01
Nov-2016

ازاي صرفت ٥٠ يورو كاش في اوروبا في اسبوعين؟

photostudio_1478023475279 بتعمل ايه في المصاريف؟ بتجيب عملة صعبة منين علشان السفر؟ معاك كروت بنك ايه؟ 

بعد انخفاض حدود السحب النقدي والشراء لاغلب البنوك المصرية، مرة اخرى، اصبح هاجس تدبير العملة الصعبة للسفر اصعب من الاول. ربنا يعدينا من الازمة دي على خير ان شاء الله. دي بعض الحلول المقترحة والي ممكن تسهل الامور قبل واثناء السفر:

١- لا تضع البيض كله في سلة واحدة

طلع اكتر من بطاقة بنكية من اكتر من بنك. بسيطة. اغلبنا عنده كارت سحب نقدي من البنك الي بينزل فيه المرتب بتاعه وممكن كمان يكون معاه بطاقة ائتمانية من نفس البنك. البحر يحب الزيادة حضرتك. حاول تطلع كروت ائتمانية من بنوك اخرى. علشان كل بنك وليه السياسة بتاعته، لو حد لغى السحب النقدي خاااالص، زي بعض البنوك، يكون عندك بنك تاني لسه سامح بكدة.

ممكن تحط وديعة بمبلغ ٣٠٠٠ جنية في اي بنك، وتعمل كارت فيزا مقابل رهن للوديعة دي بحوالي ٣٠٠ دولار . يبقى قبل ما تسافر معاك اكتر من كارت من اكتر من بنك. لو كل كارت ليه حد سحب نقدي في الخارج ١٠٠ دولار وحد مشتريات ٢٠٠ دولار، انت كده زي الفل ومش محتاج حاجة تانية.

اعمل جولة على البنوك علشان تعرف حدود السحب النقدي والمشتريات. لو البنك بتاعك خفض حدود السحب، اعمل كروت في بنك تاني. “لا ترسل الي شكواك” من البنك بتاعك علشان خفض حدود الاستخدام في الخارج …. هقولك على فكرة من برة الصندوق تماماااااا … طلع كارت تاني من بنك تاني …. سهلة وبسيطة.

جريدة المال عملت تقرير مجمع للمقارنة بين ١٦ بنك في مصر، منشور بتاريخ ١٣ اكتوبر، ادخل اعمل مقارنة بينهم وشوف مين الاحسن ليك. 

 

al-mal-logo

٢- تذاكر الطيران الغالية، اشتريها كاش من المكتب

لو سعر تذكرة الطيران اونلاين يتعدى حد الشراء بتاع الكارت بتاعك، يبقى مش قدامك غير شراء التذكرة من شركة الطيران مباشرة، من خلال اقرب مكتب ليهم. قد تكون اغلى من اونلاين للأسف، لكن للاسف مفيش طريقة تانية. في بعض وكلاء سفر في مصر، عندهم تذاكر اسعارها كويسة. شوف اللينك دي علشان تعرف ازاي تلاقي ارخص تذاكر طيران.

flight-booking

٣- ادفع اونلاين مصاريفك قبل السفر باكتر من شهر

حيث ان حدود الشراء بالكريديت كارد شهرية، يبقى قبل السفر بتاعك بشهرين ادفع حجوزات الطيران، الفنادق، الاتوبيس، القطر، المزارات السياحية المتوفرة اونلاين كمان. بحيث انك الشهر الي مسافر فيه يكون معاك حد الشراء بتاعك لسه متوفر للاستخدام اليومي اثناء السفر.

يعني لو انت مسافر في شهر ديسمبر، و مسموح ليك شهريا ٣٠٠ دولار مشتريات بالكريديت كارد، يبقى وانت في شهر اكتوبر تشتري تذكرة الطيران، وفي شهر نوفمبر تدفع اونلاين الفندق، الشقة، الهوستل، القطارات، الاتوبيسات، او حتى المزارات. علشان لما تسافر في شهر ديسمبر يكون معاك في الكارت ٣٠٠ دولار FREE للاستخدام اليومي اثناء السفرية. ارخص واحسن طريقة تلاقي بيها حجوزات الاقامة، شوف اللينك دي.

مثال: وانت بتحجز في موقع زي  Booking، بيكون قدامك اختار انك تحجز وتدفع دلوقتي (ارخص) وبيكون غير قابل للالغاء، او انك تحجز فقط وتدفع لما توصل الفندق، وبيكون قابل للالغاء مجانا لحد يوم قبل الوصول.

hotel-booking-online

٤- استخدم الكارت في اتفه المشتريات

انا عايز اقولكم اني صرفت حوالى ٥٠ يورو كاش في حوالي اسبوعين ليا في المجر. ازاي كدة؟ لاني كنت بستخدم الكريديت كارد في كل معاملاتي اليومية، حتى ولو كان فنجان قهوة بنص يورو او لو حتى موزة وتفاحة بنص يورو. بيكون في جيبي coins فكة ممكن ادفع بيها، ولكن بحتفظ بيها وادفع بالكارت. لا ادخل محل مش لازق على الباب بتاعه صورة الفيزا الماستر كارد.

 

الصورة دي اكبر دليل على كلامي، دي رسائل البنك بتاعي كل ما يتم معاملة على الكارت بتاعي. شايفين، حاجات ب٨ جنية وبشتريها بالكريديت كارد.

 photostudio_1477240827501

ملحوظة: اكبر مميزات المحلات في بودابيست، انها بتقبل الدفع بالكريديت كارد  في كل مكان وأي مبلغ. على العكس ايطاليا مثلا، الكريديت كارد غير مقبول في اماكن كتير، وان وجد، لازم يكون حد الشراء ١٠ او ١٥ يورو مثلا علشان تقدر تدفع بالكريديت كارد. اسأل في اي مكان هل بيقبلوا كريديت كارد ومسموح استخدامه قيمة مشتريات قد ايه. 

٥- المقارنة العادلة بين الاسعار

المقارنة بين اسعار الاشياء وانا مسافر اصبحت ليها طريقة تانية خالص في دماغي. الموضوع مش مجرد مقارنة بالاسعار وفقط، لازم المقارنة كمان تتضمن طريقة الدفع. ازاي؟

يعني لو قدامك مكانين تتعشى فيهم، واحد ب٤ دولار والتاني ب٦ دولار، لو انت مسافر اقتصادي، الطبيعي هتروح للي ب٤ دولار بدون تفكير علشان ارخص. غلط!! لازم تعرف تعرف طريقة الدفع علشان تقدر تعمل مقارنة مزبوطة.

لو افترضنا ان سعر الدولار في السوق السوداء النهاردة ١٦ جنية وفي البنك ٩ جنية، يبقى المقارنة لازم تتم بطريقة الدفع  بالجنية.

وجبة عشاء – ٤ دولار – محل صغير – لا يقبل كريدت كارد – الدفع كاش فقط – بالمصري تساوي ٦٤ جنية

وجبة عشاء – ٦ دولار – محل اكبر واغلى – يقبل الكريديت كارد في الدفع – بالمصري تساوي ٥٤ جنية

يعني حتى لو العشاء ده هيكلفني ٧ دولار بالكريديت كارد (٦٣ جنية)، هيكون لسه سعره ارخص من ٤ دولار كاش.  يبقى المقارنة في الاسعار وانت مسافر لازم تتضمن طريقة الدفع.

 

٦- اسحب كاش من غير ATM

طريقة كنت باستخدمها وانا مسافر الي شهر ونص الي فاتوا دول في اوروبا، هي اني بكل بساطة لو خارج او مسافر مع ناس بتدفع كاش في اي مكان، ادفع انا ليهم بالكريديت كارد، واخد منهم الكاش. حتى لو حاجة ثمنها يورو واحد فقط. الموضوع بيجمع في الاخر.

1-coffee-1-euro

مرة كنت بشتري تذكرة مزار سياحي في بودابيست، وقدامي واحد معرفوش اصلا، كان بيدفه كاش، عرضت عليه ادفع ليه بالكارت بتاعي واخد منه كاش علشان عندي مشكلة في سحب الكاش، الراجل لم يعترض واخدت منه ما يوازي ٨ يورو. مفيش مشكلة من المحاولة.

اخيرا، اجيب كاش منين طيب قبل السفر؟؟

قبل ما تسافر تحاول تجيب كاش من المصادر المتوفرة امامك، ولكن حاول جاهدا انك لا تستخدم هذه الدولارات، وان تعود بيها الى ارض الوطن سالما. لو سافر الهند او السند او بلاد الواك واك، سافر ومعاك دولار وغيره هناك بعملة البلد الي انت رايحها، لانك مش هتلاقي عملات اي بلد انت عايز تسافرها الا الخمسة الكبار (دولار، يورو، استرليني، والعملات الخليجية).

١- اول خطوة بديهية هي انك تروح البنك بتاعك، بالتأشيرة والتذكرة، وتطلب تدبير عملة صعبة للسفرية بتاعتك. بعض البنوك كانت بتدي ٥٠٠ دولار ونزلوها ل٢٠٠ دولار دلوقتي. مش مشكلة، نواية تسند الزير. لو مش عندك حساب بنكي؟

٢- حاول تشتري من السوق السودة. هنعمل ايه طيب؟؟ لو مش عندك حساب في بنك، او البنك رفض تدبير عملة ليك، يبقى مش قدامك غير السوق السودة. لان الحلال اصعب، لن ننتظر بصراحة. المضطر يركب الصعب.

٣- خد معاك كروت بنكية بتاعت ابوك، امك، اخوك، اختك، صحابك، واسحب بيها احتاجاتك فقط. اكرر. لا تسحب كاش بغرض المضاربة في الاسعار علشان المشرحة مش ناقصة قتلة. خليك امين امام نفسك ولا تستخدم الكارت استخدامات غير شريفة، لان التصرفات الغير مسؤولة من مضاربين العملة هي الي عمل المشكلة الي احنا فيها دلوقتي.

 اقرا كمان باقي النصائح عن البنوك والكروت البنكية وانواعاها ومصاريفها في اللينك ده.

ملحوظة:  انا معايا حوالي ١٢٠٠ دولار كاش في شنطتي، احتياطي للطوارئ فقط. بحاول اول كل شهر اني اسحب من الحد النقدي المسموح من الكروت بتاعتي، واستخدم كل الطرق الي شرحتها فوق دي، علشان احافظ على الكاش الي معايا. 

2

 likes / 4 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec