15
Dec-2016

photostudio_1481813029414

طبعا بعد تعويم الجنية، وجميع اسعار التذاكر طارت في السماء. واصبح اكبر جزء من ميزانية السفر اغلى من الاول. انا عامل مقالات وفيدوهات كتيرة بخصوص احسن الطرق الي نلاقي بيها تذاكر رخيصة. ياريت تشوفوها كلها بعد ما تخلصوا المقالة.

هتكلم معاكم النهاردة على طريقة جديدة ممكن نجيب بيها ارخص تذاكر طيران الى اوروبا.

الكتير مننا سمع عن شركة Air Cairo الي بتطير من مطارات الغردقة وشرم الشيخ. اشهر رحلاتها الي بتروح الى جورجيا، لانها كانت بالفين ونص قبل التعويم. لكن دلوقتي طبعا اصبحت باكتر من ٥٠٠٠.

اشهر تذكرة – الغردقة-تبليسي

اي حد عايز يسافر جورجيا الفترة الجاية، تذكرة الغردقة-تبليسي تعتبر من ارخص التذاكر الموجودة من مصر. شركة Air Cairo بتعمل رحلة كل يوم سبت. يعني تذكرة اسبوع – من السبت الى السبت بحوالي ٢٤٠ دولار. لو قارنتها بتذكرة من القاهرة الى تبليسي، هتكون ارخص حاجة ب 110 دولار.

hur-tbi-air-cairo

سعر التذكرة على موقع Air Cairo

cairo-tbi-skyscanner

تذكرة القاهرة تبليسي -في حدود ٣٥٠ دولار – ارخص حاجة في نفس الشهر

تذاكر رخيصة الى اوروبا

بالصدفة البحتة وانا بشوف تذاكر تانية على موقع شركة Air Cairo علشان ارجع من اوروبا، لقيت عندها رحلات تانية  من الغردقة وشرم الى اوروبا، واسعارها اصبحت تنافسية جدا لو جيت تقارنها برحلات زيها من القاهرة. هتلاقي ان السفر الى براغ من الغردقة ارخص حوالي ١٢٤ دولار من السفر من القاهرة (الصور تحت). الفرق كبير ويستاهل انك تسافر من الغردقة. لو جربت ميونيخ مثلا هتلاقي الفرق ٥٠ دولار. لو الفرق صغير بالنسبة ليك، وفر وقت ومجهود وسافر من القاهرة.

hur-prague-air-cairo

تذكرة الرجوع ١١٠ دولار – انا شخصيا بفكر ارجع بيها مصر

skyscanner-hur-prague

الشركة عندها رحلات الي الدنمارك والمانيا وحتت كتيرة في اوروبا. ادخل على الموقع بتاعهم وجرب بلاد جديدة في مواعيد جديدة. احيانا لازم تكون عارف جدول السفريات علشان تلاقي تذكرة. يعني لو دورت على تبليسي يوم تلات او اربعاء، مش هتلاقي نتايج بحث. جرب ايام الاسبوع كلها في الرايح والراجع علشان تلاقي نتايج بحث

دي قائمة البلاد الي ممكن تسافرها من الغردقة:

air-cairo-flights-from-hurghada

طيب لو عايز بلاد تانية غير دي؟

لو عايز اروح فرنسا او اسبانيا او ايطاليا، اعمل ايه؟ هقولك على فكرة قد تكون مناسبة لناس كتير. ممكن ببساطة تدور على وجهة سفر تكون HUB اوروبي. يعني ايه HUB؟ يعني محطة رمسيس بالبلدي، تركب منها مواصلات تروح اي حتة. يعني بلد فيها مطارات كتير ووصلات مع بلاد كتيرة. عندك مثلا دوسلدورف Dusseldorf في المانيا، ممكن تسافرها (رايح-راجع) من الغردقة بحوالي ٢٣٠ دولار، ومنها ممكن تلاقي طيران رخيص لحتت كتيرة اوي في اوروبا.

Skyscanner option “Everywhere” is magic

استخدم الاوشن العالمي “Everywhere”  في موقع Skyscanner وابحث عن تذاكر من Dusseldorf الي كل مكان، وهتلاقي اختيارات رخيصة جدا جدا، من اول ٥ يورو لحد ٢٠ يورو. اتفرج عليهم، يمكن تلاقي تذاكر مناسبة ليك. ارجع لمقالة الطيران الرخيص في اوروبا علشان فيه بعض الخوازيق المستخبية والي لازم تعرفها كويس.

dussoldurf-everywhere-in-january

شركات تانية غير Air Cairo ؟

قبل الركود الحالي للسياحة المصرية، كان في شركات طيران رخيص بتطير من شرم الشيخ والغردقة الى اوروبا. Easy Jet كان عندها رحلة سويسرا رايح راجع من الغردقة ب٥٠ يورو والله. ميلانو من شرم الشيخ كانت ب٧٠ يورو. لحد ما تتعافى السياحة المصرية وتلاقي الشركات دي جدوى اقتصادية من تشغيل رحلاتها مرة تانية، مفيش عندنا غير بعض الشركات الالمانية والايطالية الي بتطير من الغردقة وشرم الشيخ. تذاكرهم مش ارخص حاجة، ولكن التذكرة الي لقيتها ممكنة كانت شرم الى ميلانو على شركة Meridiana بحوالي ١٧٠ يورو في شهر يناير/فبراير. اتفرجوا على الفيديو ده علشان تعرفوا ازاي تستخدموا موقع skyscanner  علشان تلاقوا اسعار تذاكر رخيصة.

نصيحة أخيرة …. سافروا اسبوعين او اكتر

اعتقد دلوقتي ان بعد ما اسعار التذاكر ولعت كدة، لازم نحوش فلوس اكتر واجازات اكتر علشان نسافر سفرية طويلة مرة واحدة. حرام تدفع ٥٠٠٠ جنية في تذكرة مثلا علشان تسافر اسبوع وترجع. ادفع نفس المبلغ او اكتر شوية وسافر اكتر من بلد مع بعض. يا ريت ترجعوا للفيديو بتاعي بخصوص Multi Destination Tickets علشان اعتقد لازم كلنا نفكر بالشكل ده دلوقتي. مصاريف الاقامة والاكل والفسح ممكن نقتصد فيها ونمشي امورنا، لكن الطيران بند غالي وصعب. علشان كدة نسافر بتذكرة طيران غالية لاطول فترة ممكنة متاحة في ظروف شغلنا وامكانياتنا.

تنويه: هذه المقالة غير مدفوعة الاجر. يعني انا لا اعرف آير كايرو ولا هم يعرفوني.

8

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec