23
Dec-2016

كل ما تريد معرفته عن تبليسي – جورجيا

 photostudio_1482509348861

المقالة دي جزء من سلسلة مقالات عن زيارتي الي جورجيا، والي كنت اتكلمت عن التأشيرة بتاعتها في المقالة دي واتكلمت كمان عن تذاكر الطيران بتاعتها في المقالة دي. النهاردة هنتكلم عن حاجة محتاج تعرفها عن العاصمة تبليسي، والتي لا تحتاج اكتر من يومين فقط. كل الاماكن الي ذكرتها فيها لينك على Google Maps. يعني لو مسافر قريب، افتح كل لينك واعمل save على الخريطة بتاعتك مباشرة.

المناطق المهمة في تبليسي

المنطقة المهمة في تبليسي متركزة كلها حول “تبليسي القديمة”  و جنبه “ميدان اوروبا” . يخترق تبليسي القديمة شارع “كوت افخازي” السياحي، والمؤدي الى ميدان الحرية (زي ميدان التحرير في القاهرة)، والي منه توصل الى اهم شورع وسط البلد “شارع روستافيلي” (زي شارع جامعة الدول العربية في منطقة المهندسين بالجيزة). فيهم المناطق السياحية الحلوة في المدينة، المطاعم، اماكن السهر والنايت لايف. ممكن تعملهم كلهم في يومين وتبقى زي الفل.

tbilisi-tourist-map

الخريطة السياحية لمدينة تبليسي

اليوم الاول:

ممكن تبدأ من محطة روستافيلي (بجوار McDonalnds)  وتتمشى الشارع من اوله في اتجاه ميدان الحرية. الشارع كبير ومليان محلات ومطاعم ومباني حلوة. اول مبنى هتلاقيه هو مبنى الاوبرا بتاع تبليسي. اول ما هتشوفه هتحس انه اسلامي اندلسي التصميم. بعد كده هتلاقي مبنى البرلمان القديم لجورجيا، كله عواميد كتيرة وكبيرة. البرلمان الجورجي الحالي في تاني اكبر مدينة في جورجيا، كوتايسي. لو ليك في جو المتاحف وكده، في المتحف الوطني الجورجي، انصحك تدخل المتحف الخاص بالاحتلال السوفيتي لجورجيا، والي بيحكي العلاقة المتوترة الي كانت موجودة بين الاتحاد السوفيتي سابقا روسيا حاليا وجورجيا الي كانت جزء منه. هتلاقي كنيسة في الشارع اسمها Kashveti Church، هتكون شبه كنائس كتير هتشوفها في كل حتة في تبليسي او جورجيا عاما. الشكل المعماري للكنائس في جورجيا متميز بالقبة المدببة للبرج بتاعها ومش هتشوفه في بلد تانية غير جورجيا. لو وقفت قدام الكنيسة شوية، هتلاقي ان ناس كتير اول ما تعدي من قدامها بتقف ثانيتين تصلي وتكمل طريقها. لو عايز تعدي الشوارع الكبيرة او الميادين، استخدم انفاق المشاة المنتشرة، علشان الشارع عامل زي صلاح سالم كده عندنا في القاهرة.

هتوصل بعد كدة اشهر ميدان في تبليسي، ميدان الحرية، والي يعتبر زي ميدان التحرير عندنا. لما حصلت الثورة الجورجية سنة ٢٠٠٣، الميدان كان هو الساحة الرئيسية للمظاهرات برضو. الميدان مشهور بالعامود الي عليه تمال ذهبي وكمان مبنى بلدية تبليسي. افطر او اتغدى او اتعشى في اشهر جورجي في الميدان، والي ليه فروع كتيرة منتشرة في تبليسي. اسعاره معقولة والمنيو مليان حاجات كتير.

من ميدان الحرية، ادخل الشارع الي على ناصيته Dunken Donuts. شارع “كوت افخازي” هياخدك الي تبليسي القديمة وباقي المزارات المهمة. الشارع مليان مطاعم وبازارات وشركات سياحة للرحلات وتأجير عربيات. هتلاقي فيه معبد يهودي “سيناجوج” والمزيد من الكنائس الملتصقة ببعضها. عايزك بقى تدخل الشارع ده وتنتشر فيه. توه جوا الشوارع والحواري بتاعته. هتلاقي محلات وبيوت قديمة وحاجات كتيرة حلوة اوي.

اما هتخلص الشارع هتوصل بعد كدة ميدان تبليسي القديمة، لازم تتصور عند يافطة I Love Tbilisi.  هتلاقي قدامك كوبري “متيخي” الي بيعدي فوق نهر تبليسي “متكافاري”. في اخر الكوبري على اليمين هتلاقي تلة صغيرة عليها كنيسة Metekhi ، واحدة من اشهر كنائس الجواز في تبليسي واول واحدة ادخلها في اوروبا الاقي فيها كمية ناس بتصلي غير طبيعية. جنبها كمان تمثال كبير لحصان وعليه الملك الجورجي King Vakhtang Gorgasali – ينسب ليه الفضل في الاعتراف بالكنيسة الجورجية الاورثوزكسية وهو ايضا من انشئ العاصمة تبليسي قديما.

20161203_164955

بعد كدة ممكن تتمشى على كورنيش النهر شوية لحد ما توصل “كوبري السلام” وتنتظر لحد ما الدنيا تليل علشان انواره بالليل بتكون حلوة جدا. (هتعدي في طريقك على محطة التلفريك بس ده هنخليه تاني يوم). من آخر الكوبري ممكن تدخل شارع “كوت افخازي” الي كنت فيه قبل كده وترجع تتفرج على المنطقة بالليل علشان بيكون ليه منظر تاني خالص.

20161203_180659

تبليسي بالفيديو: 

فيديو اول يوم لينا في تبليسي – اتفرج لما تكون على الواي فاي

اليوم التاني:

ابدأ يومك من الناحية التاني للنهر، من عند كاتدرائية ترينيتيHoly Trinity Cathedral ،المعروفة برضو باسم “سيمبا”.بالرغم من انها مبنية فقط من ١٢ سنة فقط، الا انها من اشهر معالم تبليسي وممكن تشوف لوانها المذهبة من انحاء مختلفة من تبليسي علشان ارتفاعها اكتر من ١٠٠ متر. تعتبر اكبر واحدة في جورجيا كلها وتالت اكبر كنيسة اورثوزكسية على مستوى العالم. ممكن تتمشى نفس الطريق بتاع امباح سريعا لحد ما توصلها (حوالي ٢ كيلو مشي من ميدان الحرية). او ممكن تاخد مترو الانفاق محتطين انزل محطة Avlabari.

بعد ما تخلص زيارة الكنيسة، ارجع ناحية النهر مرة اخرى وممكن تزور القصر الرئاسي ذو القبة الزجاجية المشهورة. انزل اتمشى في Rike Park  بجوار النهر على طول. هتلاقي فيها مباني شكلها فضائي كدة  Concert Hall and Exhibition Center. اتمشى في البارك لحد ما توصل Europe Square والي فيه هتلاقي قبله محطة التلفريك الي يطلعك فوق تبليسي القديمة والجبل الي وراها. لو مش معاك كارت المواصلات، هتشتري كارت بلاري او اتنين وتشحنه بالفلوس الي انت عايزها. تذكرة الركوب واحد لاري. لو انتوا مجموعة من ٥ افراد مثلا، اشتروا كارت واحد واشحنوه واستخدموه سوا. اشتري تذكرة ذهاب فقط علشان هتنزل مشي من مكان تاني.

اركب التلفريك واستمتع بمنظر تبليسي من فوق. هتلاقي الكنائس الجورجية “المدببة” منتشرة في كل مكان والبيوت القديمة منتشرة على جنب الجبل بارتفاعات مختلفة. هتوصل القمة وهتشوف طبعا منظر بانورامي لتبليسي كلها والجبال البعيدة بتحيطها من كل اتجاه. اول حاجة تعملها لما توصل انك تسلك اليمين وتتمشى على “كورنيش المقطم التبليسي” لحد ما توصل لتمثال “ام الجورجيين”. تمثال الومنيوم طوله ٢٠ متر ومن احد رموز جورجيا. واحدة شايلة في ايدها سيف لاعداء جورجيا والايد التانية نبيذ لاصدقاء جورجيا، لان من اشهر المنتجات الجورجية هو النبيذ. هتلاقي بلكونات صغيرة كدة جنب التمثال تقدر تنزلها وتتصور منها مع التمثال والفيو الرائع للمدينة.

20161218_165902

بعد كدة هترجع لمحطة التلفريك الي نزلت فيها وتكمل طوال علشان تشوف القلعة القديمة Narukala Fortress . هتمشي وارء الاسهم الكتير وهتلاقي نفسك بتنزل من فوق. هتلاقي حوائط وابراج القلعة المهدمة. خد بالك وانت بتتحرك هناك علشان طرق الطلوع مكسرة شوية. منظر تبليسي من فوق حلو جدا. هتلاقي في طريقك كنيسة صغيرة ممكن تتوقف عندها تزورها. بعد ما تخلص زيارة القلعة هتكمل نزول في الطرق المنحدرة علشان تروح تزور تبليسي القديمة وشوارعها الصغيرة الجميلة. هتكمل طريقك لحد ما توصل “مسجد جامع” تبليسي، المبني على الطراز الوسط اسيوي (اذربيجاني/ايراني). لو روحت يوم الجمعة وقت الصلاة، هتقدر تصلي الجمعة، بس مش هتفهم حاجة من الخطبة.

بعد كدة تكمل تمشية في المنطقة لحد ما توصل لحديقة النباتات National Botanical Garden of Georgia
. بارك كبيرة مليانة شجر ونباتات حلوة جدا ومستخبي فيها شلال مية حلو اوي لازم تشوفه اسمه Tbilisi Waterfall.

هتكمل تمشية وتنزل في اتجاه النهر وهتعدي في طريقك على حمامات الكبريتية Sulfur Bath  – مستويات واسعار مختلفة. انا شخصيا مجربتهاش. بس في ناس بتشكر فيها.

20161204_142536

تبليسي بالفيديو تاني: 

فيديو تاني يوم لينا في تبليسي – اتفرج على تبليسي من السماء بالطيارة بتاعتي.

اتفرج على تبليسي كلها من فوق في تاني ايامنا في تبليسي

نايت لايف تبليسي

في منطقة تبليسي القديمة، هتلاقي شارع مشهور اسمه Shardeni هو الي فيها اماكن السهرات المشهورة في تبليسي – بارات كافيهات ديسكوهات. هتلاقي اماكن دخولها ببلاش واماكن تانية بفلوس (خصوصا في الويك اند). هتلاقي ناس تعزم عليك تدخل strip clubs. خد بالك علشان كتير منهم نصابين. اول ما تدخل وتقعد، هيجيب واحدة تضحك وتهزر واول ما تقعد جنبك …. يروح منزلك ازازة نبيذ او شمبانيا من غير ما تطلبها ويقولك ١٠٠ او ٢٠٠ دولار. خد بالك من النصابين! ادخل night club عادية بلاش strip club. اتفرج على فيدو نصائح النايت لايف في براغ علشان بتكلم فيه عن strip clubs بشكل اوضح. 

المكان التاني الي فيه بعض اماكن النايت لايف جنب شارع روستافيلي، بجوار فندق راديسون بلو، في مجموعة كلوبات، ولكن احظر النصابين والقوادين.

المكان التالت للتمشية والاكل ومشهور للعرب اوي اسمه شارع مارجيشفيلي – اختصاره “مارجين” – فيه مطاعم وكافيهات لطيفة وبعض التسوق.

التسوق في تبليسي

انا مش من هواة التسوق عموما، ولكن الي سمعته ممن عملوا تسوق في جورجيا ان الاسعار اصبحت مقاربة للاسعار في مصر بعد التعويم. تركيا ارخص من جورجيا في التسوق. اشهر المولات في تبليسي  East Point Mall & Tbilisi Mall

الاقامة في تبليسي

خليك حول اهم مناطق تبليسي الي شرحتها في برنامج الرحلة فوق. يعني ميدان الحرية، شارع روستافيلي، تبليسي القديمة. الخرائط الجاية دي تخليها قدام عينك وانت بتحجز في اي مكان اقامة. ادخلوا على اللينك دي شوفوا ازاي ممكن تلاقوا الاقامة المناسبة ليكم في اي بلد. 

فنادق تبليسي

دي خريطة الفنادق الي هتلاقيها في تبليسي. متركزة حول المناطق السياحية الحيوية الي قولت عليها في البرنامج.  اختيارات الفنادق في تبليسي كتيرة اوي، وبسهولة ممكن تلاقي فندق ٣ نجوم وتققيمه عالي في حدود 18 الى 27 دولار في الليلة في اوضة مزدوجة. القائمة دي فيها جميع الفنادق سعرها معقول وممكن تلاقيها على موقع Hotels Combined . انا شخصيا لم اسكن في فندق، علشان كدة مش هقدر ارشح واحد بعينه، لكن القائمة فيها اسماء كتير. بص في الخريطة دي كويس وخليك جنب الخطوط الحمراء الي فيها.

hotels-in-tbilisi

هوستلز تبليسي

يوجد نزل شباب/هوستلز كتير في تبليسي. منتشرين اغلبهم حول ميدان الحرية وشارع روستافيلي. اسعارهم من ٣ الى ٦ دولار في السرير في الليلة. انا شخصيا كنت قاعد في هوستل اسمه Tbili Hostel عند محطة روستافيلي. مكانه لطيف، بس بعيد شوية عن ميدان الحرية. مطبخ وحمامات نضيفة والناس الي فيه كويسين.

hostels-in-tbilisi

المواصلات الداخلية

اول ما توصل مطار تبليسي، هتركب اتوبيس رقم ٣٧. بيوصلك وسط البلد وتحديدا عند ميدان الحرية. كل ١٥-٢٠ دقيقة طول اليوم، وبالليل بكون كل ٣٠-٤٠ دقيقة. اعرف المحطة الي نزلم فيها في وسط البلد علشان تركبه وانت راجع المطار اخر رحلتك. التذكرة باقل من لاري.

المواصلات الداخلية في العاصمة تبليسي متوفرة ومغطية تقريبا كل حتة. مترو انفاق واتوبيسات وميكروباصات صفراء اسمها :مارشروتكا”. بتشتري كارت مواصلات سعره حوالي لاري وتشحنه ب٢ لاري مثلا. تذكرة المترو او الاتوبيس من نص الى لاري. انا شخصيا قعدت في تبليسي اكتر من اسبوعين ولم استخدمها لاني كنت مقيم في وسط البلد. لو انت مقيم في وسط البلد، مس هتحتاج مواصلات داخلية اوي. امتى هتحتاج مواصلات داخلية؟ لو عايز تروح تعمل شوبينج في احد المولات خارج العاصمة (east point mall مثلا) او لو رايح تركب من موقف المواصلات Didube علشان تزور مدن اخرى خارج تبليسي (موقف عبود بتاع تبليسي).

هتحتاج كارت المواصلات علشان تركب الحاجات السياحية في تبليسي كمان، زي التلفريك الي بيطلع الجبل.

بعد ما قعدت يومين في تبليسي، حان وقت مغادرتها لعمل رحلات اخرى … انتظروا المقالة القادمة عن الرحلات خارج تبليسي

3

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec