13
Dec-2016

الانترنت في السفر – اجيب شريحة ولا واي فاي؟

photostudio_1481637283238

انا شخصيا مش فاكر ازاي كنت بسافر من ١٢ سنة من غير سمارت فون وانترنت في ايدي طول الوقت …. وفي نفس الوقت مش فاهم الناس الي خايفة تسافر في سنة ٢٠١٦ والموبايل والانترنت اصبحوا متوفرين في كل مكان والتطبيقات الي بتساعدك وانت مسافر اصبحت لا حصر لها.

اهم حاجة في اي سفرية بعد الباسبور والشطافة المحمولة يا جماعة هي التليفون طبعا والتطبيقات بتاعته المختلفة. انا هعمل سلسلة مقالات وفيديوهات بخصوص جميع التطبيقات المهمة في السفر، بس خليني ابتدي معاكم بالمقالة الافتتاحية دي بخصوص الانترنت واحنا مسافرين. نجيب انترنت منين؟؟

اشتري خط محلي ولا اشغل التجوال ولا استخدم wifi؟  …. القرار يعتمد على حاجات كتيرة

بلاد غالية ولا رخيصة؟

وانا في رحلتي الاوروبية، كنت بشتري خط محلي اول ما اوصل علشان لازم اكون متصل بالانترنت طول الوقت علشان طبيعة شغلي اونلاين. البلاد الرخيصة في شرق اوروبا مثلا (سلوفانيا، كرواتيا، المجر، التشيك)، كانت تكلفة الانترنت فيها رخيصة. ٤ جيجا مثلا سعرهم من ٥ الى ١٠ يورو تقريبا.  جورجيا كانت الارخص: ٤ جيجا ب٣ دولار. كل ما تتجه غربا في اوروبا، كل ما تكلفة الانترنت بتزيد. المانيا مثلا ٥ جيجا كانت ب١٢ يورو، بينما هولاندا ١.٥ جيجا كانوا ب١٥ يورو.

آسيا طبعا حدث ولا حرج! الانترنت رخيص جدا وسريع كمان. اشتري خط اول ما توصل المطار او مكان اقامتك.

فترة طويلة ولا قصيرة؟

البلاد الي زورتها زيارات سريعة قصيرة (سلوفاكيا وبلجيكا مثلا)، لم اشتري خط انترنت وكنت بتعامل من غير انترنت (هقولكم في مقالة خاصة على التطبيقات المهمة الي ممكن نستخدمها offline) وكنت بعتمد على wifi في معظم الوقت. لكن البلاد الي كنت بقعد فيها اكتر من كدة، كنت بشتري خط محلي.

خط داتا فقط ولا مكالمات كمان؟

انا شخصيا بشتري خط داتا فقط لاستخدام الانترنت. اولا علشان بيكون ارخص من الخط العادي الي معاه مكالمات. ثانيا لا يحتاج الى تحقيق شخصية واجرائات تفعيل للخط. ثالثا لاني نادرا لما بتصل بحد في البلد الي انا فيها. لو غير كدة، facebook messanger دائما هو التطبيق الاكثر استخداما للتواصل مع الاصدقاء في اي بلد بروحها.

الواي فاي Wi Fi المجاني

طبعا الحل الامثل والارخص هو استخدام الواي فاي في كل مكان حولك وانت مسافر. هتلاقي واي فاي مفتوح ببلاش في اغلب المطارات، الاتوبيسات والقطارات الاوروبية (اثناء التنقل بين المدن وليست المحلية)، المزارات السياحية والمتاحف (اوروبا)، المطاعم والكافيهات والبارات والديسكوهات احيانا، الهوستل والفندق والشقة المفروشة. الواي فاي زيه زي الميه والهواء هتلاقيه في كل مكان. اغلم الاماكن بتحتاج فقط تعمل log in / sign in وتقدر تدخل الانترنت. في شوارع في اوروبا الانترنت متوفر فيها ببلاش.

احيانا بعض الشبكات wi fi لا تسمح باستخدام المواقع والتطبيقات الكثيفة الاستخدام للداتا: youtube, sound cloud, snachat, and big downloads/uploads

طيب لو انا عايز استخدم الخط بتاعي الاصلي بتاعي طول الوقت … يبقى التجوال هو الحل

تجوال مكالمات فقط

زمان كنت عادة بسافر بتليفون من ابو ١٠٠ جنية ده علشان استقبل عليه مكالمات التجوال من الشغل والاهل والاصدقاء في مصر، ولما اوصل البلد الي مسافرها اشتري خط جديد احطه في smart phone الي معايا. خصوصا علشان اتفادى مفاجآت التجوال الخاص بالانترنت. استقبال المكالمات رخيص وعملي جدا.

تجوال الانترنت

كل شبكة محمول عندها باقات خاصة بتجوال الانترنت. كلم شركتك واعرف ايه احسن العروض قبل السفر. انا شخصيا بطلت استخدم تجوال الانترنت وانا مسافر من كتر الخوازيق الي لبستها فيه بصراحة، ولا تتسع المقالة دي للكلام عليها. ممكن انزلها في مقالة خاصة المرة الجاية.

4

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec