27
Feb-2017

اخيرا وصل الاختراع الي هيلخلي فواتير مكالمات التجوال صفر

اتكلمنا في اكتر من مقالة قبل كده عن فواتير التجوال الحراقة، وخصوصا الي بتيجي من استخدام الانترنت. وفي المقالة دي شرحت جميع الحلول علشان تلاقي انترنت وانت مسافر. لكن مكالمات التجوال، سواء الارسال او الاستقبال، مالهاش اي حل غير انك تكون حريص جدا في مكالماتك، لحد ما جربت هذاالاختراع الي هيخليك تستقبل وترسل مكالمات بدون اي مصاريف تجوال على الاطلاق. ازاي؟؟ – خلينا نتكلم الاول عن مكالمات التجوال ومشاكلها.

ليه مكالمات التجوال مهمة؟

بالرغم من توفر وسائل الاتصال عبر الانترنت (facebook , skype, viber ) وتطبيقات مشابه كتير، الا ان استقبال وارسال المكالمات على التليفون الشخصي بالرقم المحلي بيكون ضروري جدا لناس كتير اوي، لاسباب كتيرة:

١- علشان تستخدم تطبيقات الانترنت للمكالمات، لازم الي بيتصل بيك يكون عندك قي قائمة الاصدقاء بتوعك علشان يعرف يوصلك. لكن لو انت شغال في مكان وعندك زملاء، مديرين، عملاء، موردين، او اي حد تاني من خارج دائرتك الاجتماعية الي على الفيسبوك مثلا او اي تطبيق اخر، مش هيعرف يوصلك الا من خلال الاتصال المباشر بيك على رقم موبايلك.

انا لما كنت شغال زمان، كل المكالمات الخاصة بالشغل لازم تكون عن طريق رقم تليفوني الخاص طبعا. مش هينفع اكلم عملاء في شركة مثلا ،لاي امر طارئ حصل وانا مسافر، واقوله “تعالالي فايبر ولا فيسبوك”، او ارن عليه واقوله اتصل بيا معلش مش معايا رصيد 🙂

٢- اول سؤال هتتسأله لو بتكلم حد من على الفيسبوك ولا فايبر “ايه يا معلم، انت مسافر فين كده؟” – وده طبعا بينتهك خصوصية ناس كتير بتسافر وتروح وتيجي من غير ما حد يعرف اصلا، نظرا لطبيعة عملهم او لطبيعة حياتهم الشخصية. علشان كدة اي مكالمات بتتعمل وانت مسافر، بتعملها من تليفونك مباشرة .

انا شخصيا، لما كنت باخد اجازة في شغلي القديم، محدش كان بيعرف انا مسافر فين ولا امتى ولا اي حاجة. لكن اهم حاجة انهم يقدروا يوصلوا لي عن طريق التليفون في اي وقت علشان اي حاجة في الشغل حصلت.  علشان كدة كنت لازم استقبل اي مكالمة خاصة بالشغل وانا مسافر. طبيعة شغل ناس كتير كده، لازم تكون reachable في اي وقت واي مكان.

٣- الكارثة الكبرى عادة بتيجي لما تكون مضطر تتصل بحد وانت مسافر، لان الاتصال عادة بيكون هو الي مكلف جدا. تكلفة عمل مكالمات تجوال اثناء سفرك في معظم بلاد العالم حوالي  ١٠ الى ١٨ جنية الدقيقة، ومرات عديدة شوفت ٢٨ جنية واكتر كمان. يعني حضرتك لو مضطر تعمل مكالمتين تلاتة اثناء سفرك، كل واحدة تلت او نص ساعة، ممكن تكلفة المكالمات تعدي الالف جنية بكل سهولة. علشان كدة عمل المكالمات بيكون اكبر الخوازيق لانه اكثرها تكلفة.

٤- خدمة العملاء – اكتر المواقف الي خلتني ادفع مئات الجنيهات في مكالمات التجوال هي المكالمات الخاصة بخدمة العملاء للبنك مثلا علشان الكارت كان فيه مشكلة، او حصل عملية مريبة على الحساب وانا مسافر، او علشان اشغل او اوقف خدمة. طبعا خدمة العملاء حبالهم طويلة عن اللازم احيانا والمكالمة بتطول. مرات تانية المكالمات كانت لخدمة عملاء شركة طيران، علشان تغيير ميعاد حجز طيارة مثلا، برضو كانت المكالمات بتاخد وقت وفلوس كتير جدا. كلها بتبقى مكالمات غير متوقعة وتؤدي الى مصاريف كتيرة جدا.

الحل السحري – سيب شريحتك في البيت

         وحطها في في Voxera

في مجموعة من الشباب المصري توصل لاختراع جهاز بسيط وعملي جدا اسمها Voxera . بيعمل ايه بقى الجهاز ده؟ الجهاز ده بيخليك ترسل وتستقبل مكالماتك بالرقم بتاعك بدون اي مصاريف تجوال على الاطلاق … ازاي؟؟

١- بكل بساطة بتحط الشريحة المحلية SIM Card بتاعتك في جهاز Voxera وتوصله بالانترنت

٢- تنزل التطبيق Application الخاص بتاعهم على تليفونك smart phone

٣- لما توصل اي بلد انت مسافرها تجيب شريحة محلية فيها انترنت او تستخدم wifi من اي مكان.

٤- جهاز Voxera  في بلدك بيستقبل المكالمات والرسائل ويبعتهالك على التطبيق الى على تليفونك بدون مصاريف تجوال، وتقدر ترد على جميع المكالمات ببلاش.

٥-لو عايز تتصل بحد مستخدما رقم تليفونك بتاع بلدك، بتستخدم التطبيق الي على التليفون لاجراء المكالمات، الي بتروح على جهاز Voxera الاول الي بيحولها الى مكالمة عادية جدا من الشريحة بتاعتك، بدون اي مصاريف تجوال.

يبقى الجهاز خلاك تستقبل وترسل مكالمات من الشريحة بتاعتك بدون اي مصاريف تجوال وبجودة عالية جدا.

تجربة شخصية لجهاز Voxera

انا شخصيا رفضت ان اكتب عن الجهاز وان ارشحه لكم قبل تجربته شخصيا. علشان كدة قبلت دعوة فريق العمل وتوجهت لمقر الشركة بتاعهم في القاهرة علشان اشوف الجهاز بيشتغل ازاي واجربه بنفسي. وبالفعل عملنا تجربة ناجحة جدا عليه بالخط الشخصي بتاعي وكان الصوت سريع جدا.

تخوفات مشروعة وحلولها

هل ممكن شركات الانترنت تقفل التطبيق؟

القائمين على تطوير الجهاز طبعا عاملين حسابهم على الموضوع ده وبيستخدموا بروتوكول انترنت لا يمكن حجبه او منعه. علشان كده التطبيق بيشتغل على جميع بروتوكولات الانترنت التي لا يمكن منع استخدامها.

هل ممكن اخد الجهاز معايا وانا مسافر؟

انا عايزك تشوف الجهاز ده اكنه “موبايل” انت جبته وبيستقبل ويرسل المكالمات من بلدك لاي مكان انت فيه في العالم. فكرة الجهاز ان الشريحة بتفضل في بلدك علشان تتحاسب بالاسعار المحلية.

لو الكهرباء قطعت او الانترنت فصل؟

لو عندك قلق من انك تسيب شريحة تليفونك في البيت وتسافر من غيرها، طلع شريحتين على نفس الرقم. واحدة سيبها في الجهاز وجربها قبل ما تسافر والتانية خليها معاك علشان لو لسه قلقان من التكنولوجيا الجديدة. لا تقلق، انا جربته بنفسي وشغال والله 🙂

في ناس احيانا عندها قلق من انقطاع التيار الكهربائي عن الجهاز او انقطاع خدمة الانترنت عن المنزل، الحل ده ممكن ينهي قلقك من النقطتين دول خالص. الشركة بتعمل على تحديث الجهاز انه يكون ببطارية وشريحة انترنت علشان لو خدمات الكهرباء او الانترنت قطعوا، الجهاز يفضل شغال.

هل لازم اكون على الانترنت طول الوقت وانا مسافر؟

الموضوع ده اصبح سهل جدا ورخيص جدا. عواصم كتيرة دلوقتي اصبح فيها free wifi في الشوارع والميادين بتاعتها. ثانيا شريحة في اي بلد هتروحها هتكون ارخص واوفر بكتييييييير من اي مكالمات تجوال. ثالثا، مين يقدر يسافر من غير انترنت دلوقتي؟ 🙂

سعر الجهاز كام؟

هل متوفر في الاسواق حاليا؟

الشركة المخترعة للجهاز بعد ما اثبتت فاعليته وسجلت براءة اختراعه، اخيرا خلاص هتنزله للمستهلك في نص ٢٠١٧، ولكن هم قرروا يمولوا المشروع من العملاء المستقبليين.  ازاي؟ في موقع امريكاني مشهور للمشاريع والافكار الجديدة اسمه “Kick Starter”  للتمويل الجماعي. يعني كل واحد معجب بالفكرة والجهاز، يقدر يشارك في حملة التمويل الجماعي عن طريق شراء وحدة من جهاز  Voxera وبياخد خصم على سعر البيع بتاعه تصل الى 63٪ من سعر الشراء المقترح ليه – سعره دلوقتي ٦٩$ مقابل سعر بيع رسمي بعد كدة ١٨٠ دولار (الاسعار شاملة التوصيل لاي حتة في العالم).

حضرتك لو ارسال دقيقة التجوال ب ١٨ جنية، يعني سعر الجهاز بالجنية يساوي ارسال ساعة مكالمة تجوال … تعالى نحسبها:  ١٨ جنية x ٦٠ دقيقة = ١٠٨٠ جنية  …. يعني حوالي ٦٧ دولار.

تحديث: نظرا للاقبال على الجهاز، تم نفاذ جميع الوحدات بسعر ٦٩ دولار. متوفر حاليا عدد محدود بسعر ٧٩ دولار، يعني تخفيض ٥٤٪ عن سعر البيع المتوقع في منتصف ٢٠١٧. 

 قيمة الجهاز = ٧٠ دقيقة مكالمة تجوال

يبقى انت احسنلك تشتري جهاز يخدمك طول العمر وتجيب حقه من مكالمة تجوال واحدة مدتها ساعة فقط.

لو عجبتك الفكرة وعايز تحجز الوحدة بتاعتك من الجهاز بالتخفيض الكبير ده، ادخل على اللينك دي علشان تحجز وحدتك فورا، وبيتم خصم المبلغ بعد انتهاء حملة التمويل الجماعي. يعني ممكن تدخل تسجل بياناتك دلوقتي والدفع بيتم بعدين. موقع kickstarter موقع آمان جدا ومشهور عالميا لدعم المشاريع الجديدة.

عرفوا يلموا قد ايه لحد دلوقتي؟

الفكرة من كتر ما هي ناجحة وفعلا هتوفر فلوس كتيرة جدا على مستخدمين التجوال، الاقبال على الحملة عالي جدا وقدروا يلموا اكتر من ١٠٠٪ من التمويل المطلوب في ٥ ايام. المبلغ الى عايزين يلموه من حملة التمويل الجماعي ٢٠ الف دولار، ولموا منه حاليا اكتر من ٢٢ الف دولار. يعني كدة الفكرة تحولت من مجرد مشروع تجريبي الى حقيقي خلال شهور.

لو فكرة الاختراع عجبتك واتأخرت في حجز وحدتك دلوقتي، هتشتريه بالسعر التجاري الي هيتباع بيه بعدين في كل حتة في الدنيا ١١٩$ . لما تدخل على اللينك، هتلاقي اسعار الوحدات المباعة حتى الآن، وكمان قائمة أسعار بالوحدات المتاحة باسعار مخفضة قبل طرحها في السوق بالسعر الغالي …. يعني قرررررب قرررررب قبل ما يغلى :)))

 

7

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec