29
Apr-2018

اعلان رحلة المغرب الاولى – يوليو ٢٠١٨

بناء علي طلبات كتيرة بخصوص رحلة جماعية الى دول جديدة غير اسيوية، قررت ان اعمل رحلة الى المغرب … طبعا المغرب من احلى الدول العربية والي غنية جدا بثقافتها وطبيعتها المختلفة. علشان دي هتكون اول رحلة جماعية ليا هناك فهعملها بالتعاون مع رحالة مصري عمل رحلات كتيرة في المغرب. العدد الي هيطلع معانا في الرحلة هيكون ٢٠ فرد فقط. الرحلة هتكون مدتها ٩ ايام كاملين – من يوم ١١ يوليو الى يوم ٢٠ يوليو ٢٠١٨.

🔺 قيمة اشتراك الرحلة 🔺

سعر الرحلة الاساسي هيكون ١٢ الف جنية ويشمل الآتي:

– الطيران الدولي من القاهرة الى كازابلانكا على خطوط مصر للطيران
– الاقامة في فنادق/رياض/شقق فندقية مغربية بالافطار
– انتقالات المطار الاساسية
– مرشد مصري مرافق طوال ايام الرحلة

🔺 تكلفة البرنامج السياحي والمزارات 🔺

الرحلة بتاعتنا هتكون Road Trip بين مدن مغربية كتيرة جدا والمسافات بينها بعيدة. علشان كدة هيكون معانا طول الوقت اتوبيس مكيف وسائق ومرافقين لينا في جميع ايام الرحلة. تكلفة البرنامج السياحي في الرحلة وجميع المزارات والانشطة هتكون ٤ الاف جنية اضافية الى قيمة اشتراك الرحلة. لو حد مش عايز يشترك في البرنامج السياحي المقترح، بالامكان قضاء جميع ايام الرحلة كلها في كازابلانكا.

🔺 التكلفة الاجمالية “شاكب راكب” 🔺

حيث ان اشتراكك شامل الطيران والاقامة بالافطار والبرنامج والانتقالات كلها هيكون ١٦ الف جنية، مصاريفك الشخصية رحلتك هناك هتكون على الاكل والشرب والهدايا واي انشطة اضافية غير متضمنة في البرنامج. الاكل حلو ورخيص والوجبة ممكن تبدأ من ٥٠-١٠٠ جنية للوجبة الحلوة في الغذاء او العشاء (١٥٠٠ جنية في التسعة ايام) وشوية هدايا تذكارية ٥٠٠ جنية كمان مثلا. تكلفة تأشيرة المغرب تقريبا ٦٠٠ جنية. يعني تكلفة الرحلة الاجمالية “شاكب راكب” ممكن تكون بداية من ١٨،٥٠٠الف جنية لمدة التسعة ايام (تقريبا ١٠٥٠ دولار). سعر الرحلة المعلن ده ثابت لجميع المشتركين في الرحلة الاولى.

برنامج الرحلة بالتفاصيل

اليوم الاول – التجمع في مطار القاهرة الدولي والسفر الى مطار محمد الخامس – الدار البيضاء. – زيارة مسجد الحسن الثاني. – السفر الى مدينة مراكش والتسكين بالرياض.

اليوم الثاني – زيارة قصر الباهية – زيارة حديقة ماجوريل – جولة حرة في المدينة القديمة وساحة الفنا ومسجد قطبية

اليوم الثالث – زيارة منطقة الالعاب Terre d’amanar وتشمل نشاط zip lining فقط في البرنامج …. http://www.terresdamanar.com/ – زيارة منطقة اوريكا وستي فاطمة. – جولة حرة في المدينة الجديدة ليلا.

اليوم الرابع – مغادرة الفندق والتوجه الى مدينة افران ثم المبيت بفاس – جولة حره بمدينة افران – التسكين بفندق فاس

اليوم الخامس – زيارة جامع القرويين ، الزاوية التيجانية ، مقام سيدي ادريس و ومصابغ الجلود. – جولة حره بالمدينة القديمة – التوجه الى مدينة شفشاون والتسكين بها

اليوم السادس – زيارة المدينة القديمة بشفشاون وجولة حره بها – زيارة اعلى نقطة على الجبال لرؤية المدينة

اليوم السابع – زيارة شلالات اقشور وعمل Hiking لمدة 6 ساعات ذهاب وعودة. – العودة الى شفشاون والمبيت بها

اليوم الثامن – العودة الى مدينة كازابلانكا مرورا بمدينة طنجة وزيارة مغارة هرقل والمرور بمدينة الرباط والتسكين بالفندق ليلا في كازابلانكا.

اليوم التاسع – جولة حرة في المدينة. – التوجه الى مطار محمد الخامس والعودة الى القاهرة.

 الاقامة

– لو انت مسافر/مسافرة لوحدك وعايز تقعد في فندق، هيتم تسكينك مع مسافر/مسافرة اخرين في الرحلة. يعني لو جاي لوحدك وعايز فندق مش مشكلة، هنلاقي حد مناسب يقعد معاك في الغرفة.

– الاقامة هتكون متنوعة ومختلفة شوية عن اي رحلات قبل كدة، وده بسبب اختلاف المغرب وتنوعها السياحي. الاقامة في كازابلانكا وفاس هتكون في غرف خاصة (دبل او تريبل) في فنادق ٣ نجوم. الاقامة في مراكش هتكون في غرف خاصة (دبل او تريبل) في فنادق مغربية صغيرة تسمى “رياض” – عبارة عن منازل قديمة تم تجديدها لتكون boutique hotels حلوة وتجربتها هتكون حاجة متميزة ومختلفة تماما عن الاقامة في فنادق كبيرة. الغرف في الرياض بتكون غرف خاصة بالحمام بتاعها. الاقامة في شفشاون هتكون في منازل مغربية برضو، ولكن على هيئة شقق فندقية. يعني الشقة ممكن تكون غرفتين او ثلاثة (دبل او تريبل). الشقة الفندقية بيكون فيها حمام خاص بيها او اتنين. ضمانا للخصوصية الكاملة، هيتم التسكين في الشقق الفندقية بناء على النوع (يعني البنات لوحدهم والولاد لوحدهم).

– الاقامة في الفنادق والرياض والشقق الفندقية في جميع المدن، تشمل الافطار وخدمة تنضيف الغرف، وكل سبل الراحة متوفرة.

 سياسة الدفع

العدد المتاح في الرحلة هيكون في حدود ال٢٠ فرد والحجز باسبقية دفع مقدم الحجز ٣٠٠٠ جنية. يتم دفع دفعة ثانية قيمتها ٣٠٠٠ آلاف جنية خلال شهر من الاشتراك في الرحلة. يجب تسديد الدفعة الاخيرة من قيمة اشتراك الرحلة وبرنامج الرحلات المراد الاشتراك فيه قبل ميعاد الرحلة بشهر ( ١٠ آلاف جنية). سياسة الالغاء خصم ٣٠٠٠ جنية في حالة الالغاء قبل الرحلة ب٣٠ يوم. وخصم ٦٠٠٠ من قيمة الحجز المدفوع في حالة الالغاء قبل الرحلة ب ١٥ يوم.

 شروط خاصة بالرحلة

علشان دي رحلة مختلفة شوية، هيكون ليها بعض الشروط الخاصة:

– الرحلة هيكون فيها الكثير من الانتقالات بين المدن، علشان كدة السفر هيكون بشنطة سفر واحدة وزنها لا يزيد عن ٢٣ كيلو وهاند باج على الضهر فقط.

– الفئة العمرية المقترحة للاشتراك لا تزيد عن ٤٠ سنة، لانه يغلب على الرحلة كثرة السفر والحركة. لو حد عمره اكبر من كدة لازم يكون مستوى لياقته الصحية كويس علشان يقدر يستمتع بكل حاجة في الرحلة – وده هيكون مسؤوليته الشخصية. بالامكان تعديل البرنامج في الرحلات القادمة علشان يناسب الجميع، لكن اول مرة لازم هتكون بهذه الشروط.

🌏🌏  تاشيرة المغرب  🌍🌍

بيتم تقديم جواز السفر والمستندات المطلوبة الى مقر شركة انجاز وهنعمل ليكم جميع اجراءات اصدار التاشيرة. الاوراق المطلوبة كالآتي:

– جواز سفر صالح على الاقل لمدة 6 شهور
– خطاب من جهة العمل موجه الى سفارة المملكة المغربية يتضمن الوظيفة وتاريخ الالتحاق والراتب ، او سجل تجاري وبطاقة ضريبية لاصحاب الاعمال الخاصة.
– كشف حساب بنكي لاخر 3 شهور على الا يقل رصيد الحساب عن 20 الف جنيه، او كشف حساب لاحد الابوين للطلبة او الغير عاملين من البنات او حديثي التخرج.
– للطلبة: يجب احضار شهادة قيد من الكلية وكشف حساب بنكي للأب وشهادة تاجيل تجنيد للذكور.
– صورتين شخصيتين بخلفية بيضاء.
– تكلفة التاشيرة والتأمين والحجز المبدئي للطيران ومصاريف اصدارها ٦٠٠ جنية مصري (يتم دفعها مع تقديم الورق) – يسترد منها ٤١٥ جنية في حالة رفض التأشيرة (لا قدر الله).

2

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec