09
May-2016

الاقامة في الهوستل: ٦ مميزات – ٦ مشاكل – ٦ حلول

hostel photo article

اولا احب اطمنكم ان اخر حالة اغتصاب او سرقة كلية او مصران غليظ في الهوستلز سجلت عام 1684م 😜…… ما بيحصلش حاجة والمصحف الشريف. كل الي معاك في الهوستل ناس في حالهم جايين يتفسحوا زيك وبس. “اوكسيمبلاه” انا نزلت في هوستلز من اول هولندا وايطاليا, لحد ايران وافغانستان ومحصليش اي حاجة في اي حتة 😂

“”” قبل ما نكمل كلامنها، افضل موقع انا دائما بستخدمه في حجوزاتي في موقع هوستل وورلد، ادخلوا من اللينك دي ودوروا على افضل وارخص اقامة. “””

جالي اسئلة كتير عن الاقامة في هوستل او في شقة مشتركة …. امان؟ نضيفة؟ مريح؟ السرقة؟ الخ الخ من المخاوف الطبيعية عند اي حد ما جربش استخدام الهوستل قبل كدة في اقامته قبل كدة. خليني اقول لكم باختصار فوائد و مميزات الهوستل وبعد كدة هقولكم على مشاكله وطرق تجنبها او التقليل منها:

مميزات الهوستل

١- الموقع. عادة ما يكون موقع الهوستل هو اكتر حاجة بتميزه. في اوروبا دايما بيكون في وسط البلد السياحي. جنب كل المزارات السياحية والنايت لايف. ممكن يكون مبنى قديم وفيه روح البلد الي بتزورها, زي هوستل نزلت فيه في بودابيست مرة. دايما هتلاقي الهوستل قدام محطة مترو او أتوبيس او جنبه بدقائق معدودة.

2- الصحبة. لو مسافر لوحدك او مع حد من صحابك, الهوستل هو احسن مكان تقابل فيه صحاب جداد في رحلتك. لانك هتلاقي فيه مسافرين لوحدهم زيك برضو او مع واحد او واحدة صاحبتها. كل الهوستلز عندها منطقة معيشة كدة الناس بتتقابل وبتتعرف فيها على بعض. بياكلوا ويشربوا و بينظموا خروجات سوا للمدينة او اهم مزارتها. في كراكوف في بولندا مثلا روحت رحلة الصبح زورت فيها افران الغاز بتاعت هتلر مع واحد ياباني, في فلوريدا روحت ميامي بيتش مع بنت بولندية وولد برازيلي, في براغ خرجت سهرت مع ناس انجليز مجانين رقص. الامثلة كتيرة. الفنادق هتلاقيها ناس كبار في السن واسر …..couples…او ناس مش عايزة تختلط بحد جديد في رحلتها.

3- السعر. طبعا سعر الليلة في الهوستل بيكون ارخص بكتير من فندق في نفس المنطقة. على الاقل بيكون نص لو تلت سعر فندق في نفس المنطقة في وسط البلد. لو عايز فندق بميزانية صغيرة, هتكون مضطر تروح فندق بعيد عن وسط البلد السياحي. فلو بصينا للسعر مقابل المكان, اكيد انت الكسبان.

4- النصايح. موظفين الهوستل هتلاقيهم شباب زيك, بيحب يسافر ويتفسح من غير ما يصرف كتير. هتلاقيهم عارفين احسن اماكن للاكل والشرب والفسحة باسعار معقولة. فاهمين دماغنا يعني من الاخر.

5- التوفير في الاكل والشرب. هوستلز كتير بيكون عندها مطبخ متكامل ومجهز بادواته وأجهزته (حلل, طاسات, توابل, تلاجة, فريزر, بوتاجاز, مايكرووف, توستر, مكنة قهوة, غلاية شاي) . لو الهوستل بتاعك من غير فطار, يبقى طبعا اول ما توصل تشتري شوية حاجات من السوبر ماركت تحطها في التلاجة, تفطر وتتعشى بيها, وتخلي وجبتك الرئيسية مرة واحدة في مطعم. الموضوع ده بيوفر جامد جدا. جبنة عيش بيض مربى عصير. مكرونة ومقليات كوكي لو عايز تتغدى كمان. فاكهة طبعا. انت كمان ممكن تعملك ساندوتشين تاكلهم وانت خارج وتخلي وجبتك الأساسية في مطعم بقى في المساء والسهرة. ارخص فطار في اوروبا 5 ولا 6 يورو, قهوة وحاجة عبيطة كدة. ممكن اي بواقي اكل من عشاء امبارح تسخنها في المطبخ تاني يوم. انا بطلت اسيب اي بواقي اكل في اي حتة. كله بينفع تاني يوم. لكن في الفندق هيكون اخرك تلاجة صغيرة في الاوضة وخلاص.

6-الغسيل. لو انت مسافر خفافي, مش معاك لبس كتير زي حالاتي, هتلاقي بعض الهوستلز عندها غسالة و دراير تستخدمهم ببلاش. تجيب الصابون بتاعك لو مش عندهم. على العكس, الفندق هتدفع علشان تغسل عندهم او تطلع مغسلة برة بقى.

edited_20160508_133900edited_20160508_134201

———————————————————————-

طيب حلو جدا الكلام ده. نيجي بقى لعيوب الاقامة في الهوستل, وازاي نقدر نقلل من مشاكلها

عيوب وحلول الهوستل

1- طبعا فكرة النوم مع غرباء في اوضة واحدة بتعمل مشكلة اكبر للبنات. احب اطمنكوا ان اغلب الهوستلز, لو مش كلها كمان, عندها غرف dorms للبنات فقط. مش معاكي ولاد في الاوضة. وفي كمان dorms للولاد فقط او مشتركة للجنسين. ساعات الهوستل يستهبل وياخد سعر اعلى لغرف البنات فقط. بس لسه هيكون ارخص من الفنادق. غير كدة في هوستلز كتيرة عندها غرف private. يعني أنا وبنتي في جنيف نزلنا في هوستل, بس في غرفة خاصة. سريرين وحوض مية. لكن الحمام والشاور كان في الحمام المشترك. تقبلت الفكرة عادي والموضوع كان بسيط. فانتي ممكن تاخدي اوضة مع صاحبتك في هوستل هتكون اوفر من اوضة فندق بالحمام بتاعها الخاص. ده لو عايزة توفري وتسافري فترة اطول. بعض الهوستلز كمان عندها private كبيرة. لو انتوا شلة كبيرة ممكن تاخدوا غرفة ل6 اشخاص مثلا. هتكون ارخص حاجة ليكوا.

2- الخصوصية طبعا منتهكة تمام في الهوستلز. لما تيجي تغير هدومك الصبح او بالليل, تروح الحمام يا بطل تغير هناك لو بتتكسف تقلع قدام رجالة ما تعرفهمش. محلولة. كمام ممكن تلف نفسك بفوطة وتغير تحتها. اتصرف بالشكل اللي يعجبك. انا شخصيا واخد على الموضوع. بقعد على السرير واسلت البيجاما واحط الجينز في ثانية الا ثانية. اوقات كتير بتبقى الاوضة الكبيرة دي فاضية اساسا وبتبقى براحتك. بس مش براحتك اوي علشان محدش يدخل عليك 😀

20160508_133334

3- الحمام اكيد بيكون مشترك في الهوستلز. حمام حريمي وحمام رجالي. اول مشكلة اتحلت. بتروح الحمام معاك هدومك والفوطة وعدة الاستحمام كلها, تزبط نفسك وتستحمى وتغير هناك. بيبقى جنب غرفة النوم على طول. متقسم حمامات و شورز جنب بعض.

funny_hostel_signs_2

4- النضافة…. طبعا كل سرير بتستلمه تنام عليه بيكون متغير ليه الملاية وكيس المخدة و البطانية بتاعته كمان. زي الفنادق بالزبط.

نضافة الحمام. اتعامل مع الحمام اكنك دخلت اي حمام في مطعم او في نادي. هتنضف قبل وبعد. معظم الحمامات دي فيها refreshner ولمؤاخذة علشان تبقى ريحتها دايما عطرة وتنتصر على غاز الميثان في معركة البقاء.

5- الراحة في الهوستل ساعات بيكون ليها تحديات بسيطة, بس سهل التغلب عليها. لو انت نومك تقيل, يبقى تيجي جنب اخوك هنا في طابور السعادة الابدية. لانك هتنام مش هتحس بالحركة او الاضواء اوالاصوات الي حواليك. لو انت نومك خفيف تعمل ايه؟ قبل ما اقولك تعمل ايه, لازم تعرفوا جميعا ان في اداب عامة يجب اتباعها في dorms … يعني الي راجع متأخر من برة ما يفتحش النور, مايعملش دوشة على قد ما يقدر, ما يتكلمش في التليفون ولا يطلع اصوات خالص من typing عليه. افرض كان في حد سخيف ومش مراعي الاداب دي. او لو رفقاء الغرفة بيصحوا بدري وانت عايز تنام الصبح ومش عايز ازعاج. تجيب حاجتين مهمين: غطاء للعين زي الي بيتوزع في الطيارات كدة علشان تمنع الاضواء تدخلك وتزعج نومتك. افرض حد بيشخر وهو نايم؟ هنا يجي دور تاني حاجة مهمة والي هي سدادة الودان الي بتتباع في الصيدلية. انعزل عن ضوضاء الوسط الي حواليك.

6- الامان في الهوستل سهل جدا. اغلبهم عندهم lockers او خزن للشنطة كلها على بعضها, تحط فيها الشنطة كلها وتقفل عليها. او عندهم خزنةصغيرة برزة وقفل و ومفتاح (خد معاك قفلين). شيل فلوسك وخبيها جوة الشنطة واقفلها بقفل او حط الحاجة في خزنة واقفلها بقفل. بسيطة مش صعبة. شحن التليفون وانت نايم بالليل؟ كل سرير عادة بيكون جنبه فيشة علشان تشحن فيها تليفونك ويكون في حضنك وانت نايم. لو مفيش جنبك, زي محل اقامتي الحالي, مش مشكلة, بشحن في فيشة بعيدة شوية وخلاص. مفيش حاجة اتسرقت مني ابدا في اي هوستل الصراحة.

edited_20160508_141412

من حيث الامان الجسدي, فاحب اطمنك ان اخر حالة اغتصاب او سرقة كلية او مصران غليظ في الهوستلز سجلت عام 1684م 😜…… ما بيحصلش حاجة والمصحف الشريف. كل الي معاك في الغرفة ناس في حالهم جايين يتفسحوا زيك وبس. “اوكسيمبلاه” انا نزلت في هوستلز من اول هولندا وايطاليا, لحد ايران وافغانستان ومحصليش اي حاجة في اي حتة 😂

اتمنى اني اكون ساعدت في كشف الغمة عن الاقامة في الهوستلز…. اتفرجوا على فيديوهات رحلتي في ميامي فلوريدا وفي نيويورك, هتشوفوا انا كنت عايش ازاي في محل إقامة مشترك والناس الي قابلتها كانت لطيفة ازاي وفعلا اضافوا كتييير للرحلة بتاعتي.

مواقع كتيرة بتحجز هوستلز وكويسة:

 hotels combined

booking

hostel world

Hostel Bookers

 

6

 likes / 17 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec