24
Sep-2016
٤ اخطاء مشهورة عند حجز الطيران الرخيص في اوروبا
سمعنا كتير ان الطيران الداخلي في اوروبا رخيص اوي … من بلد لبلد تاني ب٢٠ يورو وب٣٠ يورو … بس للأسف احيانا كتيرة بتكون دي العناوين الرئيسية فقط، لكن وقت لما ندخل في التفاصيل، ممكن نلاقي مصايب كتير… ازاي؟
١- الطيران الاوروبي الرخيص budget airline عادة بيطيروا من مطارات خارج العاصمة، واحيانا كتيرة بتكون بعيدة جدا جدا. باريس مثلا، هتلاقي الطيران الرخيص بيوصل على مطار Orly، والي يبعد ساعتين ونص عن وسط البلد. يعني هيكلفك وقت وفلوس علشان تروح وترجع منه. يبقى قبل ما تحجز تذكرة طيران علشان تسافر من مطار بعيد او توصل عليه، لازم تعرف يبعد قد ايه عن مكان اقامتك وعن وسط البلد … . وايه وسائل المواصلات الي هتركبها وهتكلفك وقت وفلوس قد ايه. ممكن تلاقي مترو، اتوبيس، او shuttle bus مخصوص للمطار.
٢- ارخص رحلات عادة هي الي بتطير او بتوصل بعد منتصف الليل – من الساعة ١ لحد الساعة ٥ كدة، تقريبا دائما تذاكرهم بتكون الارخص. المشكلة بقى ان مواعيد الاقلاع او الوصول المتأخرة دي، ممكن ما يكونش في مواصلات داخلية توصلك او تجيبك من المطار. يا فرحتي لقيت تذكرة من باريس لروما ب٢٠ يورو، لكن علشان تلاقي حاجة توديك المطار في نص الليل، هتدفع تاكسي ب٥٠ يورو. لازم تتأكد من مواعيد المواصلات العامة “من المطار و الى المطار” شغالة لحد الساعة كام علشان مش “تلبس” تاكسي غالي من غير لازمة.
يبقى ممكن تحجز رحلة ب٤٠ يورو بدل ٢٥ يورو علشان ميعاد وصولها يكون مناسب مثلا … لسه رخيصة التذكرة على فكرة.
٣- معظم شركات الطيران الرخيص في اوروبا لا تسمح الا بشنطة واحدة فقط “هاند باج” ذات وزن معين وابعاد معينة. طبعا كتير بيعمل ناصح وبياخد حاجات تانية في ايده وهو طالع …. كاميرا حوالين رقبته، شنطة لابتوب صغيرة … “كيسة سمرا” مليانة شوبينج وكدزة 🙂
كل ده مرفرض تماما. غير مسموح الا بشنطة هاندباج وفقط. مكن تدفع فلوس (من ٣٠ الى ٥٠ يورو) على الهاندباج ويدخلوها الطيارة علشان تطلع بالرفايع الي انت شايلها ويحسبوها هاندباج. يبقى لو هتسافر رخيص، لازم تكون خفيف خفيف، وحاجتك كلها في شنطة واحدة. (شنط البنات الصغيرة احيانا بتكون مقبولة). شوفت ناس كتيرة بتفتح شنطتها تلبس كام تيشيرت على كام بلوفر فوق بعض، علشان يقللوا وزن الشنطة بتاعتهم.
٤- طيب الحمدلله لقيت مواصلات رخيصة من المطار وعرفت توصل لمحل اقامتك في هوستل جميل في وسط البلد على الساعة ٩ بالليل مثلا، حلو؟ … لأ مش حلو!! هوستلز كتيرة معندهاش استقبال ٢٤ ساعة. يعني ممكن توصل و”تتلطع” في الشارع كام ساعة لحد ما موظف الاستقبال الي في الفندق يفتحلك علشان تعمل check in. (حصلت فيا في فلورانس، بس استنيت ساعة واحدة الحمدلله). يبقى وانت بتحجز، لازم تعرف مواعيد الاستقبال من الساعة كام لحد الساعة كام.
يبقى قبل ما تحجز طيران رخيص واقامة رخيصة وانت مسافر، لازم تعرف:
– مطارات الاقلاع والهبوط فين من وسط البلد وايه هي مواصلاتها
– مواعيد المواصلات العامة “من و الى” المطار شغالة من الساعة كام للساعة كام.
– شروط الشنطة المسموحة في الطيارة … وزنها وابعادها وعدد القطع الشخصية المسموحة personal items زي شنطة ايد او شنطة كاميرا
– اتأكد ان مواعيد عمل الهوستل او الفندق هتكون مناسبة لوقت وصولك علشان تعمل check in ومش تقعد في الشارع
لو مسافر مع شركة سياحة، اطلب منهم تفاصيل كل التذاكر واماكن الاقامة بتاعتك علشان لما تسافر مش تفاجئ بحاجات كتيرة مستخبية. وعلشان كمان لو مفيش حاجة تناسبك من المواعيد والمسافات، تعدلها بشوية فلوس قليلة، علشان تناسبك وتناسب طبيعة رحلتك.
Related
Archives
Jan
Feb
Mar
Apr
May
Jun
Jul
Aug
Sep
Oct
Nov
Dec
Jan
Feb
Mar
Apr
May
Jun
Jul
Aug
Sep
Oct
Nov
Dec
Jan
Feb
Mar
Apr
May
Jun
Jul
Aug
Sep
Oct
Nov
Dec
