31
Aug-2017

البرنامج التفصيلي لرحلة سيناء – سبتمبر ٢٠١٧

رحلة لاكتشاف سيناء

خلينا نحاول نشوف كل حاجة حلوة موجودة في سيناء في رحلة واحدة. دهب، سانت كاترين، نويبع. كل مكان ليه طبيعته وحلاوته الخاصة. كل مكان فيهم يحتاج اسبوع لوحده اصلا علشان تستمتع بيه. حيث اني مش بعمل رحلات كتير، قررت اعمل رحلة واحدة نشوف فيها كل الحاجات دي مرة واحدة. عايز ناس صحتها حلوة ومش مدلعين يعني. اي حاجة في برنامج الرحلة مكتوب جنبها كلمة “اختياري” وسعرها بالجنية، تبقى تكلفتها مش داخلة في تكلفة الرحلة.

ميعاد الرحلة

الرحلة التانية مواعيدهامن مساء الاربعاء ٢٧ سبتمبر الى يوم الاحد ١ اكتوبر.

برنامج رحلة سيناء

الاربعاء – ٢٧ سبتمبر 

الساعة ١١.٠٠ م : التجمع لركوب الاتوبيس من مدينة نصر 

الخميس – ٢٨ سبتمبر

الساعة  ١٢.٠٠ص : التحرك بالاتوبيس الى دهب (مشوار ٨-٩ ساعات)

الساعة ٨.٣٠ ص   : التوجهة الى محل الاقامة واستلام الغرف المتاحة (دخول اي فندق عادة بيكون الساعة ٢ ظهرا. ان وجد غرف متوفرة، هنستلمها فورا)

هنزل الشنط وهنعرف مكان الفندق فين وننطلق نروح نفطار في اي مكان. يوجد على البحر كافيتريات كتيرة بتعمل فطار بحوال ٥٠ جنية. يوجد كمان شارع اسمه المشربة مليان مطاعم عادية ورخيصة جدا. انا شخصيا هروح افطر في مطعم King Flafel في شارع المشربة لانه اكتر واحد بحبه بتاع فول وطعمية. 

 الساعة ١٢.٠٠ م    : الذهاب بالاتوبيس الى شاطئ “الثري بوولز” للاستمتاع بالبحر والسباحة – المشوار ٣٠ دقيقة. (رحلة مجانية)

احلى حاجة تتعمل طبعا هنا هي “سنوركلنج” (سباحة على وش المية بالنضارات) – ممكن تأجرهم ب٢٠ جنية في اليوم كله، بس هتسيب البطاقة او الشبشب رهن 🙂

الغذاء : يوجد مطاعم تقدم وجبات غذاء بداية من ٤٠ جنية للفرد (ربع فرخة/رز/خضار/سلطة)

الساعة ٤.٠٠ م : واحنا في وادي جني هنعمل سفاري بموتوسيكلات البيتش باجي لمشاهدة غروب الشمس (مدة الرحلة ساعة ونص) – الرحلة اختياري وتكلفة الموتوسيكل الفردي ب١٠٠ جنية والزوجي ب١٢٠ جنية ، يعني الشخص ب٦٠ جنية كل واحد على موتوسيكل زوجي).

الساعة ٦.٠٠ م:  الرجوع الفندق – مشوار ٣٠ دقيقة.

الساعة ٨.٠٠ م     :  جولة حرة للعشاء في مطاعم المدينة – اقتراحات: مطعم سمك عروس البحر، مطعم مشويات كينج تشكن، مطعم ايطالي اثانور – او احد مطاعم المشاية الكتير جدا – ممكن قعدة شاي وقهوة وشيشة في كافيه friends، انا شخصيا بحب قعدته. 

الجمعة – ٢٩ سبتمبر

الساعة ٨.٠٠ ص  : الافطار في الفندق

الساعة ٩.٠٠ ص  : عمل check out من الفندق، مع الابقاء على الشنط في بعض الغرف للاستحمام وتغيير الملابس بعد انتهاء اليوم – في آخر اليوم هنتوجه الى سانت كاترين. هيفضل معانا  في ٤ غرف للاستخدام – غرفتين للولاد وغرفتين للبنات – نساعي بعض يا اخوانا يعني والليلة هتعدي – اعتبروا نفسكم في حمام السباحة بتاع النادي.

لو حد عايز يفضل في غرفته ويعمل late check out منها، هيكون ممكن تنسيق ذلك مع ادارة الفندق لو في امكانية متاحة عندهم وممكن يكون بمصاريف زيادة (قد تكون في حدود ٢٠٠ جنية للغرفة). الرجاء ابلاغنا بذلك مقدما للتنسيق مع الفندق مسبقا. 

برامج اختيارية مقترحة لقضاء اليوم:

الساعة  ١١.٠٠ص  : 

١- هناخد عربيات نص نقل جميلة كدة ونطلع نزور المزار الاشهر في دهب – Blue Hole- (رحلة مجانا). بالامكان قضاء الوقت في البلو هوول في السباحة والسنوركلينج تاني او عمل hiking في الجبال المحيطة علشان تعرفوا تشوفوا البلو هوول من أعلى. 

ممكن ايضا قضاء ساعة سريعا في البلوهوول وبعد كدة عمل رحلة سفاري الى محمية ابو جالوم بالمراكب (رحلة اختياري وتكلفتها مواصلاتها ٧٠ جنية -(رحلة المركب ٢٠ دقيقة من البلوهول الى محمية ابوجالوم) – الرحلة ممكن تبدأ الساعة ١١ صباحا وتنتهي الساعة حوالي ٤ عصرا. المكان حلو جدا وساحر فعلا … حيث الهدوء والسباحة والسنوركلينج والانتخة العظيمة.

٢- الاقتراح التاني هو عمل غطسة تجريبية. كورس الغطس Open Water PADI بيحتاج ٤ ايام علشان يتعمل، لكن دي هتكون غطسة تجريبية بكامل معدات الغطس ولكن عمق بسيط (٥ متر) – تحتاج وقت حوالي ساعتين او تلاتة. كل مدرب بيكون معاه اتنين. لو عايز تعملها، لازم تبلغنا علشان نحجزها مع Dahab Divers Center – والدفع بيكون عندهم في السنتر (تكلفتها ٣٠٠جنية). الغطس ممكن يبدأ الساعة ٩ ويخلص الساعة ١١ او ١٢ ، على حسب العدد. الي يلحق يعمل الغطسة بدري، ممكن يلحق معانا رحلة ابوجالوم.

٣- لو مش عايز تعمل اي حاجة من الحاجتين دول، او عملت الغطسة بتاعتك وعايز تكمل يومك في دهب، اقترح عليك حاجات كتير: ممكن تأنتخ على البحر في اي مكان في شاطئ الفنار light house، او تروح شاطئ اللاجون Lagoon (لا يوجد عليه خدمات زي شاطئ الفنار)، او تأجر عجل ، او تقرا كتاب على البحر، او تتمشى في المشاية وتشوف الاسواق والبازارات. ممكن كمان تتغدى في مطاعم كتير في المشاية. (الوجبات اسعارها من ٥٠-٧٠ جنية)

الساعة  ٥.٠٠ م  : بداية العودة الى غرف الفندق المتوفرة على مجموعات للاستحمام والاستعداد للرحيل الى سانت كاترين.

الساعة ٧ م : التجمع عند الفندق لركوب الاتوبيس والتوجه الى مدينة سانت كاترين

الساعة ٩.٣٠ م: الوصول الى كامب في سانت كاترين للعشاء في الوادي مع حفلة بدوي.

السبت – ٣٠ سبتمبر 

الساعة ١٢.٣٠.٠٠ ص : وصول دير سانت كاترين لمقابلة المرشدين لصعود جبل موسى لمشاهدة شروق الشمس. هتكون مغامرة متعبة وتحتاج جاكيت خفيف، كشاف (ممكن شرائه هناك)، جزمة مريحة، مية، شيكولاتات، ساندوتشات، كريمات تسلخات. رحلة الصعود تاخد حوالي ٣ ل ٤ ساعات. هيكون معانا مرشدين للمجموعة كلها (مرشد لكل ١٠-١٥ فرد). الادرنالين بتاع المغامرة هو الي هيحركك. اتفرجوا على الفيديوهات في الكومنتات علشان تعرفوا الرحلة عاملة ازاي في الطلوع والنزول. (رحلة صعود الجبل مجانية لاعضاء الرحلة).

حالات الطوارئ

ـ في حالة الطوارئ او في حد مش هيقدر يطلع الجبل، ممكن توفير مبيت في كامب في سانت كاترين ب٥٠ جنية الفرد حتى الصباح لما نرجع من الجبل (مصاريف اضافية تدفع هناك في الكامب)

الساعة ٥.٠٠ ص  : الوصول الى قمة جبل موسى لمشاهدة شروق الشمس. 

الساعة ٦.٠٠ ص  : بداية رحلة نزول الجبل الى الدير مرة اخرى

الساعة ٨.٠٠ ص  : وصول دير سانت كاترين لزيارته لمدة ٣٠ دقيقة فقط. 

الساعة ٨.٣٠ ص  :  التحرك بالاتوبيس الى نويبع.

الساعة ١٠.٣٠ ص  : وصول محل الاقامة في كامب في نويبع. عشش وخيم على البحر مباشرة. لا يوجد داخلها حمام خاص، ولكن يوجد حمامات مشتركة للولاد وللبنات. لما تشوفوا المكان هتعرفوا قد ايه ساحر ومناسب لاستقبالنا بعد رحلة جبل سانت كاترين . اتفرجوا على الفيديو ده علشان تعرفوا المكان هيكون شكله ايه. 

الافطار في كامب Ayla في نويبع وبعد كدة راحة واستجمام على البحر فقط.

هنعمل ايه في كامب نويبع الى علي البحر؟ …. ولا اي حاجة. chill & relax – الكامبات دي قمة “الولا-حاجة”. هاتوا كوتشينة، اونو، كورة نلعب كورة وطايرة كمان… طبعا ممكن السباحة وعمل سنوركلنج في الشعب المرجانية القريبة للمخيم. بعد رحلة الجبل هيكون هو ده امتع حاجة نعملها. نجيب معانا كوتشينة والعاب كتيرة بقى علشان نتسلى طول اليوم.

المكان فيه مطعم وبيوفر وجبات غذاء (باستا) سعرها ٥٠ جنية للجروب.  

الساعة   ٧.٠٠ م  : هنتعشى عشاء بدوي (مقلوبة دجاج)  في المخيم بتاعنا (مجاني) لان مفيش مطاعم حولنا … مفيش حاجة حولنا اصلا. بعدها هنشرب الشاي ونتلم حول نار الكامب ونبحلق في النجوم والكواكب طول الليل (البنات: هاتوا مارشملوا وشيكولاته نوتيلا (او بديل ارخص) وعيدان خشب علشان تعملوا s’mores – جوجل كدة علشان تعرفوا ايه دي) – والرجالة لو عايزة تجيب شيشتها ومعسلها وفحمها معاها ممكن تجيب (المكان عنده شيشة متواضعة)

الاحد – ١ اكتوبر

الساعة ٨.٠٠ ص : الافطار في الكامب (مجاني)

الساعة ٨.٠٠ ص : التحرك بعربيات جيب لعمل سفاري في جبال وصحاري نويبع وزيارة وادي الوشواشي الشهير او وادي آخر قريب من نويبع – مدة الرحلة ٥ ساعات، ركوب عربيات ٤٥ دقيقة في كل مشوار رايح وراجع، وساعتين تلاتة تمشية في الوديان. (رحلة اختياري والفرد ب١٠٠ جنية). لو في حد مش عايز ييجي، ممكن ينتظر في الكامب لحد ما نرجع من رحلة السفاراي.

الساعة ١.٠٠ م  : العودة للكامب للغذاء (اختياري – المكان فيه مطعم وبيوفر وجبات غذاء (باستا) سعرها ٥٠ جنية للجروب)

الساعة ٢.٠٠ م  : ركوب الاتوبيس والرجوع الى القاهرة

الساعة ١١.٠٠م : وصول القاهرة بالسلامة ان شاء الله

سعر الرحلة

 ١٠٠٠ جنية في غرفة ثلاثية

١١٠٠ جنية في غرفة ثنائية

١٥٠٠ جنية في غرفة سنجل

السعر يشمل

– الانتقالات في اتوبيس مكيف حديث (اتوبيس ٥٠ فرد او اتوبيس ٢٨ فرد، يعتمد على عدد المشتركين)

– رحلات دهب (ثري بولز و بلوهول)

– مبيت ليلة في فندق في دهب بالافطار

– عشاء بدوي في سانت كاترين

– رحلة صعود جبل سانت كاترين

– افطار نويبع بعد النزول من الجبل

– مبيت ليلة في مخيب في نويبع بالافطار والعشاء

السعر لا يشمل

– غطسة تجريبية (٣٠٠ جنية)

– محمية ابوجالوم (٧٠ جنية)

– سفاري بيتش باجي (١٠٠ جنية او ٦٠ جنية)

– سفاري نويبع (١٠٠ جنية)

– ايجار ادوات سنوركلنج (٢٠ جنية)

– اي وجبات غير مذكورة في البرنامج (ممكن يكفيك بداية من ٣٠٠ جنية للوجبات الناقصة)

– اي مشروبات، معسل، شيشة، سجاير، لبان سمارة، لب اسمر او لب ابيض ، او كريمات تسلخات 🙂

كيفية الاشتراك

لو عجبك برنامج الرحلة، ممكن تدخل على اللينك ده وتكتب البيانات بتاعتك. بعد العيد هيتم التواصل معاك من خلال شركة “عالم انجاز” للسياحة علشان يبلغوك تدفع الفلوس ازاي وفين وامتى.

https://goo.gl/forms/tX5xiYqKYKgmWhDa2

    

0

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec