11
Dec-2016

photostudio_1481465079755

المقالة التي طال انتظارها…. وزاد احتياجها اليومين دول, بعد ما اصبحت مصاريف السفر غالية اوي, قد تكون الاقامة المجانية احد الطرق الي تساعدنا في التوفير واحنا مسافرين … واشهر موقع طبعا هو موقع Couch Surfing – CS.

Couch معناها كنبة، مش كابتن على فكرة. الاسم جاء من امكانية النوم على اي حاجة موجودة في بيتك، ان شاء الله كنبة في حجرة المعيشة. علشان كدة انا اسمي Couch Traveler – مسافر الكنبة – علشان بسافر مستخدما الكنبة اغلب الاوقات.

الموقع الي غير حياتي تماما

احب اقولكم في الاول ان موقع CS هو اكتر حاجة غيرت حياتي وشخصيتي وخليتني عمرو بدوي الي انتوا شايفينه وبتقروا مقالاته دلوقتي. لاني قابلت من خلاله ناس ملهمة كتير جدا …. غيروا نظرتي للسفر وللحياة والمغامرة. 

موقع CS هو موقع تواصل اجتماعي, بيوصل المسافرين بالاشخاص المحليين لتسهيل تبادل الثقافات والخبرات عن البلاد. الأشخاص المحليين بيوفروا خدمات للمسافرين واهمها خدمة الاقامة المجانية, ولكن الأعضاء ايضا بينظموا انشطة وفعاليات علشان الزائرين يستمتعوا بالبلاد الي بيزوروها.

انا اول ما بدأت على الموقع مكنتش اقدر استضيف مسافرين في بيتي ,ولكني كنت بقابل كتير افسحهم في الاهرامات او خان الخليلي مثلا, اعزمهم على كشري, اجاوب على اسئلتهم الكتير عن مصر والعادات والتقاليد بتاعتها. وبعد فترة لما عيشت لوحدي، قدرت استضيف عشرات وعشرات المسافرين من كل حتة في العالم. استضفت خلال ٤ سنين اكتر من ٢٠٠ مسافر  في بيتي في القاهرة. قد يبدوا الامر جنان رسمي لناس كتير، ومخاطرة ومجازفة لناس اكتر، لكن في الواقع ده احسن حاجة حصلت في حياتي. انا بطبعي Risk Taker وكنت اثق في جميع الناس الي رحبت بيها في بيتي. الحمدلله لم اتعرض لاي تجربة سلبية، بالعكس، الموقع بالنسبة لي كان نافذة على العالم … بسافر في قصصهم ومغامراتهم وانا قاعد علي الكنبة في بيتي. 

cs-4 cs-3 cs-couple-2 cs-couple-1

ضيوف كتير استضافتهم في بيتي

آمان انام في بيت حد معرفوش؟

هو امان يعني اني استضيف حد عندي في البيت او ابات عند حد معرفوش؟ طبعا اول سؤال بيخطر على بال اي حد بيتعرف على الموقع … طبعا في بعض معايير الآمان في بروفايل كل واحد مشترك على الموقع. انه يكون كاتب كل بياناته, مأكد العنوان بتاعه (مصاريف 25 دولار حاليا) واهم حاجة يكون عنده references او reviews من مستخدمين اخرين من الموقع، والي محدش يقدر يغيرها او يمسحها. يعني انا لو كتبت لحد ان في مستخدم ذو سلوك سئ او غير مقبول، مش هيقدر يمسحه او يغيره. علشان كده كل واحد على الموقع بيكون حريص جدا على اظهار احسن ما عنده من سلوك. 

انا مثلا في بيتي بالعافية لما بغسل الطبق الي باكل فيه، لكن لو حد مستضيفني في البيت عنده، بغسل طبقي وطبقه واشطب المطبخ كله كمان 🙂

انا لما استضيف حد او ابات عند حد, اقرا البروفايل بتاعه واتعرف عليه, واقرا كمان الريفيوهات الي مكتوبه عليه من مستخدمين اخرين. علشان كده احساسي لما اقابله ان احنا صحاب من فترة، بس لم نتقابل الا دلوقتي.

موقع Couchsurfing ناس كتير بتقترحه للاستخدام كبديل رخيص للاقامة, لكن محدش بيتكلم عن تفاصيل الموضوع …. هو مش سهل زي ما ناس كتير فاكره … موقع بيسكن ببلاش, اعمل بروفايل والاقي حد فاتح دراعاته بالاحضان. لازم نتعلم طريقه استخدام الموقع وايه الاستراتيجية الي ترفع نسبة نجاحك في ايجاد مستضيف.

profile-cs

شجرة الكاوتش سيرفنج … من زرع حصد!!

اول حاجة لازم تعرفوها عن موقع CS هو انه موقع تواصل اجتماعي إنساني بالاساس, مش موقع لحجز الاقامة زي مواقع الفنادق. يعني مش من يوم وليلة هيشتغل معاك. عايزك تتعامل معاه انه شجرة بتزرعها, محتاجة منك مجهود علشان تطرح وتجني ثمارها قدام. مش يلا انا مسافر اوروبا الاسبوع الجاي, نجري نعمل بروفايل ونبعت للناس, وبعدين نستغرب مفيش حد معبرنا … الموضوع محتاج مجهود شوية.

انا بقالي سنين بزرع في الشجرة بتاعته والحمدلله دلوقتي قدرت اجني ثمارها جيدا في رحلاتي الأوروبية. الموضوع مش معقد اوي, بس محتاج شوية خطوات وحاجات نعرفها ونعملها علشان نرفع نسب النجاح فيه.

تنبيه هام

قبل ما اكمل كلامي  …. عايز أوجه رسالة للشباب الصغير المراهق او الكبير الي لسه مراهق, والي عندهم احتباسات هرمونية عنيفة, عايز اوضح ان الموقع ليس مكان “للشقط” !!! قابلت شباب كتيييير زمان كل همه انه يقابل بنات او يستضيف بنات وبس. طمعا واملا في مشهد مسرحية “الهمجي” لمحمد صبحي بتاع “اجيبشن هيبوسني”, والي بعتبره من احد المشاهد الي دمرت العقل الباطن لاجيال واجيال. لو سمحتم تعاملوا مع الموقع برقي علشان هو مافيهوش اي حاجة من الي في دماغكم. هو زيه زي الجيم, النادي, البار, الجامعة, حفلة … كل الاحتمالات مفتوحة لمقابلة شخص ما قد يكون ذو اهمية في حياتك لايام او لسنين …. لكن هو ليس الهدف الاساسي لانشاء الموقع. زي الامريكان ما بيقولوا:

  it’s cherry on the cake …. so focus on the cake not on the cherry

خمس خطوات لنجاح الكاوتش سيرفنج

دلوقتي هقولك على 5 خطوات تعملهم علشان تبقى عضو فعال في مجتمع الكاوتش سيرفنج – علشان تقدر تبدي تزرع الشجرة بتاعته علشان تقدر تلاقي حد يستضيفك وانت مسافر:

1 – اعمل بروفايل كامل

البروفايل في CS مش مجرد صورة واسم وكلمتين كدة, لازم تكتب حاجات كتير عن دراستك. حياتك. هواياتك. رحلاتك. صور كتير ليك.

لو في حاجات مش عارف تملاها, تصفح بروفايلات ناس كتير, خد افكار منها, وارجع اكتب في البروفايل بتاعك.

الغرض من كدة ايه؟ انك تكون كتاب مفتوح قدام اي حد بيقرأ البروفايل بتاعك وممكن يستضيفك. كل ما يعرف عنك اكتر كل ما يرفع احتمالات قبول طلب الاستضافة.

references-cs

2- لازم يكون عندك References

اهم حاجة بترفع نسبة نجاحك في ايجاد مستضيف هي ان يكون بروفايلك مليان ريفيوهات من مستخدمين آخرين. طيب نعملها ازاي واحنا لسه جداد في الموقع؟ 

– لو عندك مكان تقدر تستضيف فيه حد, يبقى دي اول خطوات النجاح واسهلها. لانك لازم تقدم لمجتمع CS علشان تقدر تلاقي قدام. حاجة كدة زي Karma. وطبعا دي من اهم الرفيوهات الي ممكن تحصل عليها.

بس انا عارف ان امكانية الاستضافة مش سهلة على ناس كتير بسبب القيود العائلية الاجتماعية الاسرية. لكن في طرق تانية.

 – كل مدينة ودولة في العالم ليها جروب على الموقع, والي بيضم السكان المحليين في المدينة دي والمسافرين الي جايين قريب يزوروها او مهتمين يعرفوا معلومات عنها. اشترك في الجروب المحلي  بتاعك وتابع اسئلة الناس وجاوب عليها واعرض خدماتك. انا اخدت سياح كتير من المطار وصلتهم الفندق بتاعهم. اعملهم برنامج سياحي يعملوه. افسحهم في شارع المعز. نشيش في قهوة بلدي. حاجات كتير ممكن تعرضها وتعملها  ورخيصة جدا. الناس دي معظمها بيحبوا الحاجات التقليدية مش السياحية. في المقابل, يكتب لك ريفيو على صفحتك يساعدك بعدين.

cs-event

خروجة CS في الحسين – ٢٠١٠

– لما تسافر في اي بلد برة, وساكن في هوستل او فندق, او حتى بتدرس برة, اشترك على الصفحة الخاصة بالبلد الي انت رايحها وتابع الفعاليات الي بيعملوها وقابل اعضاء محليين او مسافرين اخرين. اتعرف على بعضهم وصاحبهم بلطف واحترام,  وزي ما هتطلب الفيسبوك بتاعهم,  اطلب كمان حساب الكاوتش سيرفينج علشان تعمله ADD هناك وتكتبوا لبعض references. 

– الطريقة البلدي بقى هي انك تشترك انت وصحابك وولاد خالتك على الموقع وتعملوا لبعض references  … هي احيانا مفقوسة, لان كلهم هيكونوا من مصر, شكلها بلدي قدام الناس الي هتقرا بروفايلك. جربها برضوا.

freinds-references-cs

ريفيو من اخويا ومن احد اعز اصدقائي – احيانا بينفعوا

٣-  ازاي تدور على مستضيف Host مناسب

لو دخلت دورت في باريس على حد يستضيفك, هتلاقي ١٦٤ الف عضو مثلا. المفروض بتبعت رسالة طلب استضافة للاعضاء وتنتظر الرد بتاعهم بالموافقة او الرفض. استحالة طبعا تقعد تدور في كل الناس دي علشان تلاقي واحد مناسب.

finding-host

محرك البحث في موقع CS بيديك اوبشنز كتير وانت بتدور على المستضيف بتاعك. بتكتب المدينة الي انت رايحها, وبعدين عندك فلاتر filters كتير تقدر تستخدمهم علشان تلاقي حد مناسب. في مستخدمين خاملين كتير على الموقع، يعني لم يستخدموه من زمان اوي، علشان كدة اول فلتر باستخدمه هو last login date يكون الاسبوع الي فات مثلا. تاني حاجة مهمة انه يقدر يستضيف، علشان كده اختار Accepting Guests. 

لو انت مستخدم جديد في الموقع، انصحك تدور على مستضيف زيك جديد برضو، وتاخدوا بايد يعض انتوا لاتنين وتعملوا ريفيوهات لبعض وتكبروا البروفايل بتاعكم. يعني ما تبقاش ابن امبارح لسه وتكون عايز تقعد عند مستخدم بقاله ١٠ سنين وعنده مئات الريفيوهات. حاول تلاقي حد جديد لسه مشترك قريب ومتحمس انه يستضيف ناس على الموقع. دايما كانت بتنجح معايا الطريقة دي، حتى وانا عندي ريفيوهات كتير. اختار Join Date الشهر الي فات مثلا. لو انت راجل، لا تقلق، محدش هيسرقك ولا هيغتصبك. اقعد عند ناس جديدة وماتخافش.

لو انتي بنت، دوري على بنات تقعدي عندهم. واختاري accomodation option الي يريحك. private room وبلاش shared bed مثلا.

filters-hosts-cs٤- رسالة خاصة لكل مستخدم

بعد ما استخدمت الفلاتر المختلفة، ال١٦٤ الف مستخدم نزلوا ل٦٠٠ مستخدم مثلا. ابتدي اتفرج على النتايج الي طلعت لك وخد بالك من Response Rate بتاع كل مستخدم. انا افضل اني ابعت للناس الي معدل الرد بتاعها عالي. ايجابي او سلبي. بس بيرد عليك. لان في ناس من كتر الرسايل الي بتيجي ليها مش بتلاحق ترد على طلبات الاستضافة.

تبتدي تفتح البروفايل الي يعجبك في new tab وتبدأ تقرأ كل بروفايل كويس. ممكن تلاقي واحدة كاتبة انها لا تستضيف ولاد مثلا. ممكن تلاقي واحد كاتب انه لا يستضيف في ايام الاسبوع ولكن في الويك اند فقط. لازم تقرأ البروفايل بتاع الناس كويس جدا قبل ما تبعت رسالة لاي حد. ليه بقى؟ علشان لما تبعت رسالة استضافة الى اي مستخدم، لازم تكون موجهة الى شخصه ولازم تحسسه انك قريت البروفايل بتاعه ومهتم تقابله، مش مجرد مكان عايز تنام فيه وخلاص. اطلب ٣ ايام او ٥ بالكتير. ما ينفعش تطلب اسبوع او ١٠ ايام مثلا. انا شخصيا استضفت ناس بالاسابيع، بس في الاول بيكونوا طالبين يومين تلاتة.

وانا في اوروبا، كنت عامل دباجة رسالة جاهزة وحافظها على الموقع Message Template، بحكي فيها عن نفسي وعن رحلتي في اوروبا، وبعدين بعد ما اقرا بروفايل الي ببعتله، اكتب كلمتين موجهين ليه هو شخصيا…. يعني الرسالة ممكن تكون ٧٠٪ copy & paste وال٣٠٪ تكون شخصية موجهة للشخص. حاجة مشتركة بتعملوها، بتحبوها … اعتبروه dating website بس للاصدقاء فقط

 “انا شايف انك سافرت كوستاريكا قبل كدة، ياريت لما نتقابل تعرفني عملت ايه هناك علشان مسافر السنة الجاية”

“انا شايف انك بتحب التصوير، وانا كمان بحب التصوير جدا، الكانيرا بتاعتك ايه؟ ممكن تبقى تقولي على احسن اماكن اصور فيها في باريس؟”

“انت بتقول انك بتحب الاكل والطبخ، اسمح لي اعملك اكلة مصري لما اقعد عندك حلوة جدا وانا متأكد هتعجبك”

للأسف في ناس بتكتب رسالة من ٣ سطور وتعملها copy & paste وفي اولها Dear Friend حتى من غير ما تكتب اسمه، وتبعت عشرات الرسائل، وبعدين يستغربوا محدش موافق يستضيفهم. المجهود مطلوب يا جماعة.

لازم تبعت لناس كتير وتعمل خطة بديلة دايما. يعني لو ٣ وافقوا يستضيفوك، خد ارقامهم وتليفوناتهم وعناوينهم، وتواصل معاهم. لما تقرر تقعد عند حد وكله تمام، اعتذر للناس التانية وقولهم حصلت تغير في الخطة. حصلت كتير معايا، ناس كتير طلبت استضافة واعتذرت ومجتش. واعرف هوستل رخيص كمان فين علشان لو حصل اي مشكلة في التواصل او المستضيف اعتذر لاي سبب مفاجئ، تعرف هتروح فين وتيجي منين.

دعوة عامة Plan a trip

الموقع يتيح لك تعمل خطة سفرك الى اي مدينة public وجميع المستخدمين في هذه المدينة يقدروا يشوفوها ويبعتولك دعوة استضافة عندهم في البيت. حصلت معايا كتير، مرة في لوس انجلوس امريكا ومرة في اوترخت هولاندا.

public-trip-cs

٥- خليك دائما ضيف لطيف

لازم تعمل كل ما وسعك علشان تكون ضيف لطيف عند الناس الي رايح تقعد عندهم. خد معاك هدايا بسيطة. جنية ورق حتى. ورقة بردي من ام ٥ جنية دي. احترم قواعد البيت الي قاعد فيه في الصحيان والرجوع للبيت. رتب الكنبة الي هتنام عليها. اغسل المواعين. خلي الوالدة تعلمك طبخة سهلة واعملها لهم. اعرض دايما عليهم انك تقضي بعض الوقت معاهم. انا شخصيا افضل وقت دايما في الفطار، لو مستضيف حد في بيتي، كنت بنفطر سوا دايما. لو قاعد عند حد بنفطر او نتعشى سوا. على الاقل مرة. الكاوتش سيرفينج مش مجرد مكان تنام فيه يالليل وتصحى تختفي طول اليوم. اعزمه على العشاء يوم يالليل بعد الشغل مثلا. اتمنى تشوفوا فيديوهاتي وتعرفوا انا بعمل ايه مع المستضيفين بتوعي.

20161119_193329

اتمنى تقدروا تفهموا فكرة الموقع … هو مش مجرد مكان للنوم … هو مكان تقدر تتواصل فيه مع اهل البلد الي انت مسافرها بدون اي منافع مادية …. تتعرف على ثقافتهم وحياتهم … مش مجرد تتفرج على البلد من برة. انا عملت كتاب كاااامل عن موقع الكاوتش سيرفنج – مسافر الكنبة في ايران – علشان اوريكم ازاي طريقة السفر دي بتخليك تتعرف على ثقافة وتاريخ وحاضر البلد احسن من اي طريقة اخرى. الطبعة الرابعة من الكتاب  متوفرة في المكتبات حاليا. كنت عمل محاضرة عن الموضوع كله، هتلاقوها في اللينك ده. 

10

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec