20
May-2016

الاقامة المجانية للسفر لمدة طويلة – العمل التطوعي

مقالة التطوع

تحاصرنا كل يوم على الفيسبوك بوستات عن اهمية وفوائد السفر …. إزاي ممكن يخليك انسان مختلف، هتتعلم ثقافات جديدة، هتشوف الآخر بشكل مختلف، هتكتشف نفسك من جديد، وقد ايه احساس جميل wandering – wanderlust زي ما بيسموه بالانجليزي….. الى آخره من الفوائد العظيمة للسفر. طيب جميل. بس هو ايه بالزبط تعريف السفر الي بيقولوا عليه ده؟؟

الفرق بين السياحة والسفر

لو انا حجزت طيارة وسافرت باريس اسبوع مثلا، وحجزت اوضة في اوتيل جميل في وسط البلد، زورت برج ايفيل واللوفر، واتصورت سلفي مع قوس النصر و كنيسة النوتردام، وعملت شوبينج في الشانزلزية …. هل هو ده السفر الي هيعملي كل الفوائد الي قولتها فوق دي؟ …. ده حضراتكوا بنطلق عليه “السياحة” … بتفرج على البلد سريعا من برة، من قشرتها، نادرا ما بنتكلم مع حد من اهلها الا لو كان سواق تاكسي ولا بياع في محل، جرسون في مطعم او مرشد سياحي بيحكي عن اثار البلد وتاريخها. مش هقلل من فوائد السفر السياحي طبعا، لانه فعلا فسحة حلوة، بيفتح عيونا على العالم الي حوالينا وبنشوف حاجات جديدة وساعات بيكون عندنا فرص حلوة لاكتشاف البلد الي مسافرينها. بس طبعا عامل الوقت بيبقى مهم جدا في عمق التجربة وانعاكسها علينا. اذا خلينا متفقين ان الكلام الانشائي الجميل بتاع تبادل الثقافات واكتساب الخبرات واكتشاف الذات ولا البحث عن the one زي الافلام الرومانسية مثلا زي فيلم eat pray & love مش ممكن ييجي من خلال السياحة الا قليلا. انا سافرت سياحة ٣٠ بلد مثلا، ولا اي اندهاش حضرتك. اكيد اتعلمت حاجات وشوفت حاجات، بس طياري اوي اوي.

طيب وايه العمل علشان نقدر نسافر بشكل مختلف غير السياحة ونخوض تجربة انسانية عميقة من الي بيقولوا عليها دي؟ والله الموضوع ممكن، بس طبعا بيختلف من ظروف واحد للتاني.

انت في اي مرحلة من حياتك؟

اي واحد مننا دلوقتي في مرحلة من اتنين في حياته. يا اما انت في بداية حياتك طالب او مخلص دراسة بس خالي شغل، وده فرصة كويسة جدا انه يقدر يسافر سفريات طويلة ويقدر فعلا يكتسب كل فوايد السفر الي قولنا عليها، طبعا لو عنده امكانيات مادية معقولة. يا اما بدأ مشوار حياته المهني وشغال في مكان ما بقاله فترة وعنده ارتباطات وظيفية مادية عائلية تعوقه عن السفر مدد طويلة، ومش قدامه غير السفر السياحي اسبوع ولا اتنين.

١- الحالة الأولى

لو انت طالب او مخلص دراسة ولسه ما اشتغلتش … نصيحتي ليك لو ظروفك تسمح، حاول تجرب الي هقولك عليه دلوقتي …… تعرف انك ممكن تسافر شهر وشهرين وتلاتة؟ وبامكانيات مادية معقولة كمان؟ اقولك ازاي يا سيدي ….. خلينا الاول بس نطلع البلاد الاوروبية وامريكا من حسابتنا، لان تأشيرتها معقدة للشباب الصغير الي من غير شغل. انا اقترح عليك البلاد الاسيوية مثلا، الي من غير تأشيرة او تأشيرتها سهلة. الحاجة الوحيدة الي هتكون مكلفة هي تذكرة الطيران، لانها في حدود ستة ا سبعة آلالف جنية، لكن هنعمل ايه في الاقامة؟ ازاي ممكن اسافر مدة طويلة زي كدة بالرخيص؟؟

العمل التطوعي

اقولك يا سيدي. في مواقع عمل تطوعي كتيرة اوي اونلاين دلوقتي تقدر توفر لك مكان اقامة واكل وشرب كمان احيانا، مقابل عمل تقوم بيه. موقع زي workaway.info ، بتعمل بروفايل عليه وتدفع ٢٧ دولار مرة واحدة فقط، ومنه تقدر تتواصل مع اصحاب الاعمال التطوعية الي طالبين ناس تشتغل معاهم مقابل اقامة او اقامة ومعيشة كمان.

خد عندك يا سيدي بعض الامثلة:

– ماليزيا مثلا فيها حوالي ١٥٣ مكان طالب متطوعين للعمل عندهم (بعض الاماكن بتطلب مدة اقامة على الاقل اسبوعين او شهر). هوستل على البحر طالب حد يساعد في الاستقبال والمطبخ النظافة، واحد عنده مركب وعايز حد يساعده عليها، ناس بتعمل مشروع صديق للبيئة على جزيرة وعايزين متطوعين للمساعدة. الامثلة كتيرة جدا جدا. كل مكان بيبقى كاتب تفاصيل المساعدة الي عايزها ايه. عدد ساعات العمل حوالي ٥ ساعات في اليوم، ٥ ايام في الاسبوع. بتختلف من مكان للتاني. تخيل عايش شهر على البحر في ماليزيا ببلاش، و هتتكلف مصاريف المعيشة فقط. وحيث انك عايش في مكان، فبالتأكيد عندهم مطبخ تقدر تستخدمه علشان توفر في اكلك وشربك. غسالة تقدر تغسل فيها هدومك، وهكذا. ماليزيا اصلا رخيصة جدا. لو شوفتوها على الموقع الي قولتلكوا عليهwww.budgetyourtrip.com, هتلاقوا مصاريف الاكل والشرب ممكن تكون في حدود ال ٣٠ جنية في اليوم لو انت budget traveler. تخيل ممكن تعيش بالف جنية، قول الفين يا سيدي علشان تدلع نفسك، شهر بحاله في ماليزيا. هتقابل كل يوم ناس جديدة، هتتعرف على ثقافة الناس وحياتهم، هيكون عندك فرصة تعيش مع ناس جديدة وتتعلم منهم. لو شغال في هوستل ولا فندق، هتقابل ناس مسافرين كمان من كل حتة في العالم. you will be meeting very inspring people all the time.

– اندونيسيا مثلا فيها حوالي ١١٦ مكان طالب متطوعين. منهم حاجات كتيرة في جزر بالي وجافا كمان. لو الانجليزي بتاعك كويس تقدر تساعد في تعليم الانجليزي للاطفال. هوستل مثلا على البحر عايز ناس تساعد فيه. مركز غطس عايز حد يشتغل معاهم وهيعلموه الغطس ببلاش. الامثلة كتيرة اوي برضو. تكاليف الاكل والشرب في اليوم في حدود ال٤٥ جنية. وبالتأكيد هتكون اقل لما تستخدم المطبخ في اي مكان.

اكتب بروفايل كويس

اهم حاجة بتكتب البروفايل بتاعك كويس. كل الحاجات الي تقدر تعملها. مهارات تقدر تشتغلها. حاول تبيع نفسك كويس علشان الي طالب متطوعين يوافق انه يختارك. لازم كمان تكون قد المسؤولية. لان الموقع قائم على references ، ولازم الي تشتغل معاه يكتب ليك reference كويس علشان ناس تانية توافق انها تشغلك.

مواقع اخرى

في مواقع تانية كتير بتطلب متطوعين في وظايف محددة. موقع مثلا زي  wwoof بيطلب متطوعين للعمل في مزارع اورجانيك World Wide Opportunities on Organic Farms ، عليه فرص في حتت كتير حول العالم.

آيسيك AIESEC

من المنظمات العالمية الي بتتيح فرص تتطوع برضو ولكن للطلاب هي آيسيك. ليهم فروع في مصر ولكني لم اشرف بمقابلتهم ليه. ولكن موجودين وناس كتير جربتهم.

تجربة شخصية

 انا شخصيا جربت الموقع لما كنت مسافر امريكا. قعدت في بيت ناس في ميامي لمدة اسبوع ببلاش مقابل اني اعملهم مونتاج لبعض الفيديوهات. اشتغلت عدد ساعات قليلة جدا، وكل يوم بروح البحر وبخرج بالليل. اتفرجوا على فيديوهات رحلتي في ميامي. لما كنت في البيت ده قابلت مضيفة طيران بولندية، واخدة اجازة شهر وشغالة في البيت الي كنت فيه house keeper علشان تسكن ببلاش.

انصحك تسافر آسيا

ممكن تسافر شهرين تلاتة في آسيا بالموقع ده. تسافر من ماليزيا لتايلاند ولا كمبوديا ولا اندونيسيا بطيران رخيص او اتوبيس، وتقضي تجربة هتغير حياتك فعلا. بدون مبالغة والله التجربة دي هتكون علامة فارقة في حياتك. انا اتمنى والله ان اولاياء الامور يقروا المقالة دي كمان. حقيقي تجربة زي دي هتخلي ابنك او بنتك شخص تاني. هيكتسب خبرات حياتية مهمة جدا مش ممكن يكتسبها باي طريقة أخرى. انا شخصيا هخلي بنتي تخوض تجربة زي دي لما تبقى في الجامعة. تسافر شهر اتنين تلاتة كمان، علشان انا متأكد ان التجربة هتكون ايجابية جدا جدا في حياتها.

(ملحوظة: ممكن كمان تسافر كتير وتسكن ببلاش عن طريق موقع couchsurfing, اقامة ببلاش برضو وبدون عمل تطوعي، بس المدة بتكون ايام قليلة، اقل من اسبوع. انا استخدمته في رحلتي الحالية في امريكا، واثرى تجربة الرحلة جدا. اقروا المقالة الكاملة عنه في هذا الرابط.

٢- الحالة التانية بقى هي انك غارس في وظيفة وعليك التزامات وظيفية ومادية وعائلية، وظروفك ما تسمحش انك تسافر مدد طويلة لمدة شهر واتنين وتلاتة …. الموضوع معقد لاني مريت بالتجربة دي، ومحتاجين مساحة اكبر نتكلم فيها علشان اقولكوا على تجربتي الشخصية في مقالة تانية قريبا ان شاء الله.

6

 likes / 8 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec