17
Jul-2017

ازاي توفر حتى ٢٠٪ من قيمة التسوق في اوروبا

بالرغم من توافر جميع الماركات العالمية في اسواقنا المحلية، الا ان الشوينج واحنا مسافرين بيكون جزء اساسي من برنامج الرحلة، خصوصا لما نعمله في بلاد مشهورة بالجودة العالية والاسعار المناسبة، زي تركيا مثلا او دول اوروبية رخيصة.

ضريبة القيمة المضافة VAT

علشان نخلي الشوبينج بتاعنا في اوروبا ارخص، لازم ناخد بالنا من موضوع مهم جدا هيفرق في قرارت الشوبينج بتاعنا، الا و هي “ضريبة القيمة المضافة- VAT – Value Added Tax” ، والي بتتراوح من ٥٪ الى ٢٥٪ وتختلف من بلد للتانية وتختلف من منتج لآخر.

جدول بضريبة القيمة المضافة في بلاد اوروبية مختلفة

Country VAT %
Austria 9.09-16.67%
Belgium 21%
Denmark 25%
Finland 17-22%
France 5.21-19.6%
Germany 7-16%
Greece 11.5-15.25%
Ireland 17.36%
Italy 4-20%
Luxembourg 15%
Netherlands 15.97%
Norway 24%
Portugal 19% (13% in Madeira and Azores)
Spain 16%
Sweden 25%
Switzerland 7.6%
United Kingdom 17.5%

مين المفروض يدفع الضرائب؟

المفروض الي يدفع الضرائب على هذه المشتريات في اوروبا هم اهل اوروبا المقيمين فيها. لانهم يستفيدوا فيالضرائب في صورة خدمات مباشرة في صحة وتعليم وبنية تحتية. لذلك يتيح النظام الضريبي لغير المقيمين في اوروبا باسترداد الضرائب المدفوعة على مشترياتهم عند مغادرة البلد او منطقة الاتحاد الاوروبي.

اي ضرائب ممكن استردادها؟

يمكن استرداد الضرائب على البضائع المادية القابلة للانتقال خارج البلد. لا يمكن استرداد الضرائب على اكل او شرب مثلا، او خدمات موبايل او سكن او تأجير سيارة. يمكن استرداد الضرائب على البضائع المادية من ملابس والكترونيات ومكياج مثلا.

استمارة استرداد الضرائب

لما تكون بتعمل شوبينج في اي دولة اوروبية او في تركيا، لازم تطلب من موظف الكاشير بعد الدفع الحصول على استمارة استرداد الضرائب Tax Free/Refund Form. يقوم الموظف بمساعدتك في ملئها واستكمال بيناتها (اسم، عنوان السكن في بلدك، رقم الباسبور، الجنسية). يطلب احيانا تقديم الباسبور للتأكد من انك مواطن اجنبي عن البلد.

حد ادني للمشتريات

اغلب المحلات بتطلب حد ادنى للمشتريات علشان علشان تعملك استمارة استرداد الضرائب. لان العملية مرهقة اداريا عليهم ولا تستحق العناء علشان المبالغ الصغيرة. علشان كده لا تتعجب لو طلبوا منك مشتريات ب١٠٠ يورو مثلا علشان يعملوا ليك – Tax Free – Tax Refund. اسأل في المحلات الي هتشتري منها. احيانا يشترطوا ان المشتريات تكون في نفس اليوم كمان مش على اكتر من يوم. اسأل على الشروط دي كمان. لان كل بلد وكل محل وليه السياسة بتاعته.

اجرائات الاسترداد في المطار

بعد ما تخلص رحلتك والشوبينج بتاعك، هيكون معاك ظرف كبير مليان فواتير الشراء وقسائم الضرائب من محلات كتير. لازم تروح المطار قبل رحلتك ب٣ او ٤ ساعات علشان اجرائات الاسترداد بتتعمل في مطار المغادرة الدولي. هتسأل في استعلامات المطار Information Desk على خدمة استرداد الضرائب Tax Refund علشان تختم الاوراق الكتير الي معاك ….. ولكن خد بالك >>>

لازم تعمل كدة قبل ما تدخل شنطتك الطيارة!!!

مرة كنت في لندن وعامل شوبينج كتير جدا وشاري تليفونين iphone لاتنين صحابي. عملت قسائم استرداد الضرائب كلها وروحت المطار. عملت check in في كاونتر الشركة واخدت boarding pass زي الشاطر وروحت اختم ايصالات الضرائب علشان استردها (المبلغ كان حوالي ٢٠٠ او ٣٠٠ جنية استرليني). كانت الصدمة الكبرى لما طلب مني الموظف معاينة البضائع المكتوبة في الفواتير. قولتله والدموع تغرق عيناي “الشنط دخلت الطيارة خلاص”  …. قال لي بابتسامة خبيثة “يبقى كل سنة وانت طيب يا عسل، راحت عليك الضرائب” 🙁

للاسف كانت غلطة بشعة جدا. مكنتش اعرف اني لازم اجهز الحاجات الي اشترتها علشان اوريهالهم قبل السفر ويتأكدوا انها هتغادر البلاد فعلا. الاجراء ده لتفادي النصب والاحتيال من اهل البلد الي ممكن يشتروا حاجات ويستردوا ضرائبها مع اي حد مسافر.

يبقى تاخد شنطك وتروح على مكتب الضرائب. ممكن يطلب الموظف انه يشوف شنطك ويفتحها فعلا. لازم تسيب الحاجات في علبتها او كيسها او اي حاجة تدل على انها جديدة. ممكن ما يفتحهاش لو المبالغ مش ضخمة اوي. هيختم ليك الاوراق ويحسب قيمة الاسترداد بعد حساب العمولة بتاعتهم. ممكن يعملك استرداد نقدي (عمولة اكبر) او ممكن يعملك استرداد على credit card بتاعك (عمولة اقل). احيانا بيكون الاسرداد على بطاقة الائتمان فقط.

امتى يتم استرداد الضرائب؟

 يتم استرداد الضرائب قبل مغادرتك من البلاد او من منطقة الشنجن. يعني لو هتسافر من تركيا او انجلترا مثلا لاي بلد تاني، يبقى هتعمل اجرائات الاسترداد في مطار مغادرتك الدولية. لو هتسافر داخل منطقة الشنجن، من روما الى باريس مثلا، يبقى لسه مش هتعمل الاجرائات دلوقتي. لازم تكون قبل مغادرتك لمنطقة الشنجن. نظريا لان الشنجن كلها تعتبر دولة واحدة ونظامها الضريبي متصل ببعضه، والمفروض نظريا يكون بامكانك استرداد ضرائب مشترياتك من اي بلد شنجن من مطار مغادرتك الدولي الى خارج منطقة الشنجن. لو حد عنده تجربة يا ريت يشاركنا.

خدمة الاسترداد عن طريق طرف ثالث

استرداد الضرائب نظريا المفروض بيتم عن طريق ختم الاستمارات من موظف الجمارك في مطار المغادرة، ارسال كل استمارة بالبريد الى كل محل عملت فيه شوبينج، وبعد كدة المحل يحولك الفلوس على حساب بنكي او بطاقة ائتمان. اجراءات ورقية كتيرة جدا عليهم. صداع كبير جدا على جميع الاطراف، علشان كده هتلاقوا شركات متخصصة في تنفيذ وتسهيل الخدمة دي على المحلات والزبائن، اشهرهم في اوروبا  Global Blue وشركة اخرى اسمها Premier Tax Free. مهمتهم الاساسية تكون وسيط بين المحلات والزبائن ومصلحة الضرائب. هياخدوا عمولة طبعا على الخدمة، ولكن بتضمن تنفيذها بكفائة.  كل بلد وليها الشركة الوسيطة بتاعتها او اكتر من شركة بتقوم بنفس المهمة.

 

 

1

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec