10
Oct-2016
Oct-2016
ازاي تفطر وتتغدى كمان ب٢ يورو في اليوم
اكتر المصاريف الي بنخاف منها واحنا مسافرين هى مصاريف الاكل، خصوصا بلاد غالية زي اوروبا. خصوصا بعض بلاد اوروبا الغربية غالية جدا في الاكل بتاعها، علشان كدة لازم نتعلم ازاي نوفر واحنا مسافرين.
الاقامة في هوستل او شقة هتساعدك، عشان هيكون فيها مطبخ وادوات مطبخ تقدر تستخدمها، لكن الاقامة في فندق مش هيكون عندك غير تلاجة، اذا كانت موجودة. مش كل الفنادق فيها. لازم تتأكد.
الحل بسيط وموفر جدا جدا ….. اول ما توصل اي مدينة، تنزل على السوبر ماركت تشتري شوية بقالة تعمل بيها سندوتشات علشان تفطر وتتغدى بيها كمان. انا لما وصلت فلورانس، اشتريت عيش وجبنة ولانشون حلال وخضار بحوالي ٦ يورو. كنت انا وواحد صاحبي، كل واحد دفع ٣ يورو. عندك السوبر ماركت مليان اختيارات مختلفة، والاسعار بتختلف من بلد للتاني طبعا. لكن الاسعار دي في ايطاليا، يعني بلد مش رخيصة.
عملوا معانا حوالي ١٠ ساندوتشات. يعني الساندوتش بحوالي 0.60 من اليورو.
تلاجة اي هوستل بتكون مليانة اكل بتاع كل الناس الي في الهوستل، كل واحد حاطط حاجته في كيس او علبة بلاستيك في التلاجة وكاتب عليها اسمه علشان محدش ياكل منها. غير ان في ناس بتسيب اكل كتير وهي ماشية، بيحطوه في تلاجة لوحده ومكتوب عليها FREE
تلاجة الهوستل بتكون مليانة اشياء خاصة بالنزلاء
فطار وغذاء ب٢ يورو
تفطر ساندوتشين (1.2 يورو) ، وتاخد معاك واحد تتغدى بيه في نص اليوم (0.6 يورو)، وتشتري صباع موز من اي بتاع فاكهة بحوالي (0.5 يورو) – يبقى اليوم قفل معاك فطار وغذاء بحوالي (2.3 يورو) … لو حضرتك روحت اي مطعم تفطر، مش هتلاقي اقل من ٣ يورو الساندوتش. طبعا مش محتاج افكرك، معاك ازازة المية الفاضية تملاها من حنفيات والنوافير العمومية – شوفوني في فيديوهاتي، بشرب من النوافير طول النهار.
في اخر اليوم بتاعك ممكن تاكل العشاء الساخن الي تحبه من اي مطعم، والي سعره هيختلف من مكان للتاني – ٥ يورو ساندوتش دونر كباب مثلا، حتتين بيزا ب٥ يورو – طبق مكرونة ب٦-٧ يورو …. على حسب بقى البلد الي انت فيها.
لو عايز توفر اكتر، تجيب كيس مكرونة تسلقه، مع برطمان صلصة، شوية خضار وتعمل سلطة، وكيس هوت دوج او برجر، وعيش حياتك في المطبخ ……. بجد هتستغرب ازاي المطبخ بتاع الهوستل بيكون عامل زي خلية النحل بالليل. روايح الاكل بتنبعث من كل مكان. معظم الهوستلز فيها حلل وصواني للطبيخ، وبهارات اساسية وزيت وخل كمان.
المقالة الجاية هتكون عن الاكل الحلال، علشان عارف الموضوع بيعمل مشكلة لناس كتير وهي مسافرة.
شير بقى المقالة علشان كله يستفيد ويقدر يسافر بالرخيص.