23
Mar-2017

ازاي تقضي ٤٨ ساعة في كوتايسي

اتكلمت في مقالة سابقة عن الرحلات الحلوة الي ممكن تتعمل خارج مدينة تبليسي. لكن حان الوقت لكتابة مقالة منفصلة عن العاصمة السابقة للملكة الجورجية قديما، كوتايسي. تعتبر من من اجمل المدن الي شوفتها في جورجيا خلال رحلتي الأخيرة. شوارعها هادية وآمان جدا ومليانة جناين وتماثيل … مفيش عمارات ومباني عالية …. بيوتها القديمة الي ارتفاعها دورين تحسسك انك رجعت بالزمن. مدينة روحها حلوة.

الوصول الى كوتايسي

تبعد كوتايسي عن تبليسي حوالي ٣-٤ ساعات ب”المارشوتكا” – الميكروباص. مواصلاتها متوفرة دائما في موقف  Didube ديدبويه . الفرد بحوالي ٤ دولار (١٠ لاري). الطريق بين البلدين اصلا لوحده ممتع جدا لان اكتر من نصه انت معدي بين جبال وسهول وانهار وشجر و تلج (لو في الشتاء).

الاقامة

اختيارات كتيرة متاحة للاقامة في كوتايسي. فنادق وهوتسلز، وكمان بيوت ضيافة كتير guest house. انا جربتها في كذا مكان في جورجيا وكانت تجربة لطيفة جدا والله. حاول تخليك في محيط ١٥-٢٠ دقيقة مشي من وسط المدينة Kutaisi Park والميدان بتاعها. انا شخصيا اقمت في في فندق اسمه جلوباس كوتايسي Globus Kutaisi وكان حلو جدا. الغرفة الدبل فيه من ٢٢ دولار وممكن ٣٠ دولار للغرفة ثلاثة او اربع افراد. ممكن تتواصلوا مع صاحب الفندق جورج مباشرة  – وهديكم تخفيض 10% – 15% عن الاسعار الي على الانترنت.

 شباب الرحلة الي معايا كمان جربوا اوتيل وهوستل اسمهم Hotel Rio و Hotel Brothers وكانوا كويسين برضو.

اماكن الاقامة كتيرة في كوتايسي – انا اقمت في المنطقة الخضراء

الميدان الاشهر في وسط كوتايسي

الزيارات داخل كوتايسي

داخل مدينة كوتايسي زيارات بسيطة زي كنيسة بجاراتي Bagrati Cathedril  التي ترى المدينة من اعلى تلة في المدينة. والزيارة الدينية الاخرى هي دير موتساميتا – Motsameta Monastery.  غير كده اهم زيارات المدينة خارجها.

كنيسة بجاراتي – الكنيسة ذات القبب الفيروزية الوحيدة في جورجيا

دير موتساميتا تحيطه الطبيعة الخلابة من كل اتجاه

زيارات خارج كوتايسي

١- كهف بروميتيوس – Prometheus Caves

هو عبارة عن كهف مليان تجاويف وطرقات تحت الارض تمتد ٢ كيلومتر تحت الارض، وتصل اعمق نقطة فيها ٨٠ متر. الكهوف وممراتها مليانة هياكل ذات اشكال مدببة، نازلة من السقف او طالعة من الارض. تكونت الاشكال دي من ترسيبات المية المعدنية فقط. عبر آلاف السنين, تسربت المياة من اسقف الكهف او من الانهار الجوفية تحت الارض, وفضلت ترسب جميع انواع المعادن الي فيها على الاسقف والارضيات. كل سنتيميتر من الاشكال دي بيحتاج حوالي 100 سنة علشان يتعمل. اقصى عمق للكهف حوالي 80 متر تحت الارض ومشينا حوالي كيلومتر في المتاهات بتاعته.

٢- اخدود اوكاتسي Okatse Canyon

اوكاتسي كانيون من العجائب الطبيعية في مدينة كوتايسي والاهتمام بيه كبير جدا من وزارة السياحة في جورجيا. يبعد عن كوتايسي ٥٠ كم وتحتاج حوالي ساعة للوصول اليها. ابدأ يومك من ٩ الصبح علشان توصل هناك الساعة ١٠ اول ما يفتح. تذكرة الفرد ٧ لاري (٣ دولار). قدامك طريقتين علشان تخترق الغابة التي تفصل بين المدخل الرئيسي والكانيون نفسه.

الاولى على قدميك Hiking. هتكون مرهقة بدنيا شوية لانك  المشوار حوالي ٣ كم ولكن في طرق وعرة ذات مطالع ومنازل. ممكن تاخد منك ساعة او ساعتين. هي ممتعة جدا طبعا لانك هتستمتع بجمال الطبيعة طول الطريق. الافضل زيارتها في فصل الالربيع/الصيف/الخريف. الشتاء قد يكون صعب بسبب الثلوج ،قد يكون المكان نفسه مغلق امام السائحين للزيارة.

الثانية في عربيات 4×4. امام مدخل الكانيون هتلاقي سواقين عربيات 4×4 واقفين جنب عربياتهم في انتظار وصول الزائرين. احجام العربيات مختلفة، هتلاقي عربيات بتاخد ٣ افراد لحد ٧ افراد. تكلفة العربية ٧ افراد ٥٠ لاري  وال٤ افراد ٤٠ لاري. كل ما العدد يزيد هتكون اوفر في الفلوس. لو انت رايح لوحدك، انتظر ناس تانية جاية لوحدها او مجموعة صغيرة وحاول تعرض انك تركب معاهم وتشارك في التكلفة. المشوار بالعربية ربع ساعة من خلال طرق صعبة جدا، لو معاك عربية 4×4 مش هتعرف تدخلها.

لما توصل حافة الاخدود، هتلاقي المدخل وسلالم نازلة لتحت. هنا بقى تبدأ المتعة. علشان حواف الخدود مليانة شجر وصخور، عملوا طرق معلقة وبلكونات بمحازاة حواف الاخدود علشان الزائرين يمشوا عليها ويشوفوا الاخدود كويس. الطرق المعلقة دي احلى حاجة في الرحلة كلها. انت ماشي تحت مستوى الارض وشايف الناحية التانية من الاخدود والنهر ماشي تحتيك بين ضفتي الاخدود وسامع صوت المياة المندفعة عالي. (الاخدود هو شق عميق في الارض بفعل الانهار). انا هسيب الصور والفيديو (قريبا) يشرحوا حلاوة المكان الساحر ده.

لو اخدت المشوار رايح جاي على رجليك، يبقى الزيارة هتحتاج منك ٥-٦ ساعات وممكن تاخد اليوم كله. لو عملتها بالعربيات، ممكن تبقى ساعتين وتقدر تعمل معاها زيارات اخرى.

تصميم ماكيت للكانيون في visitor center

اتفرجوا على صورة المكان بتقنية 360 degrees 

انتظروا فيديو عن مغامرة الاخدود قريبا

٣- اخدود مارتيفيلي – Martivili Canyon

اخدود مارتيفيلي اصغر بكتير من اخدود اوكاتسي، ولكن العمق بتاعه بسيط جدا والمياة الي ماشية فيه بطيئة الحركة جدا، مما يسمح بركوب القوارب فيها. ممكن زيارته في نفس اليوم مع اوكاتسي كانيون لانه يبعد عنه حوالي ٣٠ كم (٤٠ دقيقة).

تذكرة الدخول ٥ لاري وركوب القارب المطاطي ١٠ لاري (٦ دولار). الكانيون بجوار المدخل على طول، مفيش تمشية طويلة للوصول اليه. بداية الزيارة بتكون عن طريق القارب المطاطي. هتلبس life jacket علشان لو وقعت في المية ينقذك وهتستلم مجداف علشان تجدف في القارب، الي ممكن ياخد ٦ افراد. بيكون معاك في القارب ٢ مرشدين من الي شغالين في المكان، واحد راكب ورا والتاني قدام.

الوان الصخور والمية والشلالات والشجر لوحة فنية صعبة الوصف بالكلمات والله. اتفرجوا على الصور والفيديوهات علشان تعرفوا قيمة المكان.

اول ما ركبنا كنا سخنين جدا في التجديف ومشينا بالقارب بسرعة علشان نتفرج على المكان، ولكت فجأة قالولنا هنلف ونرجع. المسافة المسموح فيها بالقارب قصيرة جدا، علشان كدة محدش مننا جدف في رحلة الرجوع. نصيحتي ليك، لا تجدف وانت رايح ولا راجع، علشان تاخد اكتر وقت في الاستمتاع بالمكان 🙂

بعد ما خلصنا رحلة القارب المطاطي القصيرة، اتمشينا فوق النهر وشلالات الكانيون الي المراكب لا تستطيع الوصول اليها. اخدنا كمان صور حلوة جدا فوق الكباري القصيرة التي تصل بين ضفتيه. عاملين طرق معلقة وبلكونات زي اوكاتسي كانيون، بس اصغر بكتير.

٤- دير مارتيفيلي Martivili Monastery

اثناء زيارتنا لاخدود مارتيفيلي، عدينا على مدينة مارتيفيلي الصغيرة واستوقفنا تلفريك صغير وقديم. نزلنا نتصور معاه طلع شغال وزي الفل. ركبنا وطلعنا فوق الجبل علشان نلاقي مكان خيالي اسمه دير مرتيفيلي. الدير مكانه عالي وكاشف المدينة والجبال الي حواليها. الحدائق والغابات المؤدية اليه كمان حلوة جدا وتستحق الزيارة والتصوير. لو عندك وقت كافي للزيارة، انصحك تزور الدير ده.

ازاي ممكن تعمل الرحلات دي؟

لو انتوا مجموعة بالاتوبيس او مأجرين عربية، مفيش مشكلة للوصول للاماكن دي. جوجل Maps احيانا مش مزبوط اوي في بعض المناطق في جورجيا. كان معانا سواق جورجي للاتوبيس في رحلتنا الي فاتت وكنا بنستخدم جوجل ونسأل الناس في الطريق علشان نوصل.

لو مجموعة صغيرة ممكن تأجر تاكسي بسواق ياخد ٤ افراد بحوالي ١٠٠لاري – ٢٠ دولار – ويقضي معاك اليوم كله علشان تعمل المزارات المهمة الي انت عايزها. ممكن تقيم في هوستل وتشوف الناس الي هناك لو تشتركوا سوا في تاكسي وتقسموا فلوسه عليكم، هتكون ارخص.

ممكن مواصلات عامة، ولكن هتكون مرهقة ومحتاجة وقت. تركب من موقف الاتوبيس بتاع كوتايسي ميكروباص (مارشوتكا) لقرية Gordi ودي القرية الي فيها الاوكاتسي كانيون او القرية الاكبر الي قبلها khoni – ومنها برضو ممكن تركب تروح اوكاتسي كانيون ومارتيفيلي كانيون. لو عايز تروح كهف بروميثيوس يبقى تركب مارشوتكا الى قرية Tskaltubo.

المواصلات متاحة بين كل الاماكن في النهار فقط. بالليل قد تلجأ للاوتوستوب -والرحلة كدة هتكلفك اقل بكتير، ولكن تحتاج وقت وجهد.

1

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec