09
May-2017

ازاي ممكن تكسب فلوس وانت مسافر؟

في طرق كتيرة جدا لعمل فلوس وانت مسافر …. ولكن الطريقة دي تعتبر اسهلهم جدا وانت مسافر اجازتك الجاية، لازم تفكر فيها جدياااااا

هتشتغل طيار …. تاجر شنطة

بتاع ديليفري …. عابر للقارات

ازاي بقى؟

كام مرة وانت رايح ولا راجع من امريكا ولا دبي ولا من منيا القمح حتى، حد من صحابك طلب منك تجيبله حاجة من هناك وانت راجع؟ او تاخد حاجة توصلها وانت رايح؟؟

اكيد بتحصل كتير وان مسافر بين اي بلدين

… هات وانت راجع … خد وانت رايح …. شيل وانت نازل … حط وانت طالع

دلوقتي اصبح في تطبيق يساعدك انك تكسب فلوس من خدمة التوصيل المجانية الي بتعملها دي … بس اوعى تجيب سيرة لصحابك بمواعيد سفرك 🙂

كنت اتكلمت في مقالة سابقة عن تطبيق جديد يوصل الناس الي بتسافر بالناس الي عايزه تشحن حاجات … وبالشكل ده الكل هيكون مستفيد … الراسل بعت حاجته بسعر كويس، وانت وصلت له الحاجة “بلاد برة” وكسبت قرشين ينفعوك وانت مسافر.

خدمة جديدة

مجموعة من الشباب المصريين كانوا دائما بيعانوا من المشكلة دي وقرروا يعملوا موقع اونلاين وتطبيق على الموبايل يوصل الاطراف كلها ببعض ….  من خلاله تتعرف على ناس مسافرة “رايحة بلاد برة  او جاية من بلاد برة”   وعندها استعداد توديلك او تجيبلك الحاجة الي انت عايزها لحد البلد الي انت عايزها. ازاي ده؟

الموقع الجديد اسمه hitchhiker.io – والتطبيق بتاعه متوفر على apple store  للتليفونات الآيفون وكمان متوفر على google play للتليفونات الاندرويد. تواصلوا معاهم كمان على صفحة الفيسبوك من اللينك ده لوعندكم استفسارات تقنية.

(التطبيق باللغة الانجليزية علشان يشترك عليه ناس من كل حتة في العالم):

فكرة التطبيق والموقع ببساطة ان كل واحد في العاااالم ممكن يشترك على الموقع ده بصفة من اتنين — الراسل او المسافر

الطرف الاول …  الراسل/الشاحن/ Shipper  … الي عايزين يرسلوا او يشحنوا حاجات بين اي مدينتين في العالم.

الطرف التاني … المسافر/Traveler …. المسافرين الي معاهم مكان متاح وممكن ياخدوا معاهم حاجات.

والمقابل ايه؟

طبعا هيكون في تكلفة مادية للخدمة دي هيدفعها الراسل للمسافر – والي هتكون بالتأكيد اوفر واسرع بكتيييير من خدمات الشحن التقليدية …. وهتخليك كمسافر تكسب فلوس وتستفيد من الوزن الفائض الي معاك في الشنطة بتاعتك.

معايير الآمان والسلامة

طبعا اي حد هيكون مستغرب جدا انه ازاي يستأمن حد مايعرفوش وياخد منه حاجة ما يعرفهاش؟؟ مش يمكن تكون مخدرات مثلا؟؟ طبعا كلها مخاوف مشروعة والحلول بتاعتها كانت على رأس اولويات الشركة القائمة على المشروع.

١- طبعا طبعا طبعا، الطرف المسافر ليه الحق في فحص اي طرد هيقوم بنقله من مكان لمكان و قبوله او رفضه. قابلت صاحب “البضاعة” وفتحتها ومعجبتكش، خلاص هترفض تاخدها بكل شياكة وانتهى الموضوع.

٢- بيتم التأكد من هوية جميع المشتركين على الموقع/التطبيق عن طريق الاثباتات الشخصية الحكومية – رقم التليفون والايميل الحسابات البنكية – وحتى الفيسبوك كمان. ولا يتم قبول اعضاء مشكوك في نزاهتهم.

٣- لو انت الراسل وخايف على حاجتك، اطمن، اي طرد هيتم نقله من خلال التطبيق هيكون متأمن عليه بحد اقصى ١٠٠٠ دولار

ايه الخطوات بالزبط الي هتربط الحاجات دي كلها سوا؟

١- لو انت الراسل: هتنزل على التطبيق بوست خاص بالحاجة الي عايز تبعتها او تجيبها وكل المعلومات عنها.

اما لو انت المسافر: هتنزل على التطبيق وجهة سفرك ومواعيدها.

٢- لو انت الراسل: هتتواصل مع مسافرين على الموقع مسافرين البلد الي انت عايزها – ولو مفيش حد في الوقت الحالي، هتنتظر اشعار من الموقع لو حد مسافر الوجهة بتاعتك.

اما لو انت المسافر: هتتواصل مع الراسلين الي حاطين اعلانات عايزين خدمة توصيل للبلد الي انت مسافرها.

٣- لما بيحصل تواصل بين اي اتنين من الطرفين، كل واحد بيشوف البروفايل بتاع التاني ولو مناسبين لبعض بيحصل توافق بينهم وينتقلوا لمرحلة التفاوض المباشر.

الفلوس معايا والبضاعة كمان معايا

مرحلة التفاوض

بيتم التواصل بين الطرفين مباشرة للتحدث في التفاصيل المهمة بالبضاعة وميعاد التسليم هاهاهاها ….  بيتم فتح chat box بين الطرفين لمناقشة ٣ حاجات اساسية: مكان الاستلام – تكلفة الخدمة – مكان التسليم.

– هتتفقوا على مكان وميعاد “التسليم”. ممكن الراسل يقابل المسافر بنفسه يديله الحاجة الي عايز يبعتها. او ممكن يتم شحنها على عنوان المسافر من على اي موقع تسوق زي amazon / ebay مثلا.

– لو انت المسافر، طبعا اول حاجة هتيجي في بالك وانت مسافر – يمكن باعتين معايا مخدرات مثلا؟ … طبعا طبعا طبعا اول حاجة تعملها لما تستلم الطرد انك تفحصه بنفسه قدام الراسل وليك كامل الحق انك تقبله او ترفضه.

– هتتناقشوا كمان في تكلفة توصيل الشحنة. يعني لو حاجة صغيرة وخفيفة ولا حاجة كبيرة وتقيلة. لو محتاجين reference point علشان تحسبوا التكلفة ازاي، ممكن تستخدموا مواقع الشحن مثلا الي بتشحن حول العالم. معظم المواقع دي بتحط خدمة “تقدير مصاريف الشحن”. احسبوها وخلوا تكلفة الخدمة ٥٠٪ مثلا من الرقم ده. او لو الحاجة الي هتوصلها فرق سعرها كبير بين البلدين، ممكن مصاريف الشحن تكون ٥٠٪ مثلا من فرق السعر بين البلدين. الموضوع تفاوضي بين الطرفين بدون ادنى تدخل من القائمين على التطبيق.

– هتتفقوا كمان على مكان توصيل الطرد في البلد الي مسافرها.

– ممكن بكل سهولة تكسب ١٠٠ ولا ٢٠٠ دولار لو مسافر بلد فيها ناس كتير عايزة حاجات تروح وتيجي. كل ما ناس اكتر تشترك على الموقع كل ما هيتوفر فرص كتير. اشتركوا فيه يمكن تلاقوا حد عايز يبعت حاجة في طريق سفركم.

 الدفع عند التوصيل

بعد ما الطرفين يوصلوا لاتفاق بخصوص كل التفاصيل والمصاريف، بيعملوا تحديث على التطبيق ان تم الاتفاق بينكم وبتكتبوا السعر الي تم الاتفاق عليه. بيتم خصم المبلغ كاملا من الراسل وبيتم تحويله للمسافر بعد توصيل الطرد لوجهة سفره.

التسوق اونلاين Online Shopping

اهم حاجة في نظري في التطبيق ده هي توفير الشوبينج اونلاين باسعار تنافسية جدا. خصوصا ما  خف حمله وغلا ثمنه. لو انت عايز تشتري حاجة من امريكا مثلا وتشحنها مع حد نازل مصر. ممكن بكل بساطة تتواصل مع احد المسافرين الي اعلنوا انهم جايين من امريكا الى مصر، والاتفاق معه على تفاصيل الطرد وسعر الخدمة. بعدها اعمل الطلب اونلاين على موقع للتسوق واشحنه مباشرة الى عنوان المسافر علشان يجيبه معاه وهو جاي. بسيطة ومفيدة ومربحة للطرفين.

فيديو توضيحي عن التطبيق

 

3

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec