهتلاقي سعرها معقول – ٣ ل٤ دولار. اتفرج على فيدوهات اول يومين في جورجيا علشان تشوف الاكل كان شكله ايه.

photostudio_1480883155811

في محلات تركي وايراني كتير بتقدم اكل حلال، بس غالبا هيكون اغلى من العادي. الوجبة الحلوة المشبعة ممكن ب٦ دولار. ارجع للمقالة بتاعتي بخصوص موضوع الاكل الحلال في السفر. 

الاقامة في مكان فيه مطبخ، هوستل مثلا، ممكن يخليك كمان تعمل اكلك بنفسك. الاسعار في السوبر ماركت كويسة. مثال مثلا نص كيلو صور فراخ مخلية وكيس مكرونة وبرطمان صلصة بحوالي دولارين.

يعني ممكن تاكل ب٥ دولار في اليوم وتبقى مبسوط بيهم جدا.

٦- الآمان

جورجيا تعتبر دولة آمنة جدا. الشرطة متواجدة في كل مكان ومحترمين جدا. اثناء زيارتي لمدنها الكبيرة او الصغيرة، لم اشعر للحظة بعدم الآمان.  طرق السفر بين المدن او اعلى الجبال عليها دوريات شرطة باستمرار لضمان سلامة الطرق وصلاحيتها للقيادة. لما قابلنا عواصف ثلجية في احد مغامرات رحلتنا، دوريات الشرطة والجرافات كانت لا تتوقف على  تنضيف الطريق من اثار التلج علشان يصلح للقيادة.

5

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec