18
Jun-2016

٣ خطوات لعمل برنامج رحلتك لوحدك

NEAPOLITAN (2) copy

من أهم أركان نجاح أي رحلة هو برنامجها وخطتها. بعد ما تكون حوشت فلوس و أجازات علشان تسافر، بتبقى عايز تستغل كل دقيقة في الرحلة احسن استغلال في اكتشاف البلد الي انت رايحها ومش عايز تضيع لحظة من غير متعة. في المقالة دي هقولكم على ٣ خطوات مفصلة ازاي ممكن نعمل برنامج رحلة لوحدنا.

هنوزع الثلاثة خطوات على ثلاثة مستويات، وهنتبع استراتيجية التخطيط “ من الأعلى الى الأسفل” … top-down approach ، هنبتدي الاول بالقارة/المنطقة الي هنزورها، بعد كدة ننزل لمستوى كل دولة في المنطقة، وبعدين ندخل على كل مدينة داخل كل الدولة.

البعض مننا بيكون عنده اجازة اسبوعين تلاتة، وعايز يزور اكتر من بلد في طلعة واحدة. طلعت تاشيرة اوروبا بالعافية ونفسك تزور اكتر من بلد اوروبية. حجزت تذكرة طيران غالية وركبت طيارة ١٥ ساعة لحد جنوب شرق اسيا، عايز تزور بلدين تلاتة في الزيارة تحلل المشوار الطويل ده …. الاسئلة الي محتاج ليها اجابات:

– ايه الدول الي ممكن ازورها؟
– ايه المدن الي ازورها في كل دولة؟
– ايه الزيارات الي اعملها في كل مدينة؟

——————————————————————————
المستوى الاول …. المنطقة/القارة:

اول حاجة تعملها انك تفتح خرائط جوجل وتتفرج على الجغرافيا الخاصة بالنطقة الي عايز تزورها. اوروبا مثلا، هتلاقي البرتغال جنبها اسبانيا فوقيها فرنسا ….. فرنسا لازق فيها بلجيكا، وفوقيا هولندا ….. المانيا جنبها بولندا والتشيك …. وهكذا. ممكن تخطط رحلتك لاكتر من دولة جنب بعض، وده طبعا علشان توفر فلوس مواصلات وتستخدم الاتوبيسات في التنقل من دولة للتانية.

ممكن برضوا تخطط رحلة ٣ او ٤ دول مش لازقين في بعض، وتستخدم طيران داخلي في اوروبا، لكن طبعا هيكون اغلى شوية من الاتوبيسات، خصوصا لو معاك شنطة. التذكرة ممكن تكون ب٣٠ يورو و الشنطة ب٥٠ يورور مثلا …. (الفرخة بنص جنية والقفص فاضي ب١٥ جنية)

هتلاقي في اسيا سنغافورة فوقيها ماليزيا وتايلاند ….. فيتنام جنبها لاوس وكمبوديا …. تعرف على جغرافية المنطقة كويس علشان تطلع بأفكار لرحلتك و تقدر تقدر المسافات بين كل بلد والتانية.

————————————————————————————————-

المستوى الثاني …. الدولة:

المستوى ده ممكن يكون سهل وبسيط اوي لما تكون عارف العواصم او المدن الرئيسية انت عايز تزورها في كل دولة. يعني مثلا انا لما سافرت فرنسا روحت باريس، لما سافرت هولندا ماروحتش غير امستردام، والمجر كذلك، زرت فقط العاصمة بودابيست …. وكفى الله المؤمنين شر القتال.

لكن لما قررت اقضي اجازتي كلها في اكتشاف بلد كبيرة ومتنوعة زي اسبانيا، ايطاليا، غانا، تركيا، ايران …. كان لازم ادرس كل دولة بمزاج واتعرف على اماكن المدن المهمة لكل واحدة. طبعا خرائط جوجل بتكون المفتاح الاول للتعرف على اي بلد، بس بكون تايه ومش عارف ايه أحلى المدن الي اشوفها في كل بلد. لحد ما عرفت كلمة السر الي اقدر استخدمها على Google Search …. الا وهي كلمة itinerary …. خطة السفر.

ليه نقعد نخترع خطط سفر اتعملت واتهرست ١٠٠ مرة قبل كدة. شركات سياحة و مدونات سفر كتير بتنزل برامج سياحية كتير جدا لرحلاتها على الانترنت. مثلا لما سافرت ايران، سألت جوجل من غير اي كسوف والله google search : 3 weeks itinerary in Iran ….. جوجل طلع لي عشرات وعشرات النتائج من مواقع شركات سياحية كتيرة جدا. فضلت اقرا كذا واحدة لحد ما عملت البرنامج والخطة بتاعتي.

اتعب نفسك شوية معلش و اعمل google search واستخدم الكلمة السحرية itinerary + المدة + اسم البلد …. وهتلاقي برامج كتير جدا لكل بلد. بجانب الطريقة الجوجلية دي، ممكن تجربوا الثلاثة مواقع دول مع بعض:

Rough Guides – 1

ده موقع بيعمل كتب ارشادية للسفر لوجهات كتيرة اوي، ولكن بيقدم حاجات مجانية كتيرة على صفحته. لما تفتح اي دولة على الموقع، هتلاقيه عامل itineraries لكل بلد. (خطط سفر). هتلاقيه بيقترح عليك خطط مختلفة لمناطق و اهتمامات مختلفة. شوفوا الامثلة دي:

الهند: هتلاقي على الموقع ٦ خطط للسفر. خطة في الجنوب، الساحل الغربي، الوسط، الهيمالايا، وهكذا. كل خطة مرسومة بلون على الخريطة ومكتوب على الجنب نبذة عن كل مدينة في الخطة دي. http://goo.gl/qQx1H2

تايلاند: هتلاقي على الموقع ٣ خطط للسفر. خطة للانشطة outdoors، خطة للي بيحبوا الاكل Foodie، والثالثة لأحسن الجزر التالاندية. http://goo.gl/xpXU7U

طبعا كل المدن والخطط دي بتكون مقترحة. بس منها بتقدر تعرف ايه هي اهم المدن السياحية الي تقدر تزورها في كل دولة. ممكن تاخد من كل بستان زهرة، وتعمل خطة على مزاجك. تبدأ بالعاصمة مثلا، مع احلى مكان للانشطة، مع احلى مكان للاكل، مع احلى جزيرة.

Trip Masters – 2

دي شركة سياحة بتعمل برامج لا حصر لها في كل حتة في العالم. بتدخل على كل دولة عندهم، وهتلاقي suggested itineraries كتيرة جدا لكل بلد. عندك اندونيسيا لوحدها عاملين ليها ٢٣ خطة سفر مع دول اخرى كمان حواليهاhttp://goo.gl/R2eXzH

Trip Advisor – 3

لما تدور عليه على دولة معينة، هيقترح عليك اهم المدن الي ممكن تزورها في الدولة دي، واهم الحاجات الي لازم تعملها في كل دولة.

تجول بين الثلاثة مواقع براحتك لحد ما تكون عرفت ايه أشهر خطط سفر لكل دولة من الدول الي انت عايز تزورها. ساعتها تقدر ترسم الخطة بتاعتك الي تتناسب مع طبيعة رحلتك. لو رايح شهر عسل وعايز جزر وبحر وجو رومانسي، ولا مسافر بالعيال وامهم وعايز تفسحهم وتركبهم الافيال، ولا مسافرة مع صحباتك تعملوا شوبينج وتتسلقوا الجبال؟ ولا مسافر مع واحد صاحبك تصيعوا في الكراخانات (جمع كراخانة هههههههه).

—————————————————————————————————–

المستوى الثالث …. المدينة:

بعد ما عرفت خطة سفرك بين اكتر من دولة في قارة واحدة، وقررت itinerary بتاعتك جوه كل دولة هتكون ايه، دلوقتي بقى نوصل للمستوى الأخير الي هتقابل فيه الوحش. اقعد قد ايه في كل مدينة و اعمل فيها ايه؟ بعض خطط السفر الي لقيتها في المستوى الثاني بتكون مقترحة ايام الرحلة يوم بيوم … ٥ ايام في المدينة دي، ٣ ايام في الجزيرة دي و هكذا.

لازم طبعا تكون مقرر هتقعد كام يوم في كل مدينة علشان تقدر تزبط حجوزات الاقامة في كل مدينة والمواصلات بين كل مدينتين. ده بيعتمد في الاساس على حجم كل مدينة وكمية الزيارات الي ممكن تعملها في كل مدينة. يعني باريس عايزة ٥ ايام على الاقل، امستردام ٣ ايام،روما ٣ ايام، بروكسيل يومين، وهكذا.

(لو محتار ومش عارف تقرر. هقولكم الأول على الطريقة الجوجلية …. اعمل بحث عن how many days to spend in “ CITY”?I ….. واكتب اسم المدينة الي انت عايزها. هتلاقي السؤال اتسأل أكتر من ١٠٠ مرة على النت، وهتلاقي اجابات كتيرة تساعدك تاخد القرار.)

بعد ما قررت عدد الايام في كل مدينة هتكون قد ايه، عندنا طرق كتيرة نقدر نعمل بيها برنامج للرحلة بتاعتنا داخل كل مدينة. هنبدأ بالطريقة الجوجلية بردو google search: Paris in 5 days …. Amsterdam in 3 days

هتلاقي مدونات سفر و برامج لشركات سياحية عاملة برنامج مفصل لكل مدينة، وما عليك الا انك تنتقل من مكان للتاني بالمواصلات الداخلية.

بعد ما اخدت فكرة عامة، تقدر تستخدم المواقع المتخصصة دي، والي ليها mobile applications كمان علشان تستخدمها على تليفونك وانت مسافر:

visitacity.com – 1

موقع لطيف جدا، بتحدد ليه المدينة الي انت عايز تروحها والمدة الي هتقعدها في المدينة دي، وهو هيعملك برنامج سياحي لاهم الحاجات الي تشوفها وتزورها في كل مدينة. وهكون حاطط ليك الزيارات القريبة من بعضها مع بعض.بيعمل حساب المواصلات بين الزيارة والتانية وبيقولك كمان هتحتاج وقت قد ايه في كل زيارة.

(يعني هيقولك زور في القاهرة أهرامات الجيزة وسقارة ودهشور والصوت والضوء مثلا في يوم واحد. فاهم مش حافظ يعني. مش هيقولك زور الاهرامات والقلعة والحسين والمتحف المصري في يوم واحد مثلا.)

Stay.com – 2

موقع آخر لطيف لعمل برنامج سياحي لزيارة اي مدينة انت عايزها. تقدر تعمل برنامج خاص بيك، وتقدر كمان تحمل برامج سياحية مستخدمين آخرين عملوها قبل كدة.

Trip Advisor – 3

الموقع الاشهر طبعا، هيقولك كل الانشطة الي ممكن تتعمل في اي مدينة في الدنيا، ومترتبين على حسب اهميتهم. ممكن تتعرف على الحاجات الي تتعمل في كل مدينة على حسب نوعيتها. زيارات تاريخية، حدائق مشهورة، متاحف، جولات سياحية، أحياء سكنية وسياحية. اتفرج على الحاجات الكتير الي ممكن تتعمل في كل مدينة، واقرأ الريفيوهات الي ناس زارتها عملتها عن المكان.

لكن خد بالك لان احيانا كتيرة بيكون الموقع “قابض” علشان يرتب حاجات قبل حاجات. لا تنخدع بالترتيب الي الموقع بيعمله. مثال عندك العاصمة التايلاندية بانكوك، هتلاقي اهم تالت حاجة من أصل ٤٦٩ حاجة تتعمل في بانكوك، هي محلات الهدايا وتفصيل البدل ؟!؟!؟!؟؟! علشان كدة انا بحب اعتمد على المدونات blogs اكتر، لانها بتكون تجارب شخصية وأقل تحيزا من المواقع الكبيرة.

(بعد ما تكون اتفرجت على كل مدينة وعرفت ايه الي ممكن يتعمل فيها، ولقيت في اي لحظة ان في مدينة قد تحتاج منك وقت اكتر من الي انت محدده، ارجع وزع ايام رحلتك مرة تانية على المدن المختلفة في رحلتك)
——————————————————————————————————–

PLAN YOUR NIGHT LIFE IN EVERY CITY

من أهم الحاجات الي محتاجة تعملها تخطيط مسبق في أي بلد هي Night Life … الموضوع محتاج مقالة كاملة اقولكم فيه عن الموضوع باستفاضة. بس نصيحة سريعة دلوقتي، لو انت بتحب السهرات وكدة، لازم تدور كويس قبل ما تسافر وتعرف نظام نايت لايف في كل مدينة ايه, مناطقها وعنوانيها ومواعيدها. مثال بسيط مثلا، مدينة ميونخ الالمانية خلال ايام الاسبوع (مش الويك اند يعني) بالعافية تلاقي مكان تشرب فيه ازازة كازوزة حتى، على العكس مدينة برلين مثلا، فيها اماكن كتيرة شغالة طول ايام الاسبوع، مع ارتفاع ملحوظ في درجة حرارة النايت لايف في الويك اند.

—————————————————————————————————-

Lonely Planet BOOKS

وأخيرا …. أشهر كتب السفر على الاطلاق هو Lonely Planet …. هتلاقي كتاب لكل قارة ومنطقة ودولة ومدينة حول العالم … تفاصيل اشهر خطط الرحلات في اوروبا وآسيا مثلا، أشهر مدن تزورها في كل دولة، أهم الزيارات الي تعملها. بيعمل كمان نصائح بخصوص الفنادق، المطاعم، السهرات. ده كان الجوجل بتاع الناس زمان. مكتوب فيه كل صغيرة وكبيرة عن البلد. لما كنت في ايران مثلا، كان معايا نسخة ورقية من الكتاب علشان اعرف كل التفاصيل الي عايز اعرفها وانا على الطريق. ناس كتير لسه بتستخدم الكتب الورقية لحد دلوقتي. ممكن تشتروه اوتنزلوه PDF من مواقع كتير على النت.

<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>

الخلاصة: مفيش موقع واحد يقولك الزتونة بتاعت البلد في ٣ اسطر، ولا برشامة فيها الاجابة النموذجية. لو عايز تتفسح وتتبسط بالشكل الي يناسبك ويناسب ميزانيتك، يبقى زي ما هتستثمر فلوس في الرحلة، لازم تستثمر وقت ومجهود في البحث على الانترنت علشان تعمل برنامج ممتع لرحلتك.

<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>

لجحز ارخص تذاكر طيران، فنادق او هوستل، معلومات عن التاشيرات, مواصلات بين المدن، نصائح بخصوص التوفير في المزارات السياحية، نصائح عن الميزانية والنقود والبنوك ونصائح الآمان …. الرجاء زيارة الموقع لقراءة المقالات ومشاهدة الفيديوهات …. http://goo.gl/EdlfoM

لو وصلت لآخر المقالة، يبقى انت بطل فعلا … لو عندك اسئلة بعد تصفح الموقع، تواصل معايا مباشرة على السنابشات … الاسرع والاسهل … وهرد عليك بسرعة، علشان فيه voice notes …. لحد ما عم مارك يحن علينا ويعمل voice notes في صفحات الفيسبوك.

8

 likes / 5 Comments
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec