25
Oct-2016

جواز السفر ضاع وانت مسافر، هتعمل ايه؟

photostudio_1477401888717

كنت اتكلمت في مقالة قبل كدة عن تعليمات الآمان العشرة للحفاظ على فلوسك وانت مسافر، دلوقتي بقى خلينا نتكلم احتياطات الامان لجواز السفر. طبعا مش محتاج اولا أأكد عليك ان جواز السفر ده اكتر حاجة تحافظ عليها بعد شرفك وفلوسك وانت مسافر. لانه لو ضاع، فعلا هتكون حاجة مقرفة جدا.المصيبة الاكبر كمان لو كان في سفريات كتيرة قبل كدة وتاشيرات.

صورة و SCAN لجواز السفر وجميع صفحاته

اول حاجة تعملها بعد ما تقرأ المقالة دي، هي انك تاخد جوازات السفر بتاعتك القديمة والحديثة كلها، وتصور كل الصفحات الي فيها وتعملها سكان وتشيلها  cloud storgae بتاعتك في اي حتة. انا عندي ملفااااات PDF فيها اكتر من مائة تاشيرة ومئات الاختام، كلهم شايلهم على google drive بتاعي علشان لو جوازات السفر ضاعت لاي سبب، يكون عندي نسخة من تاريخي. اقدر اطبعها من اي مكان في حالة التقديم على اي تأشيرة في اي مكان.

ما هي استخدامات جواز السفر وانت مسافر؟

  • اول يوم السفر وانت مسافر طبعا، من اول ما تدخل المطار لحد ما توصل مطار الوصول النهائي

  • اول ما توصل مكان اقامتك في الفندق او الهوستل

  • لو هتركب اتوبيس بين مدينة واخرى (في اوروبا) بيحتاجوا يشوفوا اثبات شخصية علشان يتأكد من اسمك والتذكرة. او طبعا لو هتعبر حدود بلدين محتاجين تاشيرتين مختلفتين.

  • اخر يوم في الرحلة في مطار الرجوع لحد ما توصل مطار بلدك

خلال بقى رحلتك، هل في اي داعي اني امشي بجواز السفر في الشارع؟

في اغلب الاحيان، لا يوجد اي داعي لحمل جواز السفر معاك في اي حتة وانت مسافر جو اي بلد. اول ما توصل محل اقامتك، تخبي جواز السفر في مكان ثابت في شنطتك، وتطلعه في حالتين فقط اثناء السفر: تغيير محل اقامتك من فندق الى اخر او ركوب مواصلات بين اي مدينتين/دولتين اذا طلب منك.

سيبه في محل اقامتك …. محدش عايز يسرقه والله!!! انا عايز اعرف مين الحزين الي عايز يسرق جواز سفر مصري مثلا؟؟؟ لا تقلق، هو ليس بمطمع لاي حرامي او اي كائن على وجه الارض.

يبقى جواز سفرك يفضل في محل اقامتك، خبيه في الشنطة واقفل عليه بمفتاح لو قلقان اوي يعني …. يعني امشي من غير اي اثبات شخصية كده؟؟

انصحك تمشي فقط بصورة من اول صفحة في جواز السفر وتاشيرة البلد الي انت فيها – صورة ملونة وش وضهر، وغلفها بلاستيك قبل ما تسافر، وخليها في جيبك. هي دي الي تخرج بيها كل يوم. لا تخرج يوميا بجواز السفر …. ملوش لازمة خااااالص.

احنا علشان متعقدين من الحملات الامنية والكماين في وطنا العزيز، متخيلين ان باقي دول العالم بتعمل كده. مفيش اي حد وانت ماشي في الشارع هيقولك هات بطاقتك ولا وريني جواز سفرك او تاشيرتك. الا حالات نادرة جدا او طبعا لو عملت مخالفة ما في مكان ما وطلب منك البوليس اظهار جواز سفرك. انا بقالي ١٠ سنين بسافر، لم يطلب مني حواز السفر بدون اي داعي في اي مكان، الا مرة واحدة القى القبض عليا البوليس الافغاني وانا في هرات في افغانستان علشان كنت بصور في مكان بدون تصريح، وبعتوا معايا عسكري الفندق جبت جواز السفر وروحنا كملنا التحقيق في المديرية 🙂

ايه الحالات الاخرى الي بيكون مطلوب منك جواز السفر او اثبات شخصية، هل لازم الاصل ولا الصورة تكفي؟

اوروبا واسيا

– بعض اماكن السهرات في اوروبا، ممنوعة لمن اقل من ١٨ او ٢١ سنة، ممكن موظف الامن بتاع اي مكان يطلب منك تحقيق شخصية لو شاكك ان سنك تحت السن القانوني. ممكن يكتفي انه يشوف صورة من تحقيق الشخصية.  صورة جواز السفر كفاية.

– عند القيام بعمل تسوق بمبالغ كبيرة بالكريديت كارد، قد يطلب منك الكاشير اثبات شخصية بالانجليزي عليه اسم زي الي على البطاقة البنكية المستخدمة، علشان يتأكد انها مش مسروقة. حصلت معايا في بعض الاماكن في اوروبا، ايام ما كنت غني بقى وبعمل شوبينج كتير كل سفرية. احيانا بيقبلوا اي صورة  تحقيق شخصية مكتوب بالانجليزي. مرة في Zara  مدريد قبلوا مني كارنية الغطس كاثبات شخصية. يعني صورة جواز السفر كافية جدا.


must-be-21-to-enter-sign-in-front-of-bar-usa-etkj97

امريكا

– لو شعرك ابيض وسنانك واقعة ووشك مليان تجاعيد وعمرك فوق ال٧٠ سنة، وداخل اي بار او كلوب في امريكا، هيطلبوا منك في اغلب الاوقات يشوفوا تحقيق شخصية اصلي يقبت انك فوق السن القانوني. انا ضاعت عليا حفلة جباااارة في ميامي علشان روحت من غير جواز السفر. لم يبقلوا الرخصة علشان كانت لا توضح السن.

– لو  هتشتري خمور من اي محل في امريكا، بيطلبوا يشوفوا تحقيق شخصية اصلي يثبت انك فوق ٢١ سنة برضو. للاسف حصلت معايا وان في تكساس وكان مستضيفي ٢٠ سنة وطلب مني اساعده في “الجريمة” دي.

no-kids-sign-bars

– احيانا في امريكا برضو بيطلبوا تحقيق شخصية اثناء التسوق بالكريديت كارد، او بيطلبوا كارت تاني مكتوب عليه نفس الاسم. يعني لو معاك كارت visa وكارت اخر Master، والاتنين باسمك، ممكن ده يكون اثبات كافي ان الكروت دي بتاعتك، وبيتنازلوا عن رؤية تحقيق شخصية.

– لو عملت اي مخالفة طبعا في اي مكان ما، اتمسكت من غير تذكرة مترو مثلا في اوروبا، بيكون مطلوب منك جواز السفر والتاشيرة طبعا. خليهم يبعتوا معاك امين شرطة علشان تجيبهم من الفندق وقتها بقى.

كل ده بنعمله علشان محدش مغسل وضامن جنة. محدش ضامن عدم ضياع جواز السفر اثناء الرحلة. محدش ضامن طبعا انه ما يتسرقش لا قدر الله. شنطة تضيع مثلا. حاجات كتير في علم الغيب، وياما رحلات باظت بسبب ضياع الباسبور. أأنم مكان اذا هو خزنة غرفة الفندق او الهوستل، او في امانات الفندق او الهوستل.

طيب لا قدر الله، لو تعرضت لحادثة سرقة وضاع جواز السفر بتاعك، ايه العمل؟؟

  • تعمل محضر في اقرب قسم شرطة في المدينة الي ضاع فيها الباسبور

  • تتوجه على اقرب قنصلية/سفارة لاستخراج وثيقة سفر، يكون معاك صورة شخصية، صورة المحضر، صورة جواز السفر. ممكن تاخد عدة ساعات او يومين تلاتة، على حسب وضوح موقفك من التجنيد.

  • تقدر تسافر بوثيقة السفر من اي مطار في العالم علشان ترجع بلدك، لانها بديل عن جواز السفر.

الي حصل معاه الموقف ده يا جماعة يا ريت يشاركنا تجربته علشان نتعلم منها كلنا.

15

 likes / 3 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec