19
Apr-2017

ارخص واجدد طريقة للشحن والتسوق اونلاين

عايزين حاجات من بلاد برة

كم مرة شوفنا حد بيسأل السؤال ده على الفيسبوك ولا تويتر ولا واتساب:

محدش جاي من امريكا قريب؟

مين جاي الشهر الجاي من دبي؟

في حد مسافر المانيا في شهر مايو؟

في حاجات كتير جدا بيكون نفسنا نبعتها او نجيبها او نشتريها من بره علشان اسباب كتير … عايزين نبعت هدية او ورق مهم …بننتظر حد يكون  “رايح بلاد برة” ياخدها معاه.

واحيانا اكتر بنكون عايزين نشتري حاجة من برة سعرها ارخص بسبب الجمارك والضرائب والشحن والتفريغ وكل الحاجات دي. بننتظر حد “جاي من بلاد برة” علشان يجيب لينا موبايل، ساعة، عدسة كاميرا، دواء او مكياج حتى.

انا شخصيا كنت اول ما اعرف ان في حد من صحابي ولا قرايبي جاي من امريكا … عينيا تلمع كدة وويجيلي شعور بالفرحة العارمة … عايز ايه من امريكا انا طيب؟؟؟ مش عارف الصراحة، هدخل اتفرج على امازون واكيد اكيد في حاجة حلوة اونلاين عندهم حلوة ورخيصة ومش موجودة هنا. او العكس احيانا، اول ما نعرف ان في حد مسافر من مصر رايح امريكا، نحاول نبعت معاه حاجات علشان اخويا الي عايش هناك … احيانا بتكون علبة حلويات شرقية فقط. علشان عارفين قد ايه هو بيحبها 🙂

طيب الي معندوش صحاب وقرايب بيسافروا كتير، يعمل ايه؟

الحل الوحيد لو ماتعرفش حد وعايز حاجة ضرورية، هو انك تستخدم خدمة شحن زي DHL ولا Aramex ولا FedEx …. علشان تجيب الحاجة دي … “بس انا مستعجل ومش عايز ادفع مصاريف شحن ولاجمارك … مفيش حل تالت؟”

خدمة جديدة

مجموعة من الشباب المصريين كانوا دائما بيعانوا من المشكلة دي وقرروا يعملوا موقع اونلاين وتطبيق على الموبايل يخليك تتعرف على ناس مسافرة “رايحة بلاد برة  او جاية من بلاد برة”   وعندها استعداد توديلك او تجيبلك الحاجة الي انت عايزها لحد البلد الي انت عايزها. ازاي ده؟

الموقع الجديد اسمه hitchhiker.io – والتطبيق بتاعه متوفر على apple store  للتليفونات الآيفون وكمان متوفر على google play لللتليفونات الاندرويد. الفكرة ببساطة ان كل حد ممكن يشترك على الموقع ده بصفته الراسل او المسافر:

الطرف الاول …  الراسل/الشاحن/ Shipper  … الي عايزين يرسلوا او يشحنوا حاجات بين اي مدينتين في العالم.

الطرف التاني … المسافر/Traveler …. المسافرين الي معاهم مكان متاح وممكن ياخدوا معاهم حاجات.

والمقابل ايه؟

طبعا هيكون في تكلفة مادية للخدمة دي هيدفعها الراسل للمسافر – والي هتكون بالتأكيد اوفر واسرع بكتيييير من خدمات الشحن التقليدية.

معايير الآمان والسلامة

طبعا اي حد هيكون مستغرب جدا انه ازاي يستأمن حد مايعرفوش على حاجة غالية هيبعتها. طبعا كلها مخاوف مشروعة والحلول بتاعتها كانت على رأس اولويات الشركة القائمة على المشروع.

١- بيتم التأكد من هوية جميع المشتركين على الموقع/التطبيق عن طريق الاثباتات الشخصية الحكومية – رقم التليفون والايميل الحسابات البنكية – وحتى الفيسبوك كمان.

٢- اي طرد هيتم نقله من خلال التطبيق هيكون متأمن عليه بحد اقصى ١٠٠٠ دولار

٣- طبعا طبعا طبعا، الطرف المسافر ليه الحق في فحص اي طرد هيقوم بنقله من مكان لمكان و قبوله او رفضه.

ايه الخطوات بالزبط الي هتربط الحاجات دي كلها سوا؟

١- لو انت الراسل: هتنزل على التطبيق بوست خاص بالحاجة الي عايز تبعتها او تجيبها وكل المعلومات عنها.

اما لو انت المسافر: هتنزل على التطبيق وجهة سفرك ومواعيدها.

٢- لو انت الراسل: هتتواصل مع مسافرين على الموقع مسافرين البلد الي انت عايزها – ولو مفيش حد في الوقت الحالي، هتنتظر اشعار من الموقع لو حد مسافر الوجهة بتاعتك.

اما لو انت المسافر: هتتواصل مع الراسلين الي حاطين اعلانات عايزين خدمة توصيل للبلد الي انت مسافرها.

٣- لما بيحصل تواصل بين اي اتنين من الطرفين، كل واحد بيشوف البروفايل بتاع التاني ولو مناسبين لبعض بيحصل توافق بينهم وينتقلوا لمرحلة التفاوض المباشر.

الفلوس معايا والبضاعة كمان معايا

مرحلة التفاوض

بيتم التواصل بين الطرفين مباشرة للتحدث في التفاصيل المهمة بالبضاعة وميعاد التسليم هاهاهاها ….  بيتم فتح chat box بين الطرفين لمناقشة ٣ حاجات اساسية: مكان الاستلام – تكلفة الخدمة – مكان التسليم.

– هتتفقوا على مكان وميعاد “التسليم”. ممكن الراسل يقابل المسافر بنفسه يديله الحاجة الي عايز يبعتها. او ممكن يتم شحنها على عنوان المسافر من على اي موقع تسوق زي amazon / ebay مثلا.

– لو انت المسافر، طبعا اول حاجة هتيجي في بالك وانت مسافر – يمكن باعتين معايا مخدرات مثلا؟ … طبعا طبعا طبعا اول حاجة تعملها لما تستلم الطرد انك تفحصه بنفسه قدام الراسل وليك كامل الحق انك تقبله او ترفضه.

– هتتناقشوا كمان في تكلفة توصيل الشحنة. يعني لو حاجة صغيرة وخفيفة ولا حاجة كبيرة وتقيلة. لو محتاجين reference point علشان تحسبوا التكلفة ازاي، ممكن تستخدموا مواقع الشحن مثلا الي بتشحن حول العالم. معظم المواقع دي بتحط خدمة “تقدير مصاريف الشحن”. احسبوها وخلوا تكلفة الخدمة ٥٠٪ مثلا من الرقم ده. او لو الحاجة الي هتوصلها فرق سعرها كبير بين البلدين، ممكن مصاريف الشحن تكون ٥٠٪ مثلا من فرق السعر بين البلدين. الموضوع تفاوضي بين الطرفين بدون ادنى تدخل من القائمين على التطبيق.

– هتتفقوا كمان على مكان توصيل الطرد في البلد الي مسافرها.

الدفع عند التوصيل

بعد ما الطرفين يوصلوا لاتفاق بخصوص كل التفاصيل والمصاريف، بيعملوا تحديث على التطبيق ان تم الاتفاق بينكم وبتكتبوا السعر الي تم الاتفاق عليه. بيتم خصم المبلغ كاملا من الراسل وبيتم تحويله للمسافر بعد توصيل الطرد لوجهة سفره.

التسوق اونلاين Online Shopping

اهم حاجة في نظري في التطبيق ده هي توفير الشوبينج اونلاين باسعار تنافسية جدا. خصوصا ما  خف حمله وغلا ثمنه. لو انت عايز تشتري حاجة من امريكا مثلا وتشحنها مع حد نازل مصر. ممكن بكل بساطة تتواصل مع احد المسافرين الي اعلنوا انهم جايين من امريكا الى مصر، والاتفاق معه على تفاصيل الطرد وسعر الخدمة. بعدها اعمل الطلب اونلاين على موقع للتسوق واشحنه مباشرة الى عنوان المسافر علشان يجيبه معاه وهو جاي. بسيطة ومفيدة ومربحة للطرفين.

فيديو توضيحي عن التطبيق

5

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec