29
Oct-2016

ازاي الاقي اكل حلال وانا مسافر؟

photostudio_1477504350115

احد اكبر المخاوف الي بنبقى شايلين همها واحنا مسافرين اي مكان في العالم، هنلاقي ازاي وفين اكل حلال؟ خلونا نتفق الاول ان اغلبنا هيختلف في تفسير كلمة “الحلال”، كل واحد على حسب درجة التزامه وتفسيره للآوامر والنواهي.

١- تجنب لحم الخنزير بسهولة

نبدأ باول حاجة مش عليها اختلاف، لحم الخنزير. ازاي نتجنب اكل لحم الخنزير في كل بلد نروحها؟

دخلت مطعم، جاتلك المنيو، مكتوبة بلغة محلية او انجليزية. وريتكم ازاي في مقالة قبل كدة ازاي نترجم المنيو بتطبيقات الموبايل. ترجمت المنيو، يبقى هتختار لحمة او فراخ او سمك، لكن في حاجة ناقصة؟

لازم بعد ما تختار اي حاجة تتأكد ان الاكل لا يحتوي على اي مشتقات من لحم الخنزير. احيانا بيكون الصوص مثلا بتاع اللحمة او الفراخ معمول بالبيكون او السجق. ممكن يكون العيش متقطع عليه حتت بيكون صغيرة اوي اوي (بعض شاندوتشات ماكدونالدز). حصلت معايا في سلوفانيا، اشتريت ستيك مشوي وكان معاه صوص حلو جدا، بعد ما خلصته اكتشفت انه كان بالسجق pork.

بعض محلات الهامبورجر، او اللحمة المفرومة المستخدمة في الاكل، احيانا بتكون اللحمة بقري ومفروم معاها لحم خنزير (beef & pork mix ).

يبقي بعد ما تختار حاجة تأكد على الجرسون ” No Pork”. لو مكنش فاهم بالانجليزي، يبقى انت قبل ما تسافر، تدخل على جوجل وتترجم كلمة No Pork و Without Pork الى لغة البلد الي انت مسافرها. دي مثلا الترجمة الى اللغة التشيكية:

no-pork-translatin

طيب هل اللحمة او

الفراخ دي مدبوحة حلال؟؟

٢- ازاي تلاقي مطاعم اكل حلال

الموضوع مش موضوع لحم خنزير ولا لحمة بقري، الموضوع بالنسبة لي هل الحمة او الفراخ دي مدبوحة حلال؟ على الشريعة الاسلامية؟

 في مطاعم كتير في اوروبا واسيا، وخاصة العواصم والبلاد السياحية الكبيرة، تقدم اكل حلال للسياح المسلمين من كل بقاع الارض. يوجد مجازر ومزارع تذبح على الطريقة الاسلامية وتورد لحوم حلال الى هذه المطاعم. ازاي نلاقي المحلات الحلال دي؟

يوجد عدة تطبيقات موبايل دلوقتي فيها دليل للمطاعم عامة، من الممكن اختيار Filters معينة بالمطاعم الحلال. اللينك ده فيه قائمة باشهر التطبيقات الي ممكن تنزلوها قبل السفر. يوجد كمان تطبيقات ممكن تستخدمها في السوبرماركت، تعمل Scan Bar Code والتطبيق يقولك هل الاكل ده حلال ولا لأ.  

halal-food-apps

ملحوظة: بعض المحلات بتكون غير امينة وبتبيع اي لحمة وتكتب  “Halal Food”. لان اللحمة المذبوحة “حلال” عادة اغلى في السعر. (الكلام ده سمعته من واحد مصري عنده عربية حلال فوود في نيويورك.)

٣- الخمور المستخدمة في الاكل

احيانا بعض المطاعم بتستخدم النبيذ الابيض او الاحمر في تسوية بعض الاكل ولاضافة طعم مختلف. يوجد اكتر من رآي في الموضوع ده:

– ناس بتحرمه تماما من باب اختلاط الحلال بالحرام. يبقى ساعتها لازم تكون مترجم كمان باستخدام جوجل “No Alchol in Food” بلغة البلد الي انت رايحها، علشان تكون معاك قي ضهر الورقة الي مكتوب عليها “بدون لحم خنزير”.

– في ناس تانية، انا منهم بصراحة، بشوف ان حرارة الطبخ بتبخر الكحول الموجود في النبيذ، ولا يتبقى منه الا النكهة فقط. انتفى اذن سبب تحريمه، بسبب عدم وجود مادة مسكرة في الاكل.

 

اخيرا … إِلَّا مَا اضْطُرِرْتُمْ إِلَيْهِ

طيب لو ملقتش محلات حلال قريبة، او غالية، او اكلها وحش، نعمل ايه؟؟ نيجي بقى دلوقتي الى تفسير الايه الكريمة ” إِلَّا مَا اضْطُرِرْتُمْ إِلَيْهِ “. حيث اني مسافر وزائر سريع للبلد، لا اعيش فيها، انا بشوف نفسي في حكم “عابر السبيل” المضطر. اكل من اللحوم او الفراخ من المحلات العادية، سواء مدبوحة حلال او مدبوحة غير حلال. آسمي الله على الاكل وبآكل. ده رأيي الشخصي في الموضوع. لاني احيانا لا اجد مطاعم حلال، او معنديش وقت ادور عليها، وفي نفس الوقت لا استطيع اكون انسان نباتي اعيش على الاجبان والخضار والفاكهة. الصراحة حلوة مفيش كلام.

غير بقى لو انا مقيم في البلد, بكون عرفت المحلات والجزارات الحلال علشان اجيب منها الاكل بتاعي.

 لو عندكم اي اقتراحات او افكار، ياريت تكتبوها في التعليقات، ولكن بدون سجالات فقهية كتيرة لو سمحتم.

11

 likes / 13 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec