15
Oct-2016

لا تزور فيينا، الا لثلاثة أسباب

photostudio_1476548902902

تاني بلد في رحلتي الاوروبية كانت النمسا، وعاصمتها الجميلة فيينا. لكن بعد اقامتي يومين فيها، تكونت عندي قناعة انها لا تناسب BUdget travelers زي حالاتي.

امتى نسافر فيينا؟

مش المقصود اقولكم امتى من حيث الجو، النمسا في الصيف حر والشتاء برد – مفيش جديد 🙂 … المقصود امتى ازور فيينا وليه؟

٣ اسباب تسمح لك بزيارة فيينا

اولا، حضرتك تزور فيينا بعد ما تكون خلصت العواصم والمدن الاوروبية الاكثر اهمية، من وجهة نظري. يعني تكون مثلا تكون زورت باريس، برشلونة، برلين، امستردام، روما، فلورانس، بودابست، براغ، مدريد، لشبونة، ومدن تانية كتير كمان 🙂   …  او لو انت مسافر ترانزيت على الخطوط النمساوية مثلا.

ثانيا، تزور فيينا لو انت في هذه المنطقة من اوروبا وبتعمل جولة اوروبية بين اكتر من دولة. يعني كنت في براغ او بودابيست مثلا وعايز تزور دولة كمان معاهم. يبقى ممكن تتوقف في فيينا يوم او اتنين بالكتير.

اوعى تكون بينك وبين نفسك بتقول “انا نفسي اسافر فيينا الصيف ده مثلا”!! مش تخطط رحلة كاملة واساسية هدفها الاول هو زيارة فيينا…. اللهم بلغت!!

عندك كل المدن/الدول الي بالاخضر على الخريطة، من وجهة نظري، تستحق الزيارة اكتر منها بكتييييير. لو عايز تزور النمسا، علشان تكون زورت دولة جديدة، انصحك بزارة جبال الالب – مدينة سالزبرج – وانت رايح او راجع من مدينة ميونخ الالمانية، علشان هي ساعتين من ميونخ مثلا.

vienna-map-when-to-visit

ثالثا، لو انت من هواة الاوبرا والموسيقى الكلاسيكية، وتسمع موسيقى موزارت صباحا ومساءا، يبقى لازم كدة تروح تزور فيينا طبعا.

photostudio_1476546667216

اوبرا فيينا

لو حققت اي شرط من الشروط دي او حضرتك مصر على موقفك، تعالى اقولك ملخص تجربتي هناك:

المواصلات الى فيينا

من موقع goeuro هتلاقي كل الاتوبيسات او bla bla car او القطارات الي ممكن توديك فيينا من اي مدينة اوروبية كبيرة …. فيينا من بودابيست مثلا، حوالي ٣.٣٠ ساعات وب٩ يورو فقط.

المواصلات داخل فيينا

شبكة المترو مغطية معظم احياء فيينا – انا اشتريت تذكرة ٤٨ ساعة بحوالي ١٤ يورو. بس المشكلة ان google maps معندوش علم بشبكة المترو دي. اول ما وصلت واستخدمت جوجل علشان اعرف منه الاتجاهات الى اي مكان في فينينا، كان بيطلع لي الاقتراحات مشي بالرجلين او تاكسي اوبر ؟!؟!؟! – فين المترو يا عم؟

Google Maps لا يحتوي على اي معلومات او اتجاهات بخصوص وسائل المواصلات العامة في فيينا. لكن الحمد لله في تطبيقات تانية ممكن استخدامها، اسمه  qando Vienna … موجود على اللينكات دي  للاندويد والايفون

المترو شغال ٢٤ ساعة ايام الويك اند علشان الناس الي بتحب تسهر وتروح متأخر.

photostudio_1476546421565

ترام فيينا

الاقامة في فيينا

المنطقة السياحية الي مليانة مزارات فيينا الشهيرة، لا يوجد فيها هوستلز على الاطلاق. اكيد متوفر فيها فنادق طبعا. بس الهوستلز تبعد حوالي ١-٢ كيلو عن السنتر.

vienna-accomodation-map

مواقع الهوستل الشهيرة هتغلب علشان تلاقي هوستل كويس ورخيص. ارخص حاجة لقيتها كانت ب١٠ يورو وتقييم ١٠/٦. علشان تلاقي هوستل تقييم عالي – ١٠/٩، هتكون غالية – بحوالي ٢٠-٢٥ يورو. دي مجموعة هوستلز متوفرة من موقع Hostel World. لما تيجي تشوف نتايج البحث بتاعت اي هوستل، تشوف السعر، المسافة قد ايه من وسط البلد، وبعد كدة التقييم. انا شخصيا دي اولوياتي، السعر المكان الجودة. لانها مكان للنوم وخلاص. الفنادق طبعا موجودة بغزارة، لكن انا لم اقيم في اي منها، لكن خليك في الفنادق الي بجوار محطات المترو ،وبعيد عن وسط البلد علشان تكون اسعارها معقولة.

hostels-vienna

انا شخصيا كنت مقيم ببلاش عن صديق من موقع Couchsurfing – لو عايزين تعرفوا كل حاجة عن الموقع وازاي تستخدموه، اتفرجو على الفيديو ده

20160926_154054

مستضيفي في فيينا

البرنامج السياحي

فيينا تحتوي على العديد من القصور الامبراطورية للعائلة الحاكمة هابسبورغ، الحدائق بتاعتها الجميلة، المتاحف والمسارح، وواحدة من احلى دور الاوبرا في اوروبا. كانت النمسا مسقط رأس الكثير من مشاهير الموسيقى الكلاسيكية، على رأسهم موزارت Mozart، وده كان بسبب رعاية الاسرة الحاكمة هابسبورغ للموسيقى والفن في القرنين ال١٨ و١٩.

اليوم الاول

– اول حاجة انا زورتها في فيينا كانت قصر “هوفبورغ” بتاع الاسرة الحاكمة “هابسبورغ”. القصر من برة شكله حلو جدا. تحيطه تماثيل من كل حتة، وتجري حوله وخلاله عربيات تجرها الخيول، زي عربيات سيندرلا كدة. في متحف جوه عبارة عن “النيش الامبراطوري” – اطباق اطباق اطباق – وفقط، وبعدين في متحف خاص بملكة تم اغتيالها في القرن ال١٩ اسم الدلع بتاعها “سيسي” 🙂  بعد كدة كان في مكان اسمه الشقق الامبراطورية، اصغر قصر شوفته في ايران احلى منهم ٢٠ مرة مثلا….. من الآخر يا جماعة، دفعت ١٨ يورو بصراحة في مكان مقلب. هذه هى الحقيقة المؤلمة.

اتفرج على الفيديو الي صورته جوه علشان تعرف حجم المآساة.

photostudio_1476542517434

الباحة الخلفية للقصرphotostudio_1476542568055

انا والزميلة أمنية – منهمكين في تصوير النيش الامبراطوري

photostudio_1476544355841

فسحة الكارتة الامبراطورية النمساوية حول القصر

– لو عايز تدفع فلوس في حاجة تستاهل، روح Art History Mesuem – التذكرة ب١٥ يورو.بعد ما تزور قصر هوفبورغ ومتحف “السيسي”، ده قريب منه جدا. يعتبراحسن المتاحف في النمسا كلها، وليه ترتيب على اوروبا نفسها.

– اقرب واحلى الكنائس الي تزورها في نفس المنطقة دي من فيينا هي St. Stephan’s Cathedral. دخول الكنائس في اوروبا عادة ببلاش، الا لو كان في متحف فيها.

– كل الشوارع المحيطة بالمزارات السياحية جميلة وشيك جدا، مليانة بكافيهات ومطاعمالتمشية في شوارع فيينا جميلة بصراحة، ما تعرفش انت في المانيا ولا سويسرا من كتر من هم متشابهين، من وجهة نظري طبعا.

اوبرا فيينا، الاحلى في اوروبا

بالليل لازم تعدي طبعا على اشهر مباني فيينا، الاوبرا. من احلى الاوبرات في اوروبا واكبرهم. تذكرة الدخول بحوالي ٤٠ يورو، وللطلبة ٢٠ يورو. في كمان تذاكر وقوف بتتباع ارخص من كدة. انا ما جربتش. برة الاوبرا في شاشة كبيرة امامها مئات الناس قاعدة بتتفرج على ما يحدث داخل الاوبرا، Live. دي كانت الفرصة الوحيدة امامي لمشاهدة عرض اوبرا في فيينا.

موزارت Mozart

بلد موزارت طبعا هتلاقي فيها حفلات الموسيقى الكلاسيكية موجودة في كل حتة في وسط البلد، التذكرة من ٤٠-٥٠-٦٠ يورو. لو عايز تستمتع بالحفلات والاوبرا، يبقى استعد بشوية فلوس حلوة. انا متأكد انها هتكون تجربة تستحق كل يورو مدفوع فيها. اشهر مكان في فيينا لللحفلات الكلاسيكية Musikverein.

اليوم الثاني

ممكن تخصص اليوم ده للقصور والحدائق الضخمة بتاعتها. عندك اتنين انا زورتهم وكانوا مبهرين جدا من برة، لاني لم ازورهم من الداخل:

١- Belvedere Palace

 قصر تحفة،  ممكن تقضي ساعتين تلاتة في الاستمتاع بالحدائق والنافورات البديعة بتاعته. القصر مقسم لقسم علوي وسفلي، ويحتوي على عدة متاحف. اسعار التذاكر تتراوح من ١٢ الى ٢٤ يورو. الموقع ده عليه مل انواع التذاكر المتوفرة وتقدر تشتريها اونلاين قبل ما تروح، ارخص.  انا شخصيا استمتعت جدا بالزيارة من برة، علشان حلوة جدا وببلاش.

photostudio_1476546904089

قصر بلفيديري

٢- Schoenbrunn Palace

قصر اكبر كمان من Belvedere، ولكن ابعد شوية من وسط البلد. فيه زيارات كتيرة اوي واسعار التذاكر تتراوح من من ١٣ الى ٢٨ يورو، على حسب انت عايز تزور ايه. الموقع ده عليه كل التذاكر لقصر Schoenbrunn. عليه كمان تذاكر مجمعة مخفضة تقدر تدخلك قصر Belvedere كمان، Golden Pass ٥٥ يورو. يا بلاش! انصحك بدخول القصور للاستمتاع بحياة ساكني القصور الامبراطورية النمساوية، واشهرهم فرانك جوزيف وزوجته الشهيرة، سيسي. انا شخصيا استمتعت بالحدائق الغناء حول القصر، الي انبهرت بيه انبار كافي، يمنعني من دخوله.

اتفرجوا على فيديو تاني يوم ليا في فيينا، علشان تشوفوا كل الي انا عملته هناك في القصرين دول. 

photostudio_1476547131401

قصر الشونبرون

اكتر حاجة خلتني “أقفش” في فيينا، مصاريف المعيشة غالية جدا

قبل وصولي الى النمسا، كنت لسه جاي من ايطاليا، حيث فنجان القهوة بيورو او اقل في مكان عادي في الشارع، اول يوم وصلت فيه فيينا، ارخص فنجان قهوة اسبرسو، في كافيه اقل من متواضع جنب محطة مترو، كان ب٤ يورو!!! انا باخد الحاجات البسيطة دي مؤشرات اولية عن مستوى الاسعار في اي مدينة. سافرت بعدها سلوفينيا، في اجعص منطقة سياحية في العاصمة لوبيانا، فنجان القهوة كان ١.٢ يورو.

دي كانت اول حاج قفلتني من البلد. الاسعار كانت غالية بصراحة اوي. الاكل كمان كان غالي. طبق “شنتزل” النمساوي/الالماني – فراخ بانيه يعني – من ٨ الى ١٢ يورو. اعمل حسابك ان مصاريفها في الاقامة والمعيشة والزيارات هتكون غالية شوية.

رأي شخصي

انا شخصيا لم ترق لي فيينا ولا ليالي الانس فيها بصراحة 🙂 … طبعا مع كامل احترامي لمدينة فيينا وكل الناس الي بتحبها ونفسها تزورها، لكن انا دوري هو اني انقلكم وجهة نظري الشخصية في اي مكان وبكل موضوعية. اكيد في منكم ناس كتير راحت واتبسطت وحبتها اوي، لكن ده رأي شخصي المتواضع في الزيارة.

الفقرة الختامية دي طبعا علشان انا منتظر تعليقات الفيسبوك الجميلة الي بتشيد بجمال فيينا وليالي الانس فيها ومش هيوصلوا للفقرة الختامية دي وهيعلقوا من غير ما يقرأوا المقالة اصلا وهيكتفوا بالرد على العنوان بتاعها 🙂

0

 likes / 4 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec