19
Dec-2016

خايف تتوه وانت مسافر؟ – جرب ال٣ تطبيقات دي على تليفونك

photostudio_1482152026993من اكبر مخاوفنا في السفر هو التوهان …. نروح الفندق ازاي من المطار؟ نروح المزارات السياحية ازاي؟ نلاقي مطاعم حوالينا ازاي؟ نروح الفندق ازاي في اخر اليوم؟ هل هفضل اتحرك بتاكسيات غالية علشان مش اتوه في حتة؟ لازم يكون معايا انترنت ال٢٤ ساعة علشان مش اتوه؟ استخدم التجوال ويتخرب بيتي؟ ولا اجيب خط لما اروح البلد؟ هلاقي واي فاي بسهولة طيب؟

اتكلمت في مقالة سابقة عن كل الاختيارات المتاحة امامك علشان يكون معاك انترنت وانت مسافر، واتكلمت في مقالة بعدها عن التجوال والبلاوي بتاعته …. لكن هل انت فعلا محتاج انترنت طول الوقت وانت ماشي في كل حتة؟ الحقيقة لا!  بعد شهور من السفر المتواصل، اكتشفت ان ٣ تطبيقات سفر فقط مهمين بالنسبة لي وبستخدمهم offline كمان. كلهم متعلقين بالخرايط والاتجاهات.

     GPS من غير انترنت     

ازاي نشغل GPS من غير انترنت؟

اول حقيقة عايز اقولها قبل ما نكمل المقالة مع بعض هي ان GPS الي بيقولك انت فين على اي الخريطة على تليفونك لا يحتاج الى انترنت ولا شبكة موبايل اصلا علشان يشتغل.

اكتشفت مؤخرا ان في ناس كتيييييير لا تعرف هذه الحقيقة التي لا تقبل الشك او الجدل. GPS يا جماعة يستقبل الاشارات من الاقمار الصناعية المنتشرة في المجال الفضائي لكوكب الارض – لا حاجة له الى شبكة موبايل من اي نوع. حتى لو مفيش شريحة في التليفون اصلا!!! جرب كدة اقفل data على تليفونك او حتى شيل الشريحة –  وافتح GPS وجرب بنفسك. لازم تكون محمل الخريطة من قبل كدة علشان النقطة الزرقاء تطلع على خريطة ذات معالم واضحة.

جميل جدا —- يبقى دلوقتي عرفت ان التليفون هيقولك انت فين في اي مكان على سطح الكوكب. يبقى تاني خطوة ايه؟ هي انك تعمل download للخرايط الي GPS هيشتغل عليها حتى لو مش معاك انترنت.

     اكتر تطبيق بستخدمه في السفر Google maps

1- تطبيقات خرائط مجانية 

ممكن تعمل download خرايط جوجل لاي مدينة او بلد انت مسافرها. مش الخرايط وبس، لا كمان الاتجاهات بتاعت المواصلات كلها. في تطبيقات مشابهة كتير ممكن تجربها برضوا، بس انا شخصيا بستخدم بجوجل maps بقالي كتير اوي. تطبيقات اخرى لمعظم انظمة التشغيل:  Maps Me.-  OSMand.-  City Maps 2Go.

 photostudio_1481963694859

Google Maps APP

OFF-Line Areas

بتدخل في خرايط جوجل، وتختار اوبشن offline areas، هيفتحلك الخريطة ويقولك اختار انت عايز تنزل ايه. زي المربع الازرق الي تحت ده، كل ما تكبر المساحة، كل ما الخريطة الي هتنزل تكبر. ممكن تنزل المدينة الي انت فيها او الدولة كلها. ولما تخلصها، امسحها ونزل غيرها. باقي التطبيقات بتختار اسم المدينة او الدولة الي انت عايزها. الموضوع سهل جدا.

screenshot_20161217-140408

احتفظ Your Places على الخريطة

من احلى الاوبشنز طبعا في التطبيق انك ممكن تحفظ عليه كل الاماكن الي انت عايز تسكن فيها، او تاكل فيها، او  تزورها او تسهر فيها. طلع المكان من على الخريطة واعمله SAVE وهيحطلك نجمة صفراء كدة علشان تلاقيها على الخريطة بسهولة. الموضوع بسيط اوي والله. جربه واتعود عليه من اونت في بلدك.

ازاي تروح وتيجي؟

اوبشن Navigation في ممكن تسأل جوجل انت عايز تروح “من مكانك” Your Location الي مكان انت عايزه، وهو هيقولك ممكن تمشي في كام دقيقة، او ممكن تاخد تاكسي/عربية في كام دقيقة، او ممكن تركب اي نوع من انواع المواصلات العامة وكل واحد هياخد منك وقت قد ايه. هيقولك على Directions for Navigation بجميع التفاصيل المملة الي تتخيلها.

جوجل على الخريطة هيقولك امشي ٥٠٠ متر كده وبعدين اركب الاتوبيس رقم كذا من محطة كذا وهتنزل بعد كذا محطة وتنزل في محطة اسمها كذا. وبعدين تركب المترو رقم كذا اتجاه كذا وانزل محطة كذا. هيقولك كل التفاصيل علشان مش تتوه.

photostudio_1481969682755

اقتراحات جوجل علشان اروح مكان معين – مشي/مترو/عربية

تنويه: بعض المدن – زي فيينا مثلا في النمسا، Google Maps مش بيجيب المواصلات بتاعتها لسبب ما انا اجهله. ساعتها بتنزل برنامج محلي خاص بالمدينة. لكن كان موجود في كل مدينة تانية زورتها.

استخدمه وانت بتحجز مكان الاقامة

من اهم الاستخدامات لخرائط جوجل هي لما اجي احجز فندق او هوستل في اي مدينة. ازاي اعرف المكان ده قريب من ايه ولا بعيد عن ايه؟؟ احط العنوان بتاعه واحط اسم مكان او ميدان مهم في البلد. واشوف المسافة بينهم قد ايه مشي او بالمواصلات علشان اعرف انا ساكن بعيد ولا قريب. مثال: انا مثلا قررت ان شاء الله قضاء راس السنة في بودابيست، مدينتي المفضلة في اوروبا من حيث النايت لايف. لما جيت احجز هوستل مع ناس صحابي، كنا عايزين مكان قريب من النايت لايف. فكنت بعمل مقارنة بين اماكن الاقامة بناء على بعدها وقربها من اماكن النايت لايف. خرائط جوجل طبعا عظيمة جدا في الموضوع ده.

٢- خرائط المزارات السياحية

من احلى التطبيقات الي فعلا استخدمتها كتير في رحلتي الاوروبية Visit a City – علشان بيكون متوفر في اغلب العواصم والمدن السياحية الكبيرة. في عدة استخدامات مفيدة للبرنامج:

in 1 to 5 days

ممكن انزل برنامج كامل للرحلة بتاعتي من عليه. اختار مدة الاجازة بتاعتك في المدينة وهو هيقترح عليك برنامج مفصل يناسب عدد الايام الي انت قاعدها. تروح الساعة كام، تقعد قد ايه، تروح فين بعدها. بيجمع لك الحاجات الحلوة والقريبة من بعضها في البرنامج.

photostudio_1481963604117

Sights & Map

كمان لما تفتح الخريطة بتاعته، هتلاقي عليها كل الاماكن السياحية الي ممكن تزورها حواليك، نبذة تاريخية عنها، مواعيدالعمل، اسعار التذاكر. مفيد جدا للناس الي last minute planners زي حالاتي.

screenshot_20161217-134550

خريطة مزارات بودابيست

OFFLINE

ممكن كمان تنزل download دليل البلاد المتوفرة offline وتستخدمه من غير انترنت خاااالص. هتكون فاتح GPS بس علشان تعرف انت فين على الخريطة وتشوف ايه المزارات الي حواليك في المنطة الي انت فيها.

٣- هناكل فين وهناكل ايه؟

 وجبة العشاء بتكون اكتر وجبة اتطلع ليها خلال اليوم. عادة بفطر في محل اقامتي الصبح وبعمل ساندوتش للغذاء او فاكهة طول اليوم، وبعدين بالليل بكون منتظر اكل في مكان لطيف وسعره معقول. لقيت ان من احلى التطبيقات الي ممكن استخدمها في الموضوع ده Trip Advisor. ممكن كمان تعمل  download cities للمدن الي هتزورها وتخلي كل حاجة في التطبيق معاك متوفرة offline. هو من اهم التطبيقات الي تكون معاك وانت مسافر، لانه بيديك نصايح عن اماكن الاقامة والمزارات والمطاعم وحاجات سياحية كتير. بس انا عادة استخدمه في موضوع المطاعم.

photostudio_1482154496986

الميزة الي فيه انك لما بتدور على مطاعم، ممكن تستخدم Filters كتيرة اوي، منها مثلا:

  • عايزها مطاعم غالية ولا رخيصة Cheap Eats – Mid-Range – Fine Dinning
  • Open NOW – مهم جدا في اوروبا علشان المواعيد صارمة اوي
  • نوع الاكل ايه – Cuisines – الي عايز تاكلها ايه
  • لو عندك اي نظام غذائي خاص – وده هتلاقي فيه Halal اوبشن موجود
  • ممكن تختار الحد الادنى للتقييم بتاعه

screenshot_20161219-183237

*كل ما هتستخدم فلاتر كتير، كل ما نتايج البحث بتاعتك بتقل*

بعد ما تحصل على قائمة المطاعم المتماشية مع اختياراتك، اتفرج عليهم واحد واحد، وشوف التقييم بتاعهم، وشوف هم فين على الخريطة. لو عجبك واحد واخترته، دوس عليه في الخريطة واطلب الاتجاهات بتاعته، هيروح مفتوح في تطبيق خرائط جوجل ويقولك تروح المطعم ازاي.

الخلاصة

دول اكتر ٣ تطبيقات انا بستخدمهم فعلا خلال شهور من سفري المتواصل في اوروبا. سواء معايا انترنت او مش معايا انترنت. اقدر اعرف اروح فين واحي منين، واعرف الاماكن السياحية المهمة، والمطاعم الي اكل فيها. دول اهم تطبيقات سفر في العموم انا بستخدمهم. انصحك تنزلهم وانت في بلدك وجرب استخدمهم offline وتعامل مع الاوبشن الي فيهم. عايزين انزل فيديو عن طرق الاستخدام بتاعتهم بالتفصيل؟؟

12

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec