28
Jun-2016

ازاي تلاقي تذاكر بالي ارخص ٢٠٠ دولار

Bali

من أكتر البلاد الي كل صفحات السفر بتتكلم عنها الفترة الي فاتت هي اندونيسا، وتحديدا جزيرة بالي. الاشهر على الاطلاق. لان تأشيرتها للمصريين بتتاخد عند الوصول، والمعيشة فيها رخيصة. رشحتها لناس كتير بعتت تسألني عن ترشيحات للسفر، بس كانت المشكلة فيها ان التذكرة غالية حبتين.

ابتديت ادور على تذاكر لشهر ٧ و ٨ ، الي يعتبروا من احلى الاشهر لزيارتها علشان موسم الامطار بيكون في اقل نقطة ليه طوال السنة. بينما درجة الحرارة الصغرى في اواسط العشرينات والعظمى في اوائل الثلاثينات. 

bali weather

بصيت على Skyscanner ومواقع تانية، لقيت التذكرة مثلا في اخر عشر ايام في شهر يوليو بحوالي ٧٧٥ دولار على طيران الاتحاد. التذكرة بتزيد وتقل كل ما تغير التواريخ قدام ووراء.

cairo-bali - 775$

طبعا مفيش طيران مباشر بين مصر واندونيسيا. معظم الطيران الي بيروح بالي من القاهرة بيكون عن طريق احدى شركات الطيران الخليجية. عادة بيعمل ترانزيت مرتين، مرة باحد العواصم الخليجية للشركة (ابوظبي، دبي، الرياض، مسقط، الدوحة)، وثاني ترانزيت بيكون في العاصمة الاندونيسية جاكرتا. لو مباشر من الخليج لجزيرة بالي، بتكون غالية جدا. رحلة قد تكون في حدود ال٢٠ الى ٣٠ ساعة.  

زي ما كنت قولت في مقالة قبل كدة، لو التذكرة فيها ترانزيت او اتنين، نحاول نفصص التذكرة لتذكرتين منفصلتين، قد تكون ارخص. يعني نشوف تذكرة القاهرة-جاكرتا منفصلة، وبعدين نشوف تذكرة طيران داخلي من جاكرتا لجزيرة بالي، خصوصا ان في شركات طيران Budget كتيرة في اسيا. وبالفعل نجحت الحيلة. لقيت تذكرة في نفس المواعيد القاهرة-جاكرتا بحوالي ٤٧٠ دولار على الخطوط السعودية، ولقيت تذكرة جاكرتا-بالي بحوالي ٨٠ دولار على خطوط Air Asia. 

cairo-jakarta - 474$

jakarta-bali

طبعا في الحالات دي لازم يكون في وقت كافي بين وصول الطائرة مطار جاكرتا و اقلاع الطائرة الاخرى المتجهة الى بالي. وكمان ناخد بالنا من الشنط المسموحة. Air Asia بتسمح بهاند باج، ولو معاك شنطة كبيرة بتكون تكلفتها ١٠٠-١٥٠ جنية. بسيطة!

لما قسمت التذكرة قدرت توفير اكتر من ٢٠٠ دولار. مبلغ زي ده ممكن يعيشك في بالي اسبوع اصلا. سكن بحوالي ١٠-١٥ دولار في الليلة، ومعيشة يومية بحوالي ١٥ دولار زيهم.

شوفوا تذاكر على السعودية والعمانية والاردنية  … من القاهرة الى جاكرتا، هتلاقوا اسعارها معقولة جدا. جاكرتا كمان مدينة حلوة وارخص من بالي، ممكن تزوروها يوم ولا اتنين.

في رأيي المتواضع، ١٠٠٠ دولار شاكب راكب في بالي ممكن يقعدوك ويبسطوك ١٠ ايام في بالي. ودي مقالة مكتوب فيها ٣٥ حاجة حلوة ممكن تتعمل ببلاش في مدينة بالي.

وانتظروا فيديوهاتي لما اروح هناك … التفاصيل قريبا 🙂

4

 likes / 8 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec