14
Mar-2018

كل حاجة عن تايلاند – نصائح عامة

تايلاند طبعا من اشهر وانجح الدول الآسيوية في مجال السياحة. بلد جميلة ومتنوعة في كل حاجة. الحديث عنها محتاج كتب مش مقالات. خليني احاول اكتب ليكم سلسلة مقالات بسيطة عن البلد عاما وعن اهم المدن والجزر والانشطة الي ممكن تعملوها هناك.

امتى نسافر تايلاند؟

درجات الحرارة في تايلاند بتختلف من الشمال للجنوب، لكن السائد ان جوها استوائي، يعني درجات حرارة معتدلة طول السنة (بين آواخر العشرينات وآوائل الثلاثينات) – ولكن عندها مواسم امطار مختلفة. الاشهر الجافة بتكون من اكتوبر الى مايو. بالرغم من انه اسمه الموسم الجاف الا ان احتمالية الامطار لا تزال قائمة. شهور الصيف بتكون احتمالية الامطار اعلى (مايو الى سبتمبر)، ولكن بالامكان السفر لسه والاستمتاع بأغلب الانشطة. لكن لازم تعمل حسابك في وقت اضافي. يعني ايه؟ يعني لو رايح مدينة تحتاج ٥ ايام لزيارتها، يبقى حط ليها في خطتك ٧ ايام علشان ممكن تمطر يومين وماتعرفش تعمل انشطة كتير في يوم المطرة. الميزة في المواسم الممطرة ان الفنادق بتكون رخيصة وتقدر تقيم ٧ ليالي في السيزون الواطي بسعر ٥ ليالي في السيزون العالي. ….. عرفوني مين سافر في المواسم الممطرة وحصله ايه؟

تأشيرة تايلاند سهلة؟

مبدايا تاشيرة تايلاند مضمونة جدا جدا لو باسبورك ابيض ولا تحتاج تصريح امني – الموضوع بسيط اوي لو قدمت الورق المطلوب – كشف حساب ٣ شهور فيه ١٠ الاف جنية وخطاب من جهة العمل – وحجوزات طيران وفنادق – سعرها ٧٠٠ جنية للدخول مرة واحدة وصالحة ٣ شهور. لو عايزها متعدد سعرها بيكون ٣٥٠٠ لمدة ٦ شهور، بس في حركة سهلة هقولكم عليها تخليكم تستخدموا نفس التأشيرة اكتر من مرة، عن طريق حاجة اسمها re-entry. يعني لو انت قررت تعدي الحدود او تطير من تايلاند وتروح ماليزيا، كمبوديا، لاوس مثلا – وعايز ترجع تايلاند تاني، ممكن بكل بساطة تدفع رسوم اعادة دخول re entry ب١٠٠٠ بات (٦٠٠ جنية) وتروح وترجع تايلاند تاني بدون مشكلة. ادخلوا على اللينك ده علشان تعرفوا ازاي تعملوها بالتفاصيل. ….. حد عمل re-entry قبل كدة؟

الطيران رخيص؟

مصر للطيران بتسافر مباشرة الى بانكوك باسعار بدايتها٨٥٠٠ جنية وشركات الطيران الخليجية زي العمانية والخليج والاتحاد والاماراتية بتروح بانكوك ترانزيت في احد عواصم الخليج بداية من ٦٥٠٠ جنية. خد بالك وانت بتشتري التذكرة علشان احيانا ساعات الترانزيت بتكون طويلة اوي مقابل السعر الرخيص ده. طيران الاتحاد والاماراتية بيروحوا كمان جزيرة بوكيت. يعني لو بتخطط رحلة في تايلاند لزيارة اكتر من مكان، ممكن تبدأ من بانكوك وترجع من بوكيت او العكس.

شركات الطيران الآسيوية الاقتصادية زي Air Asia & Malindo بتربط بانكوك باكتر من عشرين مدينة وجزيرة تايلاندية باسعار في حدود ال٣٠٠ الى ٥٠٠ جنية، وتربط تايلاند بحوالي ١٠ دول في اسيا باسعار اقل من الالف جنية، ماليزيا كامبوديا فيتنام وحتى الهند كمان. يعني لو بتفكر تعمل جولة اسيوية تقدر تعتبر بانكوك موقف Hub حلو زي كوالالامبور. خد بالك من اسماء المطارات وانت بتعمل خطتك لان بانكوك فيها اكتر من مطار: Suvarnabhumi & Don Mueang. جزيرة بوكيت كمان فيها مطار دولي وتقدر منه تسافر الى وجهات آسيوية كتيرة اوي. ….. حد عمل رحلات اسيوية اخرى مع تايلاند؟

نروح فين في تايلاند؟

كل مدينج وجزيرة في تايلاند ليها ميزة وطابع خاص. طبيعة رحلتك هتحدد انهي مكان هيكون مناسب ليك. رايح مع مراتك و ولادك ولا رايح مع صحابك ولا لوحدك. لو عايز المدينة الصاخبة المجنونة يبقى طبعا عليك وعلى العاصمة بانكوك (يومين تلاتة)، لو عايز مدينة هادية وحلوة ومختلفة يبقى تروح تشانج ماي (تلات اربع ايام)، لو عايز جزيرة صاخبة وما بتنامش، وفي نفس الوقت ممكن عمل رحلات بحرية وانشطة و في مجال للاسترخاء والاستجمام، يبقى طبعا جزيرة بوكيت (خمسة او ستة ايام)، لو عايز جزيرة حفلات مجنونة ورقص ومناظر طبيعية خرافية يبقى عندك جزيرة بي بي Kho Phi Phi (ممكن تعملها يومين مع بوكيت)، او عندك ملكة الرقص وحفلات الfull moon الي بيحضرها عشرات الآلاف – يبقى تروح جزيرة Koh phangan او Koh Samui. لو عايز مدينة هادية ومش زحمة وحولها شواطئ وجزر حلوة يبقى كرابي (اربع خمس ايام) – لو عايز جزيرة منعزلة وهادية وفيها انشطة غطس وسنوركلينج جامدين يبقى تروح Koh Tao. …. ايه اكتر مكان زورته وعجبك؟؟

الاقامة في تايلاند حلوة؟

اختيارات الاقامة في تايلاند متوفرة في الهوستلز الحلوة من اول ٨٠ جنية في الليلة، وفنادق حلوة ورخيصة من اول ٣٠٠ ل٤٠٠ جنية في الليلة. لو عايز حاجات نضيفة اوي وتنفع شهر عسل ممكن من اول ٥٠٠ جنية في الليلة. لو رايح مكان فيه انشطة كتير، انصحك تسكن في حاجة رخيصة شوية علشان الانشطة بتاخد اليوم كله ومش هتلحق تستمع بالفندق. لكن لو عايز حاجة للانتخة والاسترخاء، يبقي ساعتها انقل فندق او منتجع حلو وكبير – ١٠٠٠ جنية في الليلة ممكن تنزلك في فنادق ممتازة. فنادق ال٣ نجوم في اسيا انضف بكتير من فنادق ال٣ نجوم في اوروبا والله وعن تجربة. مواقع booking و hostelworld عليهم اختيارات لا نهائية. لو عايز فلل خاصة كمان هتلاقيه موجود، اختار filter الخاص بالفلل. موقع airbnb كمان هتلاقوا عليه فلل خاصة حلوة. ….. ايه احلى الفنادق الي جربتوها؟؟

العملة التايلاندي رخيصة؟

اول ما توصل مطار بانكوك او بوكيت، هتلاقي صرافات تغيير العملة وماكينات atm علشان تسحب كاش من حسابك في البنك. اسعار بيع البات التايلاندي في المطار مش غالية اوي، غير ٥٠ دولار لحد ما توصل محل اقامتك وتغير من مكاتب الصرافة المنتشرة في كل مكان. هتسافر معاك دولارات او يورو – ال١٠٠ دولار هتجيب ليك تقريبا ٣١٠٠ بات تايلاندي. لما تيجي تحسبها مصري بقى هتكون سهلة اوي. الجنية المصري يجيب تقريبا ٢ بات (تحديدا١.٨٠ بات) – اسهل واسرع طريقة لمعرفة الاسعار هي انك تقسم على اتنين – يعني الحاجة الي ب١٠٠ بات تايلاندي سعرها تقريبا ٥٠ جنية مصري (في الحقيقة ٥٦ جنية). …. حد لحق تايلاند قبل التعويم؟؟؟

الاتصالات والانترنت سريع؟

هتلاقي في مطارات الوصول شركات موبايلات كتير بتبيع خطوط صلاحيتها اسبوع وفيها انترنت4g سريع وباقة ٤- ٥ جيجا وسعرهم حوالي ١٦٠ جنية. شبكة كويسة انا جربتها اسمها True. لو عايز تشحنها تاني، ممكن تروح محلات 7-eleven وتشحن بسهولة.

الانشطة في تايلاند؟

طول ما انت ماشي في الشارع في اي مدينة او جزيرة، هتلاقي شركات سياحة بتعمل جميع انواع tours الي تتخيلها – في حاجات جامدة جدا متوفرة من اول ٥٠٠ جنية لحد ٨٠٠ جنية. مش لازم تحجز اي حاجة قبل ما تسافر. لكن حاول قبل ما تسافر تكون مقرر انت ناوي تعمل ايه هناك، وتنزل اول يوم وصولك معاك ورقة وقلم وتعمل لفة على ٥ او ٦ مكاتب في الشارع (اسأل في محل اقامتك كمان) – واعمل مقارنات بين الرحلات. المهم انك تعرف جميع التفاصيل بتاعت الرحلات. احيانا لما تلاقي فرق سعر كبير، اعرف ان الرحلة مختلفة او فيها حاجة ناقصة. اتأكد ان اي رحلة بتحجزها هتكون شاملة انتقالات من والى الفندق – وشاملة الغذاء لو رحلة يوم كامل – وشاملة تذاكر الدخول لاي مكان. انواع المراكب كمان بيفرق في السعر. يعني لو رحلة بمركب كبيرة ferry هتكون ارخص من مركب سريع speed boat – كل حاجة ليها مميزات وعيوب. …. حد عمل رحلات وعجبته جدا؟؟؟

الاكل التايلاندي حلو؟

في اكلات كتير تايلاندية حلوة اوي ورخيصة جدا. اشهر حاجة هي نودلز Phat Thai -وكذلك الرز المحمر Fried Rice – (ترجمته الحرفية مقلي – ولكن هو مش مقلي زي fried chicken كدة، هو محمر زي الرز بالخلطة كدة) – بيتعملوا بالجمبري واللحمة والفراخ والبيض والخضار ( هتلاقي منهم “حلال” لان في مسلمين كتير في تايلاند) – هتلاقيهم في كل مكان زي الكشري والفول والطعمية عندنا هنا – واسعارهم من اول ٢٠ جنية لحد ٧٥ جنية – على حسب المكان والزمان. عندهم كمان حاجات كتير بصوصات الكاري العادي والحراق ومعاهم رز ابيض بالبخار – الوجبات برضو من ٣٠ ل ٦٠ جنية. يعني لو فضلت على الاكل الشعبي في الشارع او المحلات الرخيصة، ممكن تصرف ١٠٠ ل ٢٠٠ جنية في اليوم. اتفرجوا على فيديوهات الاكل التايلاندي الي عملتها. …. في اكلات تايلاندي تانية جربتوها؟؟

عندك كمان اختراع محلات 7-eleven و محلات family mart – دول عاملين زي محلات on the run في مصر، ولكن اسعارهم رخيصة جدا. هتلاقي فيهم مشروبات ساقعة وسخنة واكلات خفيفة – انا على طول كنت بتغدى علبة نودلز جاهزة التحضير ب ٨ جنية مثلا. عندهم وجبات جاهزة للتسخين وساندوتشات للافطار هايلة. انا كنت عايش فيهم الصراحة. موجودين في كل شارع وزقاق في تايلاند.

الفاكهة طبعا رخيصة وموجودة في كل مكان في الشارع – اناناس وبطيخ متقطع وجاهزة على الاكل. غير كمان عندهم فواكهة استوائية كتير جدا لازم تجربوها. اتفرجوا على فيديو الفاكهة بتاعي علشان تعرفوا ايه الحاجات الي لازم تجربوها لما تروحوا.

المواصلات في تايلاند سهلة؟

المواصلات بين المدن والجزر متوفرة باتوبيسات ومراكب كتيرة جدا. الموقع المشهور في آسيا لحجز قطر او اتوبيس او مركب اسمه 12go. asia – عليه هتلاقي اختيارات واسعار كتيرة اوي مقدمة من شركات سياحة كتير اوي. ….. حد جرب الموقع ده قبل كدة؟؟

لكن احيانا الموضوع بيكون متعب علشان ترتب انت كل شئ لوحدك. الاسهل احيانا انك تشتري مواصلاتك من شركة سياحة في الشارع، علشان هتكون شاملة كل حاجة. الانتقال من الفندق الى محطة الاتوبيس، وبعدين تركب اتوبيس، ومن محطة اتوبيس الوصول، تروح الميناء ومنها تاخد مركب علشان توصل محطتك الاخيرة، ومن هناك هيوصلوك للفندق بتاعك. علشان تعمل كل ده لوحدك هيكون متعب جدا ومرهق، ومش هتوفر اكتر من ١٠٠ او ٢٠٠ جنية مثلا. قارن بين الاختيارات المتوفرة اونلاين والمتوفر من شركات السياحة

المواصلات الداخلية متوفرة؟

الاتوبيسات والمترو متوفرة في العاصمة بانكوك، لكن لو انتوا اتنين او اكتر، هيكون الاسهل والاسرع والاوفر انكوا تتحركوا بتاكسي uber او grab، لان خرائط جوجل احيانا بيدي نتائج غير صحيحة فيما يخص خطوط الاتوبيسات تحديدا. لو ناوي تزور اي جزيرة في تايلاند، انصحك تتعلم سواقة الموتوسيكلات قبل ما تروح لان ده هيكون اسهل وارخص حاجة. الموتوسيكل في بوكيت ايجاره ١٠٠ ل١٥٠ جنية في اليوم، لكن مشوار التاكسي/التوك توك الواحد تكلفته من ١٠٠ ل ١٥٠ جنية برضو. لو مش بتعرف تسوق، يبقى لو رايح مشاوير بعيدة، هتاخد تاكسيات او تك تك باسعار في الحدود دي، علشان كدة حاول تسكن قريب من الخدمات الاساسية علشان مش تركب مواصلات كتير.

انتظروا تقارير مفصلة عن المدن والجزر الي زورتها في تايلاند

اعملوا شير ومنشن للي ناوي شهر عسل وناوي عايز يسافر تايلاند قريب

2

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec