Sep-2016
١٠ خطوات لرحلة ترانزيت ناجحة
المقالة دي مهمة جدا للمسافرين ترانزيت اول مرة – وخصوصا اوروبا واللخبطة الي بتحصل في التأشيرات – دي خطوات الطيران الترانزيت بالتفصيل. مثال رحلة من القاهرة الى روما على الخطوط اليونانية، يعني ترانزيت في أثينا:
١- وانت بتعمل check-in في مطار القاهرة، بتسلم موظف شركة الطيران الشنطة بتاعتك وجواز السفر وصورة التذكرة، وبيسلمك حاجتين مهمين جدا.
٢- بيسلمك الموظف تذكرتين ركوب طيارة – TWO Boarding Passes – واحد منهم تذكرة لركوب طائرة القاهرة-اثينا والتاني لركوب طائرة اثينا-روما
٣- بيسلمك كمان تذكرة تتبع – tracking للشنط بتاعتك. اتأكد انه مكتوب على الشنطة انها رايحة روما مباشرة. تأكد من الموظف انك لن تستلمها في اي مكان قبل وصولك روما.
– (في بعض الاحيان، ممكن تستلم شنطة سفر؛ في احدى محطات الترانزيت – وتعمل check in مرة اخرى – مثال: طائرة الاتحاد – من القاهرة الى بالي – بتعمل ترانزيت في ابوظبي – وبعدين بتعمل ترانزيت في جاكرتا – بتاخد شنطك في جاكرتا وبتعمل ليها check in مرة اخرى للسفر الى بالي …. يعني بتاخد Two boarding pass من القاهرة، والتالت بتاخده من جاكرتا. الرجاء التأكد من جميع التفاصيل من موظف شركة الطيران في مطار المغادرة. )
٤- بيكون مكتوب على boarding pass بتاع الرحلتين رقم البوابة الي هتركب منها الطيارة – Boarding gate – بتكون عادة مكونة من ارقام وحروف. (مثال F6, H9)
٥- احيانا كتيرة البوابة دي بتتغير!!!! بعد ما تعدي الجوازات ، لازم تدور على شاشة الكترونية كبيرة مكتوب عليها بالترتيب مواعيد الرحلات ووجهاتها ومكان بوابة boarding لكل رحلة … دور على رحلتك الاولى الى آثينا.
في ناس كتير بتسافر كتييييير ولسه بتعمل الغلطة دي، وانا واحد منهم، لازم تتأكد من مكان بوابتك من الشاشة الكبيرة.
٦- لازم تكون في بوابة التحميل للطيارة – boarding gate – قبل الطيارة بحوالي ساعة مثلا. جميع الرحلات الدولية بتكون كاتبة رقم الكرسي على boarding pass. بعض الطيران الداخلي في اوروبا بيكون من غير ارقام كراسي.
٧- بعد ما تركب الطيارة وتوصل بالسلامة اثينا، بتنزل من الطيارة وتعدي على منطقة الجوازات، لانك بتدخل منطة الشنجن. بتختم جوازك وبيكون عندك اختيارين:
(او بتعمل ترانزيت في ابوظبي مثلا ومش هتخرج من المطار، يبقى هتلاقي قدامك اتجاهين بعد خروجك من الطيارة):
الاختيار الاول، تحصيل الحقائب Baggage claim وبعدها الخروج Exit. لو انت وقت الترانزيت طويل، طبعا مفيش شنط هتاخدها، ممكن تخرج من المطار تتفسح في اثينا شوية، وترجع قبل ميعاد الطيارة بتاعتك بساعتين.
الاختيار الثاني، هو ان الترانزيت بتاعك قصير، فهتاخد بعضك وتمشي ورا يافطة Flight Connections وتطلع على صالة انتظار الترانزيت تدور على طيارتك الي بعد كدة. قد تكون محتاج تروح Terminal مختلف. تأكد في مطار وصولك من اي موظف في مكتب Information وهيقولك تروح فين.
(طيب لو مش معايا تأشيرة لبلد الترانزيت، ممكن اطلع تاشيرة ترانزيت واطلع ازورها؟ هنتكلم عن الموضوع في مقالة لوحدها.)
٨- بعد ما بتوصل terminal المغادرة …. مرة اخرى، بتدور في الشاشة الالكترونية على مكان بوابة التحميل Boarding gate لرحلتك من اثينا الى روما. غالبا، هتكون لم تحدد بعد. تابع الشاشة كل ساعة مثلا. قبل الرحلة بساعتين، اكيد اكيد هيكونوا كتبوا رقم البوابة.
٩- بعد ما توصل روما، مفيش جوازات مرة اخرى لانك بالفعل داخل منطقة حدود الشنجن. تتوجه مباشرة علشان تدور على شنطتك في المطار. هتلاقي شاشات تانية مكتوب عليها رقم الرحلة وجاية منين ورقم سير الشنط الي عليه Baggage Belt.
١٠ – لو الترانزيت بتاعك كان طويل كفاية، شنطك هتوصل بالسلامة معاك في نفس الرحلة (٩٩٪). لو الترانزيت بتاعك كان قصير اوي، اقل من ساعة او ساعتين، وطيارتك جاية من مصر اتأخرت مثلا، قد يكون مفيش وقت كافي ان الشنطة تلحقك على طيارتك الى روما (١٠٪-٢٠٪)، وتحصلك بعدها بيوم او يومين. هيكون في مقالة مخصوص علشان الموضوع ده وايه الخطوات الي تعملها والاحتياطات الي تاخدها.