Mar-2016
Why “Expedia.com” is not always the best website to book tickets?
كثير من اصدقائي عندهم اقتناع ان موقع expedia من ارخص المواقع الي ممكن نشتري من عليها تذاكر مباشرة. انا كنت بحاول اشتري تذكرة علشان ازور اخويا الشهر الجاي. بحثت على تذكرة ذهاب وعودة لشيكاغو من القاهرة …. ارخص تذكرة طلعها لي expedia كانت على الخطوط القطرية. قررت اعمل مقارنة سريعة في نفس الوقت بين موقع expedia وموقع Qatar Airways…… ….. الصراحة صعقت ان موقع expedia تذكرته اغلى ب ٨٧ دولار!!!!! التذكرتين متطابقتين تماما، ولكن موقع شركة طيران القطرية ارخص مبلغ كبير الصراحة ….. موقع Kayak طلع لي تذكرة القطرية برضو بنفس سعر الموقع بتاعها، لان kayak مش بيبيع تذاكر مباشرة، بيقولك ارخص حاجة فين.
(الصورة المرفقة مقارنة بين الموقعين)
الميزة الي بتميز نتائج البحث على موقع expedia هي انه بيقولك في تفاصيل التذكرة التفاصيل الخاصة بالشنط الي مسموح لك تاخدها. انا مثلا لقيت تذكرة على british airways ارخص من القطرية حوالي ١٥٠ جنية، بس مشكلتها ان الخطوط الانجليزية بتسمح بشنطة واحدة بس، لكن القطرية بتسمح بشنطتين. علشان كدة انا ساعات بستخدمه علشان اعرف ايه الي مسموح من الشنط مع التذكرة لو انا مسافر و راجع باكتر من شنطة.
النصيحة الذهبية عند حجز تذاكر الطيران هي استخدام اكثر من محرك بحث، ومقارنتهم بالموقع الرسمي لشركة الطيران نفسها، علشان تتأكد انك لقيت ارخص تذكرة.
