17
Dec-2016

٥ نصائح مهمة لتجنب فاتورة تجوال حراقة

photostudio_1481971709576

زي ما شرحت في المقالة الي فاتت، الانترنت ممكن تلاقيه بالواي فاي في حتت كتير او ممكن تشتري شريحة من اي بلد توصلها. طيب لو زيارتك قصيرة في البلد الي بتزورها ….  او مش عايز تشيل الشريحة بتاعتك من التليفون الاصلي علشان منتظر مكالمات مهمة … ، او مش عايز وجع دماغ وخط جديد بقى … يبقى هتشغل التجوال بتاعك Roaming. خليني اقولك على ٥ نصائح تحطهم حلقة في ودنك علشان انا دفعت عشرات الآلاف من الجنيهات من اجل هذا التجوال اللعين.

الغلطة بجون!!

اسعار التجوال في اي دولة في العالم غالية جدا. الميجابيت الواحد من ٣٠ الى ٦٥ جنية. يعني لو جالك صورتين واتساب على صورتين من الفيسبوك، يبقى هتدفع ٣٠٠ جنية مثلا.

photostudio_1481637794868

دي الرسائل الي بتوصلتني لما وصل اي بلد بسافرها

زي ما قريت في الرسائل، الاسعار خارج الباقة غالية جدا … علشان تتفادى فواتير عالية في التجوال يبقي تعمل الآتي:

١- الباقة المناسبة

طبعا اول حاجة تعملها انك تشترك في احدى باقات التجوال الموجودة. احجام وسرعات واسعار مختلفة. طبعا اختيار الباقة شئ يرجعلك ويرجع لمعدلات استخدامك للانترنت وانت خارج نطاق الواي فاي. ايه اهم التطبيقات بالنسبة ليك وانت مسافر؟ ده اهم سؤال وهجاوب عليه في مقالة خاصة ان شاء الله، لان ده بيختلف من واحد للتاني.

٢- باقة التجوال شغالة هناك؟

لازم تتأكد ان الدول الي انت مسافرها في رحلتك داخل باقة التجوال الي اخترتها. لان العروض احيانا بتكون لعدد معين من الدول. مرة كنت في اوروبا وتوقفت في ايطاليا ٢٤ ساعة، جاتلي فاتورة تجوال ب٥٠٠٠ جنية. علشان لم اتخيل على الاطلاق ان دولة في حجم واهمية ايطاليا مش موجودة في باقة التجوال.

roaming-970x546

٣- اختار الشبكة الصحيحة

لازم كمان تعرف ايه الشبكات الي موجود عليها باقة التجوال. كل شبكة محمول في مصر مثلا ليها شبكات شقيقة في الدول الآخرى، يعني هتلاقي اورانج وفودافون عندهم شبكات شقيقة في اوروبا وافريقيا كتير مثلا. حضرتك لو اورانج ورحت فرنسا، يبقى تعمل اختيارات الشبكة بتاعتك Manaual Selettion وتختار شبكة اورانج في فرنسا علشان تستفيد من الباقة الرخيصة. لكن لو عملت التليفون Network Automatic Selection هيفضل يطنطط بين الشبكات على حسب قوة وضعف كل واحدة، وهتلاقي نفسك لابس في الحيطة في اخر الرحلة. لان باقة التجوال بتكون شغالة على شبكة واحدة فقط.

٤- وقف الخط فورا

الاخوة الفواتير الشخصية او تبع شركتهم، لازم تبلغ شركة المحمول بان ليهم كامل الحق في قطع الخدمة عنك فورا في حالة وصول استخدام التجوال الى مستويات عالية. ليه بقى؟ بعض الشركات عندها سياسة “عدم قطع الخدمة” مع بعض العملاء المهمين (بناء على رغبتهم)، علشان طبيعة البيزنس بتاعهم لازم تكون تليفوناتهم شغالة دائما تحت اي ظروف. سياسة موبينيل مع الشركة الي كنت فيها زمان هي عدم قطع الخدمة في اي حال من الاحوال بناء على تعليمات ادارة الشركة. مرة تجاوز استخدام التجوال بتاعي ٢٠ الف جنية علشان خرجت برة الباقة او استخدمت شبكة غلط، والشركة لم تقطع الخدمة وهي شايفة الاستخدام عمال يزيد كل يوم الفين وتلاتة. وكان خراب بيوت مستعجل وقعدت ادفع في الفاتورة ٦ شهور.

٥- مراقبة الاستخدام

لازم تستخدم تطبيق Data Manager علشان تراقب الاستخدام اليومي لباقة التجوال بتاعتك. في اوبشن في البرنامج انك تدخل حجم الباقة المتاحة وعدد الايام، وهو هيحسبلك الاستخدام اليومي ويديك انذار لو تعديت حدود الاستخدام اليومي. لازم تراقبه كل شوية علشان تعرف راسك من رجلك في الاستخدام.

photostudio_1481646785546

 اخيرا، لازم تكون حريص في استخدامك للباقة وانت مسافر وتستخدمها في التطبيقات المهمة فقط، زي navigation او translation. بلاش تستخدم social network خالص علشان سفاحين في الداتا. اعمل sign out من التطبيقات كثيفة الاستخدام للداتا لو خايف. السنابشات مرة اكل مني نص جيجا علشان بالغلط دوست على story بتاعت مسافر بينزل stories طويلة زي حالاتي. اعمل سنابشات على travel mode علشان مش ينزل stories بتاعت الناس الي بتتابعهم لوحده. الفيسبوك عامل تطبيق جديد اسمه facebook light بيستخدم داتا اقل من الفيسبوك العادي. خلي الكلام ده كله وانت في مكان اقامتك او في اي مكان فيه wifi.

المقالة الجاية عن اهم التطبيقات الي تستخدمها من غير انترنت خالص، لا تجوال ولا واي فاي ولا اي حاجة.

11

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec