30
Nov-2016

photostudio_1480522281609

ناس كتير بتخاف تسافر اوروبا في الشتاء علشان اسباب كتير متعلقة بحالة الطقس …. برد – مطر – تلج – ضباب

لكن احيانا السفر الى اوروبا بيكون ليه متعة خاصة في الشتاء، خصوصا مع الثلج، الي احنا مش واخدين عليه في معظم بلادنا العربية. احب اقولكم انه بجد من احلى الاجواء الي عيشتها اوروبا هي اوقات الخريف، لما تكون كل الاشجار الوانها متنوعة – اصفر برتقالي ذهبي بني – وكمان اوقات الشتاء لما تكون درجة الحرارة صفر او اقل، والدنيا تمطر تلج بدلا من مية. ساعتها بتكون درجة الحرارة صفر او تحت الصفر بحاجة بسيطة، وبيكون لسه الجو يحتمل للخروج.

مميزات السفر في الشتاء هي ان اسعار الطيران والاقامة بتكون ارخص علشان هي مواسم غير مزدحمة (باستثناء الكريسماس ورأس السنة)، لكن اكبر المساوئ هى الامطار والضباب للأسف. لكن التلج بصراحة من امتع اللحظات في اوروبا. كنت مسافر من يومين من سلوفاكيا الى التشيك، وكان الطريق كله تلج ومقدرتش اشيل عيني من عليه من حلاوة منظره.

لو محتار تسافر امتى وفين، المقالة دي فيها احسن خطوات علشان تعرف احسن جو في اي مكان.

اول زيارة ليا في الشتاء الى اوروبا كنت فعلا محتاس ومش عارف البس ايه واخد ايه معايا وانا رايح. خلوني اقولكم سريعا كدة ايه اهم حاجات تكون معاك في سفريتك الاوروبية في الشتاء:

١- الكلسون – ولامؤخذة

طبعا الكلسون المصري الاصيل هو اول حاجة تكون في شنطتك وانت رايح اوروبا. في منه قطن وصوف وانواع ودرجات مختلفة. قطعة فوق وقطعة تحت. نا شخصيا مش معايا بنطلون، لاني مش ناوي اطلع جبال باردة او اطلع دول اسكندنافية.

 Thermal underwears  وده الاسم الافرنجي للكلسون. هتلاقيه في Marks & Spensers بيتباع بالقطعة وليه درجات كمان. يعني ايه درجات؟ هتلاقيه غالبا ٣ درجات من البرودة – Light Medium Heavy علشان يتناسب مع درجات الحرارة الي انت رايحها. في منهم الكم وفي منهم النص كم كمان.

٢- ملابس شتوية كتيرة؟

مش لازم شنطتك تكون متخمة بالبلوفرات والملابس الشتوية الكتيرة.  فوق الكلسون/Thermal ييجي بقى واحد سويتشرت خفيف + بلوفر او سويتشيرت تقيل – وفوقيهم الجاكيت. انا شخصيا معايا ٣ سويتشيرت وبلوفر واحد فقط، لان الجاكيت بيغطي كل حاجة في الاخر، ومش هتفرق لابس ايه تحتهم.

الصراحة انا معايا Thermal نص كم فقط وفوقيها سويتشيرت وجاكيت او سويتشيرت وبلوفر وجاكيت – التوليفة دي على حسب درجة حرارة البلد الي انت فيها. بتفضل تلعب في الطبقات براحتك علشان توصل لمرحلة الدفئ الي تريحك، المهم في الاخر الجاكيت فوقيهم.

٣- T-Shirts نص كم

تحت اي حاجة مما ذكرت فوق دي، البس تيشيرت نص كم او فانلة داخلية نص كم؟ مش غريبة نص كم في الشتاء؟؟ انا شخصيا بلبس الفنلات النص كم اول حاجة وفوقيها اي طبقات لبس تانية. ليه بقى؟ علشان لما تدخل اي مطعم، بيت، هوستل، اتوبيس او قطر (مسافر مثلا) – الجو بيكون دافئ جدا ومش بتحتاج تكون لابس غير حاجة نص كم وخلاص. انا شخصيا بقلع كل حاجة اول ما ادخل واقعد بالنص كم وبعدين البسهم تاني وانا خارج.

ثانيا علشان هيكون معاك كلسون او Thermal واحد بالكتير او اتنين في السفرية – (انا شخصيا مش معايا غير ٣ سويتشيرت) – فالافضل تلبس تحتيهم تيشيرت تعرق فيه مباشرة ويكون زي حاجز يمتص العرق بتاعك. وتقدر تلبس لبسك الشتوي اكتر من يوم من غير ما تحتاج تغسلهم. لكن التيشرتات امرها سهل وخفيفة. او فانلات داخلية نص كم. كل واحد وعلى حسب ما متعود وبيحب 🙂

من الاخر يعني، اعمل زي ما تعمل في مصر يعني علشان تلبس اللبس اطول فترة ممكنة من غير ما يتغسل 🙂

٤- طاقية شتوية

او زي ما بنسميها ice cap علشان دماغك طبعا. مهمة جدا في الشتاء في اوروبا. هتلاقوني لابسها في معظم فيديوهاتي الشتوية. مهم انها تكون مغطية ودنك كمان.

٥- جوانتي تاتش؟

صوابع اليد طبعا لازم تكون متدفية كويس في الشتاء. بس اكبر مشاكلي في لبس الجوانتي هي استخدام الموبايل، لحد ما اكتشفت جوانتي بتاع H&M بيشتغل مع التليفونات التاتش بتاعتنا. لو مش موجود في مصر، اشتريه اول ما توصل اوروبا من اي محل. بحوالي ٤ يورو.

٦- تطبيق لحالة الطقس (اسبوعي/يومي/كل ساعة)؟

طبعا لازم تشوف توقعات الطقس لاي بلد انت مسافرها كل يوم قبل السفر، لان التوقعات بتتغير كل شوية ومدى صحتها بيكون اعلى كل ما ميعاد الرحلة يقترب. ليه بقى؟ علشان تقدر تخطط برنامج الرحلة بتاعتك طبقا للتوقعات دي. يعني ماتروحش ديزني لاند باريس في يوم فيه توقعات بالامطار ولا تدخل متحف اللوفر في يوم مشمس. دلوقتي في تطبيقات محمول كتيرة مهمة بتديك توقعات الطقس باليوم وبالساعة

٧- شمسية ولا مشمع مطرة؟

مهم جدا تكون معاك شمسية صغيرة في جيبك او شنتطك علشان المطرة. شوف توقعات الطقس على تليفونك كل يوم قبل ما تنام واول ما تصحى علشان تعرف هل في امطار النهاردة ولا مفيش، وتتفادى شيل الشمسية في جيبك من غير لازمة. شوف توقعات الجو بالساعة مش باليوم.

في اختراع لطيف في اوروبا عامل زي المشمع كدة، بتطلعه تلبسه على جسمك لما الدنا تمطر. شئ يرجعلك. لو مش عايز نقطة مية تلمس هدومك، ممكن المشمع يكون حل لطيف وسهل في الحدكة تحت المطرة.

٨- شرابات قصيرة ولا طويلة؟

انا شخصيا معايا تشكيلة من الشرابات القصيرة والطويلة، ومعنديش مشكلة في الجو البارد العادي بالشرابات القصيرة. (حتى ناقص ٥ مثلا).في حالة الجو البارد جدا، شرابات طويلة افضل. لو طالع جبل عليه طبقات تلج كتير، خد معاك شرابين علشان لو الجزمة بتاعتك امتصت مية والشراب اصبح مبلول، وانت نازل تغيره وتلبس شراب جديد. حصل معايا كدة لما طلعت جبال الالب جنب ميونيخ.

لما كنا في اعالي جبال جورجيا ديسمبر ٢٠١٦، كان معايا بعض الاصدقاء لابسين ٣ و ٤ شرابات فوق بعض. صوابع الرجلين بتبقى اكبر مشكلة علشان الدورة الدموية بتوصلها بصعوبة. هات شرابات thermal او صوف كمان لو رايح مناطق درجة حرارتها تحت الصفر بكتير( -18 الي -10 ). تنفس بعمق. داوم على الحركة علشان تدفى. انا شخصيا كنت بجري وبنط في المكان علشان كنت لابس شراب واحد 🙂

٩- جزمة عادية ولا بووت؟

انا شخصيا معايا جزمة عادية كوتشي ماشي بيها وزي الفل، حتى لما بتدخل مية في المطرة، بتكون مش مأساة اوي بصراحة. مش لازم بووت وشيلة كبيرة يعني. قصدي يعني مش لازم تشتري جزمة مخصوص لو انت جاي اوروبا في الشتاء في زيارة عادية مش رايح تطلع جبال علشان هتكون محتاج جزمة خاصة.

 لو طالع جبل عليه طبقات تلج كتير، توقع الجزمة هتتبل جامد لو عادية وهتمتص مية كتير. حصلت معايا في سويسرا وكنت مضطر اقضي ربع ساعة في الحمام انشف الجزمة في dryer بتاع الحمام علشان اقدر البسها تاني. يبقى ممكن تجيب حاجة مخصوص للتلج، بس جهز نفسك لرقم محترم لانها هتكون غالية.

١٠- كوفية

لازم يكون معاك كوفية صوف تقيلة شوية او خفيفة علشان الرقبة والقفا كمان 🙂 ….  دي مهمة جدا وهتحتاجها في نوفمبر ديسمبر وانت طالح لحد مارس ابريل.

اكتر حاجة سخيفة ايه بقى؟

كل ما تدخل اي مطعم، بار، متحف، او اي مكان indoor ، بتقلع بقى كل الكلام ده وتعلقه في حته او على الكرسي بتاعك، وبعدين بتلبسه تاني وانت خارج. انا وبنتي سافرنا باريس وجنيف في يناير ٢٠١٥ وكنا بنلبس جميع الطبقات دي في جميع الخروجات بتاعتنا. الشئ المؤلم هو وقت دخول او خروج م اي مكان مقفول، بتقعد تقلع وتلبس حاجات كتير اوي كل مرة.

يا ريت تطردوا الافكار الغريبة بتاعت تغيير الجو من سخن لساقع هيجيب لنا المرض ونزلات شعبية وكدة. الناس في اوروبا عايشيين بقالهم الاف السنين وشغالين زي الفل ومعندهمش امراض مزمنة من الدخول والخروج من جو ساقع الى سخن كل شوية. على حسب معلوماتي الطبية المحدودة، المشكلة هي ان الدخول من ساقع الى سخن او العكس بينزل مستويات المناعة في جسم الانسان، فانت لو في مكان مليان اوبئة، احتمالات انك تمرض بتكون اعلى من المعتاد. لكن الاجواء لا تقطنها الاوبئة والامراض الحمدلله. بقالى في شتاء اوروبا اكتر من شهرين وربنا كارمني بالصحة والحمدلله.

6

 likes / 0 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec