17
Aug-2017

اامن واريح شركة طيران

– حجزت تذاكر لندن ولا لسه يا محمد؟

– للاسف يا عمرو مش لاقي تذاكر بيزنس يوم الاربعاء. متوفر تذاكر عادية فقط.

– يعني ايه مفيش؟ مش هينفع نسافر الا بيزنس!!

– ليه مش هينفع بس يا عمرو؟

– علشان الطيارة بتوصل 1 الضهر و انا عندي اجتماع الساعة 3. يعني هطلع من المطار اليه مباشرة. هل موجود تذاكر بيزنيس يوم الخميس؟

 – اه موجود امكانية الخميس تمام.

– احجزها وانا هكلم البنك واطلب تأجيل ميعاد الاجتماع ليوم الخميس.

– حاضر. هحجز وارتب كل شئ زي ما قولت. سلام.

——–

ايه رأيك في شركة الطيران دي؟ مريحة؟ آمان؟

ناس كتير بتسالني الاسئلة دي عن اسماء شركات طيران دولية, محلية, واقتصادية … علشان كدة قررت اخصص مقالة كاملة بخصوص التخوفات الخاصة بالراحة والامان.

الآمان

اول حاجة الناس بتقلق منها لما تلاقي تذاكر طيران رخيصة هي الآمان … “مش هتقع يعني الطيارة دي ولا تعمل حادثة؟”

احب اقولكم ان معايير واجرائات السلامة والآمان في خطوط الطيران العالمية عالية جدا وتقريبا موحدة في كل اغاب دول العالم. جميع الشركات بتتبع اجرائات سلامة وامان تحت اشراف جهات دولية معتمدة زي  International Civil Aviation Organization ومنظمة اخرى اسمها  International Air Transport Association IATA

هل حضراتكم بتسمعوا عن حوادث طيران كل يوم او كل شهر حتى في شركات الطيران الافريقية او اللاتينية او الاسيوية؟ لا يحدث طبعا لان اجرائات السلامة في الطائرات غير الاتوبيسات او القطارات. حوادث الطيران بتحصل في شركات من كل حتة في العالم ولا تقتصر على شركات رخيصة او غالية. طبقا للاحصائات, بيحصل حادثة كل 5 مليون رحلة. لا تقلقوا ابدا من حكاية الامان دي. انتوا ناس مؤمنين وعارفين ان الاعمار بيد الله 🙂

لو حد مهتم بالموضوع ده ممكن يقرا تفاصيل اكتر عن  Aviation Safty

الراحة

السؤال ده يا جماعة مش عارف ايه قيمته بصراحة لما حد يسألني عليه وهو مسافر اصلا مشوار كل الحكاية ساعتين تلاتة او حتى مشوار طويل ….  هو احنا هنعيش في الطيارة؟ التذاكر بقت نار, اشتري الارخص وخلاص. اي تذكرة رخيصة توصلك الحتة الي انت عايزها اركبها. هو مشوار وخلاص.

لما كنت شغال زمان في شركة بترول, كان بيكون عندنا اجتماعات شغل كتير في لندن وباريس وحتت اخرى حول العالم. كان ممكن فعلا ااجل الاجتماع بتاعي علشان اسافر بيزنس كلاس علشان اسباب كتير ….. كنت لازم اسيب الطيارة اول واحد علشان وادخل في fast track  واخلص الجوازات في اسرع وقت. لازم اكون مستريح كويس في الطريق وانا مسافر علشان اركز في الاجتماع. هكون كمان بكون لابس البدلة ومحتاج اعلقها في الدولاب الخاص بالبيزنس علشان ما تتكرمش. اهم حاجة كمان بيكون عندي انترنت طول الخمس ساعات بتوع الرحلة, بحيث اقدر اشتغل وابعت ايميلات واتابع اسعار البورصة كمان.

لكن لو انا فقران اصلا ومجمع ثمن التذكرة بالعافية ومسافر اجازة اتفسح ومش كبير في السن او مريض, هتفرق في ايه الطيارة مريحة ولا مش مريحة؟؟ ندور على ارخص تذكرة وخلاص.

طيب لو انا راجل بحب ادلع نفسي, اعمل ايه؟

موقع Seat Guru لاختيار افضل الكراسي

لو انت راحتك في الطيارة اولوية قصوى, بغض النظر عن سعر التذكرة, يبقى انصحك تدخل على موقع Seat Guru . بتقوله رقم رحلتك وشركة الطيران بتاعتك و ميعادها وهو يقولك كل حاجة عايز تعرفها عن نوع الطيارة, عدد كراسيها, الامكانيات بتاعتها, مقاسات الكراسي, اماكن الحمامات. ادخل عليه واعمل المقارنات الي تهمك.

انا شخصيا عمري ما استخدمت الموقع ده لاني لا اكترث … بس كل واحد ينام على الجنب الي يريحه. الموقع ممتاز فعلا واعرف ناس كتير بتستخدمه.

مقارنات تستحق

لو عايز تعمل مقارنات بين شركات الطيران, يبقآ تقارن في المواعيد, ساعات الترانزيت, عدد ووزن الشنط المسموح, امكانيات التغيير اة الالغاء, واخيرا السعر.

الخلاصة

الطيارة وسيلة وليست غاية

موضوع الامان ده مفيش فيه اختيارات. كلهم آمان. توكل على الله. لو انت راجل غني وراحتك في كل دقيقة في حياتك مهمة وعايز تختار كرسي مريح لرحلتك, ادخل على الموقع واعمل مقارنات بين الكراسي الي محتار فيها. انا شخصيا الطيارة بالنسبة ليا وسيلة وليست غاية. اعمل مقارنات تستحق العناء.

3

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec