16
Jun-2016

ايه العلاقة بين السفر والحب او الارتباط؟

travel vs love

واحد من أغرب الأسئلة الي جاتلي في الصفحة … “هو فعلا السفر أحسن من الارتباط والحب والجواز والكلام ده؟” … انا مش فاهم فين السؤال؟ هو فين وجة المقارنة مش عارف؟ هل السفر والحب والارتباط حاجتين عكس بعض اصلا؟؟؟

نرجع تاني للبوستات الجميلة الي على النت لتحميس الشباب للسفر، الي في أغلبها بتكون عاطفية حماسية ملهاش ماسكة كدة … ترفع شعار انه *** ** اي حاجة تانية في الحياة وساااااافر …. مع هاش تاج‫#‏سافر_وانسى_الدنيا_والي_خلفوها‬ …. مش بالدراع يا اخوانا، الموضوع موضوع ان الحياة اولويات، والي بتختلف من حياة واحد للتاني ومن ظروف واحد للتاني! السؤال المفروض ما يعملش مقارنة سطحية بين حاجتين مهمين في حياتنا، السؤال المفروض يكون عن الأولويات في مراحل حياتنا المهمة؟ هل المفروض اسافر الاول واتفسح ولا احوش كل مليم معايا علشان الحب والجواز ومصاريف الجواز والشقة وكدة؟

——— ( ١ ) ———
سنجل

أنا شخصيا مع ان السفر ده من أحلى متع الدنيا الي ممكن تتعمل، لانه طبعا تجربة انسانية جميلة في حياة اي انسان مننا. والتجربة دي كل ما كانت بدري كل ما كانت احسن. زي تطعيمات الاطفال كدة، ليها اوقات معينة وهم صغيريين، بعد كدة تأثيرها بيكون اخف كتير. لما تسافر وانت صغير، وتعيش تجارب سفر مفيدة، أكيد هتكتشف حاجات جديدة عن حياتك و عن نفسك. هتتعامل مع الدنيا بعد كدة بشكل مختلف و هتفرق في شخصيتك جدا جدا كل ما تسافر اكتر وتبعد عن مكان معيشتك وتقابل ناس ماتعرفهاش ولا تعرفك.

حضرتك لو انت طالب في الجامعة …. وكان قدامك انك تختار السفر قبل الحب والارتباط … يبقى انت اخدت احسن قرار لو اجلت فكرة الارتباط شوية. عندك مشوار طويل بعد التخرج للبحث عن الوظيفة وتكوين الذات. لو امكانياتك المادية تسمح وانت طالب، اكيد انصحك انك تحاول تسافر سفرية ولا اتنين في الفترة دي من حياتك قبل ما التزاماتك الوظيفية المادية العاطفية تعوقك، وخصوصا السفر التطوعي مثلا، الي يعتبر ارخص طريقة للسفر لمدة شهر ولا اتنين. كل حاجة عن الموضوع ده في المقالة دي.  goo.gl/mCjtNa ….

يبقى سافر وانت صغير قبل ما تبدأ في رحلة رومانسية في حياتك العاطفية …. مش وقته خاااالص.

لو اتخرجت وبدأت شغل …. وكان قدامك انك تختار السفر قبل الحب والارتباط … يبقى انت اخدت احسن قرار لو اخترت السفر. هتقدر بكل بساطة انك تحوش جزء من مرتبك كل شهر للسفر في اجازاتك السنوية … اتفرج على الدنيا وعيش مغامرات حلوة تفضل فاكرها العمر كله. السفر ده قيمته زي قيمة اي حاجة مادية انت عايز تشتريها.

مش من الضروري من وانت صغير انك تسحل/تدبس/تعك/تحبس نفسك في اقساط شقة تمليك هتستلمها بعد سنين وسنين، علشان تكون مستعد للجواز وتبهر نسايبك وكدة …. صحاب ليا كتير مش عارفين يسافروا في اي حتة بسبب الاقساط الي عمالين يدفعوها بقالهم سنين … ولا اتجوزوا ولا سافروا …. أرجوك آجل الاستثمار في الشقة لقدام شوية. للأسف العادات الاجتماعية العقيمة بتاعتنا بتتطلب استثمارات عقارية جبارة علشان تقدر تتجوز، والي عمرها ما كانت سبب نجاح اي علاقة. التجارب الانسانية الحياتية اغلى واثمن كتير من شوية اسمنت وطوب بصراحة. طبعا اهالينا بيشوفوا ان السفر شئ مالوش قيمة للأسف لو هنقارنه بالاستثمار العقاري، لكن القرار قرارك انت.

سافر شوية واتفرج على الدنيا ما دام لسه سنجل، مصاريف السفر هتكون أرخص كتير وأسهل. مش علشان هتكون مصاريف فرد ولا فردين، علشان مستوى السفرية هيختلف لو مسافر لوحدك او مع مراتك. لو لوحدك، تقدر تتصعلك براحتك، تبات في اي حتة وتركب اي حاجة. لو معاك المدام، الموضوع هيكون مختلف.

لو عندك ارتباطات عاطفية ذات مشاريع جواز وشيكة، ليه هيكون عندك مشكلة في السفر براحتك؟ لأنك هتكون دايما مضطر تقدم الاسباب والاعذار وتطلب المباركات علشان تقدر تسافر سفرية مع صحابك، وتصرف فيها فلوس “كتير” (حتى لو مسافر budget)، بدل ما تحوش الفلوس دي علشان جوازنا، فرحنا، شقتنا، الخ الخ ….. وحتحط نفسك في مواقف بايخة واسئلة ابوخ: “هتتبسط وانت مسافر بعيد عني؟”.

——— ( ٢ ) ———
خاطب / متزوج حديثا

لو انت حاطط الجواز والاستقرار اولوية في حياتك قبل ما تسافر. او مش عايز تسافر لوحدك ونفسك تتفرج على الدنيا مع نصك التاني وتعيشوا لحظات رومانيسة حلوة وتعملوا ذكريات جميلة مع بعض تفتكروها العمر كله … حقك واتفق معاك ١٠٠٪

لو انت خاطب وداخل على مشروع الجواز بكل عزيمة، هقولك على كلمتين مهمين:

– بلاش تعمل فرح كبير عريض بفلوس كتيرة، وخلي فلوسك اعملوا بيها شهر عسل حلو …. لو عرفت تقنع حبيبتك بكدة، يبقى برافو عليك.

– بلاش اول ما تتجوز تخلف على طول. طبعا في اسباب اجتماعية مادية كتير تخليك تأجل فكرة الخلفة شوية. بس السفر مع مراتك وانتوا لسه من غير عيال هيكون اسهل وأحلى بكتييييييييييير. هتعرفوا تتفسحوا بجد، تعيشوا مغامرات حلوة، تخرجوا تسهروا براحتكم. اجلوا الخلفة سنتين تلاتة علشان تعرفوا تسافروا وتشوفوا الدنيا سوا.

مش عارف ايه الحكمة اني اخلف عيال بدري علشان افرح بيهم وبعيالهم. ليه عايزين نفرح بأكثر من دوره حياة. ما نفرح بعيالنا وخلاص.

——— ( ٣ ) ———
متجوز ومخلف

لو انت ضد موضوع تأجيل الخلفة لاي اسباب اجتماعية عائلية، وعايز تخلف على طول، او لو انت بالفعل عندك اطفال دلوقتي، هقولك على حاجتين مهمين:

– لو عايز تسافر مع مراتك برة، انصحك تسافر من غير عيال (تحت٦ سنين). اتصرف. سيب الواد عند امك او حماتك او اختك. عودهم على كدة من هم صغيرين علشان تستريح بعد كدة. ده اقتراح يعني. قسم اجازاتك السنوية. تلت لوحدك مع مراتك، والتلتين والعيال معاكوا.

لو عايز تاخدهم معاك برة وتفسحهم وكدة، براحتك طبعا. بس حابب ابشرك ان السفرية دي مش هتكون فارقة مع العيال في اي حاجة. وانت مش هتتبسط فيها على الاطلاق.

لو أخدت عيالك الي عندهم ٣ سنين او ٥ سنين وفسحتهم في ديزني لاند باريس، هيكون بالنسبة لهم زي ملاهي السندباد بالزبط. لو وديتهم يصيفوا في شواطئ ماليزيا، هيكون بالنسبة ليهم زي شواطئ العجمي والساحل. الادراك عن الاطفال والتفرقة في السن ده منعدمة غالبا. اي فسحة بالنسبة ليهم هتكون حلوة. وذاكرتهم كمان مش هتفتكر السفريات دي خالص لما يكبروا. مش قبل ما يكملوا ٦ او ٧ سنين ممكن يسافروا برة ويقدروا يدركوا انهم سافروا مكان جديد ومختلف.

لو مفيش صرفة في العيال للأسف، سافر بيهم لما يكونوا كبروا شوية علشان يقدورا الفسحة والفلوس الي هتصرفها في السفرية وفعلا تقدر تتفسح معاهم وتقضوا وقت حلو. انا بكون سعيد جدا وانا مسافر مع بنتي، خصوصا لما وصلت عمر ٦ سنين، احلى سفرياتي على الاطلاق معاها. حسيت فعلا بالفرق بين ما سافرت وهي عندها ٣ سنين و ٦ سنين. فرق كبير.

علشان كدة نصيحتي هي السفر قبل الخلفة، لأنه موال صعب وطويل ومعقد، وقبل الجواز والارتباط لانه هيكون اسهل.

حابب اسمع آراكم في الموضوع واقتراحتكم وتجاربكم … وهعدل البوست كل شوية لو محتاج تعديل لاني كتبته في عُجالة 🙂

4

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec