01
Aug-2017

المدينة الخفية …. طريقة جديدة علشان تلاقي تذاكر طيران رخيصة

هل تعلم ان احد طرق ايجاد تذاكر طيران رخيصة اسمها “المدينة الخفية” – Hidden City ؟

يعني تحجز تذكرة طيران بين مدينتين وتعمل ترانزيت في بلد في النص، وتكون مدينة الترانزيت هي وجهتك الاساسية. يعني ايه الكلام ده؟

اثناء رحلة عودتي من اسطنبول الى القاهرة، اسعار تذاكر شهر يوليو كانت نار. بحثت على تذاكر كتير الى عدة مطارات مصرية، زي شرم الشيخ والغردقة. وجدت التذاكر غالية جدا وتتعدى ال٣٠٠ دولار. ارخص تذكرة لقيتها كانت اسطنبول القاهرة ب٢٧٨ دولار.

“القاهرة” الخفية

جربت اشوف طيارة من اسطنبول اسكندرية، لقيتها ب٢٣٠ دولار. حلو جدا، اوفر ٥٠ دولار. الاحلى ايه بقى، ان الرحلة كانت ترانزيت في القاهرة. يعني هركب من اسطنبول الى القاهرة واعمل ترانزيت ٣ ساعات وبعدها اركب من القاهرة الى اسكندرية. طبعا هركب فردة واحدة منهم واخرج في مطار القاهرة.

عيب محتمل

المشكلة في الموضوع ده انك لازم تبلغ شركة الطيران وانت بتركب انك مش هتكمل الرحلة علشان تستلم الشنطة بتاعتك في مدينة الترانزيت. مكنش في مشكلة مع مصر للطيران في الموضوع ده. بعض شركات الطيران ممكن ترخم في الموضوع، خصوصا في امريكا.

موقع متخصص للمدن الخفية

في واحد امريكاني عمل موقع متخصص علشان يساعدك تلاقي تذاكر طيران بالطريقة الغريبة دي. الموقع اسمه SKIP Lagged. الموقع من كتر ما بيشتغل كويس وبيطلع اسعار جامدة جدا، مرفوع عليه قواضي من شركات الطيران وبيكسبهم في المحاكم. اخرهم كانت قضية من شركة طيران United Airlines.

نتائج مبهرة في امريكا

الموقع ده بقى بيطلع لك نتائج البحث بالطريقة العادية وكمان بالطريقة الخاصة بتاعته الي مسميها Hidden City. ممكن من خلال الموقع تكتب اسم المدينة بتاعتك، ويقولك ايه احسن عروض الطيران منها. اغلب نتائج العروض الجامدة جدا الي بيلاقيها بتكون في امريكا.

الموقع يعرض التذاكر ذات التخفيضات العالية من مدينتك: مثال هنا نيويورك.

مثال لطريقة عرض نتائج البحث

الخلاصة

البحث عن تذاكر الطيران الرخيصة بيحتاج استراتيجيات بحث كتيرة. الموضوع عمره ما كان موقع وخلاص. المهم طريقة البحث. طريقة “المدن الخفية” دي واحدة منهم. ممكن طريقة البحث تكون عن طريق محرك خاص زي موقع skiplagged او عن طريق محاولة البحث في مطارات متعددة حول مطار وجهتك الاساسية.

ارجعوا للينك ده هتلاقوا اكتر من ١٨مقالة وفيديو عن تذاكر الطيران وطرق البحث عنها بافضل الطرق والمواقع.

6

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec