11
May-2017

احسن وارخص مكان اقامة للعائلات والمجموعات

الموقع ده بقى يا جماعة هو “اوبر” بتاع العقارات. السمسار الالكتروني. من وجهة نظري هو افضل وارخص مكان للاقامة للعائلات والمجموعات. ارجوكم تسامحوني لاني لم اكتب عنه مقالة مخصوص حتى الآن. تقبلوا اعتذاري بهدية بسيط وهي عبارة عن تخفيض حوالي  ٥٠٠ جنية (٢٥ دولار / ٢٣ يورو ) عند الاشتراك وعمل حجزك القادم من خلال الموقع. خد هديتك من اللينك في الصورة دي

لما تشترك في الموقع من اللينك ده هتاخد تخفيض على اول حجز ليك. اوعدك انك لما تخلص قراءة المقالة هتشترك فيه فورا 🙂

ما هو موقع airbnb

هو اكبر موقع للاقامة في العالم، ولا يملك شقة واحدة. هو واحد من اكبر المواقع لتأجير الغرف، الشقق، الفلل في اي مكان في العااااالم كله. عليه هتلاقي غرف وشقق ارخص من الفنادق بكتييييير وفي اماكن حيوية جدا.

لو انت ومراتك وعيالك وحماتك مسافرين …. يبقى عليك وعلى هذا الموقع

لو انتم شلة بنات وعايزين توفروا فلوس الاقامة علشان تعملوا شوبينج، يبقى عليكن بالموقع ده

لو انتم شلة شباب بايظة وعايزين توفروا فلوس الاقامة علشان الهلس، يبقى عليكم بالموقع ده

هو الاوبشن الممتاز الي بيجمع ما بين الاقامة الرخيصة في الهوستلز وما بين مميزات الفنادق الغالية – وبيكون لسه حلو ونضيف ورخيص ومتميز وفيه الخصوصية المطلوبة – وفي نفس الوقت فيها مميزات من الهوستل – اقروا المقالة المهمة دي بالتفصيل وهتلاقوا مميزات وعيوب الموقع في الآخر.

طريقة استخدام الموقع

١- مثل اي موقع للبحث عن الفنادق، تبحث عن المدينة، المواعيد، عدد الاشخاص

٢- بعد كده تبدأ في استخدام بعض الفلاتر الي هتساعدك في ايجاد ما يناسبك. تحدد اولا طبيعة محل الاقامة الي انت عايزه:

– ممكن حجرة مشتركة (زي الهوستلز، ودي شوفتها في امريكا كتير جدا) – shared room

– ممكن غرفة خاصة في شقة فيها اكتر من غرفة. منتشرة في اوروبا جدا. تتشارك الحمام والمطبخ مع اهل البيت الي انت ساكن فيه. private room

– مكان الكامل (شقة او فيلا) بالكامل بتاعتك طول فترة الايجار.

٣- متوسط السعر المناسب ليك. الموقع بيرسم ليك رسم بياني بمتوسط الاسعار الموجودة. علشان مش تطلب حاجة سعرها واااااطي اوي ومش تلاقي نتائج طلعتلك.

٤- امكانية الحجز الفوري

مواقع الفنادق بتطلع ليك نتائج البحث للفنادق المتاحة فقط (الي فيها avaiability) لكن في موقع airbnb ممكن يطلع لك شقق متاحة وغير متاحة. لان دي حجوزات شقق سكنية مفروشة مملوكة لافراد مش مؤسسات، احيانا قد تكون الوحدة معروضة للايجار، ولكن قد تكون غير متاحة لظروف خاصة بمالكها. او احيانا يشترط موافقة مسبقة من المالك اولا قبل قبول طلب الايجار (ممكن واحد بيرفض الايجار لاسر فيها اطفال صغيرة مثلا)

لو استخدمت الاوبشن دة “Instant Book” هيطلع ليك الوحدات المتاحة للحجز فورا بدون انتظار موافقة مسبقة من المالك.

٥- المزيد من الفلاتر بقى متعلقة بالمزيد من الخصائص عن المكان …عايزها كام اوضة وكام حمام …. عايزها بالمطبخ، الركنة، الواي فاي، بتقبل وجود كلاب او قطط … هتلاقي هنا حاجات كتيرة. اختار الضروري منها فقط. علشان كل ما هتختار حاجات كتير هتقلل نتائج البحث بتاعتك.

٦- نتائج البحث على خريطة

زي نتائج البحث عن الفنادق، الموقع بيستعرض الشقق المتاحة على خريطة للمدينة. غالبا هتلاقي نتائج البحث مبعثرة في انحاء الخريطة، على العكس من نتائج بحث الفنادق، هتلاقيها متركزة في الاماكن السياحية التجارية. لازم تكون عارف المناطق السياحية في المدين والقريبة من المواصلات علشان تختار حاجة مكانها مناسب.

٧- استعراض نتائج البحث بيكون مكون من البوم صور للشقة وتحتيها ٣ سطور: وصف سريع للمكان وسعر الليلة، عدد السراير، عدد مرات التقييم ومتوسط التقييم. لو لقيت موجود جنب السعر علامة “شرارة الكهرباء” دي، يبقى الشقة دي متاحة للحجز فوراااا.

استخدم الاسهم الصغيرة على الصورة لاستعراض صور المكان سريعا. كل ما كانت الصور جذابة، كل ما طبعا سال لعابك لاستعراض تفاصيلها. خد بالك علشان احيانا الصور بتكون متصورة بعدسات wide angle وتبدو في الصور اكبر من الحقيقة.

٨- تبدأ باختيار الحاجات الي عجبتك واستعراض تفاصيلها المهمة. اهم حاجة السعر طبعا. السعر الي مكتوب برة للأسف هتلاقيه مختلف عن الموجود جوة علشان بيكون في بعض الحاجات المستخبية، والي هنتكلم عليهم واحدة واحدة.

  • سعر الليلة الي مكتوب برة احيانا بيكون عليه تخفيض لو انت واخد اسبوع او اكتر – مصلحة – يعني الشقة دي عليها ١٥٪ تخفيض في السعر علشان واخدنها اسبوع
  • مصاريف نضافة – cleanning fees – مبلغ ثابت يدفع مرة واحدة –  لو مأجر ليلة او مأجر شهر.
  • مصاريف خدمة – service fee – الي هو اي استعباط وخلاص يعني – مصاريف خدمة علشان احنا موجودين في خدمتك اي وقت في ال٢٤ ساعة. احيانا بتكون مش موجودة. خد بالك منها برضو وهتلاقيها محسوبة في المجموع.
  • هتلاقي مكتوب في الآخر السعر المجمل شامل كل الخدمات والمصاريف والتخفيضات. تاخد بقى الرقم ده وتقسمه على عدد الليالي علشان تعرف متوسط سعر الليلة هيكون كام وتقارنه بسعر وحدات اخرى او فنادق.

٩- السعر بيكون فيه تفاصيل تانية للاطلاع:

  • سعر الليلة بيختلف بعدد الافراد. يعني ايه؟ يعني لو انت مأجر الشقة دي لاربع افراد فقط، هتكون في الليلة مثلا ب ٦٠ يورو، لكن لو زاد العدد عن كده واصبح ٦ افراد مثلا، السعر هيكون ١٥ دولار اضافية عن كل فرد. يعني سعر الليلة هيوصل ل٩٠ يورو.  Extra people $15/night after 4 guests
  • جرب غير عدد الناس الي الحجز من ٦ الى ٤، وهتلاقي السعر نزل جامد. معندكش ضمير؟ ممكن تستهبل وتقول انتوا ٤ افراد وتبقوا تروحوا الشقة على دفعتين، بس لو اتقفشت هيكون شكلك وحش والراجل صاحب المكان هيطالبك بالفلوس الزيادة او يعملك ريفيو وحش في البروفايل بتاعك. امشي في السليم!
  • بيكون كمان كاتب سعر الليلة في الويك اند كام، التخفيض الشهري او الاسبوعي كام.

١٠- الموقع وشروط اخرى

هتلاقي كمان مكتوب معلومات اكتر عن مكان الشقة، ومعلومات مهمة جدا عن سياسة الالغاء. مش معنى انها شقة يعني يبقى مفيش شروط واحكام. زيها زي الفنادق بالزبط، وده دور موقع airbnb الوسيط بينكم في الموضوع. اقرا شروط الالغاء كويس قبل ما تحجز.

١١ – تقييم الوحدة هتلاقيه مكتوب هنا بالتفاصيل. مهم انك تقرأ التقييمات علشان دي شقة. يعني مش مؤسسة عندها خدمة عملاء وادارة صيانة ومبيعات وكدة. شقة من مستأجر. لازم تقرا الريفيوهات شوية لو لقيت حاجات سلبية. كل ما عدد التقييمات زاد كل ما كانت التقييمات حقيقة اكتر ومقنعة. الشقة دي مثلا عندها ٦٠ ريفيو.

احيانا شقق جديدة بتكون من غير تقييم خالص ومنزلة الاسعار جامد علشان تجتذب زبائن جداد. ممكن تاخد المخاطرة وتجربهم وان شاء الله هيكونوا كويسين. احجز ليلتين و لو عجبتك ابقى مد الحجز بتاعك لو عندهم امكانية.

١٢- تقييم المستضيف

احنا مش لسه قاريين تقييم الشقة؟ ليه هيكون في تقييم منفصل لصاحب الشقة؟ اقولك يا سيدي. لان ناس كتير على الموقع ده عندها اكتر من شقة في نفس البلد معروضيين للايجار على الموقع – او ممكن تكون شركة او مكتب سمسرة. ممكن تكون الآنسة دي عندها شقة جديدة من غير اي تقييمات لسه، لكن هي الي منزلاها وهي كشخص مستضيف عندها تقييما ايجابية كتير. بالشكل ده هتكون مطمن للآنسة واي حاجة تعرضها للايجار على الموقع.

كمان بيقولك response rate & time معدل الرد على الايميلات بتاعتها سريعة ولا بطيئة. لو مستعجل، شوف الناس الي عندها معدلات سريعة وعالية.

هتلاقي كمان هنا اوبشن contact host  علشان لو عندك اي اسئلة خاصة بالشقة او المواصلات اليها او اي حاجة محتاج تعرفها ومش واضحة في الموقع، ممكن تبعت رسالة لطيفة للانسة وهترد عليك في اقرب وقت. عندكوا تلاجة كام قدم؟ تلفزيون الدش في قنوات ايه؟ اسأل براحتك وهيردوا عليك.

١٣- لو الوحدة متاحة للايجار مباشرة، يبقى تقدر تحجزها مباشرة من على الموقع وتدفع فلوسها اونلاين. بعض الوخدات بتدفع ليلة واحدة، او بتدفع جزء من الايجار. راجع شروط الدفع والالغاء قبل ما تدفح الحجز. الموقع اماااااان جدا لاستخدام الكريدت كارد.

١٤-  لو الشقة غير متاحة للحجز الفوري، هتلاقي بدل من كلمة Book – كلمة اخرى Request to Book – تبعت رسالة لصاحب الشقة تقوله عن رحلتك والناس الي معاك وتستفسر عن اي حاجة محتاج تعرفها.

١٥ – الحجز المباشر بدون الموقع

احيانا بكون متواجد في المدينة الي عايز فيها شقة وبتواصل مع صاحب الشقة واعرض عليه اني ااجرها مباشرة منه بكرة ولا بعده – ونوصل لاتفاق ارخص من الموقع. هي حركة غير شريفة بصراحة لانك بتتفادى دفع عمولة الموقع، علشان كدة مش بعملها كتير، بس قولت اقولكم انها ساعات بتنفع في ظروف استثنائية. ما تنفعش تعملها قبل السفر بمدة طويلة، لانه ممكن يوقلك “اوك” وبعدين يجيله زبون ياخد الشقة اسبوعين مثلا، ويحلق لك ويروح عليك حجز كلمة الشرف ده. علشان كده احجز من خلال الموقع اامن واريح.

مميزات الحجز من موقع airbnb

  • ارخص من الفنادق بكل تأكيد – لانكم لو اسرة او جروب اصدقاء، هتكون اوفر جدا
  • هتلاقي عليه حاجات للايجار لن تجدها في مكان اخر – فيلا على البحر في اسبانيا، مركب في احد قنوات امستردام، قصر في الريف الانجليزي – بص هتلاقي حاجات عجب عجب عجب. هتنبهر.
  • متوفر فيها خدمات زي المطبخ والتلاجة والغسالة، ودي كلها حاجات موفرة جدا لو انتوا اسرة او مجموعة.
  • قد تلاقي نفسك واخد اوضة في شقة ساكن فيها اسرة من اهل البلد، فهتكون فرصة انك تتعرف على اهل البلد بشكل افضل ومختلف.

عيوب الحجز على موقع airbnb

  • موقع الشقة قد يكون بعيد عن وسط المدينة السياحي وغير مناسب لاجازتك. عليك قراءة التفاصيل جيدا
  • نظافة المكان بتفرق من شخص لشخص ومكان لمكان. مفيش ادارة صيانة وخدمات في الشقة. اقرا التعليقات كويس علشان تتأكد من جودة المكان.
  • عليك التأكد من جودة عمل الاجهزة في المكان (لازم اتأكد ان السخان شغال، التلاجة، البوتاجاز، الانترنت) – علشان لو في مشكلة تطلب من صاحب المكان يصلحها.
  • مفيش خدمة غرف للتنظيف والترويق زي الفنادق – معلش بقى مفيش حلاوة من غير نار.

انا استخدمت الموقع مرات عديدة ولم اواجه اي مشاكل في استخدامه في اي مكان.

اعرض شقتك عليه للايجار

ممكن بقى تكون انت المؤجر في الموقع، تحط شقتك او اوضتك للايجار – انا شخصيا عارض شقتي في القاهرة عليه للايجار. ممكن ابقى اعمل مقالة عن الموضوع ده لو عايزين.

اشترك في الموقع دلوقتي فورا

11

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec