17
Oct-2016

مسافر قريب على طيران العمانية؟ كويسين، بس احظر نصب مكتبهم في مصر

photostudio_1476738294010

بعد ما اتكلمت في المقالة الي فاتت عن تاشيرة الترانزيت في شركات الطيران المختلفة، عايز اقولكم على تجربة سلبية حصلت معايا علشان مش تتكرر معاكم.

انا تجربتي الوحيدة في موضوع تاشيرة الترانزيت كانت على الخطوط العمانية. كنت مسافر من القاهرة الى جاكرتا، ومنها الى بالي على طيران اسيوي داخلي. رحلة الذهاب من القاهرة كان فيها ترانزيت ١٨ ساعة في العاصمة العمانية مسقط. وعلشان مسافر مع بنتي الغالية نور، قررت اسأل على موضوع الاقامة في فندق داخل المطار او امكانية الحصول على تاشيرة الترانزيت والاقامة في فندق خارج المطار في مدينة مسقط.

طلب مني مكتب الشركة في القاهرة ٥٠٠ جنية لكل مسافر مصاريف اصدار تاشيرة ترانزيت وتكلفة اقامة بالوجبات والانتقالات من والى المطار.  يعني دفعت ١٠٠٠ جنية ليا انا ونور بنتي. لو كنت لوحدي ماكنتش سألت، لكن علشان هي ٩ سنين ومش هتستحمل ال١٨ ساعة في المطار ودي كانت اول ايام الرحلة، مش عايزين نبدأها بارهاق وتعب مملين.

طلبت من موظف الشركة ايصال بالمبلغ المدفوع نظير الخدمة علشان لما اروح المطار في مسقط اقدر اطالب بالخدمة المدفوعة مقدما، ولكن الموظفين قالولي “مفيش ايصال للأسف، لكن لا تقلق، هيوصلهم ايميل مننا بالبيانات بتاعتك، وهتلاقي التاشيرة بتاعت؛ جاهزة وحجز الفندق وكله تمام.”  …. استغربت بصراحة موضوع مفيش ايصال دي.

وصلت مطار مسقط، توجهت لمكتب خدمة مسافرين الترانزيت، اخدوا مني جوازات السفر وتذاكر السفر من مسقط الى جاكرتا Boarding Pass. طلبت انهم يشوفوا اسمي وبياناتي على الايميل علشان يتأكدوا اني دافع. انتظرت ١٠ دقائق لحد ما اخدت التاشيرة وvoucher للفندق واوصلوني للتاكسي وتوجهت للفندق، اخدت اوضة حلوة في فندق ٤ نجوم شيك جدا، اكلت ٣ وجبات، وقضيت ١٨ ساعة في اكتشاف مدينة مسقط، لحد ما بعد منتصف الليل. خلصنا اليوم واخدت شنطي ورجعت المطار في تاكسي على حسابهم لحد المطار. كانت خدمة بصراحة احسن من ممتااااازة.

photostudio_1476733658232

عرفت ازاي ان موظفين الخطوط العمانية في مكتب مصر نصبوا عليا وسرقوني؟

علشان حظهم التعس، قابلت زميلة دراسة قديمة بالصدفة البحتة على نفس الرحلة المتوجهة من القاهرة الى مسقط، وكانت رايحة جاكرتا برضو معانا في نفس الرحلة بتاعتنا بالليل. وكانت هتنتظر ١٨ ساعة في المطار. عرضت عليها تسألهم في المطار لو ينفع تدفع ال”٥٠٠ جنية” حق تاشيرة الترانزيت والفندق علشان تطلع تريح ال١٨ ساعة في مدينة مسقط ونقضى اليوم نتفرج على البلد، بدل الحبسة في المطار. راحت مكتب خدمة الركاب الترانزيت في مطار مسقط، اخدوا جواز السفر بتاعها والboarding pass، وادوها التاشيرة والاقامة وكل حاجة انا اخدتها بالزبط، ولكن بدون مقااااابل على الاطلاق. لم تدفع مليما واحدا. طلبت منها تسألهم علشان تعرف هي ليه لم تدفع اي مقابل، قالولها دي خدمة مجاااانية لجميع ركاب الترانزيت اكثر من ٧ او ٨ ساعات، تقدم من شركة الطيران العمانية بدون مقابل، ولكن في رحلة واحدة من رحلتي الذهاب او العودة.

فهمت بقى دلوقتي عملية النصب الي تعرضت ليها من موظفين الشركة في مكتب القاهرة. هي خدمة مجانية مقدمة من الشركة العمانية، لكن البهوات والهوانم الي في المكتب بيبيعوها للمسافرين المصرين. انا لما ارجع مصر هروح المكتب  بتاعهم واعملهم فضيحة طبعا علشان اخد فلوسي منهم. ادعولي.

الخلاصة

لما تلاقي تذاكر طيران سعرها كويس على العمانية، ولكن ساعات الانتظار بتاعها طويلة، لا تقلق. اشتريها وسافر، لما توصل مسقط روح مكتب خدمة ركاب الترانزيت واطلب حقك في خدمة الركاب الترانزيت ببلاش (في رحلة واحدة من الرحلتين لو رايح وراجع على طيران العمانية).

4

 likes / 8 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec