18
Mar-2017

محرجة بس مفيدة – مشاكل الحمام في السفر

بعد مقالة الصدمات الحضارية الي هتحصلك لما تروح فنادق اوروبا، جائتني الكثير من التخوفات بخصوص الصدمة الرابعة، الحمام. قد تبدوا المقالة دي محرجة و”مقرفة” من الناحية النظرية، لكن من الناحية العملية مهمة جدا وبتجيب على تخوفات الناس بتقلق منها. دي مواقف كتير انا اتعرضت ليها شخصيا وحبيت اقولكم تعملوا ايه فيها لما تحصل ليكم  …. الجيش قالك اتصررررف 🙂

للأسف ناس كتير ما سافرتش قبل كدة ماتعرفش ان معظم بلاد العالم لا يوجد بها شطافات! …. ايوة يا جماعة والله. الشطافة اختراع اسلامي-عربي-آسيوي في الاساس. موجود في اغلب الدول العربية والاسلامية وبعض الاسيوية (امثلة: الهند، كوريا، اليابان) … اومال الناس بتعمل ايه في اوروبا وامريكا وباقى دول العالم؟  ….  غير كدة بتدخل الحمام في اي حتة وهتلاقي بكرة مناديل فقط.

يعني الناس برة مش بتتشطف؟؟ والله الموضوع ليه اكتر من نظرية لا اعلم مدى صحة اي منهم. في ناس بتدخل الحمام مرة واحدة الصبح وبعدين تستحمى وفي ناس بتكتفي بالمناديل وبيكتفوا بيها للنظافة، لكن احنا كمسلمين وعرب لازم نستخدم مية لاسباب متعلقة بالطهارة وثقافة النظافة.

الشطافة المحمولة

من كان سنة كدة شركة اسمها fresh buzz اخترعوا شطافة محمولة تملاها مية وتستخدمها بعد استخدام الحمام. بصراحة دي لازم تكون اول حاجة في شنطة السفر بتاعتي بعد جواز السفر، لان الحياة بدونها بالنسبة لي مستحيلة. متوفرة للبيع بالصيدليات الكبرى في القاهرة والاسكندرية واكيد متوفرة للبيع اونلاين.

مواعيد ثابتة

من واقع خبرتي، علشان تريح نفسك، حاول قبل السفر باسبوعين تلاتة، تزبط مواعيدك تكون الصبح اول ما تصحى. تخلص امورك وتنزل تقضي يومك في اكتشاف المدينة الي بتزورها وعمل البرنامج السياحي بتاعك براحتك. لان لو مواعيدك مش مزبوطة، هتكون مضطر انك تاخد معاك الشطافة في شنطة ايدك او الهاندباج بتاعتك في كل حتة وده شئ مزعج.

ممكن ما تلاقيش مية كفاية

طيب ماشي، شيلتها معاك طول اليوم واتزنقت. هتستخدم اي حمام في اي مطعم او كافية وانت خارج، بس المشكلة في ايه بقى، انك ممكن تلاقي حمام ومش معاه حوض في نفس المكان. حمامات كتير بتكون كدة. تواليت فقط بدون حوض معاه. الحل ايه؟؟ انك هتملى الشطافة من حوض الحمام برة وتدخل. ممتاز. فين المشكلة بقى؟ …. المشكلة ان ممكن المية تخلص وانت في نص السكة ….  الحل ممكن ازازة مية او تقمص دور السباك وتفتح غطاء السيفون وتملى من الميه الي فيه. طيب لو السيفون مدفون في الحيطة؟؟ معاك ربنا بقي 🙂

اتدرب على ندرة المياة

مطلوب من حضرتك قبل السفر انك كمان تدرب على انهاء العملية كلها بتعقيداتها بنص لتر مية. علشان احيانا كتيرة هتكون مضطر لاستخدام كمية صغيرة. حاجة كمان لو بتحتاج كميات مياة كتير لانهاء العملية على اكمل وجة، مطلوب منك كمان تاكل الياف كتير، زي الخس والورقيات الاخرى، علشان بتكون مُلين طبيعي لمساعدتك على الانجاز باقل مياة ممكنة.

لو مش معايا شطافة

في كذا مدرسة في الموضوع ده:

١- يكون معاك مناديل مبللة wipes بتاعت الاطفال دي، واستخدمها قدر ما تشاء لنيل النتائج المرجوة.

٢- استخدام زجاجة مية للتشطيف.  لكن للأسف هتكمن المشكلة في ان اتجاه المياة من اعلى لاسفل، هتحتاج تدخل “جراحي” من حضرتك علشان تقدر تستخدم الطريقة دي (اتدرب في البيت بقى قبل ما تسافر وشوف هتعملها من انهي اتجاه).

٣- مناديل كتير من الحمام – تبلها مية وتتعامل.

الحالات الحرجة تحتاج خرطوم

بعض الناس عندها مشكلة في القولون وامساك مزمن وتحتاج شطافة مياة قوية لانهاء العملية بنجاح وبتستخدم دفع المياة القوية كحقنة شرجية. تعمل ايه؟ في الحالة دي، انا عندي واحد صاحبي بيعاني من المشكلة دي وبيحلها عن طريق انه بيسافر معاه خرطوم مياة طويل، بيوصله بحنفية الحمام ويربطه بأفيز فيها، ويفتح المية ويكمل المهمة بنجاح. ماتخليش حاجة تمنعك من السفر.

خرطوم الدش

هتكون محظوظ لو حمام الفندق بتاعك بجوار البانيو على طول والدش الي فيه سماعة. ناس كتير بتفك سماعة الدش وتستخدم خرطوم الدش كشطافة.

حمامات بلدي

قد تفاجئ ان بعض البلاد فيها حمامات بلدي مش افرنجي اصلا …. فعلا؟ فين؟ … انا شوفتها كتير في بعض القرى الصغيرة في اوروبا … ايطاليا اسبانيا جورجيا مثلا. بعض البلاد بقى مافيهاش اصلا غير حمامات بلدي زي ايران وافغانستان، ٩٠٪ من الحمامات الي شوفتها بلدي.

اختراع لطيف للبنات

انا طبعا معنديش خبرة في امور البنات، بس انا شوفت اختراع بناتي جامد جدا اسمه Go Girl يتيح ليها قضاء الحاجة في اي وقت وحين بكل سهولة ويسر زي الرجالة. اصدقاء جربوه واثنوا عليه ثناء كثيرا الصراحة.  لا حياء في العلم لا حياء في الدين لا حياء في اشياء تسهل المعيشة. شوفتها بتتباع زمان في on the run … محتاج تدريب برضو اكيد.

 الخلاصة …. الجيش قالك اتصرف … ودي بعض التصرفات 🙂

4

 likes / One comment
Share this post:

Archives

> <
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec
Jan Feb Mar Apr May Jun Jul Aug Sep Oct Nov Dec